Naa na Unyay Kalinaw sa Tibuok Kalibotan

Ang tanan gustong mabuhi sa kalibotan nga naay kalinaw. Sulod sa libolibo na ka tuig, ang mga lider sa kalibotan naningkamot nga taposon ang mga panag-away ug gubat. Usahay, ang ilang mga paningkamot moresultag kalinaw. Pero temporaryo lang ni kay sagad mobalik ang mga panag-away. Moabot ba gyod ang panahon nga magmalinawon ang kalibotan? Oo! Susiha kon unsay atong makat-onan gikan kang Jesus.

Ang himoon ni Jesus

Gipakita sa Bibliya kon unsay hapit nang himoon ni Jesus aron magmalinawon ang kalibotan.

• “[Si Jesus] tawgong . . . Prinsipe sa Pakigdait. Ang iyang pagmando padayong molambo ug ang pakigdait walay kataposan.” (Isaias 9:6, 7) Kay si Jesus man ang Magmamando sa Gingharian sa Diyos, himoon niyang malinawon ang kalibotan hangtod sa hangtod.

• “Luwason niya ang kabos nga nagtuaw alang sa tabang . . . ug si bisan kinsa nga walay magtatabang.” (Salmo 72:12-14) Gamiton ni Jesus ang iyang awtoridad aron mahatagan ug tinuod nga hustisya ang katawhan. Tungod niini, matapos na ang tanang gubat, kapintasan, ug pag-antos.

• “Ang nasod dili mobakyaw ug espada batok sa laing nasod, ug sila dili na magkat-on sa pagpakiggubat.” (Isaias 2:4) Dihang magmando na si Jesus, ang tanang tawo magkat-on kon unsaon pagpakigdait imbes nga makiggubat.

Aron masayran kon unsay himoon ni Jesus aron mahimong malinawon ang kalibotan ug kon unsay imong himoon aron makapuyo ka niana nga kalibotan, tan-awa ang mubong video nga Unsa ang Gingharian sa Diyos?

Ang gitudlo ni Jesus

Bisan karon, ang mga pagtulon-an ni Jesus nagtabang sa minilyong tawo sa pagkinabuhing malinawon. Sa iyang ilado nga Wali sa Bukid, si Jesus nagtudlog mga prinsipyo nga makatabang sa mga tawo sa pagpakigdait diha sa ilang adlaw-adlawng pagkinabuhi. Niay pipila ka pananglitan.

• “Malipayon ang mga makigdaiton.” (Mateo 5:9) Gidasig ni Jesus ang iyang mga sumusunod nga dili lang kay basta likayan ang pagpakig-away kondili kanunay sab nga maningkamot nga mamentinar ang kalinaw.

• “Pakigdait una sa imong igsoon ug human niana, balik ug ihalad ang imong gasa.” (Mateo 5:23, 24) Gidasig ni Jesus ang iyang mga mamiminaw nga husayon dayon ang mga dili pagsinabtanay. Siya nagtudlo nga kinahanglan tang makigdait sa uban aron naa tay maayong relasyon sa Diyos.

• “Ayaw na panghukom aron dili mo hukman.” (Mateo 7:1) Si Jesus nagpasidaan nga dili ta angayng manghukom o mahimong hinawayon sa uban kay posible ning moresultag panag-away. Imbes mangitag sayop, si Jesus nagtudlo nato nga ‘padayong magpasaylo’ sa uban.—Lucas 6:37.

Sa tibuok kalibotan, naay mga tawo nga nagpadapat sa mga pagtulon-an ni Jesus, bisan kadtong nagpuyo sa mga lugar nga kaylap ang kapintasan o panag-away. Nagkat-on sila kon unsaon pagsulbad ang mga dili pagsinabtanay, kon unsaon pagpasaylo, ug kon unsaon pagpakitag gugma bisan pag ang uban dili maayog pagtratar nila.

Aron makakat-on kon sa unsang paagi ang mga pagtulon-an ni Jesus nakatabang sa uban nga makabaton ug kalinaw, basaha ang artikulo nga “Makabaton Kag Kalinaw Bisan pa sa Gubat ug Panag-away.”