Ang Kapintasan Dili mao ang Solusyon

Daghang tawo karon ang nagtuo nga ang kapintasan maoy solusyon dihang naay mga dili pagsinabtanay o problema. Pero dili na mao ang atong makat-onan sa mga gitudlo ug sa ehemplo ni Jesus. Konsideraha ang pipila sa iyang mga gisulti ug gihimo.

Ang gisulti ni Jesus

Sa iyang ilado nga Wali sa Bukid, gitudlo ni Jesus nga ang kasuko, pagpakig-away, ug pagkabayolente dili gyod mao ang solusyon sa mga dili pagsinabtanay. Niay pipila ka pananglitan.

• “Buhata sa uban ang tanan nga gusto ninyong buhaton nila kaninyo.” (Mateo 7:12; Lucas 6:31) Kini nga tambag, nga nailhan pod ingong ang Bulawanong Lagda,a nagdasig nato nga trataron ang uban base sa kon unsay gusto nato nga pagtratar nila kanato. Ug kay wala may usa nato nga gusto ug pintas nga pagtratar, dili ba angay lang nga trataron nato ang tanan nga may pagtahod ug pagkabuotan—bisan tingalig dili ta uyon sa ilang mga opinyon?

• “Si bisan kinsa nga mosagpa sa imong tuo nga aping, itahan usab kaniya ang pikas.” (Mateo 5:38, 39; Lucas 6:29) Si Jesus wala magtudlo nga dapiton nato ang uban sa pagdaogdaog nato. Hinuon, iyang gitul-id ang sayop nga panghunahuna nga gitudlo sa pipila ka lider sa relihiyon—nga wala ray sayop sa pagpanimalos. Gisultihan niya ang iyang mga sumusunod nga dili sila angayng mobalos, kondili magpakita gihapon ug pagkabuotan bisan dihang himoan ug daotan.b

• “Padayon sa paghigugma sa inyong mga kaaway.” (Mateo 5:43, 44; Lucas 6:27) Si Jesus nagtudlo nga angay tang magpakitag pagkabuotan ngadto sa mga nagdumot o dili maayog pagtratar kanato. Wala siya magpasabot nga mouyon ta sa ilang dili maayong binuhatan.c Kon atong pakitaan ug kaayo kadtong mga nagdumot nato, basig mawala ra ang ilang kasuko ug mapalihok pa gani sila nga pakitaan pod tag kaayo.

Ang gihimo ug himoon ni Jesus

Si Jesus nagtudlo nga ang kapintasan dili gyod mao ang solusyon—ug kana pod ang atong makita nga iyang gihimo. Sa gabii nga gidakop siya, ang usa sa iyang mga sumusunod nakig-away aron depensahan siya, pero si Jesus miingon: “Ibalik ang imong espada sa sakoban, kay ang tanang mogamit sa espada mamatay sa espada.” (Mateo 26:52) Si Jesus nagpakitag gugma sa iyang mga kaaway pinaagi sa pagpasaylo niadtong mga mibuhat ug daotan niya. Giampo pa gani niya sila!—Lucas 23:33, 34; 1 Pedro 2:23.

Ang Bibliya nagsaad nga si Jesus—ang Prinsipe sa Pakigdait—magtapos sa tanang kapintasan nga atong makita karon. (Isaias 9:6, 7) Para sa dugang impormasyon bahin niining nindot kaayo nga kaugmaon, basaha ang artikulo nga “Sa Unsang Paagi Matapos ang Gubat ug Panag-away?.”