Ipakita ang Lawom nga Pagsabot Aron Molampos Ka

1-2. Unsa ang lawom nga pagsabot, ug sa unsang paagi ni makatabang nato?

MIBATI na ba ka sukad nga morag wala ka tahora? Nakasulay pod ba ka nga nasaypan kag sabot? O diha bay panahon nga nahadlok o nabalaka kaayo ka? Kon mao, nahibalo gyod seguro ka kon unsa ka lisod nga himoon kon unsay maayo sa ingon ani nga mga kahimtang. Pero naay gihisgotan ang Bibliya nga makatabang nato: ang lawom nga pagsabot.

² Ang lawom nga pagsabot makatabang nato nga mas masabtan ang kahimtang—pananglitan, kon nganong nahitabo ang usa ka butang o kon ngano kahang nakasulti o nakahimog dili maayo nato ang usa ka tawo. Tungod ana, mas mahibalo ta kon unsay angayng himoon. Pananglitan, makatabang ni nato nga mag-amping sa atong isulti o mahibalo kon kanus-a ta angayng maghilom. (Sal. 4:4; Prov. 10:19) Makatabang pod ni nato nga pugngan ang atong kasuko ug palabyon ang sayop sa uban. Mas sayon pod para nato ang pagdawat ug tambag o disiplina kon naa tay lawom nga pagsabot. (Prov. 19:20) Kon ato ning ipakita pinaagi sa atong sinultihan ug binuhatan, mapalipay nato si Jehova ug makahatag nig kaayohan nato ug sa uban. Makatabang ni ilabina sa mga situwasyon diin lisod tingaling pugngan ang atong kalagot o kasuko. Busa atong hisgotan ang tulo ka estorya sa Bibliya nga nagpakita kon sa unsang paagi ang lawom nga pagsabot makatabang nato nga magpabiling mapainubsanon, kalmado, ug padayong mosalig kang Jehova.

MAHIMONG MAPAINUBSANON, DILI GARBOSO

3. Kinsa si Naaman?

³ Aron maatubang ang lisod nga mga situwasyon, kinahanglang mapainubsanon ta ug likayan ang pagkahimong garboso. (1 Ped. 5:5) Ang lawom nga pagsabot makatabang nato sa paghimo ana. Sa unsang paagi? Hunahunaa ang pananglitan ni Naaman. Nagpuyo siya sa Sirya, usa ka nasod nga nahimutang sa amihanan sa Israel. Si Naaman ilado kaayo nga tawo kay siya ang pangulo sa kasundalohan sa Sirya. Pero nag-antos siya sa sanla, usa ka grabe kaayong sakit sa panit.—2 Hari 5:1.

4. Giunsa pagpakita ni Naaman ang maayong pagsabot?

⁴ Ang asawa ni Naaman naay sulugoon nga batang babaye nga Israelinhon. Giingnan sa bata ang asawa ni Naaman nga naay propeta sa Israel nga makaayo sa sakit sa iyang bana. (2 Hari 5:​2, 3) Puwede untang maghunahuna si Naaman, ‘Kasaligan ba gyod kaha ang giingon aning bataa nga sulugoon ra man ni siya ug gikan pa gyod sa kaawayng nasod?’ Pero wala to himoa ni Naaman. Hinuon, nagpakita siyag maayong pagsabot. Nagpaubos siya ug iyang giseryoso ang giingon sa bata imbes nga balewalaon ra ni. Busa nananghid si Naaman sa hari sa Sirya nga moadto siya sa Israel aron maulian sa iyang sakit.—2 Hari 5:​4, 5.

5. Unsay nahitabo kang Naaman dihang miabot siya sa Israel?

⁵ Si Naaman miabot sa palasyo ni Haring Jehoram sa Israel, ug naglaom siya nga maulian sa iyang sakit. Pero nagtuo si Jehoram nga gipadala sa hari sa Sirya si Naaman aron lang mangitag away. Pagkadungog ni propetang Eliseo bahin ani, iyang gihangyo si Jehoram nga paadtoon si Naaman kaniya. (2 Hari 5:​6-9) Siyempre, nagdahom si Naaman nga magkita sila ni Eliseo. Pero lahi ang nahitabo. Wala makig-atubang o makig-estorya si Eliseo kaniya. Igo rang gipadala ni Eliseo ang iyang mensahero aron sultihan si Naaman kon unsay kinahanglan niyang himoon aron maulian.—2 Hari 5:10.

6. (a) Ngano kahang natandog ang garbo ni Naaman sa giingon sa mensahero? (b) Giunsa pagpakita sa mga sulugoon ni Naaman ang lawom nga pagsabot, ug unsay resulta? (2 Hari 5:​13, 14)

⁶ Sa primero, dili maayo ang reaksiyon ni Naaman sa giingon sa mensahero. Gani, siya “mibiya nga nasuko pag-ayo.” (2 Hari 5:​11, 12) Ngano? Tingali mibati siya nga wala siya tahora, nga kon buot hunahunaon, taas baya siyag ranggo. Ug tungod tingali sa gipahimo ni Eliseo, naghunahuna si Naaman nga nakamenos si Eliseo sa Sirya. Bisag unsa pa may hinungdan, nakadesisyon si Naaman nga mouli na lang, bahalag dili siya maulian. Pero ang iyang mga sulugoon nagpakitag lawom nga pagsabot. Ila siyang gihangyo nga hunahunaog balik ang iyang desisyon. Busa gitulon ni Naaman ang iyang garbo ug mapainubsanong gisunod ang gipahimo ni Eliseo. Ingong resulta, naulian siya!—Basaha ang 2 Hari 5:​13, 14.

7. Unsay atong makat-onan sa nahitabo kang Naaman? (Proverbio 22:4) (Tan-awa sab ang mga hulagway.)

⁷ Unsay atong makat-onan? Makapakita tag lawom nga pagsabot kon dili dayon ta maghunahunag negatibo bahin sa usa ka tawo o kahimtang base lang sa atong nakita o nadungog. Makapakita pod tag lawom nga pagsabot kon dili ta magpadaog sa atong emosyon. Hinuon, magpaubos ta. Atong dawaton nga wala ta mahibalo sa tanan ug nga nagkinahanglan tag tabang sa uban, ilabina kang Jehova. Bisan pag si Naaman wala pa magsimba kang Jehova niadtong panahona, nagpakita siyag maayong pagsabot kay mapainubsanon siyang naminaw sa uban: sa Israelinhong batang babaye, sa iyang mga sulugoon, ug labaw sa tanan, sa representante ni Jehova nga si Eliseo. Bisag nasakitan si Naaman ug natandog ang iyang garbo, wala siya magpadaog niana. Hinuon, mihimo siyag maalamong desisyon nga miresulta sa iyang kaayohan. Sa atong bahin, dihang makadawat tag tambag nga wala kaayo ta kauyon o instruksiyon nga wala kaayo ta kasabot, kinahanglang mamalandong una ta sa dili pa mo-react. Puwede natong pangutan-on ang atong kaugalingon, ‘Ang ako bang planong isulti o himoon nagpakita nga mapainubsanon ko o garboso?’—Basaha ang Proverbio 22:4.

MAGPABILING KALMADO, AYAWG KASUKO

8. Nganong lisod usahay nga magpabiling kalmado?

⁸ Ang lawom nga pagsabot makatabang nato nga magpabiling kalmado ug dili dayon masuko bisan pa sa makapalagot nga mga situwasyon. Ang tinuod, dili ni kanunayng sayon, ilabina kon naa gyod tay rason nga masuko kay gisultihan o gihimoan tag dili maayo sa uban. (Efe. 4:26 ug study note nga “Be wrathful”) Karon atong konsiderahon ang usa ka pananglitan kon giunsa pagpakita ni David ug Abigail ang lawom nga pagsabot.

9. Giunsa pagtratar ni Nabal si David?

⁹ Imadyina ang nahitabo: Si David ug ang iyang mga tawo nagtagotago sa kamingawan sa Paran. (1 Sam. 25:1) Samtang tua sila didto, ilang giprotektahan ang mga magbalantayg karnero ug ang kahayopan sa datong tawo nga si Nabal. (1 Sam. 25:​15, 16) Dihang ting-alot na sa mga karnero, si David nagpadalag mga mensahero ngadto kang Nabal aron mangomosta niya ug mapainubsanong mangayog bisan unsa nga iyang ikahatag. (1 Sam. 25:​6-8) Pero wala gyoy apresasyon si Nabal sa tanang gihimo ni David ug sa iyang mga tawo para niya. Wala niya ihatag ang gihangyo ni David, ug iya pa gani silang giinsulto.—1 Sam. 25:​10, 11.

10. Giunsa pagpakita ni David ug Abigail ang lawom nga pagsabot? (1 Samuel 25:​32, 33) (Tan-awa sab ang hulagway.)

¹⁰ Kon ikaw ang naa sa kahimtang ni David, unsa kahay imong bation? Tingali masuko pod ka parehas niya. Dili ikatingala ang reaksiyon ni David kay sagad ipakita gyod niya kon unsay tinuod niyang gibati, ug niadtong higayona, suko kaayo siya. Gani tungod sa iyang kasuko, nagpaingon na siya aron patyon si Nabal. (1 Sam. 25:​13, 21, 22) Pero gisugat siya sa maalamong asawa ni Nabal nga si Abigail. Giunsa pagpakita ni Abigail ang lawom nga pagsabot? Gihinumdoman ni Abigail nga maayong tawo si David bisan pa sa iyang reaksiyon, maong gitabangan niya si David nga mokalma ug mapugngan ang iyang kasuko. Gidad-an niya si David ug daghang regalo ug mapainubsanong gitambagan. (1 Sam. 25:​18, 23-31) Kon bahin kang David, nagpakita pod siyag lawom nga pagsabot kay naminaw siya sa tambag ni Abigail. Iyang giila nga gikan to kang Jehova. Ingong resulta, mikalma si David ug nalikayan niya ang paghimog grabeng sala.—Basaha ang 1 Samuel 25:​32, 33.

11. Sa unsang paagi ang lawom nga pagsabot makatabang dihang naay makapasuko nato? (Proverbio 19:11)

¹¹ Unsay atong makat-onan? Kon naa tay lawom nga pagsabot, mas sayon para nato ang pagpabiling kalmado bisag naa unta tay rason nga masuko. Makatabang ni nato nga hunahunaon kon unsa kahay epekto sa atong mga isulti o buhaton. (Basaha ang Proverbio 19:11.) Dihang napahinumdoman si David bahin sa panghunahuna ni Jehova, nakatabang to niya nga makontrol ang iyang emosyon. Sa samang paagi, kon naay makapasuko o makapalagot nimo, likayi nga mo-react dayon. (Sant. 1:19) Hinuon, pag-ampo kang Jehova ug hunahunaa kon unsa kahay gusto niya nga imong buhaton. Makatabang na nimo nga mokalma.

12. Sa unsang paagi ang uban makatabang nato nga magpakitag lawom nga pagsabot ug magpabiling kalmado?

¹² Sama nga gigamit ni Jehova si Abigail sa pagtabang kang David, puwede pod niyang gamiton ang uban sa pagtabang nato nga makapakitag lawom nga pagsabot. Maong imbes nga mo-react dayon dihang naay makapalagot nimo, maayong makig-estorya una ka sa usa ka hamtong nga Kristohanon, kinsa makatabang nimo nga hunahunaon pag-ayo ang kahimtang imbes nga magpokus lang sa imong gibati. (Prov. 12:15; 20:18) Sa laing bahin, kon naa kay higala nga naglagot o nasuko, puwede nimong sundogon si Abigail. Tabangi ang imong higala nga makita kon unsay panglantaw ni Jehova sa kahimtang. Seguradong panalanginan gyod ni Jehova ang imong mga paningkamot nga tabangan ang uban nga magpakitag lawom nga pagsabot ug magpabiling kalmado.

SALIG KANG JEHOVA IMBES MAHADLOK

13. Nganong ang lawom nga pagsabot makatabang nato nga dili madaog sa atong kahadlok?

¹³ Usahay makaatubang tag mga situwasyon nga makapahadlok nato. Pero makatabang gihapon ang lawom nga pagsabot, kay pinaagi ani mapahinumdoman ta nga bisag unsa pa ka makapahadlok ang kahimtang, mas gamhanan gihapon si Jehova. (Sal. 27:1) Kaya ta niyang tabangan sa bisan unsang situwasyon, bisan sa lisod nga mga kahimtang nga morag wala na tay kapaingnan. Mao ni ang usa sa mga leksiyon nga atong makat-onan sa kinabuhi ni propetang Jonas. Bisag lig-on na siyag espirituwalidad, kinahanglan pa siyang mouswag sa pagpakitag lawom nga pagsabot aron molampos siya sa iyang lisod nga asaynment.

14. Ngano kahang nahadlok si Jonas sa asaynment nga gihatag ni Jehova kaniya?

¹⁴ Gihatagan ni Jehova si Jonas ug kulba kaayo nga asaynment: gipaadto niya si Jonas sa Nineve aron magpahayag ug mensahe sa paghukom. (Jon. 1:​1, 2) Unsa kahay imong bation kon ikaw ang nakadawat sa maong asaynment? Hunahunaa ni: Layo kaayo ang Nineve gikan sa Israel; tingali mga usa ka bulan ning baktason. Ang mga Asiryanhon nailhan pa gyod nga mga bayolente kaayo. Gani ang Nineve gitawag ug “siyudad nga nagapamatay.” (Nah. 3:​1, 7) Mao diay nga imbes dawaton ang asaynment, mitalaw si Jonas ug miikyas.—Jon. 1:3.

15. Unsay nakatabang kang Jonas nga mas mosalig pa kang Jehova? (Jonas 2:​6-9)

¹⁵ Dihang miikyas si Jonas sa iyang asaynment, gipahinumdoman siya ni Jehova kon unsa Siya ka gamhanan pinaagi sa pagluwas kaniya sa talagsaong paagi. (Jon. 1:​15, 17) Nakakat-on gyod si Jonas sa maong panghitabo. Tungod adto, wala na siya mahadlok kon unsa kahay dangatan niya didto sa Nineve. Hinuon, mas midako ang iyang pagsalig nga proteksiyonan gyod siya ni Jehova bisag unsa pay mahitabo. (Basaha ang Jonas 2:​6-9.) Maong dihang giingnan siyag balik ni Jehova nga moadto sa Nineve, wala na motalaw si Jonas. Iya tong gituman, ug milampos siya sa iyang asaynment.—Jon. 3:5.

16. Sa unsang paagi ang lawom nga pagsabot makatabang nato dihang makaatubang tag makapabalaka nga situwasyon? (Proverbio 29:25) (Tan-awa sab ang mga hulagway.)

¹⁶ Unsay atong makat-onan? Dili nato tugotan nga moatras ta sa atong pag-alagad kang Jehova tungod lang sa atong kahadlok sa tawo. (Basaha ang Proverbio 29:25.) Ang lawom nga pagsabot nakatabang kang Jonas nga mas mosalig kang Jehova imbes nga magpokus sa mga kalisdanan sa iyang asaynment. Sa samang paagi, kon mobati tag kahadlok, hinumdoman nato kon giunsa ta pagtabang ni Jehova sa una. Puwede pod natong pamalandongon kon sa unsang paagi ang pagsalig kang Jehova nakatabang sa ubang igsoon nga malahutay ang makapabalaka nga mga situwasyon o ang lisod nga mga asaynment.a (Heb. 13:6) Busa maningkamot ta nga ipakita ang lawom nga pagsabot pinaagi sa pagsalig kang Jehova ug pagtabang sa uban sa paghimo pod ana.

PADAYONG UGMARA ANG LAWOM NGA PAGSABOT

17. Unsay atong himoon aron mas maugmad pa ang lawom nga pagsabot?

¹⁷ Sa ato nang nahisgotan, ang lawom nga pagsabot makatabang nato sa pag-atubang sa lisod nga mga situwasyon. Unsay atong himoon aron mas maugmad pa ni? Si Jehova lang ang makahatag natog lawom nga pagsabot, ug iya ning gitagana sa iyang mga alagad pinaagi sa iyang Pulong ug sa iyang balaang espiritu. (Neh. 9:20; Sal. 32:8) Gihatagan ta niyag tambag aron makahimo tag maayong mga desisyon ug dili madaog sa atong emosyon. (Sal. 119:​97-101) Busa maugmad nato ang lawom nga pagsabot kon susihon nato pag-ayo ang giingon sa Bibliya ug mangayo sa balaang espiritu ni Jehova pinaagi sa pag-ampo. Kon ato ning himoon, mas makita nato ang katibuk-an sa usa ka situwasyon ug maseguro nato nga ang atong isulti ug buhaton magpakita nga atong gisundog ang panghunahuna ni Jehova.—Prov. 21:​11, footnote.

18. Unsay determinado nimong buhaton?

¹⁸ Hinaot nga padayon natong ugmaron ug pabilhan ang lawom nga pagsabot nga gihatag ni Jehova. (Sal. 14:2) Kon ato nang himoon, seguradong magpabilin ta sa “dalan sa lawom nga pagsabot.” (Prov. 21:16) Busa himoon natong determinasyon nga ipakita ang lawom nga pagsabot sa tanang panahon aron molampos ta ug mapalipay nato si Jehova.