Paningkamoti nga Walay Makabalda sa Imong Pag-alagad

1-2. Nganong makaingon ta nga bisan ang importanteng mga butang posibleng makabalda nato?

NAKASULAY na ba ka nga naa kay gihimong importante pero naay kalit nga nakapabahin sa imong atensiyon? Pananglitan, imadyina nga nagdrayb ka ug naay kalit nga nanawag sa imong cellphone. Nakahunahuna seguro ka nga kinahanglan nimo ning tubagon. Pero kon imo ning himoon, posibleng mabalda ang imong pagdrayb. Importante seguro to nga tawag, pero nahibalo ka nga adtong tungora, mas importanteng magpokus ka sa imong pagdrayb.

² Kitang tanan busy gyod sa daghang importanteng mga buluhaton, pero nahibalo ta nga ang atong espirituwal nga mga kalihokana mao ang pinakaimportante. (Mat. 6:33) Maong naningkamot ta nga mahibaloan kon unsay posibleng makabalda nato sa pag-una kang Jehova.—Prov. 4:25; Mat. 6:22.

3. Unsay atong hisgotan niini nga artikulo?

³ Siyempre dili nato gusto nga mawala ang atong pokus sa espirituwal nga mga kalihokan. Pero ang tinuod, daghang butang o situwasyon ang dali rang makabalda nato. (Luc. 21:​34-36) Busa unsay atong himoon aron mauna nato ang pag-alagad kang Jehova? Niining artikuloha hisgotan nato (1) kon unsa nga mga butang o situwasyon ang posibleng makabalda nato, (2) kon unsay gihimo ni Jesus aron dili siya mabalda sa pag-alagad, ug (3) kon unsa poy atong himoon aron makapokus ta sa mas importanteng mga butang.

UNSAY POSIBLENG MAKABALDA SA ATONG PAG-ALAGAD?

4-6. Paghatag ug mga pananglitan sa mga butang o situwasyon nga posibleng dali rang makabalda nato.

⁴ Kitang tanan naay mga kinahanglang asikasohon o atimanon. Pananglitan, naa tingali tay problema sa panglawas, o kaha naa tay kinahanglang asikasohon para sa atong pamilya o sa atong kaugalingon. Siyempre, importante ning mga butanga ug kinahanglan nato ning gahinan ug panahon. Pero posible kaha ning makabalda sa atong espirituwal nga mga kalihokan? Posible, ilabina kon mao na lang ni ang pirme natong hunahunaon ug kon mahurot na ang atong panahon ug kusog para sa mas importanteng mga butang.

⁵ Daghan pod nato ang apektado sa dili maayong mga kahimtang niini nga sistema, sama sa kagubot sa politika, kalisod sa ekonomiya, sakit, ug kapintasan. (2 Tim. 3:1) Tungod ani, posibleng mabalaka kaayo ta ug magsige na lang hinuon tag hunahuna bahin niini nga mga problema.

⁶ Tingali naa tay nailhang mga tawo nga nag-atubang ug ingon ani nga mga situwasyon. Seguro makita nato nga pirme na lang silang maguol tungod sa ilang mga giatubang. Ang uban gani nakaingon nga morag wala nay lami ang ilang kinabuhi tungod sa daghan nilang problema. Normal ra nga mobati ta ana kay wala ta gidisenyo ni Jehova nga mag-antos. Gusto niya nga malipay ta sa atong kinabuhi. Mao nay hinungdan kon nganong ang uban magsige na lag lingawlingaw aron malimtan nila ang ilang mga kalisdanan. Unsay atong himoon kon nag-atubang pod tag ingon ani nga mga kahimtang? Hisgotan nato kon unsay atong makat-onan kang Jesus aron matabangan ta nga dili mabalda sa atong pag-alagad.

ANG GIHIMO NI JESUS ARON DILI SIYA MABALDA SA PAG-ALAGAD

7. Unsa untay puwedeng makabalda kang Jesus?

⁷ Daghan ang posible untang makabalda kang Jesus, sama sa problema sa mga tawo ug isyu sa politika. Sa iyang panahon, daghan ang nag-antos sa sakit ug kapobrehon. (Mat. 14:14; Mar. 14:7) Gidaogdaog pod sila sa mga Romano ug sa ilang isigka-Hudiyo. Maong dihang nakita sa mga tawo nga naay gahom si Jesus sa paghimog mga milagro, gusto dayon nila siyang himoong hari. (Juan 6:​14, 15) Gawas pa ana, gitental pod siya ni Satanas ug gitanyagan sa tanang gingharian sa kalibotan. (Mat. 4:​8, 9) Ug diha poy higayon nga ang usa sa pinakasuod nga higala ni Jesus, si apostol Pedro, misugyot kaniya nga dili lisodlisoron ang iyang kinabuhi. Giingnan siya ni Pedro: “Maluoy ka sa imong kaugalingon, Ginoo.”—Mat. 16:​21, 22.

8. Unsay gihimo ni Jesus aron dili siya mabalda sa iyang pag-alagad?

⁸ Unsay gihimo ni Jesus aron dili siya mabalda sa iyang pag-alagad? Una, gisundog niya ang panghunahuna ni Jehova. (Juan 8:28; 14:9) Ikaduha, nagpokus siya sa espirituwal nga mga butang. (Mat. 9:35) Ug ikatulo, gihinumdoman niya pirme kon unsa gyoy mas importante. (Juan 4:34) Iya dayong gisalikway ang mga tentasyon ni Satanas. Wala pod siya magpadala sa giingon ni Pedro kay nahibalo siya nga dili to uyon sa kabubut-on ni Jehova. (Mat. 4:10; 16:23) Bisag unsa pay gihunahuna, gisulti, o gihimo sa uban, wala gyod magpabalda si Jesus sa iyang pag-alagad sa Diyos. Tinuod, dili tingali parehas ang atong situwasyon sa giatubang ni Jesus. Pero kon sundogon nato ang iyang ehemplo, matabangan gyod ta nga dili mabalda sa atong espirituwal nga mga kalihokan.

KON UNSAON NGA DILI TA MABALDA SA PAG-ALAGAD

9. Unsay gipasabot sa giingon sa Efeso 5:17 nga “padayong sabta kon unsa ang kabubut-on ni Jehova”?

⁹ Paningkamoti nga masundog ang panghunahuna ni Jehova. Makatabang na nimo nga ‘padayong masabtan kon unsa ang kabubut-on ni Jehova.’ (Basaha ang Efeso 5:17.) Mahibaloan nato kon unsay makapalipay niya pinaagi sa pagbasa sa iyang Pulong ug pagpamalandong niana. Bisan sa mga situwasyon nga walay espesipikong gihisgotan ang Bibliya, puwede gihapon natong mahibaloan kon unsay makapalipay niya. Sa unsang paagi nato na mahimo? Mahimo nato na kon pamilyar ta sa panghunahuna ni Jehova ug kon andam tang magpagiya niana.

10. Sa unsang paagi nato mahibaloan ang panghunahuna ni Jehova?

¹⁰ Mahibaloan nato ang panghunahuna ni Jehova kon tun-an nato ang Bibliya ug pamalandongon kon giunsa niya pagtratar ang mga tawo. (Jer. 45:5) Samtang magbasa ta sa Bibliya, puwede natong pangutan-on ang atong kaugalingon: ‘Unsa may gitudlo niini bahin kang Jehova? Unsaon nako ni pagpadapat aron masundog nako ang panghunahuna ni Jehova?’ Siyempre, ang iyang panghunahuna labaw kaayo kon itandi sa atoa. (Isa. 55:9) Maong kinahanglang magpagiya ta niya aron matudloan ta kon unsaon pagbuhat sa iyang kabubut-on. (Sal. 143:10) Moampo pod ta alang sa tabang aron masabtan ug masundog nato ang iyang panghunahuna.—1 Juan 5:14.

11. Unsay gusto ni Jehova para nato?

¹¹ Hapit na kaayo ang kataposan, maong kinahanglang andam ta kanunay alang niana. Busa gidasig ta ni Jehova nga likayan ang bisan unsa nga makabalda nato. (Mat. 24:44) Dili niya gusto nga mabug-atan ta sa mga kabalaka. (Mat. 6:​31, 32) Maong kon naa tay mga gikabalak-an, pananglitan bahin sa atong panglawas, trabaho, pamilya, mga bayronon, o ubang personal nga mga butang, hinumdoman nato nga si Jehova naghatag natog maayong mga tambag aron mahibalo ta kon unsay atong buhaton. Gusto niya nga mangayo ta niyag kaalam ug kusog aron maatubang nato ang atong mga problema.—Sal. 55:22; Prov. 3:​5-7.

12. Unsa ang usa ka paagi aron dili ta sobrang mabalaka bahin sa mga panghitabo sa kalibotan? (Mateo 5:3)

¹² Pabiling busy sa espirituwal nga mga kalihokan. Dili kalikayan nga mabalaka ta gamay bahin sa mga panghitabo sa kalibotan. Maong aron dili ta mabalda niini nga mga panghitabo nga dili nato kontrolado, maayong magpokus ta sa espirituwal nga mga kalihokan. Kon maningkamot ta nga tagbawon ang atong espirituwal nga panginahanglan, nga maoy pagkadisenyo ni Jehova nato, mahimo tang malipayon. (Basaha ang Mateo 5:3.) Matagan-an nato ni nga panginahanglan kon maningkamot ta nga mailhan si Jehova pinaagi sa pagtuon sa iyang Pulong. Himoon pod nato ang atong maarangan sa pagsimba kaniya sa bisan unsang pribilehiyo sa pag-alagad nga gihatag kanato. Kon ato nang himoon, mapalipay nato si Jehova kay atong gigamit ang atong panahon sa pinakamaayong paagi.—Prov. 23:15.

13. Unsaon nato paggamit ang atong panahon sa kinamaayohang paagi?

¹³ Ingong mga Kristohanon, gusto gyod natong sundon ang tambag nga “gamiton ang [atong] panahon sa kinamaayohang paagi.” (Efe. 5:​15, 16; tan-awa ang study note nga “making the best use of your time.”) Kini nga tambag wala lang magtumong sa kon unsaon nato paggamit ang atong panahon para sa adlaw-adlaw nga mga kalihokan. Hinuon nagdasig ni nato nga gamiton ang atong panahon sa maalamong paagi para sa espirituwal nga mga butang, sa dili pa taposon ni Jehova kining daotang sistema. Unsaon nato paggamit ang atong panahon sa kinamaayohang paagi? Kon magsige tag atang sa mga balita nga puro lang bahin sa daotang mga panghitabo, posible tang maguol, maluya, ug mabalda sa atong pag-alagad. Maong maayo gyod nga limitahan nato ang atong panahon sa pagbasa ug pagtan-aw niini nga mga balita. Kon ato nang himoon, dili ta sobrang mabalaka bahin ani ug makapabilin pod tang busy sa makapadasig nga espirituwal nga mga kalihokan. Puwede pod natong dugangan ang atong panahon sa ministeryo kon posible, sama pananglitan sa paghimog dugang nga mga balikduaw. Nahibalo ta nga importante kaayo nga pahimuslan nato ang tanang kahigayonan sa pagtabang sa mga tawo nga “maluwas ug makakat-on sa tukmang kahibalo sa kamatuoran.”—1 Tim. 2:4.

14. Unsay kaayohan kon busy ta sa espirituwal nga mga kalihokan? (Tan-awa sab ang hulagway.)

¹⁴ Kon busy ta sa espirituwal, makatabang ni aron mahimong balanse ang atong panglantaw sa atong kahimtang karon. Bisan pa sa nakita nato nga kagubot sa politika, kalisod sa ekonomiya, ug sa daghang makatakod nga sakit karon, dili kaayo ta sobrang mabalaka niini kay nahibalo ta nga katumanan ni sa mga tagna sa Bibliya. Maong imbes nga mahadlok ug dili na hinuon makapokus sa pag-alagad, masaligon ta sa nindot nga kaugmaon nga gisaad ni Jehova. Makapabilin tang kalmado kon padayon tang mosalig nga tabangan ta ni Jehova.—Sal. 16:8; 112:​1, 6-8.

15. Unsay resulta kon naa tay “maayong panghunahuna”? (1 Pedro 4:7)

¹⁵ Pagpokus sa kon unsa gyoy importante. Daghang tawo karon ang nagpokus sa kalingawan ug walay pakabana sa kataposan niini nga sistema. Aw, dili ra man sayop ang paglingawlingaw, pero aron dili ta maimpluwensiyahan sa panglantaw sa kalibotan, kinahanglang naa tay “maayong panghunahuna.” (Basaha ang 1 Pedro 4:7.) Unsa may gipasabot ani? Nagpasabot ni nga kinahanglang balanse ang atong panglantaw. Pananglitan, dili nato hutdon ang atong panahon ug kusog sa paglingawlingaw; hinuon mohimo tag maalamong mga desisyon. Angayng makita diha sa atong mga desisyon nga gisundog nato ang panghunahuna ni Jehova ug nga nakasabot ta kon unsa gyoy mas importante.—2 Tim. 1:7.

16. Unsay atong makat-onan sa gihimo ni Jesus sa hapit na siyang mamatay?

¹⁶ Kanunay gyong gihinumdoman ni Jesus kon unsay pinakaimportante. Bisan sa lisod kaayo nga panahon sa iyang kinabuhi sa hapit na siyang mamatay, nagpokus gihapon siya sa pagpabiling maunongon ug sa pagtuman sa kabubut-on sa Diyos. Tungod ana, padayon siyang nag-ampo ug nagpabiling alerto. Sa laing bahin, ang mga tinun-an ni Jesus nangatulog “tungod sa kakapoy ug kasubo.”—Luc. 22:​39-46; Juan 19:30.

17. Nganong daghan ang naggamit ug social media, pero nganong posible ning makawala sa atong pokus? (Tan-awa sab ang hulagway.)

¹⁷ Sama sa mga tinun-an ni Jesus, naa tingali mga panahon nga maguol kaayo ta. Basin mabalaka pod ta sa mga nagakahitabo niining panahon sa kataposan. Tungod ana, daghan ang naggamit ug social media aron malimtan ang ilang mga problema. Gigamit ni nila aron maestorya ang ilang mga higala ug pamilya bisan asa pa sila, ug maka-share ug mga balita, picture, o uban pa. Gigamit pod ni nila sa pagdulag makalingaw nga games ug pagtan-awg mga video ug salida. Pero tungod sa kadaghan sa ilang mahimo diha sa social media, ang uban naadik na ani ug nahurot na dinhi ang ilang panahon. Aron matabangan ta nga mahimong balanse aning bahina, puwede natong pangutan-on ang atong kaugalingon, ‘Narelaks ba gyod ko sa akong paggamit ug social media, o napasagdan na hinuon nako kon unsa gyoy importante?’

18. Nganong kinahanglan tang mag-amping sa kon unsay atong ginatan-aw ug ginadula?

¹⁸ Kinahanglan pod tang mag-amping dihang magtan-awg mga salida o tag-as nga mga drama diha sa mga streaming app, mag-scroll ug mugbong mga video diha sa internet, ug magdulag mga video game. Lingaw pod baya ni ug makawala sa stress, pero kinahanglan tang mag-amping sa kon unsay atong ginatan-aw ug ginadula ug kon unsa ka dakong panahon ang atong gigamit para ana. Pananglitan, inigkahuman nimog tan-aw ug salida diha sa streaming app, naa na poy laing mogawas nga mga video aron maengganyo ka nga motan-aw ug bag-ong mga salida nga posibleng naay kapintasan o imoralidad. Mao nay nahitabo sa usa ka brader nga taga-Asia. Sa primero, nalingaw ra siyag tan-aw ug short clip sa mga salida. Pero sa sige niyag tan-aw ani, sa ngadtongadto tigtan-awan na pod siyag mga salida nga naay imoral nga mga esena, hangtod nga miabot sa punto nga motan-aw na gyod siyag pornograpiya. Maayo na lang kay sa tabang sa mga ansiyano ug sa iyang suod nga mga higala, milihok siya. Iyang gi-delete ang mga streaming app ug gilimitahan ang iyang paggamit sa cellphone. Ang nahitabo niini nga brader nagpakita kon nganong kinahanglan tang mag-amping dihang magpilig kalingawan.

19. Unsay posibleng mahitabo kon magsige na lang tag laag o lingawlingaw?

¹⁹ Importante pod nga mahimo tang balanse kon bahin sa atong mga laag ug lingawlingaw. Siyempre, kinahanglan nato ni panagsa aron makapahulay ta gikan sa atong mga trabaho ug marelaks. Pero kon magsige na lang tag lingawlingaw, basin mahurot na ang atong panahon sa mas importanteng mga butang. (Filip. 1:10) Maong kinahanglan natong pamalandongon kon unsa nga mga kalihokan ang hatagan natog mas dakong panahon. Puwede natong pangutan-on ang atong kaugalingon: ‘Ang panahon ba nga akong gigamit para sa mga laag ug lingawlingaw nagpakita nga balanse ko? Ako bang gipakita nga giuna nako ang mas importanteng mga butang ug nga andam ko sa pag-abot sa kataposan?’

20. Unsay mga kaayohan kon likayan nato ang bisan unsa nga posibleng makabalda nato sa pag-alagad?

²⁰ Dako gyog kaayohan kon likayan nato ang bisan unsa nga makabalda sa atong espirituwal nga mga kalihokan. (Isa. 48:17) Pananglitan, mas makaya nato ang atong mga problema sa tabang ni Jehova. Dili pod ta sobrang mabalaka sa mga panghitabo karon sa kalibotan. Ug malikayan nato nga mahurot ang atong panahon sa paglingawlingaw. Maong hinaot nga maningkamot ta nga padayong sundogon ang panghunahuna ni Jehova, magpabiling busy sa espirituwal nga mga kalihokan, ug kanunayng hinumdoman kon unsa gyoy importante. Pinaagi ana, malikayan nato ang mga kabaldahan ug “makapangupot [ta] pag-ayo sa tinuod nga kinabuhi.”—1 Tim. 6:19.