Salig sa Labing Gamhanang Magmamando sa Uniberso

1. Unsang mga pagsulay ang naatubang ni Job?

SI Job, usa ka matinumanong tawo sa karaang panahon, nawad-an sa halos tanan niyang nabatonan: iyang mga anak, mga sulugoon, ug kahayopan. Gihampak pod siyag ngutngot kaayo nga sakit. Tungod sa mga nahitabo niya, gilikayan siya sa mga tawo nga dako kaayog pagtahod niya sa una. Gisultihan pod siyag sakit nga mga pulong sa iyang nagpakaaron-ingnong mga higala. Ug bisan gani ang iyang asawa nakasultig dili maayo kang Job tungod sa kabug-at sa iyang gibati. Iyang giingnan si Job nga ‘tunglohon ang Diyos ug magpakamatay.’ (Job 2:9; 15:​4, 5; 19:​1-3) Kining pait nga mga kalisdanan puwedeng makapawala sa pagsalig ni Job sa matuod nga Diyos ug makapahunahuna niya nga wala na gyoy pakabana si Jehova sa Iyang matinumanong mga alagad.

2-3. Kon makaatubang tag mga kalisdanan, unsay posibleng mosulod sa atong hunahuna, ug unsay atong makat-onan sa basahon sa Job?

² Usahay, makaeksperyensiya pod tag lisod kaayo nga mga kahimtang nga magsukod kon unsa gyod ka dako ang atong pagsalig kang Jehova. Dili ni kalikayan kay naa na ta sa “kuyaw nga mga panahong lisod sagubangon.” (2 Tim. 3:1) Kon magsunodsunod ang atong mga problema, mabug-atan tingali ta ug mobati nga dili na nato ni makaya. Gani, tungod ani nga mga situwasyon, ang uban nagduhaduha kon gimahal ba gyod sila ni Jehova.

³ Mao pod ba nay imong gibati? Kon mao, ayawg kaluya. Sama nga nakat-onan ni Job nga luwason gyod ni Jehova kadtong maunongon Kaniya, makakat-on pod ta nga mas mosalig pa sa atong langitnong Amahan. Aron mahimo na, susihon nato kon unsay giingon sa basahon sa Job bahin niining duha ka importanteng leksiyon: Una, si Jehova ang Labing Gamhanang Magmamando sa uniberso. Ikaduha, kayang maniobrahon sa atong gamhanang Diyos ang mga panghitabo sa kalibotan aron maseguro nga matuman gyod ang iyang kabubut-on ug maprotektahan ang iyang katawhan gikan sa pisikal ug espirituwal nga kadaot.

SI SATANAS MISULOD UBAN KANILA

4. Base sa basahon sa Job, kinsay miapil dihang nagtapok ang mga anghel didto sa langit?

⁴ Dihay higayon nga “ang mga anak sa matuod nga Diyos” nagtapok aron moatubang kang Jehova didto sa langit. Kinsay tua pod didto? Ang Bibliya nag-ingon: “Si Satanas misulod usab uban kanila.” (Job 1:6) Kini ang kinaunhang higayon nga gihisgotan sa Bibliya ang ngalang “Satanas,” nga nagkahulogang “Magsusupak.” Gitawag siya anang ngalana kay siya ang nanguna sa pagsupak kang Jehova. Niining panahona, si Satanas dili na apil sa matinumanong mga anak sa Diyos. Nahimo na siyang kaaway ni Jehova ug sa tanan Niyang matinumanong alagad sa langit ug sa yuta. Nahibalo ta ani kay ang giingon ni Jehova diha sa Genesis 3:15 klarong nagpakita nga si Satanas dili bahin sa “babaye”—ang espirituwal nga pamilya ni Jehova sa langit—nga maoy mopatungha sa “kaliwat.”

5. Unsay atong makat-onan bahin kang Satanas ug kang Jehova gikan sa gihimo nga miting didto sa langit?

⁵ Gipasulat ni Jehova sa Bibliya ang tanang naestoryahan sa maong miting didto sa langit. Ang gipanulti ni Satanas klarong nagpakita nga siya daotan kaayo nga tigbutangbutang. (Job 1:9; itandi ang Pinadayag 12:10.) Ug kon bahin kang Jehova, kini nga rekord sa Bibliya nagpasalig nato nga siya gyod ang naay kinalabwang awtoridad, ug iya ning gigamit sa hingpit ug patas nga paagi. Nagpakita pod ni nga ang Labing Gamhanang Diyos makabuot kon asa ra kutob ang puwedeng himoon sa uban.

SI JEHOVA NAGTAKDAG LIMITASYON

6. Giunsa pagpakita ni Jehova nga kontrolado niya ang miting nga nahitabo didto sa langit? (Job 1:​7, 8)

⁶ Basaha ang Job 1:​7, 8. Klaro nga kontrolado ni Jehova ang maong miting. Iyang gipangutana si Satanas: “Imo bang gihatagag pagtagad ang akong alagad nga si Job?” Oo, nahibalo kaayo si Jehova nga gustong sulayan ni Satanas ang matinumanong tawo nga si Job, pero Iyang gigamit ang Iyang awtoridad ingong Labing Gamhanan aron protektahan si Job. Atong tan-awon kon giunsa na niya paghimo.

7. Base sa giingon ni Satanas diha sa Job 1:​10, 11, unsa kuno ang rason kon nganong nag-alagad ang mga tawo kang Jehova?

⁷ Basaha ang Job 1:​10, 11. Si Jehova ang Labing Gamhanang Magmamando sa uniberso, ug kanunayng husto ang iyang paggamit sa iyang awtoridad ug gahom. (Jer. 32:17; Dan. 4:35) Bisan pa ana, gikuwestiyon ni Satanas ang paagi ni Jehova sa paggamit sa Iyang awtoridad. Samag miingon si Satanas nga gibayran daw sa Diyos ang mga tawo, parehas kang Job, aron lang moalagad sila Kaniya. Nangangkon pod si Satanas nga ang mga tawo nag-alagad lang kang Jehova tungod sa maayong mga butang nga ilang nadawat gikan Niya. Busa unsay gihimo ni Jehova?

8-9. Unsay giingon ni Jehova nga klarong nagpakita kon asa ra gyod taman si Satanas, ug nganong Iya tong gihimo? (Job 1:12) (Tan-awa sab ang hulagway.)

⁸ Basaha ang Job 1:12. Gitugotan ni Jehova ang Yawa nga pamatud-an ang iyang akusasyon, pero Iya siyang giingnan kon asa ra gyod siya taman. Ang Diyos klarong miingon: “Apan siya mismo [si Job], ayawg hilabti!” Nakita sa tanang anghel nga labaw gyod si Jehova kay iyang gihatagag limitasyon si Satanas. Wala gyoy nahimo si Satanas kondili sundon ang maong sugo. Nalimitahan gyod siya sa kon unsay gusto unta niyang himoon kang Job, ug mao gihapon nay iyang kahimtang karon. Klaro ning nagpakita nga gigamit ni Jehova ang iyang awtoridad ug gahom aron proteksiyonan si Job ug ang Iyang reputasyon.

⁹ Wala mosaler ang mga pag-atake ni Satanas kang Job. Bisan pa sa mga pagsulay nga naagian ni Job, padayon siyang nagmatinumanon sa iyang langitnong Amahan. (Job 1:22) Pero wala pa mahuman ang Yawa sa iyang paningkamot nga sulayan si Job.

10. Nganong gitugotan man ni Jehova si Satanas nga padayong sulayan si Job? (Job 2:​2-6)

¹⁰ Basaha ang Job 2:​2-6. Wala gyod lung-i ni Satanas si Job. Gani, nagplano siya nga paantoson pag samot si Job. Naghunahuna man god si Satanas nga seguradong tunglohon ni Job ang Diyos kon kinabuhi na niya mismo ang maapektohan. Aron pamatud-an nga sayop si Satanas, gitugotan siya ni Jehova nga hampakon ug ngutngot nga sakit si Job. Pero siyempre, giingnan na pod ni Jehova si Satanas kon asa ra taman ang iyang puwedeng himoon. Siya miingon: ‘Ayawg kuhaa ang iyang kinabuhi!’ Wala na poy nahimo si Satanas kondili sundon ang limitasyon nga gitakda ni Jehova kaniya. Pamatuod na pod ni nga si Jehova ang Labing Gamhanang Magmamando, kay dili gyod makalapas si Satanas sa kondisyon nga gihatag ni Jehova kaniya.

GITAPOS NI JEHOVA ANG PAG-ANTOS NI JOB

11. Dihang gitapos na ni Jehova ang tanang pagsulay ni Job, giunsa niya pagpanalangin si Job? (Job 42:​10-13)

¹¹ Basaha ang Job 42:​10-13. Sa ngadtongadto, napamatud-an gyod nga dili mokompromiso si Job bisan pa sa mga pagsulay. Maong wala na tugoti ni Jehova si Satanas nga mohimog direktang pag-atake kang Job. Giwala ni Jehova ang tanang pag-antos sa iyang matinumanong alagad, ug wala na poy nahimo si Satanas aron pugngan ang desisyon sa Diyos.

12. Paghatag ug pananglitan kon giunsa pagpanalangin ni Jehova kadtong mga nagasalig kaniya.

¹² Niining kataposang mga adlaw, gigamit pod ni Jehova ang iyang gahom sa pagtabang sa iyang mga alagad. Pananglitan, niadtong 1945, dihay 230 ka Saksi ni Jehova nga gipaantos panahon sa usa ka Nazi death march. Pero sa tabang ni Jehova, nakalahutay silang tanan. Mao ni ang ilang gisulat sa usa ka resolusyon bahin sa ilang pait kaayo nga eksperyensiya: “Ang dugay ug malisod nga yugto sa pagsulay natapos na ug kadtong nangaluwas, nga daw gisakmit gikan sa nagdilaab nga hurno, wala gani manimahong sunog. . . . Sa kasukwahi, sila tugob sa kusog ug gahom gikan kang Jehova.” Sila midugang: “Usa ra gyoy among pangandoy . . . Nanghinaot mi nga kon makagawas na mi sa lungag sa mga leyon, tugotan ming makaalagad kang Jehova . . . hangtod sa hangtod. Kana ang among giisip nga kinadak-ang panalangin.”—Itandi ang Daniel 3:27; 6:22.

13. Kon makaatubang kag mga kalisdanan, sa unsa ka makasalig? (Tan-awa sab ang mga hulagway.)

¹³ Naa tingali mga panahon nga mobati pod ta nga morag napalibotan tag mga leyon. (1 Ped. 5:​8-10) Usahay, bun-og kaayo ta sa daghang problema, ug basig makahunahuna pa gani ta nga morag wala na gyoy kahumanan ang atong mga giatubang. Niini nga mga situwasyon, dako kaayog tabang ang paghinumdom sa estorya ni Job. Makasalig ta nga gamiton ni Jehova ang iyang gahom aron wad-on ang atong mga pag-antos—kon dili man karon, seguradong himoon na niya sa umaabot nga bag-ong kalibotan. Hapit na niyang wad-on kini nga sistema, ug dili niya tugotan nga molapas nig bisag usa lang ka adlaw sa iyang gitakdang panahon!

GIMAHAL NI JEHOVA ANG IYANG MAUNONGONG MGA ALAGAD

14-15. Unsay himoon ni Jehova para sa iyang maunongong mga alagad? (Job 14:15) (Tan-awa sab ang hulagway.)

¹⁴ Basaha ang Job 14:15. Ang atong langitnong Amahan mounong gyod niadtong mga maunongon kaniya. Gimahal kaayo niya sila, maong iya silang banhawon kon ugaling mamatay sila. Ang kasakit nga atong bation tungod sa kamatayon sa atong mga minahal pulihan na unya ni Jehova ug kalipay.—Isa. 65:17.

¹⁵ Kon bahin kang Job, bisan adtong giwagtang na ni Jehova ang iyang mga pag-antos, padayon gihapon siyang nagkinabuhi sa kalibotan ni Satanas. Bisan pa ana, nahibalo ta nga malipayon siya kay ang Bibliya nag-ingon nga gibalik ni Jehova ang maayong panglawas ni Job ug gihatagan siyag mas labaw pa kay sa iyang mga nabatonan sa una. Pero dili kay didto ra kutob ang pagpanalangin ni Jehova kang Job, kay seguradong hatagan Niya siyag mas daghan pang panalangin sa umaabot. Nagpakita lang ni nga gusto gyod ni Jehova nga malipay ug mag-enjoy sa kinabuhi ang iyang maunongong mga alagad. Ug dili lang kana, hatagan pod niya silag kahigayonan nga makabaton ug hingpit nga kinabuhi sa paraisong yuta. (Pin. 21:​3, 4) Ang Labing Gamhanang Magmamando sa uniberso naghinamhinam gyod sa paghimo ana. Kon ato nang hinumdoman, makahupay na nato dihang makaatubang tag mga kalisdanan.

16. Unsa pay laing rason kon nganong mosalig ta kang Jehova ingong atong Labing Gamhanang Magmamando?

¹⁶ Bisag gipanalanginan ni Jehova si Job ug taas nga kinabuhi, sa ngadtongadto namatay ra gihapon si Job. Pero nahibalo ta nga si Jehova ang Labing Gamhanang Magmamando, ug naa siyay gahom sa pagbanhaw kang Job. (Deut. 32:39) Wala gyoy makapugong kang Jehova sa pagbanhaw sa iyang minahal nga mga alagad, ug iya nang himoon sa iyang gitakdang panahon.—Roma 8:​38, 39.

SALIG KANG JEHOVA

17. Unsay nagpakita nga napakyas gyod si Satanas sa iyang mga paningkamot nga wagtangon ang katawhan ni Jehova?

¹⁷ Ang estorya sa Bibliya bahin kang Job naghatag natog lig-ong mga rason kon nganong makasalig gyod ta kang Jehova. Mapasalamaton kaayo ta kang Jehova kay milihok gyod siya aron mapakyas ang mga paningkamot ni Satanas nga wagtangon ang katawhan sa Diyos! Karon, mga siyam na ka milyon ang matinumanong nag-alagad kang Jehova, ug sila maoy lig-ong pamatuod sa kon unsa ka dako ang gahom sa atong Labing Gamhanang Magmamando. Sukad sa una hangtod karon, ang gamhanang mga nasod ug ang relihiyosong mga institusyon wala gyod makapildi sa mga alagad ni Jehova. (Isa. 54:17) Bisan pag morag wala tay dag-anan nila, wala gyod sila makapahunong nato sa pagsangyaw sa maayong balita. Padayon natong gipaila ang kamatuoran bahin kang Jehova ug gipamatud-an kon unsa ka bakakon ug ka daotan si Satanas. Bisan ang kamatayon dili makapahunong nato sa pag-alagad kang Jehova, kay masaligon ta nga banhawon niya kadtong mga maunongon kaniya.—Os. 13:14.

18. Nganong dili ta angayng mahadlok sa kon unsay mahitabo sa umaabot?

¹⁸ Samtang atong pamalandongon ang estorya sa kinabuhi ni Job, mas molig-on ang atong pagtuo nga tabangan ta ni Jehova nga makaya ang bisan unsa nga mahitabo sa umaabot. Panahon sa dakong kasakitan, si Satanas ug ang iyang mga sakop maghunahuna nga ang mga alagad sa Diyos dali ra kaayong atakehon kay morag wala silay panalipod. Pero sama sa gihimo ni Jehova kang Job, gamiton niya ang iyang dakong gahom aron proteksiyonan ang iyang maunongong mga alagad. Dili gyod niya tugotan nga madaog sila ni Satanas. Hapit na kaayong wagtangon ni Jehova ang pag-antos nga gipahinabo ni Satanas ngadto sa mga tawo. Ang Yawa ug ang iyang mga demonyo itambog sa kahiladman ug magpabilin sila didto sulod sa 1,000 ka tuig. (Luc. 8:31; Pin. 20:​1-3) Sa ngadtongadto, bug-os na gyong laglagon si Satanas ug ang tanang dapig kaniya. (Pin. 20:10) Sama sa giingon na ni Jehova, ang ulo ni Satanas dugmokon. Dili na gyod siya maglungtad hangtod sa hangtod.—Gen. 3:15; Roma 16:20.

19. Unsang mga panalangin ang madawat niadtong mga nagasalig kang Jehova? (Tan-awa sab ang hulagway.)

¹⁹ Ang matuod nga mga magsisimba ni Jehova eksayted na kaayo nga moabot ang paraisong yuta, diin ang tanang tawo mahimo nang hingpit ug malipayon. Lahi na unya kaayo ang atong kinabuhi anang panahona. Si Jehova nagsaad: “Tan-awa! Ginabag-o nako ang tanang butang.” (Pin. 21:5) Busa unsay atong madahom? Mawala na ang daotang impluwensiya ni Satanas ug sa iyang mga demonyo nga maoy nagpaantos sa mga tawo sulod sa daghan kaayong katuigan. Ma-imagine ba nimo kon unsa ka nindot ang atong kinabuhi kon mahitabo na ni? Lami na kaayo ang atong tulog kay wala na tay hunahunaon nga mga problema. Ang mga maluwas sa Armagedon makakita na unya kon sa unsang paagi milagrosong ayohon ni Jehova ang tanang masakiton. Ug dili lang kana, makita pod nato nga banhawon ang atong mga minahal. Mao gyod ni ang kinabuhi nga gusto sa atong langitnong Amahan para nato!

20. Unsay determinado nimong himoon?

²⁰ Samtang naningkamot ta nga molahutay sa mga kalisdanan nga atong giatubang niining kataposang mga adlaw, hinaot nga mahimo tang determinado nga mosalig gyod kang Jehova ug magpasakop sa iyang pagmando. Ato pong ipakita nga gihigugma nato ang atong langitnong Amahan ug pamatud-an nga sayop si Satanas. Kon ato nang himoon, makalaom ta nga naa tay nindot nga kaugmaon kay si Jehova, ang Labing Gamhanang Magmamando, naghinamhinam gyod sa pagpanalangin sa iyang matinumanong mga alagad!