Pauswaga ang Imong “Paagi sa Pagpanudlo”

1. Ingong mga Kristohanon, unsay paningkamotan natong himoon, ug ngano? (2 Timoteo 4:2) (Tan-awa sab ang hulagway.)

GIINGNAN ni Jesus ang iyang mga sumusunod: “Tudloi [ang mga tawo] aron mahimong akong mga tinun-an. . . . Tudloi ninyo sila sa pagtuman sa tanan nakong gisugo kaninyo.” (Mat. 28:​19, 20) Kini nga sugo nagpakita nga responsibilidad sa tanang Kristohanon ang pagtudlo sa mga tawo. Tinuod, si Jehova ang nagakabig niadtong “nakiling sa pagdawat sa kamatuoran,” ug gitabangan pod ta sa mga anghel nga makita ang maong mga tawo. (Buh. 13:48; Juan 6:44; Pin. 14:6) Pero bisan pa ana, kinahanglang naa gihapon tay himoon. Konsideraha ang ehemplo ni apostol Pablo ug Bernabe dihang nagsangyaw sila sa sinagoga sa Iconio. Ang Bibliya nag-ingon nga “kay maayo man silang mowali, daghan kaayong Hudiyo ug Grego ang nahimong magtutuo.” (Buh. 14:1) Klaro nga si Pablo ug Bernabe naay “maayong paagi sa pagpanudlo.” (Basaha ang 2 Timoteo 4:2.) Ingong mga Kristohanon, kinahanglang maningkamot pod ta nga mouswag sa atong paagi sa pagpanudlo.

2. Ngano kahang bation sa ubang igsoon nga dili na nila mapauswag ang ilang paagi sa pagpanudlo?

² Ang ubang igsoon mobati tingali nga dili na nila mapauswag ang ilang paagi sa pagpanudlo kay naghunahuna sila nga wala silay ingon ana nga abilidad, o kaha kay wala sila makatiwas ug eskuwela. Dili ni bag-o, kay bisan gani ang ubang alagad sa Diyos sa una mibati pod ug ingon ana. (Ex. 4:10; Jer. 1:6) Naa poy mga igsoon nga maguol kay dili sila parehas sa uban nga daghag Bible study o epektibo sa ministeryo, maong naghunahuna sila nga dili kaayo sila kamaong manudlo. Siyempre, dili ta makadahom nga ang tanan natong maestorya modawat sa maayong balita. Ug kon naa may maminaw, nahibalo ta nga dili lang ni tungod sa atong kaugalingong paningkamot. Sa ato nang nahisgotan, si Jehova ug ang mga anghel ang nagtabang nato aron makita ang sinserog kasingkasing nga mga tawo. Bisan pa ana, gusto natong himoon ang atong maarangan aron masangyaw ang maayong balita sa pinakamaayong paagi. Hisgotan niining artikuloha ang tulo ka paagi nga mahimo tang mas epektibo sa atong pagpanudlo.

IPAKITA ANG PERSONAL NGA INTERES

3. Nganong daghan ang ganahang maminaw kang Jesus?

³ Ang Bibliya nag-ingon nga si Jesus “nahibalo kon unsay anaa sa kasingkasing sa tawo.” (Juan 2:25) Nagpasabot ni nga nasayod si Jesus kon unsay gihunahuna sa mga tawo ug nasabtan niya ang ilang gibati. Natandog niya ang kasingkasing sa iyang mga mamiminaw kay nakasabot siya kon unsa gyoy ilang gikinahanglan. Nakita pod ni Jesus nga nanginahanglan gyod silag tabang sa espirituwal ug nga nabug-atan sila sa daghan kaayong tradisyon ug balaod gikan sa relihiyosong mga lider. (Mat. 9:36; 23:4) Maong sa iyang Wali sa Bukid, gitudloan ni Jesus ang mga tawo kon unsay makatabang nila nga mahimong mas malipayon. Daghan ang ganahang maminaw niya kay ang iyang gipanulti nakadulot sa ilang kasingkasing ug mao gyoy ilang gikinahanglan.

4. Unsaon nato pagpakitag personal nga interes sa mga tawo? (Tan-awa sab ang mga hulagway.)

⁴ Mapakita nato nga naa tay personal nga interes sa mga tawo kon maningkamot ta nga masabtan ang ilang mga gikabalak-an. Mas makapakita tag kaluoy sa mga tawo sa atong teritoryo kon atong hinumdoman nga ang matag usa nila apektado sa daotang kalibotan ni Satanas. Pananglitan, naa bay bag-ong hitabo nga nakapabalaka sa mga tawo sa inyong lugar? Basin nabalaka ang mga ginikanan sa safety sa ilang mga anak diha sa eskuwelahan. O kaha naglisod ang uban sa pagpangitag trabaho. Ma-imagine ba nimo kon unsay ilang kinabuhi niining “kuyaw nga mga panahong lisod sagubangon”? Hunahunaa kon unsa sila ka luoy kay wala sila mahibalo sa nindot nga paglaom diha sa Bibliya.—2 Tim. 3:1; Isa. 65:​13, 14.

5. Nganong lahi si Jesus sa mga Pariseo? (Mateo 11:​28-30)

⁵ Gimahal ni Jesus ang mga tawo, ug ang iyang paagi sa pagtratar kanila nakapabati nila nga sinsero siya. Dili siya sama sa mga Pariseo nga ubos kaayog panglantaw sa mga tawo ug nagdaogdaog pa gani nila. (Mat. 23:13; Juan 7:49) Hinuon, si Jesus buotan ug nagpakitag pagtahod sa iyang mga mamiminaw. Siya “malumo ug mapainubsanon,” ug kini nga mga kinaiya nakatabang niya nga mahimong mas maayong magtutudlo. (Basaha ang Mateo 11:​28-30.) Sama kang Jesus, ato pong pakitaag kaayo ug pagtahod ang atong mga gisangyawan.

6. Unsaon nato pagpakitag kaayo ug pagtahod niadtong mosupak o dili modawat sa atong mensahe?

⁶ Ang uban dili modawat sa atong mensahe ug mosupak pa gani. Unsay angay natong himoon? Si Jesus miingon nga dili nato sila balosan ug daotan. Pero dili lang kana. Gisugo pod ta niya nga magpadayon ‘sa pagbuhat ug maayo niadtong nagadumot kanato,’ ‘sa pagpanalangin niadtong nagatunglo nato,’ ug bisan pa gani ‘sa pag-ampo niadtong nagainsulto kanato.’ (Luc. 6:​27, 28) Mas dali ni natong mahimo kon hunahunaon nato nga basig naay laing rason kon nganong dili sila ganahang maminaw. Tinuod, naay mga tawo nga supak gyod sa atong mensahe. Pero ang uban naa lang tingali problema sa pamilya o naay laing gikabalak-an. Basig dili lang sakto ang atong tayming sa pagpakig-estorya nila. Pero bisag unsa pa may rason kon nganong dili sila ganahang maminaw nato, angay natong ipadapat ang tambag nga ‘himoon ang atong sinultihan nga kanunayng maayo, tinimplahag asin, aron mahibalo ta kon unsaon pagtubag ang matag tawo.’ (Col. 4:6) Kon magpakita tag kaluoy sa mga tawo ug sabton nga naa silay giatubang nga mga problema, makatabang ni nato nga dili mobalos. Hinuon, mapalihok ta nga tudloan sila sa mga kamatuoran nga mohaom sa ilang situwasyon. Pinaagi ana, mahimo tang mas maayong magtutudlo.

GAMITA ANG PULONG SA DIYOS

7. Giunsa pagpakita ni Jesus nga iyang gigamit ang Pulong sa Diyos sa pagtudlo sa mga tawo? (Juan 7:​14-16)

⁷ Ang gipanudlo ni Jesus wala niya ibase sa iyang kaugalingong ideya. Gigamit niya ang Pulong sa Diyos ug gitudloan niya ang mga tawo sa paagi nga dali nila ning masabtan ug mahinumdoman. Ang Bibliya nag-ingon nga ang mga tawo “nahingangha” sa iyang paagi sa pagpanudlo “kay siya nanudlo ingong usa nga may awtoridad gikan sa Diyos, dili sama sa mga eskriba.” (Mar. 1:22; tan-awa ang study note nga “not as the scribes.”) Ang mga eskriba niadtong panahona nagbase sa ilang pagtulon-an sa gipanudlo sa tinahod nga relihiyosong mga magtutudlo. Pero lahi si Jesus, kay iyang gibase sa Kasulatan ang iyang gipanudlo. Ingong Anak sa Diyos, seguradong daghan kaayo siyag nakat-onan gikan kang Jehova didto sa langit. Puwede gyod unta niyang gamiton ang iyang dakong kaalam aron mobilib ang mga tawo niya. Pero wala na niya buhata. Hinuon, iyang gigamit ang Kasulatan aron tudloan ang mga tawo bahin sa kabubut-on sa Diyos. (Basaha ang Juan 7:​14-16.) Maayo gyod nga ehemplo si Jesus sa iyang mga sumusunod.

8. Giunsa pagsundog ni apostol Pedro si Jesus?

⁸ Ang mga tinun-an ni Jesus naggamit pod sa Pulong sa Diyos sa ilang pagpanudlo. Hunahunaa ang pananglitan ni apostol Pedro dihang nakigsulti siya sa daghang tawo niadtong Pentekostes 33 C.E. Si Pedro wala makadawat ug taas nga edukasyon. Pero natandog niya ang kasingkasing sa iyang mga mamiminaw kay iyang gigamit ang Kasulatan sa pagpatin-aw sa mga tagna nga gituman ni Jesus. (Buh. 2:​14-37) Tungod adto, “kadtong malipayong midawat sa iyang pulong nabawtismohan, ug nianang adlawa mga 3,000 ang nadugang.”—Buh. 2:41.

9. Nganong angay natong gamiton ang Pulong sa Diyos dihang manudlo ta sa uban?

⁹ Ang pinakaepektibong paagi sa pagtandog sa kasingkasing sa mga tawo mao ang paggamit sa Pulong sa Diyos. (Heb. 4:12) Busa kinahanglang gamiton nato ang Bibliya dihang manudlo. Hinumdomi nga tumong nato nga “isangyaw ang pulong,” dili ang atong kaugalingong mga ideya. (2 Tim. 4:2) Ang Proverbio 2:6 nag-ingon: “Si Jehova mismo ang mohatag ug kaalam; naggikan sa iyang baba ang kahibalo ug ang katakos sa pag-ila.” Sa ato pa, kon gamiton nato ang Pulong sa Diyos dihang magtudlo ta sa mga tawo, samag gitugotan nato si Jehova nga makig-estorya nila. (Mal. 2:7) Gusto natong mahibalo sila nga ang tambag nga naa sa Bibliya mas labaw kay sa bisan unsang ideya sa tawo. Kini gisulat pinaagi sa paggiya sa Diyos, maong puno nig kaalam nga makatabang nato aron mabatonan ang pag-uyon sa atong Maglalalang ug mahimong malipayon.—2 Tim. 3:​16, 17.

10. Unsay atong himoon aron makita sa atong mga giestadihan nga gikan gyod sa Bibliya ang ilang mga nakat-onan?

¹⁰ Dihang mangandam ka para sa pag-Bible study, paningkamoti nga masabtan sa imong giestadihan nga gikan gyod sa Bibliya ang iyang mga nakat-onan. Bisag mogamit tag mga hulagway ug video dihang manudlo, kinahanglang magpokus gihapon ta sa kon unsay giingon sa Bibliya. Busa ipabasa ang mga teksto nga makatabang sa imong giestadihan nga makuha ang punto, ug tabangi siyang masabtan kon unsaon ni pagpadapat. Dihang mogamit pod kag mga hulagway ug video, seguroa nga masabtan sa imong giestadihan kon unsa nga mga prinsipyo sa Bibliya ang gitudlo ana. Dili kinahanglan nga tekstohan gyod nimo siya pirme o nga ikay magsigeg patin-aw sa punto. Bisag pipila lang ka teksto ang imong basahon, ang importante mahatagan nimo siyag panahon nga masabtan ang kahulogan sa matag teksto. Puwede pa gani ninyo ning balikon ug basa, kon gikinahanglan. Kon imo ning himoon, imong gipakita nga dili ang libro, hulagway, o video ang inyong gitun-an, kondili ang Bibliya mismo.—1 Cor. 2:13.

11-12. (a) Unsaon nato pagpakita nga nagpailob ta sa atong mga Bible study? (Buhat 17:​1-4) (Tan-awa sab ang hulagway.) (b) Unsa tingali ang wala mahibaloi sa uban bahin sa Bibliya, ug unsaon nato sila pagtabang?

¹¹ Kon ang imong Bible study malisdan ug dawat sa usa ka kamatuoran, kinahanglan natong “isangyaw ang pulong . . . uban ang dakong pailob.” Hinumdomi nga lahilahig kahimtang ang atong mga Bible study. Ang uban nila dali rang makasabot. Pero naa poy uban nga nagkinahanglag dugang panahon aron makasabot bisan sa sayon ra nga mga kamatuoran. Mao nay kahimtang sa ubang Hudiyo sa Tesalonica. Wala dayon nila masabti kon unsay gitudlo ni Pablo. Maong mapailobong gibalikbalik pagpatin-aw ni Pablo kon unsay naa sa Kasulatan hangtod nga nasabtan ra gyod ni nila.—Basaha ang Buhat 17:​1-4.

¹² Makapakita pod tag pailob sa atong giestadihan kon likayan nato nga kitay magsigeg estorya. Hinuon, pangutan-on nato sila ug hatagag panahon nga motubag. Importante kaayo nga maminaw gyod ta sa ilang isulti aron masabtan nato ang ilang gihunahuna. Dayon basaha ug hisgoti ang mga teksto nga makatabang nilang masabtan ang panghunahuna sa Diyos. Hinumdomi pod nga ang uban wala gyoy hanaw sa Bibliya ug wala gani ideya kon unsay sulod ani. Unsaon nimo sila pagtabang? Puwede nimo silang pakit-on ug inimprenta nga Bibliya. Puwede pod nimong gamiton ang “Introduksiyon sa Pulong sa Diyos,” nga makita sa unang mga panid sa Bag-ong Kalibotang Hubad, aron mahibalo sila kon unsa ka daghan ang ilang makat-onan sa Bibliya. Pananglitan, puwede nimong gamiton ang pangutana 15 ug mobasag usa o duha ka teksto aron ipasiugda nga ang praktikal nga tambag sa Bibliya makatabang nato nga mahimong malipayon. Sa laing pagkasulti, mahimo kang mas epektibo sa imong pagpanudlo kon ipakita nimo sa imong mga Bible study nga dako kaayog tabang ang Bibliya sa ilang kinabuhi.

TABANGI SILA NGA MAGPOKUS KANG JEHOVA

13. Dihang manudlo ta sa uban bahin sa Bibliya, kinsa ang angay natong ipokus sa atong panaghisgot? Iilustrar.

¹³ Dihang tudloan nato ang uban bahin sa Bibliya, tumong nato nga makakat-on sila bahin kang Jehova ug masuod kaniya. (Sant. 4:8) Puwede nato ning ikailustrar sa tawo nga tig-spotlight sa stage. Panahon sa programa, dili niya itunong ang spotlight sa iyang kaugalingon. Hinuon, seguroon niya nga ang nag-perform sa stage ang maigo sa spotlight. Ingon ana pod kon magtudlo ta sa uban bahin sa Bibliya. Paningkamotan nato nga adto sila mapokus kang Jehova, dili kanato.

14. Unsaon nato pagtabang ang atong Bible study nga magpokus kang Jehova?

¹⁴ Dihang magdumala kag pagtuon sa Bibliya, tabangi ang imong giestadihan nga masabtan kon unsa ka importante nga higugmaon si Jehova ug mapalipay Siya. (Prov. 27:11) Dili nato gusto nga ang mga kausaban nga iyang himoon maoy aron lang nga ma-Saksi siya. Hinuon, tumong nato nga masabtan niya nga mohimo siyag mga kausaban aron mapalipay si Jehova. Pananglitan, kon ang imong Bible study maglisod ug undang sa usa ka bisyo, pangutan-a siya: “Nganong gidumtan ni Jehova kini nga bisyo? Ngano kahang gisugo ka ni Jehova nga undangon ni nga bisyo nga nalipay man unta ka ani? Nganong kini nga sugo nagpakita nga gimahal ka niya?” Kon tabangan nimo ang imong Bible study nga masabtan kon unsay panglantaw ni Jehova, mas makita niya kon unsa ka mahigugmaon ang atong Amahan. Mao nay mopalihok niya nga maningkamot aron mapalipay si Jehova.

PADAYONG PAUSWAGA ANG IMONG PAAGI SA PAGPANUDLO

15. Unsay atong mahimo aron padayon tang mouswag sa atong pagpanudlo?

¹⁵ Ingong mga magtutudlo sa Bibliya, hangyoon nato si Jehova nga tabangan tang makita kon naa ba tay angayng pauswagon sa atong paagi sa pagpanudlo. (1 Juan 5:14) Pero kinahanglang naa pod tay himoon uyon sa atong giampo. Maong pahimusli ang pagbansay nga gihatag ni Jehova diha sa mga tigom. Puwede pod kang magpauban ug mga igsoon nga maayong modumala ug Bible study, ug pangutan-a sila kon unsay angay nimong pauswagon. Hinumdomi pod nga bisag pamilyar na ka sa inyong hisgotan, bag-o pa na para sa imong giestadihan. Maong paningkamoti nga ibutang ang imong kaugalingon sa iyang kahimtang. Dayon tabangi siyang makita nga ang iyang mga nakat-onan makahatag gyod niyag kaayohan. Magpalihok na niya nga makigsuod kang Jehova ug makahatag niyag tinuod nga kalipay.—Sal. 1:​1-3.

16. Nganong maayo nga padayon tang maningkamot nga mouswag sa atong paagi sa pagpanudlo?

¹⁶ Makapalipay kaayo ang pagtudlo sa uban bahin kang Jehova. Ug sa bag-ong kalibotan, mas daghan pa tag kinahanglang tudloan. Busa hinaot nga padayon tang maningkamot nga ipakita ang personal nga interes sa mga tawo, gamiton ang Pulong sa Diyos sa pagtudlo nila, ug tabangan sila nga magpokus kang Jehova. Kon ato ning himoon, mouswag gyod ta sa atong paagi sa pagpanudlo.