Tabangi ang Uban nga Mailhan Pag-ayo si Jehova

1. Unsay imong bation dihang mouswag ang imong Bible study?

UNSAY imong bation dihang ang imong Bible study mosugod nag tambong sa mga tigom, mokomento na, mosangyaw na sa uban, ug sa ngadtongadto modesisyon nga ipahinungod ang iyang kaugalingon kang Jehova nga Diyos? Walay duhaduha nga malipay gyod ka. Siyempre, nahibalo ta nga si Jehova gyod ang nagtabang sa atong study nga mouswag sa espirituwal. Tungod ana, mapasalamaton kaayo ta niya ug mapalihok gyod ta nga dayegon siya.—1 Cor. 3:​5-9; 3 Juan 3, 4.

2. Unsay gusto ni Jehova para sa mga Bible study? (1 Timoteo 2:​3, 4)

² Kabubut-on sa Diyos nga “ang tanang matang sa tawo maluwas ug makakat-on sa tukmang kahibalo sa kamatuoran.” (Basaha ang 1 Timoteo 2:​3, 4.) Gusto ni Jehova nga mahibalo gyod ang mga tawo bahin niya ug sa iyang katuyoan. (Jer. 9:24) Aron mahimo na, kinahanglan silag tukmang kahibalo. Sa orihinal nga pinulongan, ang pulong nga gihubad “tukmang kahibalo” wala magpasabot nga ang usa igo lang mokuhag impormasyon bahin sa Diyos. Ang usa ka eskolar sa Bibliya nag-ingon nga kinahanglang ang iyang mga nakat-onan “makausab gyod sa iyang kinabuhi.” Sa ato pa, kon ang atong Bible study makaila na gyod kang Jehova, ipadapat niya sa iyang kinabuhi ang iyang mga nakat-onan. Kon iya nang himoon, mabatonan niya ang paglaom nga “kinabuhing walay kataposan.”—Juan 17:3.

3. Unsay atong hisgotan niining artikuloha?

³ Gihatagan ta ni Jehova ug pribilehiyo nga tabangan ang uban nga mailhan siya. Niining artikuloha, atong hisgotan ang mosunod nga mga pangutana: Nganong kinahanglang mailhan pag-ayo sa atong mga Bible study si Jehova? Unsaon nato sila pagtabang nga makakat-on bahin kang Jehova ug mapadapat ang ilang mga nakat-onan bahin niya?

TABANGI ANG IMONG BIBLE STUDY NGA MAILHAN PAG-AYO SI JEHOVA

4. Base sa Marcos 12:​30, unsay tumong nato nga makat-onan sa atong Bible study?

⁴ Si Jesus miingon nga ang kinadak-ang sugo mao ang paghigugma kang Jehova sa tibuok natong kasingkasing, kalag, hunahuna, ug kusog. (Basaha ang Marcos 12:30.) Ang atong Bible study kinahanglan nga makaila pag-ayo kang Jehova aron makakat-on siya sa paghigugma kaniya. Dili nato gusto nga magpabawtismo siya tungod lang nato, o kay nakauyon siya sa atong mga pagtulon-an, o kay ganahan siya sa mga igsoon sa kongregasyon. Hinuon, gusto nato nga magpabawtismo siya tungod sa iyang gugma kang Jehova. Busa dihang magdumala tag pagtuon sa Bibliya, tumong nato nga mailhan gyod sa atong study si Jehova ug makakat-on siya sa paghigugma Kaniya.

5. Unsay determinadong himoon sa imong Bible study kon nahigugma siya kang Jehova?

⁵ Kon ang imong Bible study nakaila na pag-ayo kang Jehova ug nakakat-on na sa paghigugma niya, mas sayon na para sa imong study nga motuman sa mga sugo ni Jehova. Si Jesus miingon: “Aron mahibalo ang kalibotan nga gihigugma nako ang Amahan, akong ginabuhat ang gisugo kanako sa Amahan.” (Juan 14:31) Sama kang Jesus, kon ang imong study tinuod nga nahigugma kang Jehova, mapalihok siya nga mosunod ug mounong niya.—1 Juan 5:3.

6. Sa unsang paagi ang pagkaila kang Jehova makatabang sa imong study dihang mohimo siyag mga desisyon? Iilustrar.

⁶ Ang mga Bible study nga nakaila pag-ayo kang Jehova mas dakog purohan nga makahimog maalamong mga desisyon. Hunahunaa ni nga ilustrasyon: Ang piloto dili makapalupad ug eroplano kon igo lang niyang tun-an ang manual kon unsaon ni pag-operate o kon mokuha ra siyag eksam. Hinuon, kinahanglang kadaghan siyang makasulay ug palupad ani. Sa ngadtongadto, mahanas na siya ug makamao nang mo-adjust sa iyang pagpalupad sa eroplano bisan sa lainlaing kahimtang sa panahon. Sa samang paagi, mas mailhan sa imong study si Jehova dili lang panahon sa inyong pagtuon, kondili dihang maeksperyensiyahan niya mismo ang mga kaayohan sa pagpadapat sa mga prinsipyo sa Bibliya. Samtang magkadaghan ang iyang kahibalo bahin kang Jehova ug makita niya kon giunsa siya pagtabang sa iyang langitnong Amahan, mas makahimo siyag maalamong mga desisyon sa bisan unsang situwasyon.

7. Unsay nakatabang kang Jose sa paghimog maayong desisyon?

⁷ Nailhan kaayo ni Jose si Jehova, ug mao nay nakatabang niya sa paghimog maayong desisyon dihang gitental siya sa asawa ni Potipar. Sukad sa pagkabata ni Jose, seguradong nakadungog na siya bahin sa nahitabo kang Adan ug Eva ug sa estorya bahin kang Abraham ug Sara. (Gen. 2:24; 20:​3, 6) Ang maong mga asoy nakatabang niya nga mahibalo kon unsa ka bililhon para kang Jehova ang gasa nga kaminyoon ug seksuwal nga relasyon. Kay nailhan kaayo ni Jose si Jehova, wala siya magpatental sa asawa ni Potipar. Siya miingon: “Dili ko makaako sa pagbuhat niining dakong pagkadaotan ug magpakasala sa Diyos!” (Gen. 39:​7-9) Nahibalo gyod si Jose kon unsay maayo ug daotan sa mga mata ni Jehova, ug nasabtan niya kon unsang mga binuhatan ang makapasakit sa iyang Diyos. Tungod ana, nakahimo siyag maalamong desisyon. Sa samang paagi, kon tabangan nato ang atong mga study nga mailhan pag-ayo si Jehova ug makakat-on kon unsay dalawaton para niya, makahimo pod silag mga desisyon nga makapalipay kang Jehova.

TUDLOI ANG IMONG BIBLE STUDY BAHIN KANG JEHOVA

8. Unsaon nimo paggamit ang librong Mabuhi Ka Hangtod sa Hangtod! aron tabangan ang imong Bible study nga mailhan pag-ayo si Jehova?

⁸ Unsaon nimo pagtabang ang imong Bible study nga mailhan pag-ayo si Jehova? Si Jehova migamit ug kapig 50 ka pangutana aron tabangan si Job nga mas mailhan pa Siya. (Job 38:1–41:34) Puwede pod nato nang himoon. Gamiton nato ang mga pangutana diha sa librong Mabuhi Ka Hangtod sa Hangtod! kay gidisenyo ni aron tabangan ang mga Bible study nga anam-anam nga makakat-on bahin sa personalidad ni Jehova. (Tan-awa ang kahong “Mga Pangutana nga Magamit Nato sa Pagtudlo.”) Busa gamita ni nga mga pangutana kay dako nig tabang sa imong study nga mas mailhan pa si Jehova.

9-10. (a) Unsay makatabang sa mga Bible study nga mas makakat-on pa bahin kang Jehova dihang magbasa sila sa Bibliya? (Santiago 5:11) (b) Paghatag ug pananglitan kon sa unsang paagi ang usa ka asoy sa Bibliya makatabang nato nga mahibalo kon unsay makapalipay ug dili makapalipay kang Jehova.

⁹ Bisag dihang bag-o pa natong gidumalahan ug pagtuon ang atong mga Bible study, dasigon na nato sila nga regular nga magbasa sa Bibliya.a Unsaon nato sila pagtabang aron nga mas makakat-on sila bahin kang Jehova sa ilang pagbasa? Puwede tang mosugyot nga kada human nilag basa ug usa ka asoy sa Bibliya, konsiderahon nila kon nganong gipasulat kini ni Jehova diha sa iyang Pulong ug kon unsang mga hiyas ni Jehova ang ilang makat-onan. Mao nay gihimo sa tinun-ang si Santiago dihang iyang gipamalandong ang estorya bahin kang Job. Si Santiago wala lang basta magpokus sa paglahutay ni Job kondili sa mga hiyas pod ni Jehova, nga Siya mabination kaayo ug maluluy-on.—Basaha ang Santiago 5:11.

¹⁰ Gusto nato nga makakat-on ang atong mga giestadihan kon unsay makapalipay ug dili makapalipay kang Jehova. Ila ning makita dihang magbasa silag mga asoy sa Bibliya. Pananglitan, ibutang ta nga gigamit sa imong Bible study ang chart nga “Sugdi ang Pagbasa sa Bibliya” sa librong Mabuhi Ka Hangtod sa Hangtod!, ug napili niyang basahon ang estorya bahin kang Daniel. Puwede nato siyang dasigon nga pamalandongon ni nga mga pangutana: ‘Ngano kahang giluwas ni Jehova si Daniel? Unsay gitudlo niini kanako bahin sa kon unsay makapalipay kang Jehova?’ (Dan. 6:​10, 22) ‘Unsay nahitabo niadtong mga nag-akusar kang Daniel? Unsay gitudlo niini kanako bahin sa kon unsay makapasuko kang Jehova?’ (Dan. 6:​4, 5, 24) Puwede pod nato siyang dasigon nga maghunahuna kon unsa pang mga hiyas ni Jehova ang iyang makat-onan sa maong asoy.—Dan. 6:​26, 27.

11. Unsaon nato pagtabang ang atong Bible study aron iyang masabtan nga gikan gyod kang Jehova ang iyang mga nakat-onan?

¹¹ Malipay gyod ta dihang maapresyar sa atong study ang iyang mga nakat-onan gikan sa Bibliya. Pero kinahanglang tabangan nato siya nga makita nga ang tanan niyang nakat-onan gikan gyod kang Jehova, ang Dakong Instruktor. (Isa. 30:​20, 21) Pasalamatan tingali ta sa atong study sa iyang mga nakat-onan ug dayegon pa gani sa atong paagi sa pagtudlo. Dili man hinuon sayop ang iyang gihimo. Pero angay nato siyang pahinumdoman nga si Jehova ang takos niyang dayegon ug pasalamatan sa iyang mga nakat-onan.

TABANGI ANG IMONG BIBLE STUDY NGA MAPADAPAT ANG IYANG NAKAT-ONAN

12-13. Kon ang Bible study nakaila pag-ayo kang Jehova, sa unsang paagi ni makatabang niya dihang naa siyay malibgan sa usa ka asoy sa Bibliya? (Tan-awa sab ang hulagway.)

¹² Makabenepisyo gyod ta sa atong mga nakat-onan kon ato ning ipadapat sa atong kinabuhi. Unsaon nimo pagtabang ang imong Bible study nga mapadapat ang iyang mga nahibaloan bahin kang Jehova? Una, tudloi siya nga hinumdoman kanunay ang iyang nakat-onan bahin kang Jehova kay makatabang ni niya dihang magbasa siyag mga asoy sa Bibliya nga maglisod tingali siyag sabot. Pananglitan, dihang naa siyay mabasa nga mga asoy bahin sa paghukom ni Jehova, maglibog tingali siya kon nganong gisilotan ni Jehova ang uban nga nakasala pero naa poy uban nga wala ra niya siloti. Unsaon nimo siya pagtabang nga masabtan ang panghunahuna ni Jehova?

¹³ Puwede nimong dasigon ang imong study nga pamalandongon ang iyang mga nakat-onan bahin kang Jehova. Pananglitan, unsa ka importante kang Jehova ang kinabuhi? (2 Ped. 3:9) Unsa ka dako ang sakripisyo nga iyang gihimo aron luwason ta—bisan pa sa atong pagkamakasasala? (Efe. 2:​4, 5) Silotan ba ni Jehova bisan ang mga tawo nga dili unta angayng silotan? O konsentihon ra ba niya kadtong nakahimog daotan? (Ex. 34:​6, 7) Usahay, dili ipatin-aw sa Bibliya ang tanang detalye kon nganong gihimo ni Jehova ang usa ka butang, maong naa tingali mga panahon nga dili ta kasabot sa iyang gihimong desisyon. Pero dili ta kinahanglang mahibalo sa tanang detalye. Ngano? Kay nakaila kaayo ta sa atong Diyos, ug kombinsido ta nga kanunay gyong matarong ang iyang mga desisyon.

14. Unsaon nimo pagtabang ang imong Bible study kon naa siyay wala mauyoni nga igsoon diha sa kongregasyon?

¹⁴ Niay laing paagi nga matabangan nato ang atong Bible study nga mapadapat ang iyang nakat-onan bahin kang Jehova. Ibutang ta nga nagtambongan na siya sa mga tigom, pero naa siyay wala mauyoni nga igsoon kay tingali naay nahimo ang igsoon nga nakapandol niya. Unsay imong mahimo aron matabangan ang imong study? Puwede nimo siyang dasigon nga pamalandongon kon unsay panglantaw ni Jehova sa mga igsoon. Pananglitan, unsang sakripisyo ang gihimo ni Jehova para sa mga igsoon aron ipakita ang iyang gugma para nila? (Juan 3:16) Unsa ka importante para kang Jehova ang panaghiusa sa iyang katawhan? (Sal. 133:1) Unsay iyang bation dihang maningkamot ta nga dili mabungkag ang maong panaghiusa? (2 Cor. 13:11) Tabangi ang imong study nga makita nga dihang magpokus ta sa maayong mga kinaiya sa uban imbes sa ilang mga kahuyangan, mapalipay gyod nato si Jehova.

15-16. (a) Dihang ang imong Bible study kinahanglang mohimog dakong desisyon, unsaon niya pagsundog si Jesus? (b) Giunsa pagtabang ni Marianne ang iyang study sa paghimog maayong desisyon? (Tan-awa sab ang hulagway.)

¹⁵ Matabangan pod nimo ang imong study nga mapadapat ang iyang mga nakat-onan bahin kang Jehova dihang kinahanglan siyang mohimog mga desisyon. Unsaon nimo siya pagtabang? Puwede nimong ipakita niya ang leksiyon 35 sa librong Mabuhi Ka Hangtod sa Hangtod! nga nag-ulohang “Kon Unsaon Paghimog Maayong mga Desisyon.” Pero komosta kon malisdan gihapon siyag himog desisyon bisan pag iya na ning giampo ug naka-research na siya? Tingali sa kadaghang prinsipyo sa Bibliya nga kinahanglan niyang konsiderahon, naglibog siya kon unsay mapadapat sa iyang kahimtang. Kon mao, puwede nimo siyang tabangan sa pagpamalandong sa ehemplo ni Jesus. Nganong nakahimo si Jesus ug maayong mga desisyon? Siya miingon: “Kanunay nakong gibuhat ang mga butang nga makapahimuot [sa akong Amahan].” (Basaha ang Juan 8:29.) Busa dasiga ang imong study nga pangutan-on ang iyang kaugalingon, ‘Base sa akong mga na-research ug sa akong mga nakat-onan bahin kang Jehova, unsa nga desisyon ang makapalipay niya?’ Pahinumdomi ang imong study nga kon iyang himoon kon unsay makapalipay kang Jehova, mao nay maayo nga desisyon.

¹⁶ Konsideraha ang eksperyensiya sa usa ka babaye nga taga-Chile nga nagtuon sa Bibliya. Gipresyur siya sa iyang pamilya nga dawaton ang dakog suweldo nga trabaho, pero ang nakaapan, makababag ni sa iyang pagtambong sa tigom. Si Marianne, nga maoy nag-study niya, miingon: “Gidasig nako siya nga pamalandongon kon ang iyang himoong desisyon makapalipay ba o makapaguol kang Jehova. Ako pod siyang gidasig nga espesipikong iampo ang iyang situwasyon ug panid-an kon unsaon ni pagtubag ni Jehova. Ingong resulta, iyang gibalibaran ang trabaho, ug makapalipay kay sa ngadtongadto nakakita siyag trabaho nga dili ra makababag sa iyang pagtambong sa mga tigom.” Matikdi nga wala sultihi ni Marianne ang iyang study kon unsay himoon. Hinuon, iya siyang gitabangan sa pagpamalandong sa iyang mga nakat-onan bahin kang Jehova. Tungod adto, mas nagkasuod si Marianne ug ang iyang Bible study. Ug dili lang kana. Ang iyang study mas nasuod pod kang Jehova. Si Marianne miingon: “Nakat-onan sa akong study nga kon unahon nato si Jehova, dili gyod ta niya pasagdan.”

PANALANGINAN GYOD KADTONG MGA NAKAILA PAG-AYO KANG JEHOVA

17. Unsay gusto gyod nato nga makat-onan sa atong mga Bible study?

¹⁷ Ang atong mga Bible study daghag makat-onan nga importanteng mga pagtulon-an panahon sa ilang pagtuon sa Bibliya. Makakat-on sila sa pangunang mga doktrina sama sa kon unsay kahimtang sa mga patay, kon unsa ang lukat, ug kon unsay himoon sa Gingharian sa Diyos. Makakat-on pod sila bahin sa atong organisasyon sama sa atong mga tigom, kon unsay responsibilidad sa mga ansiyano, ug kon kinsa ang Nagamandong Lawas. Pero dili kay kana ra ang gusto nato nga makat-onan sa atong mga Bible study. Labaw sa tanan, gusto nato nga makakat-on gyod sila bahin kang Jehova ug mailhan nila siya pag-ayo.

18. Unsang mga panalangin ang madawat niadtong mga nakaila pag-ayo kang Jehova?

¹⁸ Pribilehiyo gyod para nato nga matabangan ang uban nga makaila pag-ayo kang Jehova. Kadtong mga nasuod ug nagsimba niya nakadawat ug mga panalangin bisan karon kay malipayon kaayo sila sa ilang kinabuhi. (Sal. 25:​12-15) Ug sa umaabot, naay paglaom nga mabuhi sa walay kataposan kadtong “makabatog kahibalo sa usa nga matuod,” si Jehova. (1 Juan 5:20) Pero dili kay kana ra. Ang Bibliya nag-ingon nga “nailhan” ni Jehova kadtong mga naningkamot nga makakat-on sa paghigugma kaniya. (1 Cor. 8:3) Oo, makapalipay gyod nga gipabilhan ta sa Labing Gamhanang Diyos ug giisip pa gani ta niya nga iyang mga higala. Panalangin kaayo nga mailhan nato ang bugtong matuod nga Diyos!