Paningkamot nga Mouswag Aron Mabawtismohan

1. (a) Unsay mga kaayohan sa pagpabawtismo? (b) Unsay atong hisgotan niining artikuloha?

NAKAPAHINUNGOD na ba ka kang Jehova ug nabawtismohan na? Kon mao, nakahangyo na ka kang Jehova ug maayong konsensiya. (1 Ped. 3:21) Nakahatag pod kag maayong ehemplo sa mga batan-on ug sa mga bag-ohan sa inyong kongregasyon. Maayo kaayo ang imong nahimo nga desisyon! Pero komosta kon dili pa ka bawtismado? Walay duhaduha nga gimahal nimo si Jehova ug gusto nimong buhaton ang iyang kabubut-on. Nahibalo pod ka nga importante ang pagpabawtismo aron mapasaylo ang imong mga sala ug madawat ang pag-uyon ni Jehova. (Buh. 2:​38-40) Pero basig nagduhaduha gihapon ka. Busa unsay makatabang nimo? Niining artikuloha, atong hisgotan (1) kon nganong ang uban nagduhaduha sa pagpabawtismo, (2) kon nganong maayo nga hinumdoman nato pirme nga hapit na ang kataposan, ug (3) kon unsay mga kaayohan kon maningkamot ta karon nga mouswag ug mabawtismohan.

KON NGANONG ANG UBAN NAGDUHADUHA

2. Nganong nagduhaduha man ang uban sa pagpabawtismo?

² Ang uban nagduhaduha nga magpabawtismo tungod sa kahadlok. Pananglitan, gusto gyod unta nilang moalagad kang Jehova, pero nahadlok sila nga basig dili nila mapalipay si Jehova bisag unsaon pa nilag paningkamot. Kon mao nay imong gibati, puwede nimong basahon ug balik ang mga teksto sa Bibliya nga nagpasalig nga nahibalo si Jehova sa imong mga limitasyon ug nga malipay siya nimo kon imong ginahatag niya ang imong pinakamaayo. (Sal. 103:​13, 14; Col. 3:23) Kon nahadlok ka sa mga pagsupak o paglutos, hangyoa si Jehova nga masundog ang dakong pagsalig sa salmista kinsa miingon: “Si Jehova dapig kanako; dili ko mahadlok. Unsay mabuhat sa tawo kanako?”—Sal. 118:6.

3. Unsa pay laing nakapugong sa uban sa pagpabawtismo? (Tan-awa sab ang hulagway.)

³ Ang uban nagduhaduha nga magpabawtismo bisag gimahal nila si Jehova. Ngano? Kay naghunahuna sila nga gamay pa silag nahibaloan. Pero unsa gyod diay ka daghan ang kinahanglan nimong mahibaloan? Hunahunaa ni nga pananglitan diha sa Bibliya. Human matay-og sa kusog nga linog ang prisohan diin nabilanggo si apostol Pablo ug si Silas, ilang gisangyawan ang guwardiya ug ang iyang panimalay. Posibleng nasabtan sa guwardiya ug sa iyang pamilya nga ang nahitabo maoy milagro gikan sa Diyos. Daghan pod silag nakat-onan niadtong gabhiona bahin kang Jehova ug kang Jesus. Tungod ana, napalihok sila nga ‘magpabawtismo sa walay langan.’ (Buh. 16:​25-33) Sa samang paagi, kon nakaila na ka kang Jehova, nahigugma na niya sa tibuok nimong kasingkasing, nahibalo na sa pangunang mga pagtulon-an sa Bibliya, naghinulsol na sa imong mga sala, ug determinado na nga padayong mosunod sa iyang mga sugo, nagpakita na nga andam na ka para sa bawtismo.—Mar. 12:30.

4. Sa unsa mas nagpokus ang uban nga tungod ana nagduhaduha silang magpabawtismo? (Tan-awa sab ang hulagway.)

⁴ Ang uban gustong moalagad sa Diyos, pero nagpokus sila sa mga sakripisyo nga kinahanglan nilang himoon. Siyempre, natural lang nga hunahunaon nato ang mga epekto sa atong himoon nga mga desisyon. (Luc. 14:​27-30) Pero ang uban mas nagpokus sa kon unsa ka daghan ang mawala nila kon magpabawtismo sila. Hunahunaa ang eksperyensiya ni Candace. Sukad sa pagkabata, nahibalo na siya sa kamatuoran, pero wala siya modesisyon nga magpabawtismo. Dihang nagpa-Bible study siyag balik pagkadako na niya, siya miingon: “Nahibalo na man ko sukad pa sa una kon unsay angay nakong himoon para kang Jehova. Pero nagduhaduha lang ko kay nalingaw man god ko sa kalibotan. Naglisod kog biya adto.” Ang uban pod nabalaka nga basig dili nila makab-ot ang taas nga sukdanan ni Jehova. Nahadlok sila nga basig human sa ilang bawtismo, makahimo silag seryosong sala ug matangtang sa kongregasyon. Kon mao nay imong gibati, unsay makatabang nimo?

5. Kon naghunahuna ta kon magpabawtismo ba ta, sa unsa ta angayng mas magpokus? (Mateo 13:​44-46)

⁵ Kon naa tay gustong paliton, dili lang presyo ang atong tan-awon; ato pong tan-awon kon mapuslan ba gyod ni nato. Kon atong makita nga dako kaayo nig gamit nato ug dili ta alkanse sa atong magasto, ato tingali dayon ning paliton. Sa susama, kon naghunahuna ta kon magpabawtismo ba ta, angay tang magpokus sa kon unsa ka dako ang kaayohan kon naa tay maayong relasyon kang Jehova, imbes nga maghunahuna lang sa daghang sakripisyo nga kinahanglan natong himoon. Si Jesus migamit ug duha ka ilustrasyon bahin ani. (Basaha ang Mateo 13:​44-46.) Niining duha ka ilustrasyon, gibaligya sa lalaki ang tanan niyang kabtangan aron mapalit ang usa ka butang nga dako kaayog bili. Sa samang paagi, dako pod kaayog bili ang kamatuoran bahin sa Gingharian. Kon naghunahuna ka kon dili ba masayang ang imong mga sakripisyo para sa kamatuoran, hunahunaa pag-ayo ang mga ilustrasyon ni Jesus. Puwede nimong pangutan-on ang imong kaugalingon: ‘Nagtuo ba gyod ko nga dakog bili ang mga kamatuoran nga akong nakat-onan? Gipabilhan ba nako ang akong relasyon kang Jehova, ang paglaom nga iyang gihatag nako, ug ang akong mahigugmaong espirituwal nga pamilya?’ Kon oo ang imong tubag, padayong palig-ona ang imong apresasyon sa kamatuoran. Pero kon nagduhaduha pa ka, susiha kon unsa gyoy nakapugong nimo sa pagpabawtismo.

6. Unsay makatabang aron naa tay “madinawaton ug maayong kasingkasing”?

⁶ Sa ilustrasyon ni Jesus bahin sa magpupugas, iyang gihisgotan ang mga kahimtang sa kasingkasing nga posibleng makapugong sa usa ka tawo nga mouswag sa espirituwal. Pero gihisgotan pod ni Jesus nga ang uban naay “madinawaton ug maayong kasingkasing,” ug mopadapat sila sa ilang nakat-onan. (Luc. 8:​5-15) Komosta kon nakita nimo nga dili pa bug-os ang imong kasingkasing para kang Jehova? Kon mao, ayawg kaluya. Makapangayo ka niyag “bag-ong kasingkasing” nga andam mosunod sa iyang paggiya. Hangyoa si Jehova nga pahumokon ang imong kasingkasing aron mapalihok ka nga ipadapat ang imong mga nakat-onan.—Ezeq. 18:31; 36:26.

7-8. Nganong ang ubang batan-on wala pa man magpabawtismo? (Tan-awa sab ang hulagway.)

⁷ Naay mga batan-on nga nahigugma kang Jehova pero wala pa magpabawtismo tungod sa impluwensiya sa uban. Pananglitan, diha sa eskuwelahan, sultihan tingali sa ubang teacher ang mga estudyante nga kinahanglang andam silang modawat sa kon unsa nay komon nga ginahimo karon sa kadaghanan, bisan pag sayop ni sa panglantaw sa Diyos. Pero kana nga tambag moresultag daghang problema. (Sal. 1:​1, 2; Prov. 7:​1-5) Malikayan nimo ni nga mga problema kon sundogon nimo ang ehemplo sa salmista nga miingon kang Jehova: “Mas lawom ang akong pagsabot kay sa tanan nakong magtutudlo, kay gipamalandong nako ang imong mga pahinumdom.”—Sal. 119:99.

⁸ Usahay pod, pugngan sa ubang Saksi nga mga ginikanan ang ilang mga anak nga magpabawtismo. Basig grabe silang makadasig sa ilang mga anak nga magpokus pag-ayo sa pag-eskuwela, o wala nila matabangi ang ilang mga anak sa paghimog espirituwal nga mga tumong. Kon gusto nimo nga mas matabangan pa ka sa imong mga ginikanan nga mouswag sa espirituwal, puwede kang makig-estorya nila bahin ani. Hinumdomi nga bisag bata pa ka, puwede kang masuod kang Jehova.—Prov. 20:11.

9. Ngano tingaling ang uban mag-unyaunya sa pagpabawtismo?

⁹ Ang uban nga puwede na untang magpabawtismo mag-unyaunya gihapon kay tingali gusto nilang makigdungan ug pabawtismo sa ilang higala o kapamilya. Aw, nindot man gyod kon dungan mog pabawtismo sa usa nga suod nimo. Pero angay ba nga mag-unyaunya kag pabawtismo tungod lang ana? Hinumdomi nga ang pagpahinungod maoy imong personal nga panaad kang Jehova, maong kon andam na kang magpabawtismo, dili kinahanglan nga maghulat ka kon kanus-a magpabawtismo ang uban.—Roma 14:12.

KON NGANONG HINUMDOMAN NATO PIRME NGA HAPIT NA ANG KATAPOSAN

10. Nganong ang uban wala pa tingali maningkamot nga mouswag sa espirituwal?

¹⁰ Gawas pa sa mga rason nga ato nang nahisgotan, ang uban wala pa maningkamot nga mouswag sa espirituwal kay naghunahuna sila nga dugay pa moabot ang kataposan. Pero sakto ba na nga panghunahuna? Gipasidan-an ni Jesus ang iyang mga tinun-an: “Kamo . . . kinahanglang andam kanunay, kay sa oras nga wala ninyo damha, ang Anak sa tawo moabot.”—Luc. 12:40.

11. Samtang mas mailhan nato si Jehova, unsa may epekto ana sa atong pagsunod sa iyang mga sugo? (Salmo 119:60)

¹¹ Ang atong gugma kang Jehova mao ang angayng magpalihok nato sa pagpahinungod sa atong kinabuhi kaniya. Samtang mas mailhan nato ang atong mahigugmaong Amahan, mas mapalihok ta nga higugmaon ang iyang mga sugo ug tumanon dayon kini. (Basaha ang Salmo 119:60.) Matikdi pod ang laing importanteng rason kon nganong angay natong tumanon dayon ang mga sugo ni Jehova. Ang tinun-ang si Santiago miingon nga walay usa nato ang nahibalo kon unsay mahitabo nato sa sunod nga adlaw. Dili gani ta segurado kon buhi pa ba ta ugma aron himoon “kon unsay husto,” maong buhaton na nato karon kon unsay angay natong buhaton.—Sant. 4:​13-17.

12. Unsay atong makat-onan sa ilustrasyon ni Jesus bahin sa ubasan?

¹² Pero basin makapangutana ta: Dili ba sa ilustrasyon ni Jesus bahin sa ubasan, siya miingon nga kadtong mitrabahog usa lang ka oras parehas rag nadawat nga suhol niadtong nagtrabahog tibuok adlaw? Aw, tinuod na. Pero matikdi kon nganong ulahi na sila nakasugod ug trabaho. Sila miingon: “Kay wala may nagpatrabaho namo.” Sa ato pa, kadto nga mga trabahante dili tapolan; wala lang gyoy mihatag nilag trabaho. Pero dihang naa nay nagpatawag nila, mitrabaho dayon sila. (Mat. 20:​1-16) Karon pod, gitawag ta ni Jesus aron mahimong iyang tinun-an ug moapil sa buluhaton sa Gingharian. Busa angay tang molihok dayon ug dili maglangan sa pagsunod kaniya.

13. Unsang leksiyon ang atong makat-onan sa asawa ni Lot?

¹³ Ang uban naghunahuna nga ayha na lang sila moalagad sa Diyos kon duol na kaayo ang kataposan. Pero ang tinuod, mas malisdan ta kon nianang panahona pa ta mohimog mga kausaban. Nasayod si Jesus ani, maong iyang gipasidan-an ang iyang mga tinun-an: “Hinumdomi ang asawa ni Lot.” (Luc. 17:​31-35) Nahibalo kaayo ang asawa ni Lot nga hapit nang laglagon sa Diyos ang Sodoma ug Gomora, pero naglisod siyag biya sa mga butang nga giisip niyang importante. (Gen. 19:​23-26) Ang nahitabo niya nagpahinumdom nato nga ang pultahan para sa kaluwasan dili magpabiling abli hangtod sa hangtod. Moabot ra gyod ang panahon nga sirad-an ni sa Diyos, ug ulahi na unya ang tanan para niadtong wala molihok.—Luc. 13:​24, 25.

14. Nganong importante nga hatagan natog pagtagad ang katumanan sa mga tagna sa Bibliya bahin sa kataposan?

¹⁴ Ang mga panghitabo karon sa kalibotan nagpakita nga nagakatuman na ang mga tagna sa Bibliya bahin sa kataposan. Bisan kon dili pa ka apektado karon niini nga mga panghitabo, ang pagkahibalo nga nagakahitabo na ni sa lainlaing lugar makadasig nimo nga molihok na karon aron mouswag sa espirituwal ug mabawtismohan. Hunahunaa ang pananglitan sa mga Kristohanon sa unang siglo. Giingnan sila ni apostol Pedro nga mahimong “alisto,” o “andam,” kay “ang kataposan sa tanang butang duol na.” (1 Ped. 4:7; footnote) Ang “kataposan” nga gihisgotan dinhi nagtumong sa kalaglagan sa Hudiyong sistema. Kadtong mga gisulatan ni Pedro nagpuyo layo sa Jerusalem, maong dili sila direktang apektado sa kalaglagan sa maong siyudad. (1 Ped. 1:1) Pero dihang nakita nila nga natuman ni nga tagna, mas midako ang ilang pagsalig nga matuman pod ang ubang mga saad ni Jehova. Sa susama, dihang makita nimo nga nagakatuman na ang mga tagna bahin sa kataposan, mas mapalihok ka nga mahimong alisto ug maningkamot nga mouswag aron mabawtismohan.

15. Unsaon nato pagpakita nga andam ta sa pag-abot sa adlaw ni Jehova? (2 Pedro 3:​10-13)

¹⁵ Sa ikaduhang sulat ni Pedro, iyang gipatin-aw kon unsay angay natong panglantaw sa umaabot nga adlaw ni Jehova sa paghukom. Niadtong panahona nga gisulat to ni Pedro, layo pa kaayo ang adlaw sa paghukom, pero giingnan gihapon ni Pedro ang mga Kristohanon nga ‘maghunahuna kanunay’ sa pag-abot nianang adlawa. (Basaha ang 2 Pedro 3:​10-13.) Sa atong bahin, mapakita pod nato nga naghunahuna ta sa adlaw ni Jehova kon andam o naghinamhinam ta sa pag-abot ani. Mahimo nato ni pinaagi sa atong “balaang panggawi ug mga buhat nga nagpakitag debosyon sa Diyos.” Hunahunaa kon unsay bation ni Jehova sa imong “mga buhat nga nagpakitag debosyon” kaniya! Seguradong malipay siyang makita nga imong ipahinungod ang imong kinabuhi para niya ug magpabawtismo.

KON NGANONG MAAYO NGA MOLIHOK NA KA KARON

16. Kanus-a ang pinakamaayong panahon nga maningkamot kang mouswag aron mabawtismohan? (2 Corinto 6:​1, 2) (Tan-awa sab ang mga hulagway.)

¹⁶ Karon na ang pinakamaayong panahon nga maningkamot ka nga mouswag aron mabawtismohan. (Basaha ang 2 Corinto 6:​1, 2.) Nakita sa Etiopianhong eunuko nga naestorya ni Felipe nga kinahanglan siyang magpabawtismo dayon. Dihang nasabtan na niya ang maayong balita ug nakakitag kahigayonan nga mabawtismohan, wala siya maghunahuna: ‘Sa sunod na lang kaha no? Ganahan pa man ko makakat-og dugang bahin sa maayong balita. Naa pa bitaw laing tubig sa unahan.’ Hinuon, iyang gipangutana si Felipe, “Unsay nakapugong nako nga mabawtismohan?” (Buh. 8:​26, 27, 35-39) Maayo gyod nga ehemplo ang eunuko! Human siya mabawtismohi, siya ‘mipadayon sa iyang panaw nga malipayon.’

17. Sa unsa ta makasalig?

¹⁷ Kon nagduhaduha kang magpabawtismo, makasalig ka nga andam si Jehova nga motabang nimo aron masuod ka niya. (Roma 2:4) Tabangan pod ka niya nga mawala ang imong mga kahadlok o kabalaka ug makaya ang bisan unsang presyur nga posibleng nakapugong nimo sa pagpabawtismo. Dihang mabawtismohan na ka ug naa nay maayong konsensiya atubangan sa Diyos, makita tingali nimo nga ang “mga butang sa luyo” dili na importante. (Filip. 3:​8, 13) Hinuon, mas magpokus na ka sa “mga butang sa unahan,” sa katumanan sa mga saad ni Jehova para niadtong nagpahinungod sa ilang kaugalingon kaniya ug nagpabawtismo.—Buh. 3:19.