Ang Kahulogan sa Bawtismo

1. Unsay nagpakita nga ang bawtismo importanteng pagtulon-an sa Bibliya?

MALIPAY gyod ta kon naay mga bag-ong mabawtismohan! Mao pod nay gibati sa mga Kristohanon panahon sa ilang pinakaunang tigom niadtong Pentekostes 33 C.E. Sa maong tigom, dihay bawtismo ug pakigpulong nga nagpatin-aw kon unsa ni ka importante. (Buh. 2:​38, 40, 41) Si apostol Pablo miingon nga apil sa “una natong nakat-onan bahin sa Kristo . . . ang pagtulon-an bahin sa mga bawtismo.” (Heb. 6:​1, 2) Bisag pamilyar na ta bahin sa bawtismo, kinahanglan gihapon nato ning masabtan pag-ayo. Ngano?

2. Nganong kinahanglang masabtan nato pag-ayo kon unsa ang bawtismo?

² Aron mahimong lig-on ang balay, kinahanglan nga maayo kaayo nig pundasyon. Sa samang paagi, aron mahimong lig-on ang atong pagtuo, kinahanglang masabtan nato pag-ayo ang bawtismo. Importante ni dili lang para niadtong mga nagplanong magpabawtismo, kondili niadto pong dugay nang bawtismado. Maong niining artikuloha, atong tubagon ni nga mga pangutana: Unsay kahulogan sa bawtismo? Unsay ginahimo panahon sa bawtismo? Ug nganong kinahanglan tang mabawtismohan sa ngalan sa Amahan, sa Anak, ug sa balaang espiritu?

ANG KAHULOGAN SA IMONG BAWTISMO

3. Unsay kahulogan sa bawtismo?

³ Pinaagi sa bawtismo, imong gipakita sa publiko nga mituo na ka kang Jehova nga Diyos ug kang Jesu-Kristo, naghinulsol na sa imong mga sala, mihimo nag mga kausaban aron makaalagad kang Jehova, miila nga si Jesus ang gigamit sa Diyos aron luwason ang mga tawo, ug nanaad diha sa pag-ampo nga imo nang himoon ang kabubut-on sa Diyos ug magpasakop sa Iyang organisasyon. Dihang mohimo na ka ana nga panaad o pahinungod ug magpabawtismo, nagsugod na kag subay sa dalan padulong sa kinabuhing walay kataposan.

4. Unsay gisimbolohan sa pagtuslob diha sa tubig ug paghaw-as gikan ani? (Tan-awa sab ang hulagway.)

⁴ Dihang bawtismohan ka, bug-os kang ituslob sa tubig ug dayon haw-ason,a nga sama bag gilubong ka ug dayon gibanhaw. (Itandi ang Colosas 2:12.) Ang bawtismo haom nga nag-ilustrar sa dakong kausaban sa imong kinabuhi. Sa unsang paagi? Ang pagtuslob kanimo sa tubig nagpakita nga mihunong na ka sa imong daang pagkinabuhi. Ug ang imong paghaw-as sa tubig nagpakita nga magsugod na ka sa imong bag-ong kinabuhi nga nasentro sa pagbuhat sa kabubut-on sa Diyos.

5. Nganong ang imong ginahimo aron mabawtismohan maomao sa gihimo ni Noe aron matukod ang arka? (1 Pedro 3:​18-21)

⁵ Basaha ang 1 Pedro 3:​18-21. Ang imong ginahimo aron mabawtismohan puwedeng ipakasama sa gihimo ni Noe aron matukod ang arka. Kon bag-o pa lang kang nagkat-on bahin kang Jehova, basin mabug-atan ka sa paghunahuna sa kadaghan sa imong kinahanglang himoon. Basin makaingon pa gani ka nga dako kaayo ni nga trabaho, parehas sa pagtukod ni Noe sa arka. Kinahanglan ba gyod kang maningkamot pag-ayo para mabawtismohan? Kon bahin kang Noe, kinahanglan gyod niyang sundon ang pagkadisenyo ni Jehova sa arka aron maluwas siya ug ang iyang pamilya sa Lunop. Nahimo ni Noe ang iyang asaynment tungod sa iyang dakong pagtuo ug kay gitabangan siya sa Diyos. Sama kang Noe, kaya pod nimong himoon “ang tanang gisugo sa Diyos.”—Gen. 6:22.

6. Unsay gipasabot sa giingon ni apostol Pedro nga ang bawtismo makaluwas nato?

⁶ Sa bersikulo 21, si apostol Pedro miingon nga ang bawtismo “nagaluwas . . . kaninyo.” Siyempre, wala ni magpasabot nga ang pagtuslob sa tubig makaluwas na nato o makawala na sa atong mga sala. Ang dugo ni Jesus lang ang makahinlo nato gikan sa sala. (1 Juan 1:7) Bisan pa ana, ang bawtismo apil sa mga sugo sa Diyos nga kinahanglan natong himoon, ug pinaagi ani kita ‘naghangyo sa Diyos ug maayong konsensiya.’ Si Jehova malipay gyod sa pagtubag ana nga hangyo. Busa ang giingon ni Pedro nagpasabot nga ang bawtismo maghatag natog kahigayonan nga maluwas.

KON UNSAY GINAHIMO PANAHON SA BAWTISMO

7. Unsay kahikayan panahon sa bawtismo?

⁷ Ang Bibliya walay daghang gihatag nga detalye bahin sa bawtismo, gawas lang sa kinahanglanon nga ilusbog sa tubig ang bawtismohan. Bisan pa ana, ang mga prinsipyo sa Bibliya makatabang nato nga mahibalo kon unsay angayng himoon anang panahona—pananglitan, kon unsay isul-ob sa mga kandidato sa bawtismo ug kon unsay angayng himoon sa mga igsoon nga motan-aw. (1 Cor. 14:40; 1 Tim. 2:9) Kasagaran, ansiyano ang magbawtismo, pero likayan nato ang paghunahuna nga espesyal siya kay siya ang nahatagan ana nga pribilehiyo. (1 Cor. 1:​14, 15) Dili pod importante kon daghan o gamay ra ang nakakita sa bawtismo.—Buh. 8:36.

8. Unsa ang duha ka pangutana para sa mga kandidato sa bawtismo, ug nganong importante ni? (Buhat 2:​38-42) (Tan-awa sab ang hulagway.)

⁸ Ang Bibliya nag-ingon nga kinahanglan natong ‘ipahayag ang atong pagtuo ngadto sa uban’ kay kini “moresultag kaluwasan.” (Roma 10:​9, 10; tan-awa ang study note nga “publicly declare.”) Kay importante man ang bawtismo aron maluwas ta, haom lang nga ipahayag nato ang atong pagtuo nianang panahona. Tungod ana, naay duha ka pangutana para sa mga kandidato sa bawtismo. Una, “Naghinulsol ka na ba sa imong mga sala, gipahinungod ang imong kinabuhi kang Jehova, ug gidawat ang iyang paagi sa pagluwas pinaagi ni Jesu-Kristo?” Kini nga pangutana magpakita kon unsa nay ilang gihimo aron mahimong kuwalipikado sa bawtismo, ug maomao ni sa giingon ni Pedro sa mga tawo niadtong Pentekostes aron mabawtismohan sila. Ang ikaduhang pangutana, “Imo bang nasabtan nga ang imong bawtismo magpaila kanimo nga ikaw usa na ka Saksi ni Jehova ug bahin na ka sa organisasyon ni Jehova?” Kini nga pangutana magpahinumdom nato nga aron matuman nato ang atong saad sa pagpahinungod, kinahanglan tang mosunod sa direksiyon nga gihatag ni Jehova pinaagi sa iyang organisasyon ug mag-alagad niya kauban ang mga igsoon, sama sa gihimo sa unang siglong mga Kristohanon. (Basaha ang Buhat 2:​38-42.) Kadtong kinasingkasing nga motubag ug oo niini nga mga pangutana mahimong kuwalipikado sa bawtismo.

9. Unsay angayng himoon sa tanan nga gustong makadawat sa pag-uyon sa Diyos?

⁹ Bisan niadtong wala pa ka magtuon sa Bibliya, tingali buotan na ka daan ug wala ra maghimog seryosong mga sala. O kaha Saksi ang imong ginikanan ug gitudloan ka nila nga higugmaon si Jehova. Kon mao, kinahanglan pa ba kang maghinulsol ug magpabawtismo aron madawat ang pag-uyon sa Diyos? Aw oo. Bisag unsa pay atong kinabuhi sa una, angay natong ilhon nga kitang tanan nakapanunod ug sala, nga tungod ana wala tay maayong relasyon sa Diyos. (Sal. 51:5) Busa importanteng mas mailhan nato si Jehova kay magpalihok ni nato nga unahon kon unsay iyang gusto, dili ang atoa. Dayon maghinulsol ta sa atong mga sala ug magbag-o—sa ato pa, magkinabuhi na ta sa paagi nga makapalipay sa atong langitnong Amahan. Kon ato na ning mahimo, puwede na tang mabawtismohan.—Buh. 3:19.

10. Unsay angay nimong himoon kon nabawtismohan ka sa laing relihiyon?

¹⁰ Kon nabawtismohan na ka kaniadto sa laing relihiyon, kinahanglan gihapon kang mabawtismohan ingong Saksi ni Jehova. Ngano? Kay niadtong panahona, dili pa sakto ang imong nahibaloan bahin kang Jehova nga Diyos ug kang Jesus. Ug bisag nakapanaad na tingali ka sa Diyos nga moalagad ka niya, wala pa nimo bug-os masabti niadtong panahona ang kabubut-on sa Diyos. Hunahunaa pananglitan ang pipila ka tinun-an sa Efeso nga naestorya ni apostol Pablo. Bisag nabawtismohan na sila kaniadto, wala silay saktong kahibalo sa Kristohanong pagtulon-an. Maong gitudloan sila ni Pablo bahin kang Jesus, ug human ana nagpabawtismo silag balik.b (Buh. 19:​1-5) Karon sab, ang bawtismo dalawaton lang kon ibase ni sa saktong kahibalo bahin sa kabubut-on sa Diyos.

“SA NGALAN SA AMAHAN UG SA ANAK UG SA BALAANG ESPIRITU”

11. Unsay gipasabot sa pagpabawtismo “sa ngalan sa Amahan ug sa Anak ug sa balaang espiritu”? (Mateo 28:​18-20)

¹¹ Si Jesus nagsugo nga ang bag-ong mga tinun-an kinahanglang bawtismohan “sa ngalan sa Amahan ug sa Anak ug sa balaang espiritu.” (Basaha ang Mateo 28:​18-20.) Unsay iyang gipasabot? Sa Bibliya, ang “ngalan” sagad nagtumong sa reputasyon sa usa ka tawo. Puwede pod ning magtumong sa iyang posisyon ug awtoridad. Sa ato pa, dihang moingon tag “sa ngalan sa” o “sa ngalan ni,” atong giila ang awtoridad anang ngalana. (Itandi ang Mateo 10:41; tan-awa ang study note nga “because he is a prophet.”) Busa unsaon nimo pagpakita nga imong giila ang posisyon ug awtoridad sa Amahan ug sa Anak, apil na ang paggiya sa balaang espiritu sa Diyos?

12. Unsay gipasabot sa pagpabawtismo sa ngalan sa Amahan? (Pinadayag 4:11) (Tan-awa sab ang hulagway.)

¹² Sa ngalan sa Amahan. Atong giila nga si Jehova ang atong langitnong Amahan, nga maoy naghatag sa atong kinabuhi. Siya ang Labing Gamhanang Diyos, nga maoy naghimo sa tanang butang. (Basaha ang Pinadayag 4:11.) Ato pong giila nga siya ang Tigpatalinghog sa pag-ampo, ug dili ta mahadlok nga mogamit sa iyang ngalan sa matinahorong paagi dihang moampo ta niya ug dihang sultihan nato ang uban bahin niya. (Sal. 65:2) Pero dili lang kana ang gipasabot sa pagpabawtismo sa ngalan sa Amahan. Hinumdomi nga ang mga tinun-an nga naminaw kang Pedro panahon sa Pentekostes nahibalo na bahin kang Jehova. Pero aron mabawtismohan sila sa ngalan sa Amahan, kinahanglan nilang ilhon nga si Jehova mahigugmaong naghatag ug kaluwasan pinaagi kang Jesu-Kristo.—Roma 5:8.

13. Unsay gipasabot sa pagpabawtismo sa ngalan sa Anak? (Tan-awa sab ang hulagway.)

¹³ Sa ngalan sa Anak. Atong giila nga si Jesus ang bugtong Anak sa Diyos. Si Jesus “ang dalan,” ug pinaagi lang kaniya nga naa tay maayong relasyon kang Jehova. (Juan 14:6) Siya pod ang atong Manlulukat, kinsa namatay para nato aron makabaton tag kinabuhi. Tungod sa gihimo ni Jesus para nato, napalihok ta nga sundogon ang iyang ehemplo kada adlaw, dili lang panahon sa atong bawtismo. (1 Juan 2:6) Sama niya, naningkamot ta nga magkugi sa pagsangyaw. (Luc. 4:43) Andam pa gani tang molahutay sa mga paglutos ug mopadayon sa pag-alagad sa Diyos. (2 Tim. 3:12) Gitahod pod nato ang awtoridad ni Jesus ingong “ulo sa kongregasyon,” maong nagpasakop ta sa mga brader nga iyang gitudlo nga manguna ug moatiman nato.—Efe. 4:​8, 11, 12; 5:23.

14. (a) Unsay gipasabot sa pagpabawtismo sa ngalan sa balaang espiritu? (Tan-awa sab ang hulagway.) (b) Gawas pa sa bawtismo sa tubig, unsa pa ang ubang bawtismo sa mga dinihogan? (Tan-awa ang kahong “Ubang Bawtismo sa mga Dinihogan.”)

¹⁴ Sa ngalan sa balaang espiritu. Gidawat nato ang kamatuoran bahin sa balaang espiritu. Dili ni persona o bahin sa Trinidad, kondili kini ang aktibong puwersa sa Diyos. Atong giila nga ang balaang espiritu ang naggiya sa mga propeta ug sa mga magsusulat sa Bibliya, maong ginabasa nato ang Bibliya ug ginapadapat ang atong mga nakat-onan. (2 Ped. 1:​20, 21) Naningkamot pod ta nga dili makahimog seryosong mga sala aron padayon natong madawat ang balaang espiritu sa Diyos ug aron dili mapugngan ang paglihok niini diha sa kongregasyon.—Efe. 4:30.

15. Unsay atong determinasyon?

¹⁵ Kon bawtismado na ka, himoang tumong nga masabtan pag-ayo ang “pagtulon-an bahin sa mga bawtismo.”c Paningkamoti pod nga matuman nimo ang imong saad kang Jehova dihang nagpahinungod ka ug nagpabawtismo. Pero komosta kon dili pa ka bawtismado? Naa bay nakapugong nimo? Ang sunod nga artikulo makatabang nimo nga mouswag ug mabawtismohan.