Andam ba Ka sa Posible Nimong Maatubang Human sa Bawtismo?

1-2. Unsay atong himoon aron maandam ta sa mga problema nga posible natong maatubang sa atong pag-alagad? Iilustrar.

SAMTANG nia pa ta sa kalibotan ni Satanas, makadahom ta nga makaatubang gyod tag mga problema. Giingnan ni Jesus ang iyang mga sumusunod: “Dili gyod kalikayan nga dunay mga kapandolan.” (Mat. 18:7) Tinuod na, kay bisan gani diha sa mga igsoon, posible tang magkaproblema. Maong base sa giingon ni Jesus, kinahanglang mangandam gyod ta.

² Hunahunaa ni nga ilustrasyon. Ingong mga alagad ni Jehova, gidasig ta nga mangandam para sa mga kalamidad. Unsaon na nato paghimo? Una, kinahanglang mahibalo ta kon unsa nga mga trahedya ang kasagarang mahitabo sa atong lugar, ilabina kon bag-o pa tang nagpuyo diha. Dayon magplano ta kon unsay himoon aron andam ta enkasog mahitabo ni. (Prov. 21:5) Ingon ana pod sa atong pag-alagad. Kinahanglang mahibalo ta sa mga problema nga posible natong maatubang ug mangandam na karon. Kon andam ta, dili kaayo ta sobrang maapektohan niini nga mga problema ug dili madaot ang atong relasyon kang Jehova. (Sal. 17:5) Busa hisgotan nato karon ang tulo ka posibleng mga problema ug kon unsaon nga makapangandam ta para ani.a

KON MASAKITAN KA SA GIHIMO SA IGSOON

3. Unsang problema ang posible natong maatubang sulod sa kongregasyon?

³ Nahinumdom ba ka sa imong gibati sa unang higayon nga mitambong kag tigom ug nakita nimo ang gugma sa mga igsoon? Tingali tungod adto, nakaingon ka nga nakita na gyod nimo ang kamatuoran. (Juan 13:35; Col. 3:12) Kanay gibati ni Blanca.b Pero human sa iyang bawtismo, dihay nahitabo nga wala niya damha. Siya miingon: “Naay sister nga lain kaayog tinagdan nako. Namatikdan pod nako nga naa gyod siyay ikasulting dili maayo bahin sa uban. Wala gyod ko magdahom ani. Nagtuo man god ko nga ang tanang Saksi ni Jehova buotan ug mahigugmaon.” Siyempre, ang mga igsoon naningkamot nga masundog ang mga hiyas ni Jehova, pero hinumdomi nga dili sila hingpit. (Efe. 4:​23, 24; 1 Juan 1:8) Maong naa gyoy mga panahon nga naa silay masulti o mahimo nga makapasakit nimo. (Sant. 3:8) Makapaguol kay ang uban mihunong sa pag-alagad tungod ani.

4. Unsay makatabang nato nga maandam kon pananglit naay igsoon nga makapasakit nato? (Efeso 4:32)

⁴ Unsay imong mahimo karon aron maandam ka kon pananglit naay igsoon nga makapasakit nimo? Hinumdomi ug ipadapat pirme ang tambag sa Efeso 4:32. (Basaha.) Kon maningkamot ka nga magpakitag kaayo sa mga igsoon, malikayan nimo ang walay hinungdang mga away. Maayo pod kon anaron nimo ang imong kaugalingon nga makapasaylo dayon sa uban dihang masayop sila. Unsay makatabang nimo? Hunahunaa kon kapila ka magsigeg pangayog pasaylo kang Jehova ug kon unsa pod siya ka andam nga mopasaylo nimo. (Mat. 6:12) Kon imong pamalandongon kon unsa ka mapinasayloon si Jehova nimo, mas dali kang makapasaylo sa uban.

5. Unsang prinsipyo sa Bibliya ang makatabang nato kon mapasakitan ta sa uban? (Proverbio 19:11) (Tan-awa sab ang mga hulagway.)

⁵ Basaha ang Proverbio 19:11. Ang Bibliya nag-ingon nga kon naay makahimog dili maayo nato, ang lawom nga pagsabotc makatabang nga dili dayon ta masuko. Kini nga prinsipyo nakatabang kang Rima, nga pipila ka tuig pa lang nabawtismohan. Siya miingon: “Kon naay mahimo ang usa ka igsoon nga para nako makapalagot o makapasakit, hinumdoman dayon nako ang Proverbio 19:11. Hunahunaon nako kon ngano kahang nahimo to niya, pananglitan kon unsay iyang gidak-an nga pamilya o kon naa ba siyay giatubang nga problema. Makigpartner pod ko niya sa pagsangyaw aron mas mailhan nako siya.” Puwede pod nimong himoon ang gihimo ni Rima. Sulayi nga mas ilhon pa ang mga igsoon. Kon mas mailhan nimo sila, mas dali nimo silang mapasaylo enkasog mapasakitan ka nila.

6. Unsay makatabang aron makapabilin tang suod sa mga igsoon?

⁶ Unsa pay puwede nimong himoon aron makapabilin kang suod sa mga igsoon? Samtang naningkamot ka nga mas masuod nila, mas maayo nga magpokus ka sa ilang nindot nga mga hiyas. (Itandi ang Proverbio 10:12; Roma 12:10; Filip. 2:​2, 3) Matikdi kon sa unsang paagi ni nakatabang sa bag-ong bawtismadong brader nga si Mark. Dihang nasuod na siya sa mga igsoon, mas nakita pod niya ang ilang mga kahuyangan. Pero wala ni niya tugoti nga makapandol niya. Siya miingon: “Gihinumdoman nako nga ang ginagmayng sayop sa mga igsoon wala ra kon ikompara sa daotang mga buhat sa ubang tawo. Maong imbes nga magsigeg hunahuna sa kahuyangan sa mga igsoon, nagpokus ko sa ilang maayong mga kinaiya.” Sama kang Mark, kon magpokus ta sa positibong hiyas sa mga igsoon, makapabilin tang suod sa kongregasyon.

KON MANGANDOY KAG BALIK SA IMO NANG GITALIKDAN

7. Ngano tingaling mangandoy tag balik sa mga butang nga ato nang gitalikdan?

⁷ Dihang nahimo kang Saksi ni Jehova, seguradong nalipay ka nga gibiyaan na nimo ang daotang kalibotan ni Satanas. Tingali nakaingon ka, ‘Wala gyod koy rason nga mobalik pa sa akong kinabuhi sa una.’ Pero dihang makaatubang kag mga kalisdanan, basig naay mga panahon nga makahinumdom ka o magsugod pa ganig pangandoy sa mga butang nga imo nang gibiyaan. (Itandi ang Numeros 11:​4-6.) Pananglitan, ang uban miundang sa ilang trabaho nga dakog suweldo pero makahurot ug panahon. Ang uban nawad-ag suod nga mga higala dihang nagtuon na sila sa Bibliya. Ug ang uban mihunong sa ilang ganahan kaayo nga mga bisyo aron mapalipay si Jehova. Makapaguol gyod kon balikan sa usa ka Kristohanon kining mga butanga ug mapahilayo na hinuon kang Jehova! Unsay imong himoon karon aron nga bisag unsa pay mahitabo, dili na gyod nimo balikan ang imo nang gitalikdan?

8. Unsay atong makat-onan kang Abraham ug Sara?

⁸ Daghan tag mabasang ehemplo diha sa Bibliya bahin sa matinumanong mga alagad ni Jehova nga puwede untang mobalik sa mga butang nga ila nang gitalikdan. Konsideraha si Abraham ug Sara. Ingong pagsunod sa sugo ni Jehova, gibiyaan nila ang luwas nga siyudad sa Ur ug mipuyo sa mga tolda. (Heb. 11:​8, 9) Naa gyod tingali mga panahon nga makahinumdom sila sa ilang hayahay nga kinabuhi sa Ur. Pero “kon nagsige pa silag hunahuna” o nagsigeg pangandoy adto, matental gyod tingali sila nga mobalik didto. Pero wala to nila himoa. Hinuon, nagpokus sila sa umaabot.—Heb. 11:​15, 16.

9. Unsay hunahuna ni apostol Pablo bahin sa mga butang nga iya nang gibiyaan aron makaalagad kang Jehova? (Filipos 3:​7, 8, 13)

⁹ Si apostol Pablo dakog gisakripisyo aron makaalagad kang Jehova. Sa wala pa siya mahimong Kristohanon, gibansay siya ni Gamaliel, usa ka ilado ug tinahod kaayo nga magtutudlo sa Balaod. (Buh. 22:3) Dako gyod untag purohan nga makadawat si Pablo ug taas nga posisyon sa Judaismo ug mahimong prominente nga relihiyosong lider. (Gal. 1:​13, 14) Pero gibiyaan niya kining tanan dihang nakakat-on siya sa kamatuoran. Sayon ba ang iyang kinabuhi dihang nahimo na siyang Kristohanon? Dili. Gikulata siya, gipriso, ug gidumtan sa iyang mga isigka-Hudiyo. (2 Cor. 11:​23-26) Kon nagsige pag hunahuna si Pablo sa iyang mga kalisdanan ug nagsigeg tandi ani sa iyang kinabuhi sa una, makaingon tingali siya nga maayo pag wala na lang siya mobalhin ug relihiyon. Pero wala to himoa ni Pablo. Hinuon, nagpokus siya sa iyang talagsaong pribilehiyo nga mahimong sumusunod ni Kristo Jesus ug sa iyang nindot nga paglaom sa umaabot. Kombinsido siya nga ang mga panalangin nga iyang nadawat mas labaw gyod kay sa mga sakripisyo nga iyang gihimo.—Basaha ang Filipos 3:​7, 8, 13.

10. Unsay angay natong pamalandongon pirme? (Marcos 10:​29, 30) (Tan-awa sab ang mga hulagway.)

¹⁰ Unsay atong makat-onan kang Pablo? Kon makahunahuna ka sa mga butang nga imo nang gitalikdan, ayaw pod kalimti kon nganong imo tong gibiyaan. (Eccl. 7:10) Ang mga butang nga imong gisakripisyo wala ra kon itandi sa daghang panalangin nga imong nadawat kay nahimo kang alagad ni Jehova. Pananglitan, nasuod ka sa Labing Gamhanang Diyos. (Prov. 3:32) Naa kay mahigugmaong espirituwal nga pamilya. (Basaha ang Marcos 10:​29, 30.) Ug naa pod kay nindot nga paglaom sa umaabot. (Isa. 65:​21-23) Kon pirme nimong pamalandongon ang mga panalangin sa pag-alagad kang Jehova, dili gyod ka mingawon sa mga butang nga imo nang gibiyaan.

11. Unsay imong makat-onan sa gihimo sa usa ka sister nga si Rosemary?

¹¹ Ang sister nga si Rosemary mga 50 anyos na dihang nabawtismohan. Matikdi kon unsay iyang gihimo aron dili siya mobalik sa mga butang nga iya nang gitalikdan. Siya miingon: “Sa primero, gimingaw kong mag-Pasko, kay lingaw kaayo ni nga okasyon uban sa among pamilya. Ganahan kaayo kong manghatag ug regalo. Malingaw kong magtan-aw sa mga bata nga manglingkod duol sa Christmas tree ug eksayted kaayong mag-abli sa ilang mga regalo.” Busa unsay gihimo ni Rosemary? Siya miingon: “Nangita kog paagi nga makauban gihapon nako ang akong pamilya sa laing higayon. Kada tuig, sa lahi nga adlaw, magtapok mi, hatagan nako silag regalo, ug sultihan nako sila kon nganong ako silang gimahal.” Nakatabang gyod to kang Rosemary. Pero naa pa siyay laing gikamingawan. Siya miingon: “Dihang na-Saksi ko, gibiyaan ko sa akong suod nga mga higala. Mingawon pod baya ko nila, ug maguol ko usahay kay mobati ko nga nag-inusara na lang ko.”d Unsay nakatabang niya? Nakigpartner siyag lainlaing sister sa pagsangyaw. Siya miingon: “Kay lainlain man akong kauban, mas daghan na kog nailhan nga sister ug nasuod ko nila.” Unsay atong makat-onan kang Rosemary? Kon naay mga panahon nga mingawon ka sa mga butang nga nakapalipay nimo sa una nga dili pa ka Saksi, puwede nimo ning pulihan ug mga butang nga makapalipay gihapon nimo pero makapalipay pod kang Jehova. (Filip. 4:​8, 9) Ug hinumdomi ni: Dili gyod ka alkanse kon pilion nimo si Jehova.

KON ANG UBAN MOBIYA KANG JEHOVA

12. Unsang makapaguol nga situwasyon ang mahitabo usahay diha sa kongregasyon?

¹² Dihang nahimo kang Saksi, seguradong nalipay ka nga nakabiya na ka sa daotang kalibotan ni Satanas. Nahimo na kang bahin sa pamilya ni Jehova nga nagtudlo sa kamatuoran ug naningkamot nga mohimog maayo. (Isa. 65:14) Pero usahay, makadungog tingali ka nga naay mga igsoon nga makahimog sala. Ang uban nila kinahanglan pa ganing tangtangon gikan sa kongregasyon. (1 Cor. 5:13) Matikdi kon sa unsang paagi ni nakaapektar sa sister nga si Samar. Siya miingon: “Niadtong bag-o pa kong nabawtismohan, dihay ansiyano nga nakahimog seryosong sala ug natangtang sa kongregasyon. Hapit ko mapandol tungod adto, kay wala ko magdahom nga ang usa ka ansiyano makahimog grabeng sala kang Jehova ug sa kongregasyon.” Siyempre, angay tang mosalig nga gihigugma gyod sa mga igsoon si Jehova ug nga gusto nilang magmatinumanon kaniya. (1 Cor. 13:​4, 7) Pero kinahanglang realistiko pod ta. Kada tuig, naay mga igsoon nga matangtang sa kongregasyon. Dili gyod ni sayon, ilabina kon ang natangtang suod nimo o gitahod nimo pag-ayo.

13. Unsay atong himoon karon aron dili ta mapandol kon naay suod nato nga mobiya kang Jehova?

¹³ Unsay imong himoon karon aron makapabilin kang matinumanon bisan pag ang imong suod nga higala o paryente moundang sa pag-alagad? Padayong palig-ona ang imong personal nga relasyon kang Jehova. (Sant. 4:8) Ayaw pag-agad sa uban; magmatinumanon man sila o dili, ayaw gyod ug biya kang Jehova. Maong bisag magsimba ta ingong pamilya ug kongregasyon, kinahanglan nga naa pod tay atong kaugalingong eskedyul sa pagbasa sa Bibliya ug pag-ampo.—Sal. 1:2; 62:8.

14. Unsay atong makat-onan sa ehemplo ni apostol Pedro? (Juan 6:​66-68)

¹⁴ Naa pod tay makat-onan sa gihimo ni apostol Pedro dihang daghang tinun-an ni Jesus ang mibiya niya. Naglibog sila sa giingon ni Jesus maong wala na sila mosunod niya. Tingali naglibog pod si Pedro adto. Pero matikdi ang iyang giingon sa Juan 6:​66-68. (Basaha.) Imbes nga magpokus sa gihimo sa uban ug mosundog nila, nagpokus si Pedro sa mga kamatuoran nga gitudlo ni Jesus. Tungod ana, wala gyod mapandol si Pedro. Sa susama, bisag unsa pay himoon sa uban ug bisag mobiya sila kang Jehova, wala na magpasabot nga dili tinuod ang mga kamatuoran nga imong nakat-onan sa tabang sa organisasyon sa Diyos. Maong ayaw gyod ug biya sa kamatuoran! Si Samar, nga gihisgotan ganina, miingon, “Pirme nakong pahinumdoman ang akong kaugalingon nga kon naay himoong dili maayo ang usa ka igsoon, wala na magpasabot nga ingon ana pod ang tanang igsoon o ang organisasyon. Ug labaw na nga dili ingon ana ang kinaiya ni Jehova.”

15. Unsay imong makat-onan sa eksperyensiya ni Emily?

¹⁵ Konsideraha ang eksperyensiya ni Emily. Usa pa lang ka semana human sa iyang bawtismo, ang iyang mama mibiya sa ilang pamilya ug natangtang sa kongregasyon. Si Emily miingon: “Wala gyod ko magdahom adto. Mao to ang pinakalisod nga akong naagian, ug gimingaw kaayo ko ni Mama.” Unsay nakatabang kang Emily? Siya miingon: “Wala ko mag-inusara. Gitabangan ko ni Papa ug sa mga igsoon sa kongregasyon nga nagmahal nako samag pamilya. Ang kada usa nato naay giatubang nga mga problema. Maong importante nga makigsuod ta sa mga igsoon ug maningkamot nga magdinasigay.” (1 Ped. 5:9) Mouyon gyod ta sa giingon ni Emily. Pero dili ta kinahanglang maghulat nga naay moabot nga mga problema ayha ta makigsuod sa mga igsoon. Karon pa lang, ato na ning himoon aron nga bisag unsa pay mahitabo, dili kaayo ta mobating nag-inusara.

16. Unsay angay natong hinumdoman? (Tan-awa sab ang hulagway.)

¹⁶ Hinumdomi pod nga gihigugma ni Jehova kadtong iyang gidisiplina. (Heb. 12:6) Gusto niya nga ang tanang natangtang sa kongregasyon mobalik kaniya. (2 Ped. 3:9) Maong kon naa kay suod nga higala o paryente nga natangtang, makaseguro ka nga himoon sa mga ansiyano ang tanan nilang maarangan aron matabangan siyang mobalik kang Jehova.—2 Tim. 2:​24, 25.

17. Sa unsa ta makasalig?

¹⁷ Nahisgotan nato ang pipila ka problema nga posible nimong maatubang human sa bawtismo. Mabalaka tingali ka nga basin dili nimo ni makaya kon mahitabo ni nimo. Pero ayawg kahadlok. Daghan kag mahimo aron makapangandam. Hinumdomi pod nga si Jehova, ang Labing Gamhanang Diyos, mao mismo ang motabang nimo. Gitabangan na ka niya sa una, ug gusto ka niyang tabangan hangtod sa hangtod. (1 Ped. 5:10) Hatagan ka niyag kusog aron makalahutay ka sa bisan unsang pagsulay. Maong kon padayon nimong dawaton ang tabang ni Jehova, wala gyoy bisan unsa nga makabulag nimo gikan niya!—Sal. 119:165; Roma 8:​38, 39.