Ang mga Anak Maoy “Panulondon Gikan ni Jehova”

UNSAY imong mahunahunaan sa pulong nga “panulondon”? Tingali makahunahuna kag kuwarta, propidad, o bililhong butang nga imong napanunod gikan sa usa ka membro sa pamilya. Bisag unsa pa ni nga klase sa panulondon, seguradong importante kaayo ni para nimo ug gusto nimo ning ampingan.

Ang Bibliya nag-ingon nga ang mga anak maoy “panulondon gikan ni Jehova.” (Sal. 127:3) Seguradong giisip sa Kristohanong mga ginikanan ang ilang mga anak ingong bililhong regalo gikan sa ilang langitnong Amahan. Gusto nilang himoon ang tanan aron protektahan ang ilang mga anak ug atimanon ang ilang pisikal, emosyonal, ug espirituwal nga panginahanglan.

Pero makapaguol kay ang ubang ginikanan wala mag-isip sa ilang mga anak ingong regalo gikan sa Diyos. (Isa. 49:15; 2 Tim. 3:​1-3) Ang uban pod gusto gyong moatiman sa ilang mga anak, pero malisdan sila tungod sa lainlaing rason. Unsa ang pipila sa mga kalisdanan nga giatubang sa mga ginikanan? Unsang responsibilidad ang gihatag ni Jehova sa mga ginikanan? Ug unsay himoon sa Kristohanong mga ginikanan aron molampos sila sa pagpadako sa ilang mga anak?

MGA KALISDANAN

• Presyur gikan sa ilang komunidad ug pamilya. Sa ubang mga lugar, ang mga ginikanan nga daghag anak mas tinahod diha sa ilang komunidad. Tungod ana, ang mga magtiayon presyuron tingali sa ilang pamilya o sa ilang mga silingan nga manganak ug daghan, bisag dili na nila ni kayang atimanon.

• Mga kabalaka bahin sa umaabot. Sa mga lugar diin daghang bata ang mangamatay tungod sa malnutrisyon, sakit, ug limitadong medikal nga mga serbisyo, ang ubang ginikanan manganak ug daghan aron maseguro nga naa silay anak nga magpabiling buhi. Ang uban pong ginikanan manganak ug daghan aron naay moatiman nila inigkatigulang nila. Ingon ana ang kasagarang mahitabo ilabina sa mga nasod diin ang mga tigulang walay madawat nga ayuda gikan sa gobyerno.

• Family planning. Sa ubang lugar, limitado kaayo ang kapilian sa birth control. Ang uban nahadlok mogamit ug baratohon nga mga contraceptive kay basig dili ni maayog epekto sa ilang lawas. Ang uban pod dili makapalit ug birth control kay mahal kaayo ni.a

UNSAY GIDAHOM NI JEHOVA NGA HIMOON SA MGA GINIKANAN?

Tagan-an ang panginahanglan sa ilang mga anak. Gihatagan ni Jehova ang mga ginikanan ug responsibilidad nga atimanon ang materyal nga panginahanglan sa ilang mga anak. Gidahom niya nga ang mga ginikanan maningkamot gyod aron matagan-an ang ilang mga anak ug pagkaon, sinina, ug puy-anan. Gusto pod ni Jehova nga tudloan sa mga ginikanan ang ilang mga anak. Maong imbes nga paeskuwelahon sa layo ang ilang mga anak, giseguro sa Kristohanong mga ginikanan nga ang ilang mga anak ipon nilag puyo hangtod nga managko sila, aron matudloan ug maatiman silag tarong. Makatabang ni nga ang ilang mga anak mobating luwas ug gimahal. Pero siyempre, rasonable si Jehova; wala siya magdahom nga kinahanglang dato gyod ang mga ginikanan. Gani, pobre ang mga ginikanan nga gipili ni Jehova aron moatiman sa iyang minahal nga Anak, pero bisan pa ana, kugihan sila nga mga ginikanan.—Mat. 13:​55, 56; Luc. 2:24.

Prinsipyo sa Bibliya: “Segurado nga kon dunay dili magtagana sa iyang mga sakop, ilabina sa iyang panimalay, siya naglimod sa pagtuo ug mas daotan pa kay sa tawong walay pagtuo.”—1 Tim. 5:8.

Nahibalo si Jehova nga ang mga ginikanan nagkinahanglan tingalig tabang samtang magkatigulang sila. Gani, ang usa ka paagi nga mapakita sa mga anak nga gimahal ug gitahod nila ang ilang mga ginikanan mao ang pagseguro nga naay makaatiman sa ilang mga ginikanan inigkatigulang nila. (Ex. 20:12; 1 Tim. 5:4) Bisan pa ana, malipay si Jehova dihang ang mga ginikanan mas maghunahuna kon unsaon nila pag-atiman ang ilang mga anak, imbes nga maghunahuna kon unsay mahimo sa ilang mga anak para nila inigkatigulang nila.—2 Cor. 12:14.

Tudloan ang ilang mga anak bahin kang Jehova. Responsibilidad pod sa Kristohanong mga ginikanan nga tudloan ang ilang mga anak sa paghigugma ug pag-alagad sa Diyos. Para kang Jehova, usa ni sa pinakaimportanteng butang nga angayng itudlo sa mga ginikanan sa ilang mga anak.—Deut. 6:​6, 7.

Prinsipyo sa Bibliya: “[Padayong matutoa ang inyong mga anak] pinaagi sa disiplina ug tambag ni Jehova.”—Efe. 6:4.

GUSTO NI JEHOVA NGA MOLAMPOS MO

Pagplano daan. Kon nagplano mong manganak, hunahunaa pag-ayo ang inyong kahimtang. Pananglitan, kon gusto mog daghang anak, kaya ba ninyo silang pakan-on, tagan-ag sinina, ug paeskuwelahon? Kon dili, saboti ninyog maayo kon pila ra gyod ang inyong kaya, aron maatiman ninyo ang inyong mga anak sumala sa gusto ni Jehova. Siyempre, naay mga panahon nga dili gyod matuman ang atong mga plano, ug kasabot si Jehova ana. (Eccl. 9:11) Pero makasalig mo nga panalanginan niya ang inyong mga paningkamot nga mahimong maayong mga ginikanan.

Prinsipyo sa Bibliya: “Ang mga plano sa kugihan moresulta gyod ug kalamposan, apan ang tanang madalidalion seguradong mopaingon sa kakabos.”—Prov. 21:5.

“Kinsa kaninyo nga buot magtukod ug torre ang dili una molingkod ug kuwentahon ang gasto aron matino kon duna ba siyay igong kuwarta nga ikahuman niini?”—Luc. 14:28.

Himoang prayoridad ang pag-alagad kang Jehova. Seguroa nga ang pag-alagad kang Jehova mao ang pinakaimportante sa inyong pamilya. Kon naa na moy mga anak, paningkamoti nga matudloan ang matag usa nila nga higugmaon si Jehova. Tabangi sila nga maminaw pag-ayo sa mga tigom. Kinahanglan nga naa pod moy pamilyahanong pagsimba kada semana. Ug tudloi ang inyong mga anak kon unsaon pagsangyaw. Ayawg ipasa ang inyong responsibilidad ingong ginikanan ngadto sa inyong dakodako na nga mga anak o sa inyong mga paryente. Tinuod, dili sayon nga tudloan ang inyong mga anak sa paghigugma kang Jehova kay nagkinahanglan nig dakong panahon ug paningkamot. Pero makasalig mo nga dili gyod masayang ang inyong mga paghago.

Prinsipyo sa Bibliya: “Wala nay mas makapalipay nako kay niini: nga akong madungog nga ang akong mga anak padayong naglakaw sa kamatuoran.”—3 Juan 4.b

Salig kang Jehova. Kon nagplano pa lang mo nga manganak o kon naa na moy mga anak, hinumdomi nga ang mga sukdanan ni Jehova mas importante kay sa inyong kultura o sa naandan sa mga tawo sa inyong lugar.

Kon nakadesisyon mo nga dili ra manganak ug daghan, ayaw rag kabalaka sa umaabot. Salig nga atimanon gihapon mo ni Jehova inigkatigulang ninyo. Bisan pa tingalig presyuron mo sa uban nga himoong “retirement plan” ang inyong mga anak, ayawg padala nila. Hinumdomi nga nagsaad si Jehova nga atimanon mo niya, ug kanunay gyod siyang motuman sa iyang mga saad.—Jos. 23:14.

Prinsipyo sa Bibliya: “Salig kang Jehova sa bug-os nimong kasingkasing, ug ayawg salig sa kaugalingon nimong pagsabot. Sa tanan nimong dalan konsideraha siya, ug tul-iron niya ang imong mga agianan.”—Prov. 3:​5, 6.

“Sukad sa akong pagkabatan-on hangtod karon nga tigulang na ko, wala ko makakitag matarong nga gibiyaan, wala usab ko makakita nga ang iyang mga anak nagpakilimos ug tinapay.”—Sal. 37:25.

“Busa unaha kanunay ang pagpangita sa Gingharian ug sa pagkamatarong sa Diyos, ug ang tanang ubang butang igadugang ra kaninyo.”—Mat. 6:33.

Ang mga anak maoy bililhong regalo nga gisalig ni Jehova ngadto sa mga ginikanan. Seguradong nalipay si Jehova sa Kristohanong mga ginikanan nga naghimo sa ilang maarangan sa pagtuman sa ilang responsibilidad. Mahigugmaon nilang gitagana ang pisikal, emosyonal, ug espirituwal nga panginahanglan sa ilang mga anak; ilang giplano kon pilay gusto nilang anak; ug ilang gisunod ang mga sukdanan sa Diyos imbes ang kultura o kostumbre sa ilang lugar. Pinaagi ana, gipakita sa Kristohanong mga ginikanan nga ang ilang mga anak bililhon gyod nga regalo—usa ka “panulondon gikan ni Jehova.”