Mayo

Human luwasa ni Jehova ang iyang katawhan gikan sa pagkaulipon sa Ehipto, nagtudlo siyag mga saserdote aron mag-alagad sa tabernakulo. Ang mga Levihanon giasayn nga mag-atiman sa ubang buluhaton sa maong balaang dapit. Pero kadto bang nag-alagad sa tabernakulo o kadtong mga nagkampo duol niini mas naatiman ni Jehova kay sa uban? Siyempre dili! Si Jehova patas nga Diyos. Ang tanang Israelinhon naay kahigayonan nga masuod kang Jehova. Pananglitan, giseguro niya nga ang tibuok nasod makakita sa milagroso nga haligi nga panganod ug haligi nga kalayo ibabaw sa tabernakulo. (Ex. 40:38) Dihang ang panganod mobalhin sa laing direksiyon, bisan kadtong nagkampo nga layo kaayo gikan sa tabernakulo makakita niana, makaandam sa ilang mga gamit, makahipos sa ilang tolda, ug makabiya kauban ang tibuok nasod. (Num. 9:​15-23) Sa susama, bisag asa pa ta nagpuyo, makabenepisyo ta sa gugma, pag-atiman, ug proteksiyon ni Jehova. w24.06 4 ¶10-12

Nameligro ang kinabuhi ni David. Ang iyang anak nga si Absalom determinado nga patyon siya aron mailog ang trono. (2 Sam. 15:​12, 13) Kinahanglang mobiya dayon si David sa Jerusalem! Samtang nangikyas ang iyang mga alagad, nakahunahuna si David nga kinahanglang naay magpabilin aron makareport sa mga plano ni Absalom. Busa giingnan niya si Zadok ug ang ubang mga saserdote nga mobalik sa siyudad aron mangespiya para niya. (2 Sam. 15:​27-29) Kinahanglan gyod silang mag-amping. Naay gihimong plano si David uban kang Zadok ug Husai, nga maunongong mga higala ni David. (2 Sam. 15:​32-37) Gisunod nila ang plano—nagpakaaron-ingnon si Husai nga dapig siya kang Absalom. Tungod ana, nakuha ni Husai ang pagsalig ni Absalom ug misugyot siyag estratehiya nga maghatag kang David ug panahon nga makapangandam sa pag-atake ni Absalom. Human niana, giingnan ni Husai si Zadok ug Abiatar sa iyang gisugyot. (2 Sam. 17:​8-16) Dayon silang duha nagpadalag mensahe kang David bahin sa plano nga dako kaayog nahimo aron maprotektahan ang kinabuhi ni David.—2 Sam. 17:​21, 22. w24.07 4-5 ¶9-10

Ang ubang alagad ni Jehova nahasol pag-ayo tungod sa mga sala nga ilang nahimo kaniadto, tingali sa wala pa o human sa ilang bawtismo. Pero angay natong hinumdoman nga gitagana ni Jehova ang lukat kay gimahal ta niya pag-ayo. Gusto niya nga dawaton nato kini nga regalo. Gipasaligan ta ni Jehova nga kon ato nang ‘nahusay ang mga butang’ uban kaniya, dili na ta niya paninglan sa mga sala nga atong nahimo kaniadto. Mahigugmaon gyod si Jehova! Dili niya hinumdoman ang nangagi natong mga sala. Ang iyang hinumdoman mao ang maayo nga atong nahimo. (Sal. 103:​9, 12; Heb. 6:10) Kon nahasol ka tungod sa imong mga nahimo sa nangagi, paningkamoti nga magpokus sa imong mahimo karon ug sa umaabot. Dili na nimo mabag-o ang nahitabo. Pero mapasidunggan nimo si Jehova sa imong presenteng kahimtang ug makapokus sa nindot nga paglaom sa umaabot nga iyang gisaad kanimo. w24.10 8 ¶8-9

Malisdan tingali ta usahay sa pagpadapat sa atong nakat-onan sa pagbasa sa Bibliya. Hunahunaa ni: Ibutang ta nga karon naa kay nabasa nga pasidaan bahin sa pagpakitag paboritismo. (Sant. 2:​1-8) Imong nakita nga kinahanglan nimong pauswagon ang imong pagtratar sa uban, ug midesisyon ka nga mohimog mga kausaban. Dayon pagkaugma, nakabasa kag teksto nga nagpasiugda kon unsa ka importante nga kontrolon nimo ang imong sinultihan. (Sant. 3:​1-12) Naamgohan nimo nga usahay dili maayo o dili makapadasig ang imong sinultihan. Maong nakaingon ka nga kinahanglan kang mahimong mas positibo ug makapadasig. Pagkasunod adlaw, nakabasa kag pasidaan bahin sa pagpakighigala sa kalibotan. (Sant. 4:​4-12) Namatikdan nimo nga kinahanglan kang mas mag-amping sa pagpilig kalingawan. Maong sa ikaupat nga adlaw, tingali nabug-atan na ka sa kadaghan sa kinahanglan nimong pauswagon. Ayawg kadismayar. Hinumdomi nga ang pagsul-ob sa “bag-ong personalidad” nagkinahanglag padayong paningkamot. w24.09 5-6 ¶11-12

Nahibalo si Jesus nga nakita ni Jehova ang tanan. Misalig siya nga tul-iron ra ni Jehova ang mga inhustisya sa hustong panahon. Masundog nato si Jesus pinaagi sa pagkontrol sa atong sinultihan dihang makasinati tag dili maayong pagtratar. Kon ginagmay ra ang inhustisya, basin puwede ra nato ning palabyon. O kaha puwede tang maghilom aron dili mosamot ang situwasyon. (Eccl. 3:7; Sant. 1:​19, 20) Pero sa ubang mga higayon, basin kinahanglan tang mosulti aron depensahan ang uban o ang kamatuoran. (Buh. 6:​1, 2) Kon mosulti ta, angay tang maningkamot nga magpabiling kalmado ug matinahoron. Masundog sab nato si Jesus kon isalig nato ang atong kaugalingon sa “Usa nga nagahukom sa matarong nga paagi.”—1 Ped. 2:23. w24.11 5-6 ¶10-12

Malipay kaayo ta kon ang usa nga nakasala maghinulsol! (Luc. 15:7) Kinsa ang angayng pasidunggan? Ang mga ansiyano ba? Matikdi kon unsay giingon ni apostol Pablo bahin sa mga makasasala: “Tingalig itugot sa Diyos nga sila maghinulsol.” (2 Tim. 2:25) Busa klaro nga si Jehova ang angayng pasidunggan ug dili si bisan kinsang tawo, kay si Jehova ang nagtabang sa makasasala nga magbag-o sa iyang panghunahuna ug tinamdan. Gihisgotan ni Pablo ang maayong mga resulta sa paghinulsol—makatabang ni sa nakasala nga makabaton ug mas tukmang kahibalo sa kamatuoran, makaamgo sa iyang nahimong sala, ug makaikyas sa mga lit-ag ni Satanas. (2 Tim. 2:26) Kon ang nakasala maghinulsol, ang komite maghikay ug mga pag-shepherding aron padayon siyang matabangan sa pagsukol sa mga lit-ag ni Satanas ug matul-id ang iyang dalan.—Heb. 12:​12, 13. w24.08 23 ¶14-15

Ang mga tawo nga gipakaon ni Jesus nagpokus lang sa pagtagbaw sa ilang pisikal nga mga panginahanglan ug tinguha. Nganong makaingon ta ana? Pagkasunod adlaw, ilang nahibaloan nga si Jesus ug ang iyang mga apostoles mibiya. Busa dihang may midunggo nga mga sakayan gikan sa Tiberias, misakay sila niana paingon sa Capernaum aron pangitaon si Jesus. (Juan 6:​22-24) Gihimo ba to nila kay gusto nilang mokat-on ug dugang bahin sa Gingharian? Wala. Gusto lang nilang tagbawon ang ilang pisikal nga panginahanglan alang sa tinapay. Giunsa nato pagkahibalo niana? Matikdi kon unsay nahitabo dihang nakit-an sa mga tawo si Jesus duol sa Capernaum. Si Jesus prangkang miingon nga naghunahuna lang sila sa pagtagbaw sa ilang temporaryong pisikal nga panginahanglan. Siya miingon nga sila ‘nakakaon sa tinapay ug nangabusog’ sa “pagkaon nga madaot.” Busa gitambagan niya sila nga maghago para sa “pagkaon nga dili madaot nga motultol sa kinabuhing walay kataposan.” (Juan 6:​26, 27) Si Jesus miingon nga ang iyang Amahan magtagana niana nga pagkaon. w24.12 5 ¶8-9

Mga brader, aron mahimong mas maayong magtutudlo, seguroa nga ang inyong mga pakigpulong ug pribadong mga tambag gibase sa Pulong sa Diyos. Aron mahimo ni, kinahanglan nga maayo mong estudyante sa Bibliya ug sa atong mga publikasyon. (Prov. 15:28) Samtang magtuon mo, matikdi kon giunsa pagpatin-aw sa atong mga publikasyon ang mga teksto sa Bibliya aron kabalo mo kon unsay hustong kapadapatan niini. Ug dihang manudlo, paningkamoti nga matandog ang kasingkasing sa inyong mamiminaw. Mouswag ang inyong kahanas ingong magtutudlo kon mangayo mog sugyot sa eksperyensiyadong mga ansiyano ug kon inyo ning ipadapat. (1 Tim. 5:17) Ang mga ansiyano kinahanglang makapalig-on sa mga igsoon, pero usahay kinahanglan tingali silang mohatag ug tambag o mobadlong pa gani. Magpalig-on man sila o mobadlong, kinahanglan nga himoon nila ni sa buotan nga paagi. Kon buotan ug mahigugmaon mo ug kon inyong ibase sa Pulong sa Diyos ang inyong ginatudlo, mahimo mong epektibo kay inyong gisundog ang Dakong Magtutudlo, si Jesus.—Mat. 11:​28-30; 2 Tim. 2:24. w24.11 24 ¶16

Mahimaya nato si Jehova pinaagi sa pagsulti sa uban bahin kaniya. Ang katawhan ni Jehova giawhag sa “pag-awit kang Jehova,” ‘pagdayeg sa iyang ngalan,’ ‘pagmantala sa maayong balita sa iyang pagluwas,’ ug ‘pagpahayag sa iyang himaya [ngadto] sa kanasoran.’ (Sal. 96:​1-3) Pinaagi niini, atong mahimaya ang atong langitnong Amahan. (Buh. 4:29) Mahimaya pod nato si Jehova pinaagi sa materyal nga mga butang nga atong nabatonan. Sukad pa kaniadto, ang mga alagad ni Jehova naghimaya kaniya pinaagi sa paghatag sa ilang bililhong mga butang. (Prov. 3:9) Pananglitan, ang mga Israelinhon nag-amot para sa pagtukod ug pagmentinar sa templo. (2 Hari 12:​4, 5; 1 Cron. 29:​3-9) Ang mga tinun-an sa Kristo nag-alagad niya ug sa iyang mga apostoles “pinaagi sa ilang mga kabtangan.” (Luc. 8:​1-3) Ang unang siglong mga Kristohanon nagpadala pod ug hinabang para sa ilang mga igsoon nga nanginahanglan. (Buh. 11:​27-29) Karon, kita pod makahimaya kang Jehova pinaagi sa atong mga donasyon. w25.01 4 ¶8; 5 ¶11

Unsay nakatabang kang Cornelio nga magpabawtismo? Mabasa nato sa Bibliya nga si Cornelio “may kahadlok sa Diyos uban sa tibuok niyang panimalay,” ug siya padayong nangamuyo sa Diyos. (Buh. 10:2) Sa dihang gisangyawan siya ni Pedro sa maayong balita, siya ug ang iyang pamilya mituo sa Kristo ug nagpabawtismo dayon. (Buh. 10:​47, 48) Andam gyod siyang mohimog bisan unsang kausaban nga gikinahanglan aron makasimba siya kang Jehova uban sa iyang pamilya. (Jos. 24:15; Buh. 10:​24, 33) Sama kang Saulo, ang taas nga posisyon puwede pod untang makapugong kang Cornelio nga mahimong Kristohanon. Pero wala na niya tugoti nga mahitabo. Naa bay dagkong kausaban nga kinahanglan nimong himoon sa imong kinabuhi aron mahimong kuwalipikado sa bawtismo? Kon mao, tabangan ka ni Jehova. Panalanginan ka niya sa imong determinasyon nga alagaron siya ug ipadapat ang mga prinsipyo sa Bibliya. w25.03 5 ¶12-13

Kon makadungog kag negatibong mga estorya bahin sa atong organisasyon o sa mga brader nga nanguna, hinumdomi kon unsay gihimo sa mga kaaway sa Diyos kang Jesus ug sa mga Kristohanon sa unang siglo. Karon, ang katawhan sa Diyos gilutos ug gihimoag dili tinuod nga mga estorya, nga mao gyoy gitagna sa Bibliya nga mahitabo. (Mat. 5:​11, 12) Dili ta mailad sa bakak nga mga estorya kon atong hinumdoman kon kang kinsa gyod ni naggikan ug kon molihok dayon ta aron protektahan ang atong kaugalingon. Unsay angay natong himoon? Isalikway ang dili tinuod nga mga estorya. Si apostol Pablo naghatag ug klarong instruksiyon kon unsay himoon dihang makadungog tag dili tinuod nga mga impormasyon. Giingnan niya si Timoteo nga ‘tambagan ang pipila ka indibiduwal nga dili magtagad’ niini ug “isalikway ang bakak nga mga estorya nga nagpasipala sa Diyos.” (1 Tim. 1:​3, 4) Gisalikway nato ang bakak nga mga estorya kay nahibalo ta kon asa gyod gikan kini nga impormasyon. Maminaw lang ta sa “maayong mga pulong” sa kamatuoran.—2 Tim. 1:13. w24.04 11 ¶16; 13 ¶17

Pabiling nahiusa niadtong mga maunongon kang Jehova. Gusto sa Diyos nga magkahiusa ta sa atong pag-alagad kaniya. Makapabilin tang nahiusa kon dili ta mobiya sa kamatuoran. Kadtong dili magpabilin sa kamatuoran makapahinabog pagkabahinbahin sulod sa kongregasyon. Busa gipasidan-an ta sa Diyos nga ‘likayan sila,’ kay kon dili, basin kita mismo mobiya pod sa kamatuoran. (Roma 16:17) Kon nakaila ta sa kamatuoran ug dili mobiya niana, makapabilin tang suod kang Jehova ug lig-on sa espirituwal. (Efe. 4:​15, 16) Maproteksiyonan ta gikan sa bakak nga mga pagtulon-an ug propaganda ni Satanas, ug luwason ta ni Jehova panahon sa dakong kasakitan. Kon dili ta mobiya sa kamatuoran, ‘ang Diyos sa kalinaw magauban kanato.’—Filip. 4:​8, 9. w24.07 13 ¶16-17

Gihatagag espesyal nga pagtagad ni Jesus ang mga tawo nga mibating nabug-atan tungod sa ilang makasasalang kahimtang ug gidapit niya sila nga mahimong iyang sumusunod. Nahibalo siya nga ang sala mao gyoy hinungdan sa pag-antos sa katawhan. Maong naningkamot siya nga matabangan ilabina kadtong mga tawo nga nailhang makasasala. Pinaagig ilustrasyon, siya miingon: “Ang mga tawong himsog wala magkinahanglag doktor, apan kadto lang mga masakiton.” Siya midugang: “Mianhi ko sa pagdapit, dili sa mga tawong matarong, kondili sa mga makasasala.” (Mat. 9:​12, 13) Mao gyod nay gihimo ni Jesus. Mahigugmaon niyang gipasaylo ang mga sala sa babaye nga naghugas sa iyang mga tiil pinaagig mga luha. (Luc. 7:​37-50) Gitudloan pod ni Jesus ug importanteng mga kamatuoran ang babayeng Samarianhon didto sa atabay, bisag nahibalo siya sa iyang imoral nga pagkinabuhi. (Juan 4:​7, 17-19, 25, 26) Gihatagan pa gani sa Diyos si Jesus ug gahom sa pagbanhaw sa pipila ka lalaki, babaye, ug mga bata nga namatay. Kini nagpakita nga si Jesus naay gahom sa pagtapos sa pinakapait nga resulta sa sala—ang kamatayon.—Mat. 11:5. w24.08 4 ¶9-10

Unsaon paghimaya ni Jehova ang iyang ngalan sa dili madugay? Pinaagi sa pagpahamtang sa hustisya. Hapit na niyang laglagon ang Bantogang Babilonya kay gidaot niini ang iyang balaang ngalan. (Pin. 17:​5, 16; 19:​1, 2) Ang uban nga makakita sa kalaglagan sa Bantogang Babilonya tingali modesisyon nga mosimba kang Jehova. Dayon sa Armagedon, laglagon ni Jehova ang tibuok sistema ni Satanas. Iyang laglagon ang tanang masinupakon kaniya ug nagpasipala sa iyang ngalan. Pero iyang luwason ang tanang nahigugma, nagmasinugtanon, ug naghimaya kaniya. (Mar. 8:38; 2 Tes. 1:​6-10) Dihang matapos ang Usa ka Libo ka Tuig nga Pagmando sa Kristo, mahitabo ang kataposang pagsulay, ug human niana bug-os nang mabalaan ni Jehova ang iyang ngalan. (Pin. 20:​7-10) Nianang panahona, “ang yuta mapuno sa kahibalo sa himaya ni Jehova sama sa katubigan nga nagtabon sa dagat.” (Hab. 2:14) Makapalipay gyod kon moabot na ang panahon nga ang tanan sa langit ug sa yuta maghatag kang Jehova sa himaya nga angay sa iyang ngalan! w25.01 7 ¶15-16

Unsay makatabang sa Hebreohanong mga Kristohanon nga makalahutay sa pagsupak nga ilang giatubang? Nahibalo si apostol Pablo nga kinahanglan silang makabaton ug hustong panglantaw bahin sa ilang mga pagsulay. Busa iyang gipatin-aw nga itugot tingali sa Diyos nga makaatubang ang mga Kristohanon ug pagsulay ingong bahin sa ilang pagbansay. Kini nga pagbansay makatabang nila nga maugmad ug mapauswag ang nindot nga mga hiyas. Kon magpokus ang Hebreohanong mga Kristohanon sa resulta sa ilang mga pagsulay, mas dali silang makalahutay. (Heb. 12:11) Gidasig ni Pablo ang Hebreohanong mga Kristohanon nga magmaisogon ug dili mosurender dihang mag-atubang ug mga pagsulay. Ingong maglulutos kaniadto, nahibalo siya nga mas grabe pa ang ilang maatubang sa umaabot. Ug kay nakaeksperyensiya man siyag lainlaing klase sa pagsupak dihang nahimo siyang Kristohanon, nahibalo siya kon unsaon paglahutay niana.—2 Cor. 11:​23-25. w24.09 12-13 ¶16-17

Sa matag adlaw nga molabay, ang atong pagsangyaw mahimong mas dinalian. Ngano? Kay mubo na lang kaayo ang nahibilin nga panahon. Konsideraha ang gitagna ni Jesus bahin sa buluhatong pagsangyaw sa kataposang mga adlaw, nga narekord sa Marcos 13:10. Ug sa rekord sa Mateo, si Jesus miingon nga ang maayong balita isangyaw sa tibuok yuta sa dili pa “moabot ang kataposan.” (Mat. 24:14) Ang kataposan nga giingon dinhi nagtumong sa bug-os nga kalaglagan sa daotang sistema ni Satanas. Nakatakda na si Jehova ug ‘adlaw ug oras’ sa mga panghitabo nga hapit na kaayong matuman. (Mat. 24:36; Buh. 1:7) Matag adlaw, nagkaduol ta nianang panahona. (Roma 13:11) Pero samtang naghulat niana, kinahanglang padayon tang mosangyaw hangtod moabot ang kataposan. Bahin sa atong ministeryo, maayong pangutan-on nato ang kaugalingon: Nganong nagasangyaw ta sa maayong balita? Siyempre, tungod sa gugma. Dihang mosangyaw ta, gipakita nato ang atong gugma o pagpabili sa maayong balita, gugma sa mga tawo, ug labaw sa tanan, gugma kang Jehova ug sa iyang ngalan. w24.05 14-15 ¶2-3

Mga ginikanan, dasiga ang inyong anak nga mamalandong bahin sa kalalangan. Kon maglakawlakaw mo sa nindot nga lugar o mag-garden, ipakita sa inyong anak ang nindot nga mga disenyo diha sa kalalangan. Ngano? Kay kini nga mga disenyo nagpakita nga naa gyoy intelihenteng persona nga naghimo niini. Pananglitan, daghang disenyo sa kalalangan ang pormag spiral o patuyok. Kining spiral nga mga pattern daghang tuig nang gitun-an sa mga scientist. Ang scientist nga si Nicola Fameli miingon nga kon imong iphon ang mga spiral diha sa usa ka butang o disenyo, imong makita nga naa ni gisunod nga sequence sa mga numero, nga nailhan nga Fibonacci sequence. Ang spiral nga mga pattern makita diha sa daghang kalalangan sama sa porma sa ubang galaksiya, sa pattern sa lagang nga mga kinhason (nautilus shell), sa mga dahon, ug sa mga sunflower. w24.12 16 ¶7

Si Moises, David, ug Juan nagkinabuhi sa panahon ug kahimtang nga lahi sa atoa. Pero parehas ta nila sa daghang paagi. Sama nila, kita nag-alagad sa matuod nga Diyos. Kita nag-ampo kang Jehova, nagsalig niya, ug nagpagiya niya. Ug parehas nila, masaligon ta nga si Jehova dagayang magpanalangin niadtong magmasinugtanon kaniya. Busa hinaot nga ipadapat nato ang tambag niining tigulang nga mga lalaki pinaagi sa pagtuman sa mga sugo ni Jehova. Kon himoon nato na, magmalamposon gyod ta. Mabuhi pod tag dugay, oo, hangtod sa hangtod! Ug magmalipayon ta kay nahibalo ta nga napalipay nato ang atong mahigugmaong langitnong Amahan, kinsa magtuman sa iyang mga saad sa paagi nga labaw pa sa atong gidahom o gihunahuna.—Efe. 3:20. w24.11 13 ¶20-21

Sa unang siglo, ang pipila ka lalaki gitudlo ingong mga ministeryal nga alagad. (1 Tim. 3:8) Posibleng sila ang gitumong ni Pablo nga naghimog “mga buhat sa pagtabang.” Ang mga ministeryal nga alagad nag-atiman ug importanteng mga buluhaton aron ang mga ansiyano makapokus sa pagpanudlo ug pagpalig-on sa mga igsoon. Pananglitan, tingali mitabang sila sa paghimog mga kopya sa Kasulatan o sa pagpalit ug mga materyales nga gikinahanglan sa pagkopya. Matikdi ang pipila ka tabang nga ginahimo sa mga ministeryal nga alagad sa inyong kongregasyon. (1 Ped. 4:10) Tingali naasayn sila sa pag-atiman sa account o teritoryo sa kongregasyon, pag-order ug mga literatura, pag-operate sa audio ug video, pag-attendant, o pagtabang sa pagmentinar sa Kingdom Hall. Kini nga mga buluhaton importante aron mahimong organisado ang mga tigom ug pagsangyaw ug makabenepisyo ang mga igsoon.—1 Cor. 14:40. w24.10 19 ¶4-5

Malahutay nato ang bisan unsang pagsulay, dako man o gamay, kon atong hinumdoman nga si Jehova buhi ug nga kanunay siyang motabang nato. Kon buot hunahunaon, siya ang Labing Gamhanan, ug hatagan ta niyag kusog nga makalahutay. Busa makasalig gyod ta nga makaya nato ang bisan unsang problema. Kon makita nato nga ginatabangan ta ni Jehova bisan sa ginagmay nga mga pagsulay, makombinsir ta nga tabangan pod ta niya sa dihang mag-atubang tag dagkong mga pagsulay. Konsideraha ang duha ka hitabo nga nakapalig-on sa pagsalig ni Haring David kang Jehova. Sa batan-on pa siya, dihay leyon nga midagit ug karnero sa iyang amahan. Sa laing higayon, diha poy oso nga midagit ug karnero. Niining duha ka hitabo, maisogong gigukod ni David ang maong mga hayop ug giluwas ang karnero. Pero wala siya maghunahuna nga nahimo to niya tungod sa iyang kaugalingong kusog. Iyang giila nga si Jehova ang nagtabang niya. (1 Sam. 17:​34-37) Pinaagi sa pagpamalandong ni David sa maong mga eksperyensiya, napalig-on ang iyang pagsalig nga ang buhi nga Diyos padayong motabang niya. w24.06 21 ¶5-6

Ibutang ta nga giimbitar ka sa usa ka tapoktapok. Moadto ba ka? Kon dili kaayo nimo kaila ang nag-organize o wala kay ideya bahin sa tapoktapok, kinahanglan kang mangutana: “Asa ug kanus-a himoon ang tapoktapok? Unsa ka daghan ang giimbitar? Kinsa may magdumala ug magseguro nga wala ray problema panahon sa tapoktapok? Kinsa may mangadto? Unsay giplanong himoon didto? Magdalit bag makahubog nga mga ilimnon?” Ang mga tubag niini nga mga pangutana makatabang nimo sa paghimog maalamong desisyon. Karon nga nahibalo na ka sa mga detalye, pamalandonga ang kahimtang. Pananglitan, komosta kon imong mahibaloan nga apil sa giimbitar ang mga indibiduwal kinsa walay pagpabili sa mga prinsipyo sa Bibliya? O komosta kon magpatuyang rag dalit didto ug makahubog nga mga ilimnon? Posible kaha nga kini nga tapoktapok mahimong banha ug way pugong nga paglipaylipay? (1 Ped. 4:3) Kon mapamalandong na nimo ang mga posibleng mahitabo, makatabang ni nimo sa paghimog maayong desisyon. w25.01 15 ¶4-5

Si Jehova naggamit ug mga ilustrasyon aron tabangan ta nga makita nga pinaagi sa halad lukat, iyang gipapas ang sala sa mga mahinulsolon. Pananglitan, lisod gyod tangtangon ang pula kaayo nga mansa. Pero pinaagi niini nga ilustrasyon, gipasaligan ta ni Jehova nga ang atong mga sala bug-os gyong matangtang ug dili na makita. Ang sala gipakasama pod ug “utang.” (Mat. 6:​12, footnote; Luc. 11:4) Maong matag higayon nga makasala ta kang Jehova, samag magkaanam ka dako ang atong utang. Oo, dako kaayo tag utang kang Jehova! Pero sa dihang mopasaylo siya, samag iyang kanselahon ang utang nga angay unta natong bayran. Dili na ta niya paninglan sa mga sala nga iya nang gipasaylo. Makapahupay gyod na! Sama nga malipay pag-ayo ang usa ka tawo dihang kanselahon ang iyang utang, malipay pod kaayo ta dihang pasayloon ta ni Jehova. w25.02 10 ¶9-10

Ang mga ginikanan magkinahanglan tingalig praktikal nga tabang inigkatigulang nila, ug daghang mga anak ang malipay gyod sa pagbuhat niana. (1 Tim. 5:4) Pero angayng hinumdoman sa Kristohanong mga ginikanan nga wala nay molabaw pa sa kalipay kon magpadako silag mga anak nga nag-alagad kang Jehova, kay sa magpadakog mga anak aron naay makahaw-as nila sa kalisod. (3 Juan 4) Samtang tabangan nimo ang imong mga anak nga makakat-on sa pagsuportar sa ilang kaugalingon sa umaabot, ipakita pinaagi sa imong ehemplo nga misalig ka kang Jehova. Sukad sa bata pa sila, ipakita kanila ang kaimportante sa pagkugi. (Prov. 29:21; Efe. 4:28) Samtang magkadako sila, tabangi sila nga maningkamot sa ilang pag-eskuwela. Maayo gyod kon ang mga ginikanan mag-research ug mga prinsipyo sa Bibliya aron matabangan ang ilang mga anak sa paghimog maalamong desisyon bahin sa edukasyon. Tumong nila nga ang ilang mga anak makasuportar sa ilang kaugalingon ug, sa samang higayon, makagahin ug taas nga panahon sa ministeryo o makapayunir pa gani. w25.03 30-31 ¶15-16

Ang Isaias kapitulo 65 naghisgot sa giingon ni Jehova bahin sa kon unsay kahimtang niadtong mopuyo sa espirituwal nga paraiso. Kini nga tagna unang natuman niadtong 537 B.C.E. Niadtong panahona, ang mahinulsolong mga Hudiyo gipagawas gikan sa pagkabihag sa Babilonya ug mibalik sa ilang yutang natawhan. Gipanalanginan ni Jehova ang iyang katawhan ug gitabangan sila nga mapanindot ang nagun-ob nga siyudad sa Jerusalem ug matukod pag-usab ang templo nga maoy sentro sa matuod nga pagsimba sa Israel. (Isa. 51:11; Zac. 8:3) Ang ikaduhang katumanan sa tagna ni Isaias nagsugod niadtong 1919 C.E. dihang ang mga magsisimba ni Jehova sa modernong panahon nakagawas gikan sa pagkabihag sa Bantogang Babilonya. Dayon ang espirituwal nga paraiso naporma, anam-anam nga midako, ug nakaabot sa lainlaing bahin sa yuta. Ang madasigong mga magsasangyaw sa Gingharian nagpormag daghang kongregasyon ug nakaugmad ug Kristohanong mga hiyas. Ang mga tawo nga kaniadto bayolente ug imoral nagsul-ob na sa “bag-ong personalidad nga gihimo sumala sa kabubut-on sa Diyos.” w24.04 20-21 ¶3-4

Sa ubang lugar, ang mga ginikanan o ang ubang hamtong gidahom nga maoy mopili kon kinsay minyoan sa ilang tagsaanong membro sa pamilya. Sa uban pong lugar, ang mga pamilya o higala mangitag potensiyal nga maminyoan sa usa ka tagsaanon, dayon hikayon nila nga magkitaay ang lalaki ug babaye aron makita nilang duha kon gusto ba nilang magkatrato. Kon ikaw ang gihangyo nga maoy mangita o mopili, hunahunaa kon unsay gusto ug panginahanglan sa usa nga imong gipangitaag kapikas ug sa usa nga imong giisip ingong potensiyal nga kapikas. Kon naa na kay nakita, susiha pag-ayo ang iyang personalidad, mga hiyas, ug labaw sa tanan, ang iyang espirituwalidad. Mas importante ang suod nga relasyon kang Jehova kay sa kuwarta, edukasyon, o kahimtang sa kinabuhi. Pero hinumdomi nga ang single nga brader ug sister mao gyoy modesisyon kon magminyo ba sila. w24.05 23 ¶11

Masuportahan nato ang managtrato pinaagi sa pag-amping kon unsay atong isulti. Usahay kinahanglan tingali natong pugngan ang atong kaugalingon. (Prov. 12:18) Pananglitan, eksayted tingali kaayo ta nga sultihan ang uban bahin sa bag-ong managtrato, pero basin mas gusto nila nga silay mosulti. Dili ta angayng manabi bahin nila o sawayon sila sa ilang desisyon bahin sa personal nga mga butang. (Prov. 20:19; Roma 14:10; 1 Tes. 4:11) Mag-amping pod ta sa atong mga isulti o ipangutana aron dili nato mapabati nila nga angay gyod silang magminyo o nga gidahom nato nga sila na gyod ang magkadayon. Komosta kon ang managtrato modesisyon nga magbulag? Likayan gyod nato ang pagsukitsukit o pagdapigdapig. (1 Ped. 4:15) Ang panagbulag wala magpasabot nga napakyas ang managtrato. Nagpasabot lang ni nga nakab-ot nila ang katuyoan kon nganong nagtrato sila—nga mao, aron tabangan sila nga makahimog maayong desisyon. Pero masakitan tingali gihapon sila sa ilang gihimong desisyon. Maong puwede tang mangitag paagi nga matabangan sila. w24.05 31 ¶15-16

Makapaguol gyod kon ang usa ka membro sa pamilya o higala mobiya kang Jehova. (Sal. 78:40) Lisod ning dawaton ilabina kon suod kaayo ta niya. Kon nakaeksperyensiya ka niana, seguradong mapalig-on ka sa pagkamaunongon ni Zadok. Siya nagpabiling maunongon kang Jehova bisan pag ang iyang suod nga higala nga si Abiatar mipili nga mobiya kang Jehova. Nahitabo ni sa hapit nang mamatay si Haring David. Ang iyang anak nga si Adonias misulay sa pag-ilog sa trono nga gisaad ni Jehova kang Solomon. (1 Cron. 22:​9, 10) Si Abiatar mipili nga suportahan si Adonias. (1 Hari 1:​5-8) Busa wala siya magmaunongon kang David ug Zadok, ug labaw na gyod kang Jehova! Sulod sa daghang katuigan, si Zadok ug Abiatar nag-uban ingong saserdote.—2 Sam. 8:17; 15:29; 19:​11-14. w24.07 6 ¶14-15

Makaseguro ta nga kon padayon natong suklan ang tentasyon, dili gyod masayang ang atong mga paningkamot. Ang “temporaryong kalipay” sa pagpakasala layo ra kaayo kompara sa kalipay nga atong bation kon sundon nato ang mga sukdanan ni Jehova. (Heb. 11:25; Sal. 19:8) Tungod na kay gidisenyo ta niya nga magkinabuhi uyon sa iyang mga sukdanan. (Gen. 1:27) Busa kon sundon nato si Jehova, mabatonan nato ang hinlong konsensiya ug ang kahigayonan nga mabuhi hangtod sa hangtod. (1 Tim. 6:12; 2 Tim. 1:3; Jud. 20, 21) Tinuod, “luya ang unod.” (Mat. 26:41) Pero wala ni magpasabot nga wala na tay mahimo sa atong mga kahuyangan. Si Jehova andam mohatag ug kusog nga atong gikinahanglan. (2 Cor. 4:7) Pero matikdi nga ang ihatag sa Diyos mao ang kusog o gahom nga labaw sa kasarangan. Sa ato pa, naa tay kinahanglang himoon sa atong bahin. Kinahanglan natong gamiton ang atong kasarangan nga gahom, o kaugalingong kusog, aron masuklan ang tentasyon. Ato ning responsibilidad adlaw-adlaw. Tubagon ni Jehova ang atong mga pag-ampo para sa dugang kusog nga atong gikinahanglan. (1 Cor. 10:13) Oo, sa tabang ni Jehova, makapadayon ta sa pagbantay aron masuklan ang tentasyon. w24.07 19 ¶19-21

Sama sa atong mabasa sa teksto karong adlawa, giingnan ni Pablo ang iyang isigkaansiyano nga si Timoteo nga badlongon atubangan sa tanan “kadtong mga nagpakasala.” Kinsa man ning “tanan” nga iyang gitumong? Kanunay ba ning nagpasabot sa tibuok kongregasyon? Wala. Ang iyang gitumong mao kadtong pipila nga tingali nahibalo sa nahimong sala—tingali kadtong mga nakasaksi o kadtong mga gitug-anan sa nakasala. Ang mga ansiyano magpahibalo nila sa pribado nga naatiman na ang kaso ug natabangan na ang nakasala. Pero usahay, ang sala nabaniog diha sa kongregasyon o posibleng mabaniog. Niini nga kahimtang, ang giingon ni Pablo nga “tanan” nagtumong sa tibuok kongregasyon. Busa ang usa ka ansiyano magpahibalo diha sa kongregasyon nga ang igsoon gibadlong. Ngano? Gisulti ni Pablo ang rason: “Ingong pasidaan para sa uban” aron dili sila mohimog sala. w24.08 24 ¶16-17

Kinahanglan tang magpabiling aktibo sa pag-alagad kang Jehova hangtod sa kataposan. Ang mga dinihogan kinahanglang magpadayon sa pagbantay aron apil sila sa “dad-on” ni Jesus ug makadawat sa ilang langitnong ganti. (Mat. 24:40) Naghinamhinam na gyod ang mga dinihogan nga ‘matigom’ ngadto kang Jesus didto sa langit. Human sa gubat sa Armagedon, mahitabo na ang kasal sa Kordero ug sila mahimong pangasaw-onon ni Jesus (2 Tes. 2:1) Bisag nagkaduol na ang paghukom, wala tay angayng kahadlokan. Kon magpabilin tang matinumanon, ang atong mahigugmaong langitnong Amahan mohatag natog “gahom nga labaw sa kasarangan” aron “makabarog [ta] atubangan sa Anak sa tawo.” (2 Cor. 4:7; Luc. 21:36) Langitnon man o yutan-on ang atong paglaom, mapalipay nato ang atong Amahan kon sundon nato ang mga pasidaan gikan sa mga ilustrasyon ni Jesus. Pinaagi sa dili hitupngang pagkamaayo ni Jehova, ang atong mga ngalan ‘masulat sa basahon’ sa kinabuhi.—Dan. 12:1; Pin. 3:5. w24.09 25 ¶19-20

Magmalinawon ang imong hunahuna sa tabang sa Pulong sa Diyos. Sa unsang paagi? Pamalandonga ang tanan nimong nabatonan karon—apil ang imong mga bahandi sa langit—ug ikompara ni sa nabatonan niadtong mga tawo nga wala mag-alagad kang Jehova. Kini nga mga tawo nagpokus lang sa ilang kalamposan ug sa ginatanyag sa kalibotan karon kay wala silay laing gidahom nga paglaom sa umaabot. Pero sa imong bahin, gawas pa sa maayong mga butang nga imong nabatonan karon, naa pa gyoy gisaad si Jehova kanimo nga nindot nga mga panalangin sa umaabot. (Sal. 145:16) Hunahunaa pod ni: Dili gyod nato bug-os mahibaloan kon unsay atong kinabuhi karon kon lahi pa nga desisyon ang atong gihimo. Pero usa ka butang ang segurado: Kadtong mihimog mga desisyon base sa ilang gugma sa Diyos ug sa mga tawo dili gyod makulangan ug bisan unsa nga makahatag nilag tinuod nga kalipay. w24.10 27 ¶12-13