Hunyo

Karon pa lang, nakabenepisyo na ta sa halad lukat sa Kristo. Pananglitan, tungod sa lukat, si Jehova nagpasaylo sa atong mga sala. Dili siya obligado nga himoon na, pero gusto niya nga pasayloon ta. (Sal. 103:​3, 10-13) Ang uban mobati tingali nga dili takos sa pagpasaylo ni Jehova. Ang tinuod, kitang tanan dili gyod takos niana. Kana pod ang gibati ni apostol Pablo, ug gani siya miingon nga “dili [siya] angayng tawgon nga apostol.” Pero siya midugang: “Pinaagi sa dili hitupngang pagkamaayo sa Diyos nahimo kong apostol.” (1 Cor. 15:​9, 10) Kon maghinulsol ta sa atong mga sala, pasayloon ta ni Jehova. Ngano? Dili tungod kay angayan tang pasayloon, kondili tungod kay gimahal ta niya. Busa kon gibati nimo nga dili ka takos sa pagpasaylo ni Jehova, hinumdomi nga gitagana niya ang lukat dili para sa hingpit nga mga tawo, kondili para sa mahinulsolong mga makasasala.—Luc. 5:32; 1 Tim. 1:15. w25.01 26-27 ¶3-4

Dili nato makontrol kon unsay isulti o himoon sa uban, pero puwede natong kontrolon ang atong reaksiyon. Ug sagad, ang pinakamaayong buhaton mao ang pagpasaylo. Ngano? Kay gimahal nato si Jehova ug gusto niya nga magpasaylo ta. Kon padayon tang masuko ug dili magpasaylo, basig makahimo tag dili maayo o kaha masakit na hinuon ta. (Prov. 14:​17, 29, 30) Kon wad-on nato sa atong kasingkasing ang kasuko ug pagdumot, maayo nig epekto sa atong kaugalingon ug sa atong pagtratar sa uban. Samag gihatagan pod natog nindot nga regalo ang atong kaugalingon, kay makapadayon ta sa atong kinabuhi ug mabalik ang atong kalipay. Nagkinahanglag panahon aron maulian ang atong gibati nga kasakit. Sa pag-ilustrar: Ang tawo nga grabeng na-injure nagkinahanglan gihapon ug panahon nga maulian bisag nahatagan na siyag medikal nga pag-atiman. Sa samang paagi, nagkinahanglag panahon nga maulian ang atong gibati aron makahimo ta sa pagpasaylo nga kinasingkasing. (Eccl. 3:3; 1 Ped. 1:22) Pinaagi sa pag-ampo, hangyoa si Jehova nga tabangan ka nga makapasaylo. w25.02 16-17 ¶8-11

Ang pipila sa pangunang mga pagtulon-an mao ang paghinulsol, pagtuo, bawtismo, ug pagkabanhaw. (Heb. 6:​1, 2) Kini nga mga pagtulon-an mao ang pundasyon sa Kristohanong pagtuo. Kanay hinungdan nga dihang nagsangyaw si apostol Pedro panahon sa Pentekostes, kini nga mga butang ang iyang gitudlo. (Buh. 2:​32-35, 38) Kinahanglan natong dawaton kining panguna nga mga pagtulon-an aron mahimo tang mga tinun-an sa Kristo. Pananglitan, si Pablo nagpasidaan nga kadtong dili modawat sa pagtulon-an sa pagkabanhaw nagsalikway sa tibuok Kristohanong pagtulon-an. (1 Cor. 15:​12-14) Pero dili ta angayng makontento sa panguna lang nga mga kamatuoran. Dili sama sa pangunang mga doktrina, ang gahing espirituwal nga pagkaon wala lang maglakip sa mga balaod ni Jehova kondili sa iya pong mga prinsipyo, nga makatabang nato nga masabtan ang iyang panghunahuna. Aron makabenepisyo ta niana nga pagkaon, kinahanglan natong tun-an, pamalandongon, ug ipadapat ang atong nakat-onan sa Pulong sa Diyos. Kon ato nang buhaton, makakat-on ta sa paghimog mga desisyon nga makapalipay kang Jehova. w24.04 5 ¶12-13

Gipahinumdoman sa Diyos si Jonas nga ang mga taga-Nineve “wala gani mahibalo kon unsay husto ug sayop.” (Jon. 1:​1, 2; 3:10; 4:​9-11) Sa ulahi, gigamit ni Jesus kini nga pananglitan aron tudloan ta bahin sa hustisya ug kaluoy ni Jehova. Unsay gipasabot ni Jesus dihang siya miingon nga ang mga taga-Nineve “banhawon sa Adlaw sa Paghukom”? Si Jesus naghisgot bahin sa umaabot nga ‘pagkabanhaw ngadto sa paghukom.’ (Juan 5:29) Kini mahitabo panahon sa Usa ka Libo ka Tuig nga Pagmando ni Jesu-Kristo, diin ang “mga matarong” ug ang “mga dili matarong” banhawon. (Buh. 24:15) Para sa mga dili matarong, kini maoy ‘pagkabanhaw ngadto sa paghukom.’ Nagpasabot ni nga obserbahan ug susihon ni Jehova ug Jesus ang ilang binuhatan aron makita kon ila bang gipadapat ang ilang nakat-onan. Kon ang nabanhaw nga taga-Nineve dili gustong mosimba kang Jehova, hukman siya nga dili angayang mabuhi hangtod sa hangtod. (Isa. 65:20) Pero kon ang nabanhaw nga taga-Nineve mopili nga simbahon si Jehova ug magmatinumanon, hukman siya ni Jehova nga makabaton ug kahigayonan nga mabuhi hangtod sa hangtod!—Dan. 12:2. w24.05 5 ¶13-14

Hingpit gyod nga gipakita ni Jesus kon unsa ka maluluy-on ang iyang Amahan. (Juan 14:9) Pinaagi sa pulong ug buhat, gipakita ni Jesus nga ang iyang maluluy-ong Amahan nahigugma sa mga tawo ug gustong motabang nila nga masuklan ang sala. Gitabangan niya ang makasasalang mga tawo nga magbag-o ug mosunod kaniya. (Luc. 5:​27, 28) Nahibalo si Jesus kon unsay mahitabo niya sa umaabot. Sa pipila ka higayon, gisultihan niya ang iyang mga sumusunod nga siya budhian ug patyon diha sa estaka. (Mat. 17:22; 20:​18, 19) Nahibalo siya nga ang iyang paghalad sa iyang kinabuhi magpapas sa sala sa kalibotan. Miingon pod si Jesus nga dihang mahalad na niya ang iyang kinabuhi, iyang “kabigon ang tanang matang sa tawo” ngadto kaniya. (Juan 12:32) Mapalipay sa makasasalang mga tawo si Jehova kon ilang dawaton si Jesus ingong Ginoo ug sundon ang iyang ehemplo. Kon ila nang himoon, sila ‘mapagawas gikan sa sala.’ (Roma 6:​14, 18, 22; Juan 8:32) Busa kinabubut-on ug maisogong giatubang ni Jesus ang iyang pait nga kamatayon aron maluwas ta.—Juan 10:​17, 18. w24.08 5 ¶11-12

Hunahunaa kon unsay imong gibati dihang una nimong nakat-onan ang kamatuoran gikan sa Pulong sa Diyos. Nahibaloan nimo nga gimahal ka sa imong langitnong Amahan, ug nga gusto niya nga mahimo kang bahin sa iyang pamilya. Nahibaloan sab nimo ang iyang saad nga taposon ang kasakit ug pag-antos ug nga sa bag-ong kalibotan, iyang banhawon ang imong namatay nga mga minahal. (Mar. 10:​29, 30; Juan 5:​28, 29; Roma 8:​38, 39; Pin. 21:​3, 4) Kini ug ang uban pang kamatuoran nakatandog gyod sa imong kasingkasing. (Luc. 24:32) Kay gipabilhan nimo ang imong mga nakat-onan, dili nimo mapugngan nga isulti ni ngadto sa uban! (Itandi ang Jeremias 20:9.) Kon mogamot sa atong kasingkasing ang kamatuoran, ato gyod ning isulti sa uban. (Luc. 6:45) Bation nato ang gibati sa mga tinun-an ni Jesus sa unang siglo, kinsa miingon: “Dili mi makahunong sa pagsulti bahin sa mga butang nga among nakita ug nadungog.” (Buh. 4:20) Kon gipabilhan nato pag-ayo ang kamatuoran, mapalihok ta nga isulti ni sa uban kutob sa mahimo. w24.05 15 ¶5; 16 ¶7

Ingong katawhan ni Jehova, nagsangyaw ta sa uban kay gimahal nato ang atong langitnong Amahan ug gusto natong tabangan ang mga tawo nga makaila kaniya. Pero ang uban wala kaayo mag-enjoy sa buluhatong pagsangyaw. Ngano? Kay ang uban maulawon kaayo ug walay kompiyansa sa kaugalingon. Naay uban nga dili komportable nga moadto sa mga balay kon wala sila imbitaha. Ang uban pod mahadlok nga makasab-an. Ug ang uban dili ganahan nga makapasuko sila sa mga tawo. Busa, kini nga mga igsoon nalisdan sa pagsangyaw sa dili nila kaila. Malisdan ba ka usahay nga magmalipayon sa ministeryo tungod sa maong mga pagbati? Kon mao, ayawg kaluya. Ang imong kakulang ug kompiyansa sa kaugalingon nagpakita nga mapainubsanon ka ug dili nimo gustong mapokus kanimo ang atensiyon sa uban. Nagpakita pod ni nga dili ka ganahang makiglalis. Ug dili nato gusto nga makasab-an ta sa mga tawo, ilabina kay naningkamot ta nga mohimog maayo kanila. Ang imong langitnong Amahan nahibalo pag-ayo sa imong gibati ug gusto ka niyang tabangan.—Isa. 41:13. w24.04 14 ¶1-2

Imbes nga himoon dayon ang tanan nimong nakat-onan sa imong pagbasa sa Bibliya, pagpili lang unag pipila ka tumong nga kaya nimong kab-oton. Puwede nimo ning sulayan: Ilista ang tanan nga gusto nimong pauswagon, ug pagpilig usa o duha nga gusto nimong unahon sa pagpadapat. Dayon sa sunod na pod ang uban. Asa kaha ka puwedeng magsugod? Puwede nimong unahon ang tumong nga dali ra nimong makab-ot. O kaha puwede nimong unahon kadtong nakita nimo nga ilabinang kinahanglan nimong pauswagon. Kon naa na kay napili nga tumong, pag-research sa atong mga publikasyon. Iampo ang imong tumong ug hangyoa si Jehova nga hatagan kag “tinguha ug kusog sa pagbuhat sa mga butang nga gusto niya.” (Filip. 2:13; footnote) Dayon ipadapat ang imong nakat-onan. Kon molampos ka sa una nimong tumong, posibleng mas madasig ka nga mohimog lahi na pod nga tumong. Gani, kon molampos ka sa paghimog kausaban o sa pag-ugmad ug espesipikong hiyas, posibleng mas sayon na para nimo ang paghimog uban pang kausaban o ang pag-ugmad ug uban pang hiyas. w24.09 6 ¶13-14

Tingali naguol ka sa imong mga nahimo kaniadto nga nakapasakit sa uban. Unsay puwede nimong buhaton? Himoa kon unsay imong mahimo sa situwasyon, sama sa kinasingkasing nga pagpangayog pasaylo. Hangyoa si Jehova nga tabangan kadtong mga naapektohan sa imong gihimo. Makatabang siya nimo ug niadtong imong mga napasakitan aron makalahutay mo ug makabatog kalinaw. Kat-oni ang mga sayop nga imong nahimo, ug tugoti si Jehova nga gamiton ka sa bisan unsa mang paagi nga iyang gusto. Matikdi ang ehemplo ni propetang Jonas. Gisugo siya sa Diyos nga moadto sa Nineve. Pero imbes himoon na, miikyas na hinuon siya ug miadto sa laing direksiyon. Tungod ana, gidisiplina siya ni Jehova ug nakakat-on siya sa iyang sayop. (Jon. 1:​1-4, 15-17; 2:​7-10) Si Jehova wala gyod mobiya kang Jonas. Gihatagan niya si Jonas ug laing kahigayonan nga moadto sa Nineve, ug niining higayona misunod dayon si Jonas. Bisag naguol siya sa iyang sayop kaniadto, wala niya ni tugoti nga mopugong niya sa pagdawat sa asaynment nga gihatag ni Jehova.—Jon. 3:​1-3. w24.10 8-9 ¶10-11

Gawas nga gikanselar ni Jehova ang atong mga utang, o mga sala, iya pod ning gipapas. Hunahunaa ni: Kon gikanselar ang utang, ma-imagine tingali nato nga samag gisulatan ug dako nga X ang listahan sa mga utang. Bisan pa ana, makita gihapon ang utang kay igo ra ning gisulatan ug X. Pero lahi kaayo ang pagpapas. Hinumdomi nga sa karaang panahon, ang tinta nga gigamit maoy gisagol nga karbon, tagok, ug tubig. Dali ra ning ma-erase pinaagig basa nga panapton. Maong kon ang utang papason, mawala ni sa bug-os. Dili na makita kon unsa may nasulat niana kaniadto; sama bag wala gyoy rekord sa utang. Busa makapahupay gyod nga dili lang kay basta kanselahon ni Jehova ang atong mga sala, iya pod ning papason sa bug-os!—Sal. 51:9. w25.02 10 ¶11

Kon akusahan o buhatan ta ug dili maayo sa uban, may pagsalig ta nga nahibalo si Jehova kon unsay tinuod. Makatabang na nato nga malahutay ang dili maayong pagtratar kay nahibalo ta nga sa ngadtongadto tul-iron ra ni Jehova ang mga butang. Kon isalig nato kang Jehova ang tanan, malikayan nato nga maghambin ug kasuko o pagdumot. Sa laing bahin, kon magpadala ta niini nga mga pagbati, basin makahimo tag mga butang nga dili maayo, mawala ang atong kalipay, ug madaot ang atong relasyon kang Jehova. Siyempre, dili gyod nato bug-os masundog ang ehemplo ni Jesus. Usahay, naa tingali tay mahimo o masulti nga atong mahayan sa ulahi. (Sant. 3:2) Naa poy mga inhustisya nga basin nakahatag natog grabeng kasakit ug dili gyod nato malimtan sa tibuok natong kinabuhi niini nga sistema. Kon kanay imong kahimtang, makasalig ka nga nahibalo gyod si Jehova sa tanan nimong kasakit. Ug si Jesus, nga nakasinati sab ug mga inhustisya, nakasabot sa imong gibati. (Heb. 4:​15, 16) Makapalipay gyod nga si Jehova naghatag ug praktikal nga mga tambag nga makatabang nato kon makasinati tag inhustisya. w24.11 6 ¶12-13

Ang mga tawo kinahanglang magpakitag pagtuo kang Jesus aron makabaton silag “kinabuhing walay kataposan.” (Juan 3:​16-18, 36; 17:3) Wala dawata sa daghang Hudiyo nga kinahanglan silang magpakitag pagtuo kang Jesus. Ila siyang gipangutana: “Unsang ilhanan ang imong ipakita kanamo aron motuo mi nimo?” (Juan 6:30) Miingon sila nga ang ilang mga katigulangan sa panahon ni Moises nakadawat ug mana, nga susama sa tinapay. (Neh. 9:15; Sal. 78:​24, 25) Klaro nga ang ilang hunahuna nakapokus lang gihapon sa literal nga tinapay. Wala gani sila mangutana kang Jesus kon unsay iyang gipasabot sa “tinuod nga tinapay gikan sa langit,” ang tinapay nga labaw pa sa mana ug makahatag ug kinabuhing walay kataposan. (Juan 6:32) Nagpokus ra kaayo sila sa ilang pisikal nga panginahanglan nga tungod niana ilang gibalewala ang espirituwal nga mga kamatuoran nga gustong itudlo ni Jesus kanila. w24.12 5-6 ¶10-11

Samtang magkadaghan ang makat-onan sa imong anak sa eskuwelahan bahin sa science, iyang makita nga ang mga butang sa kalalangan naay gisunod nga mga balaod nga maoy hinungdan sa ilang porma o shape. Pananglitan, ang disenyo sa kada snowflake nagsunod sa geometric pattern nga gitawag ug fractal. Ang fractal nga mga pattern makita pod sa ubang kalalangan. Pero kinsa may nagtakda niini nga mga balaod sa kalalangan? Kinsa may naghimo o nagdisenyo niining nindot nga mga pattern? Kon hunahunaon pag-ayo sa imong anak kini nga mga pangutana, posibleng molig-on ang iyang pagtuo nga gilalang gyod sa Diyos ang tanang butang. Kon modakodako na ang imong anak, puwede nimo siyang pangutan-on, “Kay gilalang man ta sa Diyos, di ba makaingon gyod ta nga naghatag pod siya natog mga balaod o giya aron magmalipayon ta?” Dayon sultihi siya nga kini nga mga giya makita diha sa Bibliya. w24.12 16 ¶8

Ubos sa paggiya sa Diyos, gisulatan ni apostol Pablo ang mga taga-Corinto nga tangtangon gikan sa kongregasyon ang usa ka dili mahinulsolong makasasala. (1 Cor. 5:13) Unsaon pagtratar sa matinumanong mga Kristohanon ang nakasala? Giingnan sila ni Pablo nga “mohunong na sa pagpakig-uban” kaniya. Unsay iyang gipasabot? Si Pablo nagsugo nga “dili gani [sila] mokaon uban sa ingon niana nga tawo.” (1 Cor. 5:11) Kon ang usa mokaon uban sa laing tawo, makagahin siyag taastaas nga panahon uban niya. Busa tin-awng gipasabot ni Pablo nga likayan sa kongregasyon ang pagpakig-uban sa maong tawo. Makatabang ni aron maproteksiyonan ang kongregasyon gikan sa iyang dili maayong impluwensiya. (1 Cor. 5:​5-7) Makatabang pod ni niya aron makaamgo siya sa iyang sala kang Jehova, mobatig kaulaw, ug mapalihok sa paghinulsol. w24.08 15 ¶4-5

Ang mga Israelinhon kinahanglang magsaulog sa Adlaw sa Pagtabon sa Sala kausa sa usa ka tuig. Nianang adlawa, ang hataas nga saserdote magtanyag ug halad nga mga hayop alang sa katawhan. Siyempre ang halad nga hayop dili bug-os makatabon sa sala, kay ang mga hayop mas ubos kay sa mga tawo. Pero kon itanyag sa mahinulsolong mga Israelinhon ang mga halad nga gisugo ni Jehova, andam siyang mopasaylo sa ilang mga sala. (Heb. 10:​1-4) Ang mga halad nga ilang ginatanyag sa Adlaw sa Pagtabon sa Sala magpahinumdom sa mga Israelinhon nga naa sila sa makasasalang kahimtang. Pero si Jehova mihimog permanenteng kahikayan aron mapasaylo ang mga sala sa katawhan. Gihikay niya nga ang iyang pinalanggang Anak mahimong ‘halad kausa alang sa tanang panahon aron mopas-an sa mga sala sa daghan.’ (Heb. 9:28) Gihatag ni Jesus ang “iyang kinabuhi ingong lukat baylo sa daghan.”—Mat. 20:28. w25.02 4 ¶9-10

“Andam ang espiritu, apan luya ang unod.” (Mat. 26:41b) Kining mga pulonga nagpakita nga nasabtan ni Jesus ang atong pagkadili-hingpit. Pero iya pod ning giingon aron pasidan-an ta nga dili sobrang mosalig sa atong kaugalingon. Sayosayo nianang gabhiona, gisulti sa mga tinun-an ang ilang lig-ong determinasyon nga dili nila biyaan ang ilang Agalon. (Mat. 26:35) Gusto nilang himoon kon unsay maayo. Pero wala sila mahibalo nga dali ra diay mohuyang ang ilang determinasyon kon naa sila sa lisod nga situwasyon. Busa, gitambagan sila ni Jesus pinaagi sa mga pulong nga makita sa teksto karong adlawa. Pero unsay gihimo sa mga tinun-an dihang gidakop si Jesus? Miunong ba sila niya, o nagpadaog sila sa kahadlok ug mibiya? Makapaguol kay ang mga tinun-an wala makapadayon sa pagbantay. Ang dili nila gustong himoon mao hinuon ang ilang gihimo—ilang gibiyaan si Jesus.—Mat. 26:56. w24.07 14 ¶1-2

Giwala ni Adan ug Eva ang ilang maayong relasyon sa ilang Amahan, si Jehova. Sa primero, apil sila sa pamilya sa Diyos. (Luc. 3:38) Pero sa dihang misupak sila kang Jehova, wala na sila tugoti nga mahimong bahin sa iyang pamilya. Nahitabo ni sa dihang wala pa sila makabaton ug mga anak. (Gen. 3:​23, 24; 4:1) Tungod ana, kita pod nga ilang mga kaliwat dili bahin sa pamilya ni Jehova, maong nagkinahanglan tag tabang aron mapasig-uli kaniya. (Roma 5:​10, 11) Nagpasabot ni nga kinahanglang makabaton tag maayong relasyon kaniya. Base sa usa ka reperensiya, ang Gregong pulong nga gigamit dinhi para sa “pagpasig-uli” puwedeng magpasabot nga “makighigala sa usa ka kaaway.” Makapainteres kay si Jehova ang mihimog paagi aron maposible ni. Iyang gihimo ang kahikayan sa pagtabon sa sala, aron ang makasasalang katawhan makabaton pag-usab ug maayong relasyon kaniya. Apil niini nga kahikayan ang paghatag ug butang ingong baylo sa laing butang nga parehas ug bili. Busa ang usa ka butang nga nawala o nadaot puwedeng mabalik o mailisan. w25.02 3-4 ¶7-8

Giingnan ni apostol Pablo ang kongregasyon nga “igo na ang pagbadlong nga [ilang] gihatag sa maong tawo.” (2 Cor. 2:​5-8) Sa ato pa, nakab-ot na ang katuyoan sa disiplina ngadto sa tawo nga kaniadto naghimog seksuwal nga imoralidad uban sa iyang inaina. (1 Cor. 5:1) Unsa nga katuyoan? Tabangan siya nga maghinulsol. (Heb. 12:11) Busa giawhag ni Pablo ang kongregasyon nga ‘pasayloon ug hupayon’ ang nakasala nga igsoon ug “pamatud-an ang [ilang] gugma kaniya.” Matikdi nga wala lang mag-ingon si Pablo nga dawaton nila pag-usab sa kongregasyon ang nakasala. Gusto niya nga pinaagi sa pulong ug buhat, pasaligan nila ang maong mahinulsolong igsoon nga ila siyang gimahal ug gipasaylo na. Pinaagi ana, ilang mapakita nga kinasingkasing nila siyang gidawat pag-usab sa kongregasyon. w24.08 15 ¶4; 16-17 ¶6-8

Makahatag gyod si apostol Pablo ug maayong tambag kay nahibalo siya pag-ayo kon unsay gikinahanglan aron makalahutay. Iyang gipahinumdoman ang mga Kristohanon nga sa dihang mag-atubang ug mga pagsulay, kinahanglan silang mosalig kang Jehova ug dili sa ilang kaugalingon. Mao ni ang nakahatag kang Pablo ug kaisog maong siya miingon: “Si Jehova ang akong magtatabang; dili ko mahadlok.” (Heb. 13:6) Ang uban natong mga igsoon nag-atubang karon ug mga paglutos. Masuportahan nato sila pinaagi sa atong mga pag-ampo, ug usahay sa praktikal nga mga paagi. Pero ang Bibliya klaro pong nag-ingon nga “ang tanan nga nagkinabuhi nga nahiusa kang Kristo Jesus ug may debosyon ngadto sa Diyos lutoson sab.” (2 Tim. 3:12) Tungod niana, kitang tanan kinahanglang mangandam sa mga panghitabo sa umaabot. Hinaot nga bug-os tang mosalig kang Jehova nga tabangan ta niyang makalahutay sa bisan unsang pagsulay nga atong maatubang. Sa umaabot, hatagan niyag kahupayan ang tanan niyang matinumanong mga alagad.—2 Tes. 1:​7, 8. w24.09 13 ¶17-18

Unsay nakatabang sa mga taga-Corinto nga magpabawtismo? (2 Cor. 10:​4, 5) Ang Pulong sa Diyos ug ang iyang gamhanang balaang espiritu nakatabang nila sa paghimog dagkong kausaban sa ilang kinabuhi. (Heb. 4:12) Kadtong mga taga-Corinto nga midawat sa maayong balita bahin sa Kristo milampos sa pagbiya sa daotang mga binuhatan sama sa paghuboghubog, pagpangawat, ug homoseksuwalidad. (1 Cor. 6:​9-11) Matikdi nga ang ubang taga-Corinto naay nakagamot na pag-ayo nga mga bisyo, pero wala sila maghunahuna nga dili na gyod sila makabiya niana ug mahimong Kristohanon. Hinuon naningkamot sila nga makasubay sa sigpit nga dalan padulong sa kinabuhing walay kataposan. (Mat. 7:​13, 14) Nakigbisog pod ba ka sa usa ka daotang buhat o bisyo aron mabawtismohan? Ayawg surender! Hangyoa si Jehova nga hatagan ka sa iyang balaang espiritu aron masuklan nimo ang tinguha sa paghimog daotan. w25.03 6 ¶15-17

Si Jehova nagsaad nga hatagan ta niyag kaalam aron masabtan nato kon ang atong gihunahuna nga desisyon makapalipay ba niya. Kini nga kaalam ‘madagayaon niyang ihatag sa tanan ug dili siya mamuyboy.’ Kon nakaampo na ka alang sa giya ni Jehova, matikdi pag-ayo ang iyang tubag. Ibutang ta nga nasaag ka samtang nagbiyahe, mao nga nangutana ka sa usa nga tagadidto. Molakaw ra ba dayon ka bisag wala pa gani siya katubag? Siyempre dili. Maminaw gyod ka pag-ayo sa iyang ihatag nga direksiyon. Sa susama, kon mihangyo ka kang Jehova alang sa kaalam, paningkamoti nga mahibaloan nimo ang iyang tubag. Mahimo nimo na pinaagi sa pagsusi kon unsa nga mga balaod ug prinsipyo sa Bibliya ang mapadapat sa imong situwasyon. Pananglitan, dihang modesisyon kon moadto ba ka sa usa ka tapoktapok, puwede nimong konsiderahon kon unsay giingon sa Bibliya bahin sa banha ug walay pugong nga paglipaylipay, daotang panagkauban, ug sa pag-una sa Gingharian imbes sa atong kaugalingong mga gusto.—Mat. 6:33; Roma 13:13; 1 Cor. 15:33. w25.01 16 ¶6-7

Ang tagna ni Isaias klarong nagpakita kon unsay kalainan sa kinabuhi niadtong naa sa espirituwal nga paraiso ug niadtong wala. Gitagbaw gyod ni Jehova ang espirituwal nga panginahanglan sa iyang mga magsisimba. Gihatag niya ang iyang balaang espiritu, ang iyang Pulong, ug ang dagayang espirituwal nga pagkaon aron kita “mangaon, . . . manginom, . . . [ug] magsadya.” (Itandi ang Pinadayag 22:17.) Pero lahi kaayo ang kahimtang niadtong naa sa gawas sa espirituwal nga paraiso kay sila ‘gigutom, giuhaw, ug nag-antos sa kaulawan.’ Ang ilang espirituwal nga panginahanglan wala gyod matagan-i. (Amos 8:11) Dagayang gitagan-an ni Jehova ang Iyang katawhan sa ilang mga panginahanglan, apil na sa espirituwal nga pagkaon. (Joel 2:​21-24) Iya kanang gitagana pinaagi sa Bibliya ug sa atong binase sa Bibliya nga mga publikasyon, atong website, mga tigom, asembliya, ug kombensiyon. Mapahimuslan nato ang maong espirituwal nga mga tagana kada adlaw, ug pinaagi ana, mas mohimsog ta ug molagsik. w24.04 21 ¶5-6

Kon gusto nimong isulti ang imong gibati sa imong nagustohan, puwede kang makigsabot nga makig-estorya niya diha sa publikong lugar o kaha pinaagig tawag. Klaroha kon unsa gyoy imong intensiyon. (1 Cor. 14:9) Dayon tugoti siya nga maghunahuna. (Prov. 15:28) Ug kon dili siya mosugot nga makigtrato, tahora ang iyang desisyon. Pero komosta kon naay moingon nga nakagusto siya nimo? Seguradong dili sayon para niya nga isulti ang iyang gibati, maong importante nga pakitaan nimo siyag kaayo ug pagtahod. Kon nagkinahanglan kag panahon nga maghunahuna kon mosugot ba ka, isulti kana. Pero ayaw pod kaayo dugaya ang imong tubag. (Prov. 13:12) Kon dili ka interesado, isulti na sa buotan pero prangka nga paagi. Pero kon interesado ka, isulti ang imong gibati ug mga gidahom. Ang imong gidahom bahin sa panagtrato basin lahi sa iyang gidahom. w24.05 24 ¶12-13

Tingali sa tin-edyer pa si David, miadto siya sa kampo sa mga sundalo sa Israel. Iyang nakita nga ang mga sundalo nahadlok pag-ayo sa higanteng Filistehanon nga si Goliat nga ‘nagtamay sa kasundalohan sa Israel.’ (1 Sam. 17:​10, 11) Nahadlok ang mga sundalo kay nagpokus sila sa higante ug sa mga pagtamay nga ilang nadungog. (1 Sam. 17:​24, 25) Pero lahi ang panglantaw ni David. Giisip niya ang pagtamay ni Goliat dili lang ingong pagtamay sa kasundalohan sa Israel kondili sa “kasundalohan sa buhi nga Diyos.” (1 Sam. 17:26) Oo, nagpokus si David kang Jehova. Misalig siya nga ang Diyos nga mitabang niya niadtong tigbantay pa siyag mga karnero motabang pod niya niining higayona. Segurado siya nga paluyohan siya sa Diyos maong iyang giatubang si Goliat, ug siyempre midaog siya!—1 Sam. 17:​45-51. w24.06 21 ¶7

Hunahunaa kon unsa kahay atong kinabuhi kon wala ta mag-alagad kaniya. Ang paghimo ana makatabang nato nga magmatinumanon. Ug sama sa salmista, makaingon pod ta: “Bahin kanako, maayo alang kanako ang pagduol sa Diyos.” (Sal. 73:28) Malahutay nato ang bisan unsang kalisdanan niining kataposang mga adlaw kay kita ‘nagpaulipon sa buhi ug matuod nga Diyos.’ (1 Tes. 1:9) Si Jehova buhi nga Diyos nga andam motabang sa iyang mga alagad. Gitabangan niya ang iyang mga alagad kaniadto, ug iya pod nang ginahimo karon. Hapit na natong masinatian ang dakong kasakitan, ang pinakalisod nga panahon sa kasaysayan sa tawo. Pero dili ta mag-inusara nianang panahona kay kauban nato si Jehova. Hinaot magmaisogon ta ug moingon: “Si Jehova ang akong magtatabang; dili ko mahadlok.”—Heb. 13:​5, 6. w24.06 25 ¶17-18

Sa Bibliya, ginganlan ang kapig 40 ka mga hari sa Israel. Ang maayong mga hari nakahimog dili maayo. Konsideraha ang maayong hari nga si David. Si Jehova miingon: “Ang akong alagad nga si David . . . misunod kanako sa tibuok niyang kasingkasing, nga nagbuhat lamang kon unsay husto sa akong mga mata.” (1 Hari 14:8) Pero, nakahimo siyag seksuwal nga imoralidad sa minyo nga babaye ug mihimog mga plano aron mapatay ang iyang bana panahon sa gubat. (2 Sam. 11:​4, 14, 15) Sa laing bahin, daghan sa dili matinumanong mga hari ang naghimo pod ug maayo. Konsideraha si Rehoboam. Sa panglantaw ni Jehova, siya “nagbuhat ug daotan.” (2 Cron. 12:14) Pero, gisunod ni Rehoboam ang sugo sa Diyos nga dili makig-away sa 10 ka tribo sa Israel ug tugotan sila nga mobulag sa iyang gingharian. Gipalig-on pod niya pag-ayo ang mga siyudad nga sakop sa iyang pagmando maong naproteksiyonan ang katawhan sa Diyos gikan sa mga kaaway. (1 Hari 12:​21-24; 2 Cron. 11:​5-12) Unsay basehanan ni Jehova nga isipon ang usa ka hari nga matinumanon? Klaro nga gisusi Niya kon unsay kahimtang sa kasingkasing sa maong hari, kon andam ba siyang maghinulsol, ug kon padayon ba siyang nagsimba kang Jehova sa hustong paagi. w24.07 20 ¶1-3

Komosta kon makahimog seryosong sala ang bawtismadong menor de edad—kadtong wala pay 18 anyos? Ang lawas sa mga ansiyano mag-asayn ug duha ka ansiyano nga makig-estorya sa menor de edad ug sa iyang Kristohanong mga ginikanan. Susihon sa mga ansiyano kon unsa nay gihimo sa mga ginikanan sa pagtabang sa ilang anak nga maghinulsol. Kon ang menor de edad maayog tinamdan ug misanong sa paningkamot sa iyang mga ginikanan, ang duha ka ansiyano mahimong modesisyon nga dili na mohimog dugang aksiyon. Haom lang ni kay ang mga ginikanan ang gihatagan sa Diyos ug responsibilidad sa pagtul-id sa ilang mga anak sa mahigugmaong paagi. (Deut. 6:​6, 7; Prov. 6:20; 22:6; Efe. 6:​2-4) Human niana, komostahon panagsa sa mga ansiyano ang mga ginikanan aron maseguro nga ang menor de edad padayong makadawat sa gikinahanglang tabang. Pero komosta kon ang bawtismadong menor de edad dili mahinulsolon ug magpadayon sa iyang daotang binuhatan? Niana nga kahimtang, ang komite sa mga ansiyano makig-estorya niya kauban sa iyang Kristohanong mga ginikanan. w24.08 24 ¶18

Malipay gyod ta kon makadawat tag regalo. Pero mas magmalipayon ta kon kitay mohatag. Kay gidisenyo ta ni Jehova niining paagiha, kita mismo naay mahimo aron magmalipayon. Madugangan nato ang atong kalipay kon mangita tag mga kahigayonan nga makahatag sa uban. Mapasalamaton gyod ta nga ingon niini ang pagkadisenyo ni Jehova kanato. (Sal. 139:14) Ang Bibliya nag-ingon nga makapalipay ang paghatag. Kanay hinungdan nga si Jehova gitawag diha sa Bibliya ingong “malipayong Diyos.” (1 Tim. 1:11) Siya ang pinakauna nga naghatag, ug walay makalabaw sa iyang pagkamahinatagon. Tungod niya, “kita dunay kinabuhi ug naglihok ug naglungtad,” sumala sa giingon ni apostol Pablo. (Buh. 17:28) Oo, “ang matag maayong gasa ug matag hingpit nga regalo” naggikan gyod kang Jehova. (Sant. 1:17) Gusto gyod natong tanan nga maeksperyensiyahan ang labaw nga kalipay sa paghatag. Mahimo nato na kon atong sundogon ang pagkamahinatagon ni Jehova.—Efe. 5:1. w24.09 26 ¶1-4

Human mahisgoti ang mga kuwalipikasyon para sa mga ansiyano, ang ubang ministeryal nga mga alagad mobati tingali nga dili gyod sila mokuwalipikar. Pero hinumdomi nga si Jehova ug ang iyang organisasyon wala magdahom nga perpekto nimong mapakita kini nga mga hiyas. (1 Ped. 2:21) Hinumdomi pod nga ang gamhanang espiritu ni Jehova makatabang nimo sa pagkab-ot niini nga mga kuwalipikasyon. (Filip. 2:13) Naa bay espesipikong hiyas nga gusto pa nimong pauswagon? Iampo na kang Jehova. Pag-research bahin sa maong hiyas ug pangayog sugyot sa usa sa mga ansiyano kon unsaon na pagpauswag. Padayon sa pagpangab-ot! Hangyoa si Jehova nga bansayon ka aron mas daghan pa kag mahimo sa pag-alagad kaniya ug sa kongregasyon. (Isa. 64:8) Hinaot dagayang panalanginan ni Jehova ang imong paningkamot nga mokuwalipikar sa pag-alagad ingong ansiyano. w24.11 24-25 ¶17-18

Wala gyoy usa nato ang angayng mobati nga takos sa pagpasaylo ni Jehova bisag dugay na tang nag-alagad niya. Siyempre, gipabilhan ni Jehova ang atong matinumanong pag-alagad. Pero gihatag niya kanato ang iyang Anak ingong libre nga regalo, dili ingong bayad sa atong pag-alagad. Kon moingon ta nga takos ta sa pagpasaylo ni Jehova tungod sa atong mga nahimo sa pag-alagad, sama rag miingon ta nga wala nato kinahanglana ang lukat. (Itandi ang Galacia 2:21.) Nahibalo si apostol Pablo nga bisag unsa pay iyang himoon, dili gyod siya takos sa pagpasaylo sa Diyos. Pero nganong nagkugi man gihapon si Pablo sa pag-alagad kang Jehova? Aron ipakita ang iyang apresasyon sa dili hitupngang pagkamaayo ni Jehova. (Efe. 3:7) Sama kang Pablo, padayon tang magkugi sa pag-alagad dili aron pamatud-an nga takos ta sa pagpasaylo ni Jehova kondili aron ipakita ang atong apresasyon niini. w25.01 27 ¶5-6