Abril

Kinahanglan tang magpakitag pagtuo sa lukat aron madawat nato ang mga panalangin nga naposible tungod sa unod ug dugo ni Jesus. (Efe. 1:7) Kadtong gihisgotan ni Jesus nga apil sa “ubang mga karnero” dili angayng mokaon sa tinapay ug moinom sa bino panahon sa tinuig nga Panihapon sa Ginoo. (Juan 10:16) Pero makabenepisyo gihapon sila sa mga panalangin nga naposible tungod sa unod ug dugo ni Jesu-Kristo. Madawat nila ang maong mga panalangin pinaagi sa pagpakitag pagtuo sa bili sa iyang halad lukat. (Juan 6:53) Sa laing bahin, kadto lang apil sa bag-ong pakigsaad ug may paglaom nga magmando sa langitnong Gingharian sa Diyos ang angayng mokaon sa tinapay ug moinom sa bino. Pero dinihogan man ta o bahin sa ubang mga karnero, kinahanglan gyod tang magpakitag lig-ong pagtuo aron madawat ang kinabuhing walay kataposan. w24.12 13 ¶14, 16

Panahon sa Panihapon sa Ginoo, gihatagan ni Jesus ang iyang mga apostoles ug tinapay nga walay pangpatubo ug giingnan sila nga kini nagrepresentar sa iyang lawas. Dayon gihatagan niya silag bino ug miingon nga kini nagrepresentar sa “dugo sa pakigsaad.” (Mar. 14:​22-25; Luc. 22:20; 1 Cor. 11:24) Ang bag-ong pakigsaad gihimo uban sa “panimalay [sa espirituwal nga] Israel” nga mahimo unyang bahin “sa Gingharian sa Diyos.” (Heb. 8:​6, 10; 9:15) Panahon sa Panihapon sa Ginoo, si Jesus nagpokus lang sa “gamayng panon.” Ang maong gamayng grupo unang gilangkoban sa iyang matinumanong mga apostoles nga kauban niya niana nga okasyon. Kini nga grupo ang makauban ni Jesus didto sa langit. w24.12 11 ¶9-10

Si Jesus gibudhian, gidakop, gibiaybiay, gibutangbutangan, gihukmang sad-an, ug gipaantos pag-ayo. Dayon gidala siya sa mga sundalo ngadto sa dapit diin siya patyon ug gilansang siya sa estaka. Samtang giantos niya kining tanan, naay nagtan-aw niya nga mas labawng nasakitan—si Jehova nga Diyos. Hunahunaa lang: Walay kinutoban ang gahom ni Jehova ug gimahal kaayo niya ang iyang Anak. Pero nganong wala man niya gamita ang iyang gahom aron taposon ang pag-antos sa iyang pinalanggang Anak? Tungod kay gimahal ta niya. Ang paghalad ni Jesus sa iyang kinabuhi mao ang kinadak-ang pamatuod nga gimahal ka pag-ayo ni Jehova. Dili lalim ang iyang sakripisyo kay giagwanta niya ang grabeng kasakit aron maluwas ka gikan sa sala ug kamatayon. (1 Juan 4:​9, 10) Oo, gusto niyang tabangan ang kada usa nato nga masuklan ang sala ug madaog kini! w24.08 6 ¶13-14

Mas masabtan nato nga gimahal ta pag-ayo ni Jehova kon atong pamalandongon kon unsa ka dako ang iyang gisakripisyo aron mahatag ang lukat. Si Satanas miingon nga walay alagad sa Diyos ang magpabiling maunongon Kaniya kon lisod ang situwasyon. Aron mapamatud-an nga sayop ang giingon ni Satanas, gitugotan ni Jehova nga mag-antos si Jesus sa dili pa siya mamatay. (Job 2:​1-5) Nakita ni Jehova samtang si Jesus gibugalbugalan sa mga magsusupak, gilapdosan sa mga sundalo, ug gilansang sa estaka. Ug nakita ni Jehova ang iyang pinalanggang Anak nga grabeng nag-antos hangtod nga namatay. (Mat. 27:​28-31, 39) Naay gahom si Jehova nga hunongon ang tanang pag-antos ni Jesus. (Mat. 27:​42, 43) Pero kon iya tong gihimo, dili gyod matagana ang lukat ug wala gyod tay paglaom. Maong gitugotan ni Jehova ang iyang Anak nga mag-antos hangtod sa kamatayon. w25.01 22 ¶7

Kadto maoy Nisan 16, 33 C.E. Ang mga tinun-an ni Jesus naguol ug nahadlok. Ang duha kanila mibiya sa Jerusalem ug mibaktas paingon sa Emmaus. Usa ka lalaki ang miduol ug milakaw kuyog nila. Gisulti sa duha ka tinun-an ang ilang kaguol tungod sa nahitabo kang Jesus. Dayon naay gihisgotan ang lalaki nga wala gyod nila malimti. “Sugod kang Moises ug sa mga sinulat sa tanang Propeta,” iyang gipatin-aw kon nganong ang Mesiyas kinahanglang mag-antos ug mamatay. Sa dihang ang tulo miabot sa Emmaus, gipaila sa lalaki ang iyang kaugalingon—nga siya ang binanhaw nga si Jesus. (Luc. 24:​13-35) Sa iyang kataposang 40 ka adlaw dinhi sa yuta, si Jesus kadaghang nagpakita sa iyang mga tinun-an. Nianang panahona, ang kaguol ug kahadlok sa mga tinun-an napulihag kalipay ug paglaom. Nakabaton pod silag kaisog nga mosangyaw ug motudlo bahin sa Gingharian. w24.10 12 ¶1-3

Ang pagtubo sa pisikal natural nga mahitabo paglabay sa panahon, pero ang pagtubo sa espirituwal dili awtomatikong mahitabo. Pananglitan, ang mga igsoon sa Corinto midawat sa maayong balita, nagpabawtismo, nakadawat ug balaang espiritu, ug nakabenepisyo sa personal nga instruksiyon gikan kang apostol Pablo. (Buh. 18:​8-11) Pero paglabayg pipila ka tuig human sa ilang bawtismo, daghan ang dili gihapon hamtong sa espirituwal. (1 Cor. 3:2) Busa aron mohamtong ta, kinahanglang ugmaron una nato ang tinguha nga mahimong hamtong. Kadtong ganahang “magpabiling walay kasinatian,” o magpabiling bata sa espirituwal, dili mouswag. (Prov. 1:22) Dili nato gustong maparehas niadtong hamtong na sa pisikal pero nagdepende gihapon sa ilang mga ginikanan sa paghimog desisyon para nila. Hinuon, gusto natong maningkamot para sa atong kaugalingong pag-uswag. Kon sa pagkakaron, naningkamot pa ka nga mohamtong sa espirituwal, pag-ampo kang Jehova nga hatagan kag “tinguha ug kusog sa pagbuhat sa mga butang nga gusto niya.”—Filip. 2:13; footnote. w24.04 4 ¶9-10

Gisultihan ta ni Jehova kon unsay iyang pagbati bahin sa iyang paghukom sa mga tawo. (Ezeq. 33:11) Si Jehova dili dayon modesisyon nga laglagon hangtod sa hangtod ang usa ka tawo gawas kon naa siyay lig-ong rason nga himoon ni. Maluluy-on kaayo siya, ug magpakita siyag kaluoy kutob sa mahimo. Unsay atong nahibaloan bahin sa mga tawo nga dili mabanhaw? Pipila lang ang gihisgotan sa Bibliya. Pananglitan, naay giingon si Jesus nga nagpakita nga si Judas Iskariote dili mabanhaw. (Mar. 14:21; tan-awa sab ang Juan 17:12 ug ang study note.) Si Judas tinuyong misupak kang Jehova nga Diyos ug sa Iyang Anak. (Tan-awa ang Marcos 3:29 ug ang study note.) Si Jesus miingon sab nga ang pipila ka Hudiyong mga lider sa relihiyon nga misupak kaniya mamatay nga walay paglaom nga mabanhaw. (Mat. 23:33; tan-awa ang Juan 19:11 ug ang study note nga “the man.”) Ug si apostol Pablo nagpasidaan nga ang dili mahinulsolong mga apostata dili mabanhaw.—Heb. 6:​4-8; 10:29. w24.05 4 ¶10-11

Kon magpabilin tang suod kang Jehova, walay mahimo si Satanas nga makadaot nato hangtod sa hangtod. (1 Juan 3:8) Sa bag-ong kalibotan, padayong proteksiyonan ni Jehova ang iyang matinumanong mga higala gikan sa espirituwal nga kadaot ug bisan sa kamatayon. (Pin. 21:4) Dako gyod nga pribilehiyo nga mahimong dinapit sa tolda ni Jehova—nagpasabot ni nga puwede tang makabaton ug suod nga relasyon kang Jehova hangtod sa hangtod. (Ezeq. 37:27) Unsay angay natong himoon aron magpabilin ta sa iyang tolda? Kon naay nangimbitar nimo, seguradong gusto nimong mahibaloan kon unsay iyang gidahom. Sa samang paagi, gusto pod natong mahibaloan kon unsay gidahom ni Jehova sa iyang mga dinapit. Tungod kay gimahal nato si Jehova, mapalihok ta nga himoon ang tanan “aron bug-os . . . siyang mapalipay.” (Col. 1:10) Busa, kinahanglang naa tay lawom nga pagtahod niya ug dili gyod nato kalimtan kon kinsa si Jehova. Kon lawom ang atong pagtahod kaniya, dili gyod ta mohimog bisan unsa nga dili makapalipay niya. Maningkamot ta nga ‘maglakaw nga mapainubsanon’ uban sa atong Diyos.—Miq. 6:8. w24.06 4 ¶8-9

Gisugo ni Jehova si Abraham sa paghalad sa iyang kaugalingong anak nga si Isaac. Seguradong mao to ang pinakalisod nga asaynment nga nadawat ni Abraham. Bisan pa niana, andam siyang motuman sa sugo ni Jehova. Pero sa dihang iya na untang patyon ang iyang anak, gipugngan siya sa Diyos. Kini nga hitabo nagpakita kon unsa poy andam himoon ni Jehova—andam niyang ihatag ang iyang pinalanggang Anak ingong halad. Ingon ana gyod ka dako ang gugma ni Jehova sa katawhan. (Gen. 22:​1-18) Katuigan sa ulahi, ang Balaod nga gihatag ngadto sa nasod sa Israel nagsugo sa pagtanyag ug daghang halad aron matabonan ang sala sa katawhan sa Diyos. (Lev. 4:​27-29; 17:11) Ang maong mga halad nagrepresentar sa mas dakong halad nga maoy bug-os magtabon sa sala sa katawhan. Gigiyahan sa Diyos ang mga propeta sa pagsulat nga ang gisaad nga kaliwat, ang espesyal nga Anak sa Diyos, kinahanglang mag-antos ug mamatay aron maluwas ang katawhan—apil ka—gikan sa sala ug kamatayon!—Isa. 53:​1-12. w24.08 4 ¶7-8

Dihang magbasa ka sa Bibliya, paningkamoti nga mapadapat nimo ang imong gibasa. Samtang magbasa ka sa Pulong sa Diyos, pangutan-a ang imong kaugalingon, ‘Unsaon nako ni pagpadapat karon o sa umaabot?’ Pananglitan, ibutang ta nga sa imong pagbasa sa Bibliya, naa na ka sa 1 Tesalonica 5:​17, 18. Human nimo mabasa kining duha ka bersikulo, hunong usa ug hunahunaa kon unsa ka regular ang imong mga pag-ampo ug kon kinasingkasing ba gyod ni. Puwede pod nimong hunahunaon ang mga butang nga mapasalamaton ka. Tingali magplano ka nga pasalamatan si Jehova sa tulo ka espesipikong butang. Bisag pipila lang ka minuto ang imong igahin sa paghunahuna sa imong nakat-onan, makatabang ni nimo nga masabtan ang Pulong sa Diyos ug mapadapat kini. Hunahunaa lang ang kaayohan niini para nimo kon imo ning himoon kada adlaw sa dihang magbasa ka sa Bibliya. Oo, mouswag gyod ka ug mahimong maayo kaayo nga alagad ni Jehova! w24.09 4-5 ¶9-10

Espesyal kaayo ang pagkadisenyo ni Jehova kanato. Bisag malipay ta kon hatagan ta, mas malipay gyod ta kon kita ang mohatag. Nindot kaayo ang bation dihang makatabang ta sa atong mga igsoon, ug malipay ta dihang magpasalamat sila nato. Pero makadawat man tag apresasyon o dili, ang importante mao nga gibuhat nato kon unsay maayo. Hinumdomi nga bisag unsa pay imong ihatag, “si Jehova makahatag kanimo ug mas daghan pa kay niana.” (2 Cron. 25:9) Oo, bisag unsa pa man ka dako ang atong ihatag sa uban, mas labaw pa niana ang ihatag ni Jehova kanato! Wala na gyoy molabaw pa sa kalipay nga atong bation sa dihang si Jehova mismo ang mobalos nato. Hinaot nga padayon natong sundogon ang pagkamahinatagon sa atong langitnong Amahan. w24.09 30-31 ¶20-21

Si Jehova maluluy-on kaayo. (Sal. 103:13; Isa. 49:15) Nakasabot siya sa atong gibati; kon masakitan ta, masakitan pod siya. (Zac. 2:8) Ginatabangan ta niya nga mas masuod kaniya. (Sal. 25:14; Buh. 17:27) Ug siya mapainubsanon; “siya moyuko aron mosud-ong sa langit ug sa yuta. Bangonon niya ang timawa gikan sa abog.” (Sal. 113:​6, 7) Seguradong gusto gyod natong himayaon ang atong halangdong Diyos! Gihimaya nato si Jehova kay gusto natong mailhan siya sa uban. Daghan ang wala mahibalo sa kamatuoran bahin kang Jehova. Ngano? Kay gibutaan sila ni Satanas pinaagi sa pagpakaylap ug daghang bakak nga pagtulon-an bahin sa Diyos. (2 Cor. 4:4) Gipatuo ni Satanas ang mga tawo nga si Jehova masuk-anon, wala mahigugma nato, ug maoy hinungdan sa pag-antos sa katawhan. Pero nahibalo ta sa kamatuoran bahin sa atong Diyos! Busa pribilehiyo nato nga sultihan ang uban kon unsa gyod siyang klaseha sa Diyos aron sila pod makahatag niyag himaya.—Isa. 43:10. w25.01 3 ¶6-7

Sa unang siglo, si Satanas migamit ug mga tawo sa pagpakaylap ug daghang bakak bahin sa Anak sa Diyos, kinsa hingpit ug naghimog nindot nga mga milagro. Pananglitan, ang mga lider sa relihiyon miingon nga ang gahom nga gigamit ni Jesus sa pagpalayas sa mga demonyo naggikan kuno sa “magmamando sa mga demonyo.” (Mar. 3:22) Dihang si Jesus gihusay, ang mga lider sa relihiyon miingon nga gipasipalahan kuno niya ang Diyos, ug ilang gisulsolan ang mga tawo nga ipapatay siya. (Mat. 27:20) Sa ulahi, samtang ang mga sumusunod sa Kristo nagsangyaw sa maayong balita, kadtong supak kanila “naghulhog ug nag-impluwensiya sa katawhan” nga lutoson ang maong mga Kristohanon. (Buh. 14:​2, 19) Bahin sa Buhat 14:​2, Ang Bantayanang Torre sa Disyembre 1, 1998 miingon nga ang Hudiyong mga magsusupak wala lang makontento sa pagsalikway mismo sa mensahe, kondili sila “milansad ug usa ka kampanya sa walay-pamatuod nga mga sumbong” batok sa mga Kristohanon, aron ang mga Hentil magdumot sa mga Kristohanon. Karon, si Satanas padayon gihapong “nagpahisalaag sa tibuok gipuy-ang yuta.” w24.04 11 ¶15-16

Ang paglaom sa usa ka tawo nga mabuhi hangtod sa hangtod wala magdepende kon kanus-a siya mamatay. Si Jehova mao ang hingpit nga Maghuhukom, ug kanunayng patas ug husto ang iyang mga desisyon. (Sal. 33:​4, 5) Makasalig ta nga “ang Maghuhukom sa tibuok yuta” kanunayng mobuhat kon unsay husto. Ang paglaom sa usa ka tawo wala pod magdepende kon asa siya nagpuyo. Dili gyod makataronganon ang paghunahuna nga awtomatikong hukman ni Jehova ingong “mga kanding” ang milyonmilyong tawo tungod lang kay nagpuyo sila sa mga lugar diin wala silay kahigayonan nga makakat-on sa mensahe sa Gingharian. (Mat. 25:46) Kon buot hunahunaon, wala nay mas labaw nga nagpangga niini nga mga tawo kay kang Jehova, ang matarong nga Maghuhukom sa tibuok yuta. Wala ta mahibalo kon unsaon pagmaniobra ni Jehova ang mga panghitabo panahon sa dakong kasakitan. Tingali ang pipila nila mahatagag kahigayonan nga makakat-on bahin kang Jehova, magpakitag pagtuo, ug modapig kaniya dihang balaanon niya ang iyang kaugalingon atubangan sa tanang kanasoran.—Ezeq. 38:16. w24.05 12 ¶14-15

Ang katawhan ni Jehova andam motabang sa usag usa. (2 Cor. 8:4) Pero usahay, nagkinahanglag kaisog ang paghimo niana. Pananglitan, dihang naay mahitabo nga giyera, ang mga ansiyano nahibalo nga ang mga igsoon nagkinahanglag pagdasig ug tabang, ilabina kon bahin sa ilang espirituwal ug materyal nga panginahanglan. Kay gimahal sa mga ansiyano ang mga igsoon, andam silang motabang nila bisag mameligro ang ilang kinabuhi. Niini nga mga kahimtang, importante nga magkahiusa ta. Sunda ang direksiyon gikan sa inyong sangang buhatan. (Heb. 13:17) Kinahanglang regular nga susihon sa mga ansiyano ang mga instruksiyon kon unsaon nga makapangandam sa kalamidad ug kon unsay himoon panahon sa kalamidad. (1 Cor. 14:​33, 40) Magmaisogon, pero pag-amping. (Prov. 22:3) Hunahunaa pag-ayo ang imong himoon. Magmaalamon aron dili ka mameligro. Salig kang Jehova. Giyahan ka niya aron luwas nimong matabangan ang mga igsoon. w24.07 4 ¶8; 5 ¶11

Si Haring David nakaila kang Jehova ug misalig kaniya. Sa dihang gigukod siya sa iyang mga kaaway, apil ni Haring Saul, si David miampo ug nangayog tabang kang Jehova. Human tubaga sa Diyos ang iyang pag-ampo ug giluwas siya, si David miingon: “Si Jehova buhi!” (Sal. 18:46) Sa iyang pagsulti ani, wala lang basta giila ni David nga naglungtad ang Diyos. Ang usa ka reperensiya nag-ingon nga ang gisulti ni David nagpakita sa iyang pagsalig kang Jehova “ingong buhi nga diyos nga kanunayng nagatabang sa iyang katawhan.” Oo, base sa mga nasinatian ni David, kombinsido gyod siya nga ang iyang Diyos buhi, ug tungod ana determinado siya nga alagaron ug dayegon si Jehova. (Sal. 18:​28, 29, 49) Kon atong hinumdoman nga si Jehova buhi nga Diyos, makatabang ni nato nga mahimong dasig sa pag-alagad kaniya. Makabaton tag kusog nga malahutay ang mga pagsulay ug mapalihok ta nga padayong magkugi sa pag-alagad. Magdasig pod ni nato nga padayong makigsuod kang Jehova. w24.06 20-21 ¶3-4

Unsay atong makat-onan sa giingon ni apostol Pablo sa mga taga-Tesalonica? Kon naa tay madunggan nga dili uyon sa atong nakat-onan sa Bibliya o kaha makadungog tag makapakurat nga impormasyon, kinahanglan tang magmaalamon. Sa kanhing Soviet Union, ang mga igsoon nakadawat ug sulat nga gikan kuno sa hedkuwarter. Kini nga sulat nagdasig sa mga igsoon nga maghimog lahi nga organisasyon. Morag tinuod ang maong sulat, pero ang matinumanong mga igsoon wala mailad. Ilang nakita nga ang mensahe sa sulat dili uyon sa kon unsay gitudlo kanila. Karon, ang mga kaaway mogamit usahay ug modernong teknolohiya sama sa Internet ug social media aron maglibog ta ug magkabahinbahin. Imbes motuo dayon, maprotektahan nato ang atong kaugalingon pinaagi sa pagsusi kon ang ato bang nadungog o nabasa nahiuyon sa mga kamatuoran nga ato nang nakat-onan.—2 Tes. 2:2; 1 Juan 4:1. w24.07 12 ¶14-15

Ang pinakaimportanteng desisyon nga mahimo sa usa ka tawo mao ang pagpahinungod sa iyang kaugalingon kang Jehova ug mahimong bahin sa Iyang pamilya nga nagsimba Kaniya. Mao nay gusto ni Jehova nga himoon sa tanan. Ngano? Gusto niya nga masuod sila kaniya ug mabuhi hangtod sa hangtod. (Deut. 30:​19, 20; Gal. 6:​7, 8) Pero dili pugson ni Jehova si bisan kinsa nga alagaron siya. Gitugotan niya ang matag usa nga maoy magdesisyon kon unsay iyang himoon. Komosta kon ang usa ka bawtismadong Kristohanon makalapas sa balaod sa Diyos ug makahimog seryosong sala? Kon dili siya mahinulsolon, kinahanglan siyang tangtangon gikan sa kongregasyon. (1 Cor. 5:13) Bisan pa niana, gusto gyod ni Jehova nga ang nakasala mobalik kaniya. Gani, usa na sa importanteng mga rason kon nganong gitagana niya ang lukat—aron mapaposible nga mapasaylo ang mahinulsolong makasasala. Ang atong mahigugmaong Diyos kinasingkasing nga nagdasig sa mga makasasala sa paghinulsol.—Zac. 1:3; Roma 2:4; Sant. 4:8. w24.08 14 ¶1-2

Sa panahon nga gihimo ni apostol Juan ang iyang ikatulong sulat, dunay pipila nga nagpakaylap ug sayop nga mga pagtulon-an ug nagpahinabog pagkabahinbahin. Pero ang uban padayong “nagsubay sa kamatuoran.” Nagmasinugtanon pod sila kang Jehova ug ‘naglakaw sumala sa iyang mga sugo.’ (2 Juan 4, 6) Kining maong matinumanong mga Kristohanon nakapalipay pag-ayo kang Juan ug ilabina kang Jehova. (Prov. 27:11) Unsay atong makat-onan? Ang pagkamatinumanon moresultag kalipay. (1 Juan 5:3) Pananglitan, malipayon ta kay napalipay nato si Jehova. Malipay siya dihang makita niya nga atong gisuklan ang mga tentasyon sa kalibotan ug gidawat ang kamatuoran. Malipay pod ang mga anghel sa langit. (Luc. 15:10) Malipay sab ta nga makita ang atong mga igsoon nga nagpabiling matinumanon. (2 Tes. 1:4) Ug dihang matapos na kini nga sistema, magmalipayon gyod ta kay nahibalo ta nga nagmaunongon ta kang Jehova bisan pag ang kalibotan gimandoan ni Satanas. w24.11 12 ¶17-18

Unsa ka dugay nimong obserbahan ang tawo nga giisip nimo nga potensiyal nga kapikas ayha nimo isulti ang imong gibati? Kon isulti dayon nimo ang imong gibati, basin mora kag nagdalidali. (Prov. 29:20) Pero kon dugay pod kaayo kang mosulti, basin mora pod kag dili makadesisyon dayon, ilabina kon kabalo na siya nga nakagusto ka niya. (Eccl. 11:4) Hinumdomi nga dili kinahanglang kombinsido ka nga siya na gyoy imong minyoan ayha nimo isulti ang imong gibati. Pero kinahanglang kombinsido ka nga andam na kang magminyo ug nga sa imong tan-aw, mahimo siyang maayong kapikas para nimo. Komosta kon nakamatikod ka nga naay nakagusto nimo? Kon dili mo parehas ug gibati, ipakita na sa imong mga lihok. Dili gyod maayo nga ipabati nimo nga naay posibilidad nga magkatrato mo, pero ang tinuod wala diay ka makagusto niya.—Efe. 4:25. w24.05 23 ¶9-10

Kadto lang tinuod nga matinumanong mga dinihogan ang dad-on ni Jesus sa iyang langitnong Gingharian. Kadtong mga dinihogan nga dili magpabiling alerto sa espirituwal dili maapil sa tigomon nga “mga pinili.” (Mat. 24:31) Pero ang tanang alagad sa Diyos, bisag unsa pay ilang paglaom, angay sab magpadayon sa pagbantay ug magpabiling matinumanon. Nakaila na ta pag-ayo kang Jehova maong naa tay pagsalig sa tanan niyang desisyon. Dili ta matingala kon sa atong panahon karon, mipili si Jehova nga dihogan ang ubang mga matinumanon. Nahibalo ta sa giingon ni Jesus bahin sa ilustrasyon sa ubasan diin naay mga sinuholan nga misugod pagtrabaho sa ika-11 na nga takna. (Mat. 20:​1-16, footnote) Kadtong ulahing gidapit nga magtrabaho sa ubasan parehas rag suhol niadtong sayo misugod pagtrabaho. Sa susama, bisan kanus-a man pilion ni Jehova ang mga dinihogan, madawat nila ang langitnong ganti kon mapamatud-an silang matinumanon. w24.09 24 ¶15-17

Si Jesus nagpakitag hingpit nga ehemplo kon unsaon paglahutay ang inhustisya. Konsideraha ang dili maayong pagtratar nga iyang naeksperyensiyahan gikan sa iyang pamilya ug sa uban. Giingnan siya sa iyang dili magtutuong mga paryente nga nabuang na siya. Giakusahan siya sa relihiyosong mga lider nga ang iyang gahom naggikan kuno sa mga demonyo. Ug giyagayagaan, gipasakitan, ug gipatay siya sa Romanong mga sundalo. (Mar. 3:​21, 22; 14:55; 15:​16-20, 35-37) Pero gilahutay ni Jesus ang tanang inhustisya ug wala gyod siya manimalos. Unsay atong makat-onan sa iyang ehemplo? (1 Ped. 2:​21-23) Si Jesus naghatag ug hingpit nga ehemplo nga makatabang nato dihang makaatubang tag inhustisya. Nahibalo siya kon kanus-a mohilom ug kon kanus-a mosulti. (Mat. 26:​62-64) May mga higayon nga magpakahilom ra siya bisag sayop ang mga akusasyon batok niya. (Mat. 11:19) Dihang motubag siya sa iyang mga maglulutos, wala niya sila insultoha o hulgaa. w24.11 4-5 ¶9-10

Imadyina nga imong gihatagan ang usa nimo ka minahal ug espesyal nga regalo nga nindot ug mapuslanon. Pero unsa kahay imong bation kon iya ra ning tagoan sa kabinet ug kalimtan na lang? Seguradong dili ka malipay. Sa laing bahin, malipay gyod ka kon gamiton niya ang imong gihatag nga regalo ug pasalamatan ka. Unsay punto? Gihatag ni Jehova ang iyang Anak para nato. Malipay gyod si Jehova kon magpakita tag apresasyon sa maong bililhong regalo ug sa iyang gugma nga maoy nagpalihok niya nga itagana ang lukat. (Juan 3:16; Roma 5:​7, 8) Pero paglabay sa panahon, basin anam-anam nga mamenosan ang atong apresasyon sa regalo nga lukat. Kon mahitabo na, sama rag gitagoan nato sa kabinet ang regalo sa Diyos. Nalipay tuod ta nga nakadawat ani, pero sa ngadtongadto ato ra ning gikalimtan. Aron dili na mahitabo, kinahanglang kanunay natong hunahunaon ang mga gihimo sa Diyos ug sa Kristo para nato. w25.01 26 ¶1-2

Ang brader nga mokuwalipikar ingong ansiyano kinahanglang dili bag-ong magtutuo. Bisag dili kinahanglan nga daghang tuig na kang bawtismado, nagkinahanglag panahon aron mahimo kang hamtong nga Kristohanon. Sa dili pa ka itudlo ingong ansiyano, kinahanglan nimong ipakita nga sama kang Jesus, mapainubsanon ka ug andam maghulat kon kanus-a ka hatagan ni Jehova ug mga asaynment. (Mat. 20:23; Filip. 2:​5-8) Mapamatud-an nimo nga maunongon ka pinaagi sa pagpabiling matinumanon kang Jehova ug sa iyang matarong nga mga sukdanan ug pinaagi sa pagsunod sa direksiyon sa iyang organisasyon. Ang Bibliya klarong nag-ingon nga ang mga tigdumala kinahanglan nga kuwalipikadong manudlo. Nagpasabot ba ni nga kinahanglang maayo kaayo kang mopakigpulong? Wala. Dili tanang ansiyano ang maayong mopakigpulong, pero daghan nila ang epektibo diha sa ministeryo ug sa pag-shepherding. w24.11 23 ¶14-15

Kon naa kay nabasahan sa Bibliya nga wala nimo masabti, pag-research. Dayon pamalandonga ang imong nakat-onan ug kon unsay gitudlo niini kanimo bahin kang Jehova, sa iyang Anak, ug sa ilang gugma kanimo. (Sal. 119:97) Kon sa imong pagbasa o pag-research wala dayon kay makita nga bag-o o makapainteres nga mga butang, ayawg kaluya. Imadyina nga nangita kag bulawan. Ang mga tigpangitag bulawan kinahanglang mogahin ug daghang oras o adlaw ayha sila makakitag gamayng tipak niini. Pero maningkamot gyod sila, kay ang matag tipak sa bulawan dako kaayog bili. Unsa pa kaha ang mga kamatuoran nga naa sa Bibliya; mas labaw pa nig bili kay sa bulawan! (Prov. 8:10) Maong pailob lang ug padayon sa imong eskedyul sa pagbasa sa Bibliya.—Sal. 1:2. w25.01 24-25 ¶14-15

Gidahom ni Jehova nga andam tang mopasaylo niadtong mga nakapasakit nato. (Sal. 86:5; Luc. 17:4; Efe. 4:32) Masakitan gyod tingali ta kon naay mosulti o mohimog dili maayo nato, ilabina kon suod nato siya nga higala o membro sa pamilya. (Sal. 55:​12-14) Usahay mora tag gidunggab tungod sa kasakit. (Prov. 12:18) Tingali pasagdan o balewalaon ra nato ang atong gibati. Pero kon ato nang himoon, mora tag gidunggab ug dayon gipasagdan ra nga magpabilin ang kutsilyo. Sa samang paagi, dili ta makadahom nga moarang-arang ang atong gibati nga kasakit kon ato ra ning balewalaon. Kon naay makapasakit nato, masuko tingali ta. Sagad mao nay una natong reaksiyon, ug giila sa Bibliya nga natural ra ni. Pero gipasidan-an ta niini nga dili magpadayon sa pagkasuko. (Sal. 4:4; Efe. 4:26) Ngano? Kay ang kasuko sagad moresultag dili maayo. (Sant. 1:20) Hinumdomi ni: Dili kalikayan nga masuko ta usahay, pero naa ra nato kon padayon ba tang masuko. w25.02 15 ¶4-6

Sa usa ka ilustrasyon ni Jesus, iyang gipasiugda nga walay pulos kon ang usa magtigom ug daghang kuwarta pero dili siya “dato ngadto sa Diyos.” (Luc. 12:​16-21) Wala ta mahibalo kon unsay mahitabo sa umaabot. (Prov. 23:​4, 5; Sant. 4:​13-15) Dugang pa, kadtong gustong mahimong sumusunod ni Jesus kinahanglang andam “mobiya” sa tanan niyang kabtangan. (Luc. 14:33) Mao nay nasinatian sa mga Kristohanon sa Judea sa unang siglo, pero wala sila mawad-ig kalipay. (Heb. 10:34) Sa atong panahon, daghan sa atong mga igsoon ang nawad-ag materyal nga mga kabtangan o trabaho tungod kay wala silay gisuportahan nga partido sa politika. (Pin. 13:​16, 17) Unsay nakatabang nila? Bug-os silang misalig sa saad ni Jehova: “Dili gyod ka nako biyaan, ug dili gyod ka nako talikdan.” (Heb. 13:5) Angay tang magplano para sa atong umaabot, pero kon duna may moabot nga wala damhang mga panghitabo, makasalig ta nga tabangan gyod ta ni Jehova. w25.03 29-30 ¶13-14

Nahibalo si Jehova nga dili ta mohamtong sa espirituwal sa kaugalingon lang natong paningkamot. Ang mga magbalantay ug magtutudlo sa kongregasyon andam kaayong motabang nato nga mahimong “hamtong” sa espirituwal, “sama sa pagkahamtong sa Kristo.” (Efe. 4:​11-13) Gihatag pod ni Jehova ang iyang balaang espiritu aron tabangan ta nga mabatonan ang “panghunahuna sa Kristo.” (1 Cor. 2:​14-16) Dugang pa, gigiyahan sa Diyos ang pagsulat sa upat ka Ebanghelyo aron masabtan nato kon sa unsang paagi si Jesus naghunahuna, misulti, ug milihok panahon sa iyang ministeryo dinhi sa yuta. Pinaagi sa pagsundog sa panghunahuna ug binuhatan ni Jesus, makab-ot nimo ang imong tumong nga mahimong hamtong nga Kristohanon. Pero aron mouswag ta sa pagkahamtong, dili igo nga magpabilin lang ta sa pangunang mga pagtulon-an—ang mga butang nga “una natong nakat-onan bahin sa Kristo.” w24.04 4-5 ¶11-12

Kada adlaw kinahanglan tang mohimog mga desisyon. Ang uban sayon ra, sama sa kon unsay atong ipamahaw o unsang orasa ta matulog. Pero naay mga butang nga medyo lisod desisyonan kay makaapektar ni sa atong panglawas, sa atong kalipay, sa atong mga minahal, o sa atong pagsimba. Gusto nato nga ang atong mga desisyon makahatag ug kaayohan nato ug sa atong pamilya. Labaw sa tanan, gusto nato nga ang atong mga desisyon makapalipay kang Jehova. (Roma 12:​1, 2) Aron makahimo tag maayong desisyon, importante nga atong sayron ang mga detalye. Nganong hinungdanon kini? Imadyina ang usa ka pasyente nga mikonsultag doktor bahin sa iyang seryosong sakit. Moreseta ba dayon ang doktor ug tambal o modesisyon nga operahan siya nga dili una mangutana o mo-examine niya? Siyempre dili. Sa susama, makahimo kag maayong mga desisyon kon imo unang sayron ang mga detalye bahin sa kahimtang. w25.01 14 ¶1-3

Unsay atong nahibaloan bahin sa kaluoy ni Jehova? Giunsa niya pagpakita nga “dili niya gusto nga naay malaglag”? (2 Ped. 3:9) Konsideraha ang kaluoy nga iyang gipakita sa pipila nga nakahimog seryosong mga sala. Si Haring David nakahimog grabeng mga sala sama sa pagpanapaw ug pagpatay. Pero naghinulsol si David, maong si Jehova naluoy niya ug gipasaylo siya. (2 Sam. 12:​1-12) Si Haring Manases mihimog grabe ka daotang mga buhat sa halos tibuok niyang kinabuhi. Pero dihang naghinulsol siya, gipakitaan siya ni Jehova ug kaluoy ug gipasaylo. (2 Cron. 33:​9-16) Kini nga mga pananglitan nagpahinumdom nato nga si Jehova magpakitag kaluoy kon makita niya nga naay basehanan sa paghimo niini. Iyang banhawon kini nga mga indibiduwal kay ilang giila nga nakahimo silag seryosong mga sala ug naghinulsol. w24.05 4 ¶12