52 MARCOS
“Makatabang Siya Nako”
BISAN adtong batan-on pa siya, si Juan Marcos nagpakita nag kaisog. Si Jesu-Kristo bag-o ra nga gidakop, gigapos, ug gidala sa armadong mga tawo. Tungod ana, mikalagiw ang tanang apostoles. Pero ang Bibliya nag-ingon nga dihay “batan-ong lalaki” nga maisogong misunod kang Jesus. Nakit-an siya sa mga tawo, ug ila pod unta siyang dakpon. Pero ang ila rang nagunitan mao ang iyang lino nga besti. “Nakaikyas siya nga halos hubo.” Ang basahon sa Marcos mao lang ang Ebanghelyo nga naghisgot niini nga hitabo, maong daghan ang nagtuo nga kining wala nganli nga batan-on mao mismo si Marcos.
Nagpuyo si Marcos sa Jerusalem, lagmit uban sa iyang inahan. Posible nga dato ang inahan ni Marcos. Gani human sa kamatayon ni Jesus, ang kongregasyon magtigoman sa balay sa iyang inahan. Didto pod miadto si apostol Pedro human siya tabangi sa usa ka anghel nga makagawas sa bilanggoan panahon sa lawom nga kagabhion. Segurado nga daghang apostoles ug tinun-an ni Jesus ang nahimamat ug nailhan ni Marcos. Daghan gyod siyag nakat-onan nila bahin sa kaisog.
Niadtong mga 46 C.E., ang ig-agaw ni Marcos nga si Bernabe miadto sa Jerusalem uban ni apostol Pablo, ug nakita nila nga maayong bansayon ang maong batan-on. Busa ilang giuban siya sa ilang pagbalik sa Antioquia. Mga usa ka tuig sa ulahi, gidapit ni Pablo ug Bernabe si Juan Marcos nga mouban sa ilang misyonaryong panaw. Mikuyog siya ug nahimong “tig-alagad” sa maong madasigong mga misyonaryo.
Lisod ug peligroso ang mga panaw niadtong panahona. Si Pablo misulat nga sa daghan niyang panaw, nakasinati siyag “kapeligrohan sa mga suba, sa mga tulisan, . . . sa siyudad, sa kamingawan, sa dagat.” (2 Cor. 11:26) Ingong tig-alagad, si Marcos kinahanglang andam sa paghimo sa bisan unsa aron tabangan si Pablo ug Bernabe, kinsa daghag ginahimo para sa kongregasyon. Ug mao nay iyang gibuhat. Pero dihang nakaabot na sila sa Pamfilia, gibiyaan ni Marcos si Pablo ug Bernabe ug miuli siya sa Jerusalem. Tungod ba to kay nabug-atan siya pag-ayo sa iyang buluhaton? Walay giingon ang Bibliya. Pero ang iyang pagbiya seguradong nakadismayar kang Pablo ug Bernabe—ilabina kang Pablo.
Human sa ilang taas nga panaw, si Pablo ug Bernabe nagplano ug ikaduhang misyonaryong panaw. Gusto ni Bernabe nga ubanon pag-usab si Marcos aron hatagan siyag laing kahigayonan. Pero wala mouyon si Pablo. Gibati tingali niya nga dili kasaligan si Marcos. Wa gyod magkasinabot si Pablo ug Bernabe ug “naglalis sila pag-ayo.” Giuban ni Bernabe si Marcos paingon sa Cipro, diin gipadayon nila ang ilang pagsangyaw. Kon bahin kang Pablo, nakakita ra siyag laing makauban ug mipadayon siya sa iyang panaw.
Seguradong naguol gyod niini si Marcos. Nadismayar kaniya si Pablo, kinsa gitahod niya pag-ayo, ug tungod niya naglalis ug nagbulag ang duha ka suod nga managhigala. Posibleng nalain ug nasuko si Marcos kang Pablo ug dismayado siya sa iyang kaugalingon. Pero bisag ingon ana ang iyang gibati, mihunong ba siya sa pag-alagad? Wala gyod!
Si Marcos nawad-ag espesyal nga pribilehiyo, pero wala niya tugoti nga madaog siya sa negatibong mga pagbati
Padayong gihimo ni Marcos ang iyang kinamaayohan sa pagtabang sa mga igsoon. Niadtong mga 60-61 C.E., si Pablo gibilanggo sa usa ka balay didto sa Roma. Sa usa niya ka sulat iyang gihisgotan si Marcos, kinsa kauban niya. Si Pablo miingon nga si Marcos “nakahupay pag-ayo” niya. Dayon tali sa 62 ug 64 C.E., gihisgotan ni apostol Pedro si Marcos diha sa iyang sulat. Posibleng si Marcos mipanaw ug layo kaayo paingon sa Babilonya aron tabangan ug dasigon ang nagkaedaran na nga apostol. Giisip ni Pedro si Marcos ingong iyang “anak.” Nakapahupay gyod si Marcos kang Pedro! Segurado nga ang maong apostol daghag gisulti kang Marcos bahin sa mga tuig nga nakauban niya si Jesu-Kristo. Dihang gisulat ni Marcos ang iyang Ebanghelyo, tingali didto siya sa Roma ug giapil niyag hisgot ang mga detalye sa mga nasinatian ni Pedro nga posibleng gisulti sa apostol kaniya.
Gihisgotan si Marcos sa kataposang higayon diha sa sulat ni Pablo ngadto kang Timoteo. Napriso pag-usab si Pablo ug iyang gihangyo si Timoteo nga bisitahon siya ug iuban si Marcos. Ngano? Si Pablo miingon: “Makatabang siya nako sa ministeryo.” Seguradong gusto gyod ni Timoteo ug Marcos nga adtoon si Pablo aron tabangan ug dasigon ang minahal nga apostol sa kataposang bahin sa iyang kinabuhi. Bisan pa sa mga kalisdanan ug pagkadismayar diha sa pag-alagad kang Jehova, si Marcos padayong nagmaisogon ug mitabang sa mga igsoon, ug tungod niana gihigugma siya pag-ayo ni Jehova.
Basaha ang asoy sa Bibliya:
Pakighisgot:
Sa unsang mga paagi nga si Marcos nagpakitag kaisog?
Tun-ig Dugang
1. Nganong makaingon ta nga dato ang pamilya ni Marcos? (w10 3/15 6 ¶6–7 ¶1)
2. Unsa tingali ang buluhaton ni Marcos “ingong tig-alagad” ni Bernabe ug Pablo? (Buh. 13:5; w10 3/15 7 ¶5)
3. Unsa ang pipila sa mga lugar nga naadtoan ni Marcos? (w10 3/15 8 ¶5-7) A
Hulagway A: Pipila ka lugar nga tingali naduaw ni Marcos
4. Dihay mga gihisgotan si Marcos sa iyang Ebanghelyo nga posibleng naggikan kang Pedro. Paghatag ug pananglitan. (w08 2/1 26 ¶1)
Hunahunaa ang mga Leksiyon
Si Marcos wala hisgoti ingong apostol o propeta. Pero mapainubsanon niyang gialagaran ang uban. Sa unsang paagi pod ta makaalagad sa uban?
Dihay higayon nga si Marcos nawad-ag pribilehiyo nga makaalagad uban kang Pablo, pero nagpabilin siyang matinumanon. Unsay atong makat-onan kang Marcos kon nawad-an tag pribilehiyo sa pag-alagad? B
Hulagway B
Sa unsang mga paagi masundog nimo ang kaisog ni Marcos?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Nganong mapasalamaton ka nga si Marcos gipili nga magmando uban sa Kristo didto sa langit?
Pagkat-og Dugang
Nganong talagsaon ang Ebanghelyo ni Marcos?
Gamita ang ehemplo ni Marcos aron tudloan ang imong mga anak sa mga kaayohan sa paglahutay.