53 PABLO
Gisultihan Niya Sila nga “Dili Mahadlok”
GIPADAYAG ni Jesus kang Saulo sa Tarso ‘ang tanang butang nga angayng antoson’ ni Saulo tungod sa pagsangyaw sa maayong balita. Nahitabo ba gyod ang giingon ni Jesus? Si Saulo, nga sa ulahi nailhan ingong apostol Pablo, misulat sa iyang ikaduhang sulat ngadto sa mga taga-Corinto mga 20 ka tuig sa ulahi. Nianang panahona, nakasinati na siyag ‘daghang pagbunal, ug kadaghan na siyang hapit mamatay.’ Katulo pod siya nakasinati nga nalunod ang barko nga iyang gisakyan. Dihay higayon nga usa ka adlaw ug usa ka gabii siya nga nag-utaw-utaw sa lawod. Pero naa pa gyoy laing higayon nga nalunod na pod ang barko nga iyang gisakyan.
Si Pablo kapin nag duha ka tuig nga napriso sa siyudad sa Cesarea. Wala siya buhii kay naghulat ang gobernador ug hiphip. Sa dihang gipulihan ang gobernador, si Pablo miapelar sa Cesar. Busa gipasakay siyag barko paingon sa Roma aron moatubang sa Cesar. Ang paglawig gikan sa Cesarea paingon sa Roma maoy kapig 3,000 kilometros (mga 2,000 ka milya) ang gilay-on ug lisod kaayo ni. Kauban ni Pablo ang iyang duha ka higala nga si Aristarko ug Lucas, nga usa ka “doktor.”—Col. 4:14.
Ang barko unang midunggo sa Mira sa Asia Minor. Dayon si Pablo ug ang ubang binilanggo gibalhin sa Romanong opisyal nga si Julio ngadto sa barkong dekarga paingon sa Italya. Misakay sila sa barko ug dayon migikan. Hinay ang ilang paglawig tungod sa sungsongon nga hangin. Kaduha gihisgotan ni Lucas nga “naglisod” paglawig ang barko. Mipondo usa sila sa dapit nga gitawag ug Maayong mga Dunggoanan aron maghulat nga molurang ang hangin. Naghunahuna si Pablo nga angay sila nga magpabilin didto sa tibuok tingtugnaw, kay nahibalo siya nga peligroso kaayo kon mopadayon sila sa paglawig.
Nagmaisogon si Pablo ug iyang gipasidan-an si Julio. Iya siyang giingnan nga kon magpadayon sila, moresulta nig “kadaot ug makapameligro” ni kanila. Pero wala maminaw si Julio. Iya hinuong gisunod ang tambag sa uban ug mipadayon sa paglawig. Seguradong gimahayan ni Julio ang maong desisyon. Si Lucas misulat nga “mihuros ang kusog kaayong unos” ug “ang barko gikusokuso” niini. Dayon mas mikusog pa ang unos ug mihapak ang dagkong mga balod. Sulod sa pipila ka adlaw, ‘gikusokuso sila pag-ayo sa kusog nga bagyo.’ Aron mogaan ang barko, gipangsalibay sa mga tripulante ang bug-at nga mga pisi ug ubang butang ngadto sa dagat. Nagpadayon ang bagyo sulod sa duha ka semana ug walay usa nila ang mikaon sulod sa pila ka adlaw. Miingon si Lucas nga adtong panahona ‘nagkaanam nag kawala ang tanan nilang paglaom nga maluwas.’
Samtang ang binilanggo nga si Pablo nagsakay sa barko, iyang gitabangan nga maluwas ang tanan niyang kauban panahon sa kusog kaayong bagyo
Pero masaligong miingon si Pablo kanila: “Sultihan mo nako nga dili mahadlok.” Tungod sa gisulti sa anghel kaniya, si Pablo miingon: “Walay usa kaninyo ang mamatay, ang barko lang ang maguba.” Dihang misulayg ikyas ang ubang tripulante gamit ang bote sa barko, nagpasidaan si Pablo nga daghan ang mangamatay kon dili magpabilin sa barko ang mga tripulante. Busa giputol sa mga sundalo ang mga pisi sa bote ug gipasagdan kining mahulog nga walay sakay.
Sa hapit nang mobanagbanag, giingnan ni Pablo ang tanan nga puwede na nilang makaon ang ilang suplay sa pagkaon. Iya silang giingnan: “Walay bisan usa ka buhok sa ulo ni bisan kinsa kaninyo ang mahanaw.” Dayon nagpasalamat siya kang Jehova atubangan kanilang tanan. Nangaon silag tinapay ug dayon gisalibay nila sa dagat ang trigo. Tungod sa kaisog nga gipakita ni Pablo, “silang tanan nadasig.” Dihang hayag na, ang barko nakaabot sa mabaw ug nasangyad, ug nagupok ni tungod sa paghapak sa mga balod. Bisan pa niana, natinuod ang giingon ni Pablo. “Ang tanan luwas nga nakaabot sa baybayon.”
Nadagsa sila sa isla sa Malta. Sa wala madugay, si Pablo ug ang iyang mga kauban napuliki sa pagsangyaw. Gigamit pa gani sa Diyos si Pablo sa paghimog mga milagro didto. Ang mga tawo mapasalamaton kaayo kang Pablo ug sa iyang mga higala. Ila silang gipakitaag kaayo ug gihatagag daghang gasa.
Si Pablo wala gyod mohunong sa pagpakitag kaisog. Sa dihang nakaabot na siya sa Roma human sa pipila ka bulan (panahon sa tingpamulak), gibilanggo siya didto nga binantayan sulod sa mga duha ka tuig. Pero nagpadayon siya sa pagsangyaw ug sa paghimog mga sulat para sa mga igsoon. Human siya makagawas, nagpadayon siya sa pagsangyaw. Pero pipila ka tuig sa ulahi, gibilanggo na pod siya sa Roma—sa kataposang higayon. Wala madugay human niana, posibleng gipatay sa mga Romano ang maong matinumanon ug maisogong tawo. Pero si Pablo wala mahadlok nga mamatay. Gitawag niyang “kataposang kaaway” ang kamatayon, ug nahibalo siya nga wagtangon kini ni Jehova nga Diyos. (1 Cor. 15:26) Sa gitakdang panahon sa Diyos, madawat na ni Pablo ang gisaad nga ganti kaniya—imortal nga kinabuhi sa langit, nga mag-alagad ingong hari ug saserdote kauban ni Jesu-Kristo.
Basaha ang asoy sa Bibliya:
Pakighisgot:
Sa unsang mga paagi nga si Pablo nagpakitag kaisog niining bahina sa iyang kinabuhi?
Tun-ig Dugang
1. Ngano tingaling mas gipili ni Saulo nga gamiton ang iyang Romanhong ngalan nga Pablo? (w08 3/1 12 ¶4-5)
2. Dihay siyam ka tuig sukad nga mibalik si Pablo sa Tarso hangtod nga mibalhin siya sa Antioquia. Gitawag nig “wala hisgoting mga tuig” ni Pablo. Unsa nga mga kalisdanan ang lagmit iyang naatubang niadtong panahona? (w00 7/15 26-27, kahon ¶3-4)
3. Maalamon ba ang sugyot ni Pablo nga ipalangan una ang paglawig paingon sa Italya? (Buh. 27:9, 10; wp17.5 9 ¶3-4) A
Hulagway A: Barkong dekarga sa unang siglo, parehas sa gisakyan ni Pablo sa Mira
4. Nganong nakaingon ang mga taga-Malta nga si Pablo “usa ka mamumuno”? (Buh. 28:4; w15 10/1 9 ¶5-6)
Hunahunaa ang mga Leksiyon
Giingnan ni Pablo ang mga tawo didto sa barko nga tabangan sila sa Diyos ug “walay usa kanila ang mamatay.” (Buh. 27:22, 34) Unsay gitudlo niini kanimo bahin sa kon unsay mahimo ni Jehova, ug unsay epekto niini sa imong panglantaw sa buluhatong pagsangyaw?
Human sa pag-ampo ni Pablo, ang tanan niyang kauban sa barko “nadasig.” (Buh. 27:35, 36) Sa unsa tingaling mga kahimtang nga ang atong mga pag-ampo makadasig sa uban? B
Hulagway B
Unsaon nimo pagsundog ang kaisog ni Pablo niini nga asoy?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay nakat-onan nimo bahin kang Pablo niini nga asoy nga nakapalipay nimo nga gipili siya nga magmando uban sa Kristo didto sa langit?
Pagkat-og Dugang
Sayra kon unsa ka importante ang paglawig sa unang siglo ug kon sa unsang paagi ni nakatabang sa pagsangyaw sa maayong balita.
Giunsa pagsundog sa mga ansiyano ang paglahutay ug pagsakripisyo ni Pablo?
Sundoga Kadtong Nakadawat sa mga Saad Pinaagig Pailob—Pablo (3:22)