51 BERNABE
“Anak sa Paghupay”
MGA tulo ka tuig human nga si Saulo sa Tarso nahimong tinun-an, mibalik siya sa Jerusalem aron adtoon ang mga Kristohanon didto. (Gal. 1:15-19) Para kang Saulo, giisip na niya silang mga igsoon. Pero para nila, bangis gihapon siya nga maglulutos. Posibleng daghan nila ang wala mahibalo nga nagbag-o na gyod siya. Pero dihay usa ka tawo nga nagpakitag kaisog ug kaluoy sa pagtabang kang Saulo. Siya nailhan ingong si Bernabe.
Ang mga Kristohanon sa Jerusalem nahadlok sa pagtabang kang Saulo sa Tarso, pero si Bernabe nagmaisogon ug mitabang kaniya
Si Bernabe unang gihisgotan diha sa Bibliya ingong usa ka Kristohanon nga ginganlag Jose. Wala madugay human sa Pentekostes 33 C.E., gibaligya ni Jose ang iyang gipanag-iyang yuta ug gihatag ang halin para sa iyang mga isigka-Kristohanon nga nanginahanglan. Kay nailhan siya nga buotan ug andam nga mohupay sa uban, gitawag siya sa mga apostoles ug Bernabe, nga nagkahulogang “Anak sa Paghupay.” Sa ulahi, sa mga 36 C.E., nagmaisogon si Bernabe dihang iyang nahimamat si Saulo ug iya siyang gipakitaag kaayo. Ang Bibliya nag-ingon: “Gitabangan siya ni Bernabe ug gidala siya ngadto sa mga apostoles.”
Sukad niadto, si Saulo ug Bernabe nahimong suod kaayo nga managhigala. Madasigon kaayong nagsangyaw si Saulo didto sa Jerusalem nga tungod niana dihay mga Hudiyo nga gustong mopatay niya. Dihang nasayran kini sa mga igsoon, ila siyang gipaadto sa Tarso, ang iyang yutang natawhan. Kon bahin kang Bernabe, mga siyam ka tuig sa ulahi, gipadala siya ngadto sa Antioquia sa Sirya aron dasigon ang bag-ong mga magtutuo didto. Nadasig gyod sila kay si Bernabe “maayong tawo ug punog balaang espiritu ug pagtuo.” Daghan kaayog midawat sa maayong balita didto sa Antioquia nga tungod niana nagkinahanglag dugang tabang si Bernabe. Miadto siya sa Tarso aron pangitaon ang iyang higala nga si Saulo. Mikuyog si Saulo kang Bernabe ngadto sa Antioquia ug silang duha makugihong nagsangyaw didto. Miadto sab sila sa Judea aron magdalag hinabang para sa mga Kristohanon nga nanginahanglan.
Si Bernabe ug Saulo, nga sa ngadtongadto nailhang Pablo, gipadala ingong mga misyonaryo. Nagkinahanglan gyod silag kaisog niini nga buluhaton. Pananglitan, pag-abot nila sa Iconio dihay mga Hudiyo nga gustong mopatay nila, maong si Bernabe ug Pablo mibiya ug miadto sa Listra. Sa sinugdan, ang mga tawo didto nagtuo nga mga diyos ang maong mga misyonaryo. Pero nangabot ang mga magsusupak gikan sa Antioquia ug Iconio ug ilang giimpluwensiyahan ang mga tawo. Tungod niana, si Pablo gibato sa mga tawo, giguyod pagawas sa siyudad, ug gibiyaan didto kay abi nilag patay na siya. Dihang gialirongan sa mga Kristohanon sa Listra si Pablo, siya mitindog ug mibalik sa siyudad. Nahupayan gyod si Bernabe adto. Pagkasunod adlaw, mihawa sila sa Listra. Pero wala madugay human ana, mibalik sila sa Listra aron hupayon ang mga Kristohanon didto. Nagpakita gyod to sa ilang dakong kaisog.
Si Bernabe ug Pablo malipayong nag-uban sa pag-alagad kang Jehova bisan pa sa peligroso kaayong mga kahimtang. Pero dihay higayon nga nadaot ang ilang panaghigala. Miinsistir si Bernabe nga paubanon ang iyang batan-ong ig-agaw nga si Marcos sa ilang sunod nga panaw. Wala mouyon si Pablo niana kay gibiyaan man sila ni Marcos sa miagi. Wala gyoy usa nila ang andam mopahiuyon. Tungod niini, “naglalis sila pag-ayo” ug nagbulag sila.
Tungod niana, nasulayan na pod ang kaisog ni Bernabe. Dihang motungha ang dili pagsinabtanay, matental tingali ang usa nga magdumot, mosultig dili maayo bahin sa igsoon, o mohunong na sa pagtambong sa mga tigom. Nagkinahanglan gyod ug kaisog ang paglikay niana ug ang pagpaningkamot nga mapalipay si Jehova ug mapasaylo ang igsoon.
Bisag wala magkasinabot si Bernabe ug Pablo, nagpadayon gihapon sila sa pag-alagad kang Jehova. Si Bernabe ug Marcos milawig paingon sa Cipro ug nagpadayon sa paghimog mga tinun-an didto. Si Pablo nagpadayon sa iyang panaw kauban si Silas, ug gitabangan sila ni Jehova sa pagdasig sa mga kongregasyon ug sa pagtabang sa daghang tawo nga masangyawan sa maayong balita.
Naghambin bag kasuko si Bernabe ug Pablo sa usag usa? Wala. Konsideraha ni: Sa ulahi, dihang gisulatan ni Pablo ang mga kongregasyon, nagsulti siyag maayong mga butang bahin kang Bernabe. Pananglitan, miingon siya nga, sama niya, si Bernabe naningkamot sa pagpanginabuhi aron masuportahan ang iyang ministeryo. (1 Cor. 9:6) Sa laing sulat, gihisgotan ni Pablo si Marcos nga “ig-agaw ni Bernabe,” ug giingnan ang mga igsoon nga trataron si Marcos sa maayong paagi. (Col. 4:10, 11) Bisag wala na mag-uban si Pablo ug Bernabe sa pagsangyaw, nagpabilin gihapon silang managhigala. Tinuod gyod ang kahulogan sa ngalan ni Bernabe kay padayon niyang gihupay ang uban pinaagi sa pagsangyaw sa maayong balita kutob sa iyang maarangan. Ug samtang nag-uban sila ni Marcos, seguradong gibansay pa gyod niya ang maong batan-on. Atong hisgotan ang kaisog ni Marcos sa sunod nga kapitulo.
Basaha ang asoy sa Bibliya:
Pakighisgot:
Sa unsang mga paagi nga si Bernabe nagpakitag kaisog?
Tun-ig Dugang
1. Ang mga Levihanon dili makapanunod ug yuta. Busa nganong ang Levihanon nga si Bernabe nakapanag-iya man ug yuta? (Num. 18:20; Buh. 4:36, 37; w98 4/15 20 ¶4, footnote)
2. Nganong gitawag si Bernabe ug apostol? (Buh. 14:14; it “Bernabe” ¶3)
3. Didto sa Cipro, gisangyawan ni Bernabe ug Pablo si Sergio Paulo. Sa basahon sa Mga Buhat, gitawag ni Lucas si Sergio Paulo ingong “prokonsul.” Nganong tukma ang pagtawag kaniyag prokonsul? (Buh. 13:7, 12; it “Cipro” ¶6) A
Bank of Cyprus Cultural Foundation Collection
Hulagway A: Sensilyo panahon sa pagmando ni Claudio, kinsa mao ang emperador dihang si Bernabe ug Pablo miadto sa Cipro. Gipaila niini ang gobernador sa isla ingong “prokonsul”
4. Nganong dili ikatingala nga ang katawhan sa Listra gustong moabiabi ug motanyag ug mga halad kang Bernabe ug Pablo? (bt 97, kahon)
Hunahunaa ang mga Leksiyon
Unsaon nato pagsundog ang pagkamahinatagon ni Bernabe?
Bisag sa primero si Bernabe ang nanguna sa ilang misyonaryong panaw, sa ulahi si Pablo nahimong mas prominente kay kaniya. Pero wala masina si Bernabe. Unsaon nato pagsundog ang iyang ehemplo? B
Hulagway B
Sa unsang mga paagi masundog nimo ang kaisog ni Bernabe?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Nganong mapasalamaton ka nga si Bernabe gipili nga magmando uban sa Kristo didto sa langit?
Pagkat-og Dugang
Giunsa pagpakita sa ehemplo ni Bernabe ug Pablo nga ang mga tawo nga managlahig personalidad puwede gihapong mag-uban sa paghimo sa usa ka buluhaton?
Niini nga video, tan-awa kon sa unsang paagi masundog sa mga igsoon si Bernabe ug Pablo kon motungha ang dili pagsinabtanay.