Gibag-o Niya ang Iyang Hunahuna

SA SINUGDAN, si Saulo sa Tarso wala gyod magbasol nga miuyon siya sa pagpatay kang Esteban.a Gani misamot pa ang iyang pagpanglutos. Debotado kaayo siya sa iyang relihiyon maong “nasuko [siya] pag-ayo sa mga tinun-an sa Ginoo ug naghulga sa pagpatay kanila” ug iya silang gilutos didto sa Jerusalem. Gipapriso niya ang inosenteng mga lalaki ug babaye. Panahon sa mga paghusay sa mga Kristohanon diha sa korte, si Saulo kanunayng mopabor sa desisyon nga ipapatay sila. Tungod sa grabeng paglutos didto sa Jerusalem, daghang Kristohanon ang napugos sa pag-ikyas. Pero wala pa gyod makontento niini si Saulo. Mihangyo siya sa hataas nga saserdote ug mga sulat nga magtugot kaniya sa paglutos ug pagdakop sa mga Kristohanon sa Damasco.

Pagkadawat dayon ni Saulo sa mga sulat, siya ug ang iyang mga kauban mipanaw paamihanan paingon sa Damasco. Adtong tungora, kombinsido siya nga patay na si Jesus. Pero ang tinuod, buhi si Jesus ug kauban niya ang iyang Amahan didto sa langit. Si Jehova ug ang iyang Anak nahibalo sa tanan bahin kang Saulo. Ang makapahingangha kay nakita nila ang maayong mga hiyas ni Saulo ug ang iyang potensiyal. Samtang si Saulo ug ang iyang mga kauban nagkaduol sa Damasco, kalit lang nga dihay mikidlap nga kahayag sa ilang palibot. Kini “mas silaw pa sa adlaw”! Dayon si Saulo natumba ug nabuta.

Unya dihay tingog nga iyang nadungog. “Saulo, Saulo, nganong ginalutos ko nimo?” Ang tingog nagbadlong kang Saulo kay sama siyag masukihong torong baka nga nagsigeg patid sa talinis nga bunal nga gigamit sa agalon aron giyahan kini. Tungod niini, sama rag gipasakitan niya ang iyang kaugalingon. Dayon nangutana si Saulo, “Kinsa man ka, Ginoo?” Ang tingog mitubag, “Ako si Jesus, nga imong ginalutos.” Pagkadungog ni Saulo niini, morag gidunggab ang iyang kasingkasing. Gisugo siya ni Jesus nga motindog ug giingnan siya bahin sa buluhaton nga ihatag kaniya. Mahimo siyang saksi nga magpamatuod nga tinuod ang tanang gitudlo ni Jesus. Busa ang nabuta nga si Saulo gihatagag buluhaton sa pagpabuka sa mga mata sa mga tawo ug sa pagpaliso kanila gikan sa kangitngit ngadto sa kahayag.

Ang maong langitnong panan-awon nakapaamgo sa maong garboso ug pintas nga tawo nga angay siyang magbag-o. Kay dili pa gihapon makakita si Saulo, kinahanglan siyang agakon paingon sa Damasco, diin naghulat siya hangtod nga naay Kristohanon didto nga moadto kaniya. Nagpuasa siyag tulo ka adlaw, nga nagpakita sa iyang kaguol ug sinserong paghinulsol. Seguradong kinasingkasing siyang nag-ampo kang Jehova sa taas nga panahon, nga nangayog pasaylo sa iyang paglutos sa minahal nga Anak sa Diyos. Gipaadto ni Jesus ang Kristohanong si Ananias ngadto kang Saulo. Bisag sa sinugdan nahadlok si Ananias, miadto gihapon siya. Gipatong niya ang iyang mga kamot kang Saulo. Dayon “may natagak nga morag mga himbis gikan sa [mga mata ni Saulo].” Nakakita na siya pag-usab! Unya si Saulo, nga nahimo nang mas mapainubsanon ug maalamon, “mitindog ug gibawtismohan.”

Pagkahimong Kristohanon ni Saulo, misugod dayon siya sa pagsangyaw. Imbes mobalik sa Jerusalem, diha siyay gihimo nga lisod kaayo para niya. Miadto siya sa mga sinagoga sa Damasco, diin posibleng nailhan siya ingong maglulutos. Seguradong nag-ampo siya alang sa kaisog. Imadyina ang reaksiyon sa iyang mga mamiminaw samtang giangkon niya nga nasayop diay siya ug nga karon siya Kristohanon na! Pero labaw pa niana ang iyang gihimo kay siya “padayong nagkahanas sa pagsangyaw. Iyang gipamatud-an nga si Jesus mao ang Kristo pinaagi sa makapakombinsir nga mga pangatarongan, nga tungod niana wala nay ikapangatarongan ang mga Hudiyo nga nagpuyo sa Damasco.”

Samtang nagpuyo si Saulo sa Damasco, dihay higayon nga miadto siya sa Arabia, nga tingali nagtumong sa Desyerto sa Sirya. Wala hisgoti sa Bibliya kon nganong miadto siya, pero posible nga gusto niyang mag-inusara aron mag-ampo ug mamalandong bahin sa iyang dakong buluhaton. Wala gyod mohunong si Saulo sa pagtuon ug pagpamalandong sa Kasulatan. Bug-os niyang gibag-o ang iyang hunahuna. Sa ulahi, gidasig niya ang iyang mga isigka-Kristohanon sa Roma nga magpadayon sa pagbag-o sa ilang hunahuna.—Roma 12:2.

Wala gyod malimot si Saulo sa iyang daotan kaayong mga buhat kaniadto. Bisag pila na ka tuig ang milabay, siya miingon: “Kaniadto ako tigpasipala, maglulutos, ug bagis.” (1 Tim. 1:13) Dihang naghisgot siya bahin sa kamatayon ni Esteban, makita sa iyang mga pulong nga nagbasol gyod siya. (Buh. 22:19-21) Bisan pa ana, nasayod si Saulo nga gipasaylo na siya ni Jesus ug ni Jehova ug padayon silang nagpanalangin kaniya.

Mga tulo ka tuig na si Saulo didto sa Damasco dihang napugos siya sa pagbiya sa siyudad tungod sa paglutos. Gitabangan siya sa mga tinun-an nga makaikyas. Ila siyang gibutang sa bukag ug gitunton diha sa paril. Dayon miadto siya sa Jerusalem. Sinugdanan pa lang to sa iyang kinabuhi ingong Kristohanon. Daghan pang buluhaton ang nagpaabot niya sa unahan.

Basaha ang asoy sa Bibliya:

• Buhat 8:1-3; 9:1-25; 26:4, 5, 9-20

• Galacia 1:13-18

Pakighisgot:

Sa unsang mga paagi nga si Saulo sa Tarso nagpakitag kaisog niining bahina sa iyang kinabuhi?

Tun-ig Dugang

1. 1. Nganong nakaingon si Saulo nga ang Tarso, nga iyang yutang natawhan, “usa ka bantogang siyudad”? (Buh. 21:39; w99 5/15 30 ¶1) A

   Imong tubag

   

   Todd Bolen/BiblePlaces.com

2. 2. Ngano tingaling pamilyar si Saulo sa kultura sa mga Hudiyo, Grego, ug Romano? (bt 62, kahon ¶1-3)

   Imong tubag

3. 3. Unsay gipasabot ni Saulo dihang siya miingon nga si Jesus nagpakita kaniya “nga daw ngadto sa usa nga natawong ahat”? (1 Cor. 15:8; w22.09 27)

   Imong tubag

4. 4. Unsay nagpamatuod nga tukma ang gisulat ni Lucas bahin sa pagkakombertir ni Saulo didto sa Damasco? (Buh. 9:11, 24, 25; g03 2/8 24-26) B

   Imong tubag

   

   Photo by ROLOC Color Slides

Hunahunaa ang mga Leksiyon

• Mapainubsanong gidawat ni Saulo ang tabang gikan kang Ananias ug sa ubang mga Kristohanon. (Buh. 9:17, 18; Col. 4:10, 11) Sa unsang mga kahimtang nga kinahanglan natong dawaton ang tabang sa uban?

  Imong tubag

• Wala tugoti ni Saulo nga ang iyang kanhing mga kalamposan o kasaypanan mobalda niya sa iyang pagsimba kang Jehova. (Filip. 3:4-8; 1 Tim. 1:12-16) Unsaon nato siya pagsundog? C

  Imong tubag

  

• Sa unsa pang mga paagi masundog nimo ang kaisog ni Saulo niini nga asoy?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Unsay nakat-onan nimo bahin kang Saulo niini nga asoy nga nakapalipay nimo nga gipili siya nga magmando uban sa Kristo didto sa langit?

  Imong tubag

Pagkat-og Dugang

Sayra kon sa unsang paagi bug-os nabag-o ang usa ka kanhing maglulutos, sama kang Saulo.

Ang “Saulo sa Sado” Nakombinsir Tungod sa Gugma (5:50)

Nganong ang ehemplo ni Saulo makatabang nato sa pagbaton ug maayong rutina sa pagtuon, sa pag-ugmad ug gugma, ug sa pagbaton ug hustong panglantaw sa kaugalingon?

“Pauswaga ang Imong Espirituwalidad Pinaagi sa Pagsundog Kang Pablo” (w08 5/15 21-25)