49 PEDRO
Siya Nahimong Sama sa Bato
DIHANG nagkita si Jesus ug si Simon, si Jesus miingon kaniya: “Ikaw si Simon nga anak ni Juan; tawgon kang Cefas.” Ang ngalang “Cefas” parehas ug kahulogan sa ngalang “Pedro,” nga nagpasabot ug “Usa ka Pirasong Bato.” Nganong gihatagan siya ni Jesus sa maong ngalan? Ang bato lig-on ug dili matarog ug magamit ni sa pagpanukod. Busa sama rag miingon si Jesus nga ang iyang higala mahisama ka lig-on sa usa ka bato.
Nahimo ba gyong ingon ana nga tawo si Pedro? Sa atong nasayran sa Kapitulo 45, naay mga panahon nga si Pedro nagduhaduha ug nakahimog sayop nga mga desisyon tungod sa iyang kahadlok. Bisan pa niana, may pagsalig gihapon si Jesus sa iyang higala. Nahibalo siya nga sa ngadtongadto mahimong mas maisogon si Pedro. Mao ba gyod nay nahitabo?
Human mamatay ug mabanhaw si Jesus, iyang gihatagan ang iyang mga apostoles ug importante kaayong buluhaton. Si Pedro determinado kaayo sa pagbuhat niana nga buluhaton ug mas nagmaisogon siya. Panahon sa dakong pista sa Jerusalem, si Pedro misulti atubangan sa linibo ka debotadong mga Hudiyo ug maisogon niya silang gisultihan nga ilang gipatay ang Mesiyas. Pagkadungog nila niini, daghan kanila ang naguol pag-ayo nga daw “giduslak ang ilang kasingkasing” ug napalihok sila nga maghinulsol. Ingong resulta, mga 3,000 ka tawo ang nabawtismohan ingong mga tinun-an ni Jesus.
Unsay nakatabang kang Pedro nga mahimong usa ka tawo nga may dakong pagtuo ug kaisog?
Gihimo ni Pedro nga pangunang buluhaton sa iyang kinabuhi ang pagsangyaw. Gihatagan siya ni Jesus sa “mga yawi sa Gingharian,” ug gisugo siya nga ablihan ang dalan para sa tulo ka lainlaing grupo sa katawhan aron makasulod sila sa langitnong Gingharian. Busa si Pedro maisogon ug walay pagpihigpihig nga misangyaw sa mga Hudiyo, dayon sa mga Samarianhon, ug sa ulahi ngadto sa mga Hentil, o mga dili Hudiyo. Mipanaw siya sa lagyong mga dapit sa pagsangyaw ug sa pagdasig sa mga igsoon, ug usahay kauban niya ang iyang asawa. Gani, mipanaw ug mipuyo pod si Pedro sa Babilonya aron sangyawan ang mga tawo didto.
Sulod sa daghang katuigan, maisogong giatubang ni Pedro ang mga kalisdanan ug gilahutay ang mga pagsupak sa iyang pagsangyaw. Siya ug ang iyang kaubang mga apostoles gipriso dili lang sa usa ka higayon. Gibaoran sila sa Hudiyong relihiyosong mga lider nga mohunong sa pagsangyaw. Pero si Pedro miingon: “Kinahanglan namong sugton ang Diyos ingong magmamando imbes ang mga tawo.” Bisan pag gibunalan sila human adto, padayon gihapon silang nagsangyaw bahin sa Gingharian sa Diyos ug kang Jesu-Kristo, ang Hari nga gitudlo ni Jehova.
Migrabe pa gyod ang paglutos. Sa nahisgotan na sa nag-unang kapitulo, si Esteban gipatay. Mga 10 ka tuig sa ulahi, gipapatay sa daotang magmamando nga si Herodes ang higala ni Pedro nga si apostol Santiago. Nakita ni Herodes nga kini nakapalipay sa Hudiyong mga magsusupak maong gipadakop pod niya si Pedro. Si Pedro gikadenahan, gipriso, ug giguwardiyahan ug mga sundalo. Naghunahuna kaha siya nga mao na tong panahona nga matuman ang gitagna ni Jesus nga si Pedro prisohon ug patyon?
Sa lawom nga kagabhion, kalit nga mitungha ang usa ka anghel. Iyang gipukaw si Pedro, gitangtang ang mga kadena, ug giubanan sa paggawas sa selda. Ila rang gilabyan ang mga guwardiya, ug miagi sila sa dakong ganghaan pagawas sa dalan. Unsay sunod nga gihimo ni Pedro? Puwede unta siyang moikyas palayo aron dili na mameligro ang iyang kinabuhi. Pero milahos siya sa balay diin ang mga igsoon nagsimba kang Jehova ug nag-ampo. Seguradong nalipay ug nadasig ang mga igsoon dihang ilang nakita si Pedro!
Wala gyod malimot si Pedro sa gisugo sa iyang Ginoo: “Palig-ona ang imong mga igsoon”; “pakan-a ang akong gagmayng mga karnero.” (Luc. 22:32; Juan 21:17) Bisag asa siya, maisogon siyang nagsangyaw ug iyang gipalig-on ang mga igsoon. Pero dili siya hingpit ug nakahimog mga sayop. Kas-a, nagpadaog siya sa presyur ug kinahanglan siyang tul-iron sa iyang kaubang apostol. Apan mapainubsanon tong gidawat ni Pedro ug iyang gipadapat ang tambag. Padayon niyang gidasig ang mga igsoon. Ubos sa paggiya sa Diyos, nagsulat siyag duha ka sulat nga nahimong bahin sa Bibliya. Human sa daghang tuig sa matinumanong pag-alagad, si Pedro gidakop ug gipriso sa kataposang higayon aron patyon. Pero wala gyod mawala ang iyang pagtuo o kaisog. Si Pedro nahimo gyong sama ka lig-on sa “bato”!
Basaha ang asoy sa Bibliya:
Pakighisgot:
Sa unsang mga paagi nga si Pedro nagpakitag kaisog niining bahina sa iyang kinabuhi?
Tun-ig Dugang
1. Gihatag ni Jesus kang Pedro “ang mga yawi sa Gingharian.” Giunsa paggamit ni Pedro ang maong mga yawi? (Mat. 16:18, 19; ijwbq artikulo 124 ¶1-5) A
Hulagway A: Gisangyaw ni Pedro ang mensahe sa Gingharian ngadto sa mga Hudiyo sa Jerusalem, sa mga Samarianhon sa Samaria, ug sa mga Hentil sa Cesarea
2. Giunsa nato pagkahibalo nga si Pedro dili mapihigon bisan pa niadtong wala pa sila magkita sa Hentil nga si Cornelio? (Buh. 10:5-7, 23; bt 69 ¶1, footnote) B
Hulagway B: Nahimutangan sa karaang Jope
3. Unsay nagpakita nga gidawat ni Pedro ang tambag ni Pablo? (w17.04 26-27 ¶15-17)
4. Nganong si Pedro mibalhin ug puyo sa Babilonya? (it “Pagkabinihag” ¶24)
Hunahunaa ang mga Leksiyon
Si Pedro maisogon pero matinahorong nakig-estorya sa dakong grupo sa mga tawo sa Jerusalem. Sa unsang mga kahimtang ilabinang kinahanglan tang magpakitag kaisog ug pagtahod?
Bisan pag si Pedro dunay dakong responsibilidad sa kongregasyon, iyang gidawat ang tambag ni Pablo. Unsaon nato pagsundog si Pedro? C
Hulagway C
Sa unsa pang mga paagi masundog nimo ang kaisog ni Pedro niini nga asoy?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay nakat-onan nimo bahin kang Pedro niini nga asoy nga nakapalipay nimo nga gipili siya nga magmando uban sa Kristo didto sa langit?
Pagkat-og Dugang
Sa unsang paagi ang ehemplo ni Pedro makatabang nato nga mosalig kang Jehova dihang mahadlok ta?
Gamita kini nga kalingawan aron makakat-og dugang sa asoy diha sa Buhat kapitulo 10.
“Ang Diyos Dili Mapihigon” (Serye nga “Pagtuon sa Bibliya” diha sa jw.org)