48 ESTEBAN
“Puno sa Pagtuo ug Balaang Espiritu”
SI Esteban usa lang ka ordinaryong tawo. Pero dihang nakaatubang siyag grabeng kapeligrohan, ang Bibliya nag-ingon bahin kaniya: “Ang iyang nawong sama sa nawong sa anghel.” Siya kalmado kaayo bisag kinahanglan siyang moatubang sa Sanhedrin, ang hataas nga korte sa mga Hudiyo. Kadto ang mismong korte nga nagpapatay kang Jesus pipila ka bulan kanhi. Nganong kalmado kaayo ang maong tawo bisan pa sa maong kapeligrohan? Tungod na sa iyang kaisog.
Ang Bibliya nag-ingon nga si Esteban “puno sa pagtuo ug balaang espiritu.” Gisaligan siya sa mga apostoles sa Jerusalem ug gihatagan siyag buluhaton sa pagpaneguro nga matagan-an ang panginahanglan sa kongregasyon. Usa ka adlaw niana, dihay grupo sa panatiko nga mga magsusupak nga nakiglalis kang Esteban. Pero maayo kaayong mangatarongan si Esteban nga tungod niana dili nila mapamatud-ang sayop ang iyang gipanulti. Sa ilang kalagot, ila siyang gidala sa Sanhedrin ug giakusahan. Ang desisyon sa Sanhedrin puwedeng magkahulogan sa iyang kinabuhi o kamatayon.
Posible nga nahibalo si Esteban sa saad ni Jesus sa iyang mga sumusunod nga makaatubang unya sa maong mga kahimtang: “Ayawg kabalaka kon unsay inyong isulti. Apan kon unsay ihatag kaninyo nianang taknaa, isulti kini, kay dili kamo ang magasulti kondili ang balaang espiritu.” (Mar. 13:11) Ang maong saad seguradong nakahatag kang Esteban ug dugang kaisog. Ug ang espiritu ni Jehova nakatabang niya nga mahimong kalmado kaayo nga tungod ana mora siyag anghel tan-awon samtang nagtindog atubangan sa Sanhedrin.
Ang korte dunay 71 ka membro. Silang tanan prominente ug edukado nga mga lider sa Judaismo. Magtigom sila sa usa ka dako kaayong lawak ug manglingkod diha sa tulo ka talay (o, laray) nga morag nag-alirong, ug dunay duha ka eskriba nga magsulat sa tanang gihisgotan. Si Esteban nagtindog atubangan nilang tanan. Siya giakusahan sa pagsulti batok sa Balaod ni Moises ug sa templo—mga krimen nga kamatayon ang silot. Gipangutana siya sa hataas nga saserdote nga si Caifas kon tinuod ba ang maong mga akusasyon.
Mitubag si Esteban. Gihisgotan niya ang kasaysayan sa Israel ug gisugdan niya kini kang Abraham. Gihisgotan sab niya si Jose, nga gilutos sa iya mismong mga igsoon, ang mga patriarka sa Israel. Matinahoron pod niyang gihisgotan si Moises. Gani naghisgot siyag mga detalye bahin kang Moises nga wala hisgoti sa Hebreohanong Kasulatan. Pero iyang gipahinumdoman ang iyang mga mamiminaw nga gisalikway sa mga Israelinhon si Moises.
Ang mga gisulti ni Esteban nagpakita nga gitahod niya pag-ayo ang Balaod, tabernakulo, ug templo nga gihatag ni Jehova alang sa putling pagsimba. Pero gihisgotan pod niya nga ang katawhan sa Diyos balikbalik nga mirebelde sa mga representante nga gipadala ni Jehova kanila.
Kinahanglang depensahan ni Esteban ang iyang pagtuo atubangan sa mapihigong korte nga nakadesisyon na sa pagpatay kaniya
Nahibalo si Esteban nga dili siya pakitaag kaluoy niining mga tawhana nga tig-a ug kasingkasing. Busa haom lang nga gihatagan siya ni Jehova ug kaisog pinaagi sa balaang espiritu sa pagpahayag ug mensahe sa paghukom. Iya silang giingnan nga sila “gahig ulo nga mga tawo” ug ‘ginasuklan nila kanunay ang balaang espiritu,’ sama sa gihimo sa ilang mga katigulangan. Pero labaw sa tanan, ilang gipapatay ang usa nga gitagna ni Moises nga moabot, usa ka propeta nga mas labaw pa kay kaniya. Miingon si Esteban nga sila “mga magbubudhi ug mamumuno” sa “usa nga matarong”—si Jesus, ang Mesiyas.
Nanginit sa kasuko ang mga membro sa Sanhedrin ug sila “nagpakagot sa ilang mga ngipon” batok kang Esteban. Pero gipalig-on siya ni Jehova pinaagig panan-awon. Si Esteban miingon: “Tan-awa! Nakita nako nga ang kalangitan nabuksan ug ang Anak sa tawo nagbarog sa tuong kamot sa Diyos.” Pagkadungog niini sa Sanhedrin, miulbo sila sa kasuko! Ngano? Posibleng pamilyar sila sa giingon ni Esteban. Dihang gihusay si Jesu-Kristo pipila ka bulan kanhi, siya mitagna: “Makita unya ninyo ang Anak sa tawo nga maglingkod sa tuong kamot sa Labing Gamhanan.” (Mat. 26:64) Gipakita sa giingon ni Esteban nga natuman ning mga pulonga. Si Jesus nagbarog na sa kiliran ni Jehova!
Naglungotlungot sila sa kasuko ug ilang gihasmagan si Esteban, gidala sa gawas sa siyudad, ug gibato. Samtang gibato si Esteban, nakita pa tingali niya si Jesus diha sa panan-awon ug siya mituaw: “Ginoong Jesus, dawata ang akong espiritu.” Dayon, siya mihangyo kang Jehova sa kataposang higayon: “Ayawg idat-og kanila kining salaa.” Human ana, si Esteban namatay nga madaogon ingong unang Kristohanong martir. Pero usa ka batan-on didto nga miuyon sa pagpatay kaniya ang dili gyod malimot sa kataposang mga pulong ni Esteban. Hisgotan nato siyag dugang diha sa Kapitulo 50, 51, ug 53.
Basaha ang asoy sa Bibliya:
Pakighisgot:
Sa unsang mga paagi nga si Esteban nagpakitag kaisog?
Tun-ig Dugang
1. Nganong gipili sa mga apostoles si Esteban ug ang ubang mga lalaki nga “puno sa espiritu ug kaalam” sa pagdumala sa pag-apod-apod ug pagkaon? (Buh. 6:3-5; bt 41-42 ¶17-18) A
Hulagway A
2. Unsang mga detalye bahin kang Moises ang gihisgotan ni Esteban nga wala sa ubang bahin sa Bibliya? (bt 48 ¶13, footnote)
3. Nganong kalmado kaayo si Esteban dihang gilutos? (w18.10 32)
4. Ang gihisgotan ba sa Buhat 7:59 nagpakita nga si Esteban miampo kang Jesus? (w05 1/1 31)
Hunahunaa ang mga Leksiyon
Si Esteban “puno sa pagtuo ug balaang espiritu” ug “giuyonan pag-ayo sa Diyos ug puno sa gahom.” Pero kinabubut-on siyang midawat sa asaynment sa pag-apod-apod ug pagkaon. (Buh. 6:2, 5, 8) Sa unsang paagi masundog si Esteban sa mga brader nga abilidaran o niadtong dunay bug-at nga mga responsibilidad sa kongregasyon? B
Hulagway B
Giampo ni Esteban ang iyang mga maglulutos. Unsaon nato pagpakitag gugma niadtong nagsupak ug naglutos nato? (Mat. 5:44-48)
Sa unsang mga paagi masundog nimo ang kaisog ni Esteban?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Nganong mapasalamaton ka nga si Esteban gipili nga magmando uban sa Kristo didto sa langit?
Pagkat-og Dugang
Sayra kon unsaon nato pagdepensa ang atong pagtuo sa matinahoron ug maisogong paagi, sama sa gihimo ni Esteban.
“Si Esteban—‘Giuyonan Pag-ayo sa Diyos ug Puno sa Gahom’” (bt 47-50 ¶9-19)
Sa dihang lutoson ang katawhan ni Jehova, sa unsang paagi masundog nila ang kaisog ni Esteban?