“Gihimo Niya ang Iyang Maarangan”

SI Maria natandog pag-ayo sa gipakita nga kaayo ni Jesu-Kristo. Daghan siyag nahimo para kang Maria ug sa iyang mga igsoon nga si Marta ug Lazaro. Gimahal sila pag-ayo ni Jesus. Kadaghan na siyang nakaestar sa ilang balay sa Betania, ug daghan siyag gitudlo kanila bahin kang Jehova ug sa iyang kaugalingon. Ug dihang namatay si Lazaro, gibanhaw siya ni Jesus!

Gustong ipakita ni Maria kang Jesus kon unsa siya ka mapasalamaton. Nakahunahuna siya nga hatagan ang iyang Ginoo ug bililhon kaayo nga regalo. Kadto maoy humot nga lana nga may gibug-aton nga “usa ka libra . . . nga lunsay nga nardo ug mahal kaayo,” ug gisulod ni sa alabastro. Mahal kaayo ang pahumot nga gisulod sa maong gamay nga sudlanan. Ang kantidad niini katumbas sa halos usa ka tuig nga suhol sa usa ka trabahante niadtong panahona. Wala hisgoti sa Bibliya kon kanus-a o kon sa unsang paagi nabatonan ni Maria ang maong pahumot, pero posibleng mao ni ang kinamahalang butang nga iyang napanag-iya.

Usa ka adlaw niana, si Jesus didto sa usa ka balay sa Betania panahon sa pagpangaon. Nakita ni Maria nga mao na to ang higayon nga ihatag ang iyang regalo. Miduol siya kang Jesus, giablihan ang sudlanan sa pahumot, ug hinayhinay kining gibubo sa ulo ug mga tiil ni Jesus. Pagkahuman niyag bubo sa lana, gitangtang niya ang iyang belo, ug unya gipahiran niya sa iyang buhok ang mga tiil ni Jesus. Sa ilang kultura, giisip tingali sa uban nga sayop ang gihimo ni Maria, nga iyang gitangtang ang iyang belo. Pero niadtong tungora, ang gihunahuna lang ni Maria mao ang pagpasidungog sa iyang Ginoo. Kinabubut-on siyang nagpaubos aron ihatag kang Jesus ang kinalabwang pasidungog.

Ang balay nalukop sa alimyon sa humot nga lana. Pero dili tanan ang nalipay. Si Judas Iskariote nasuko pag-ayo, ug posibleng iyang naagni ang ubang mga apostoles nga sawayon ang gihimo ni Maria. Siya miingon: “Nganong wala man ibaligya kining humot nga lana ug 300 ka denario ug ang halin ihatag ngadto sa mga kabos?” Imadyina ang gibati ni Maria. Gihigugma niya si Jesus ug gusto niyang pasidunggan ang iyang Ginoo pinaagi sa paghatag ug espesyal kaayo nga regalo. Imbes komendahan, gikasab-an na hinuon siya niining tinahod nga mga lalaki, nga mga apostoles mismo ni Jesus. Seguradong naulawan siya pag-ayo. Pero gidepensahan siya ni Jesus.

Si Jesus miingon: “Pasagdi lang siya.” Pagkadungog sa mga apostoles niana, seguradong nahilom sila. Dayon siya miingon: “Maayo ang iyang gibuhat kanako.” Gipatin-aw ni Jesus nga si Maria mihimog mahigugmaong buhat para kaniya. Wala mahibalo si Maria nga hapit nang mamatay si Jesus, pero ang maong humot nga lana nag-andam kang Jesus para sa iyang lubong. Bahin sa gihimo ni Maria, ang Ginoo miingon: “Gihimo niya ang iyang maarangan.” Dayon siya miingon: “Sa pagkatinuod sultihan mo nako, bisan asa sa kalibotan nga isangyaw ang maayong balita, ang gibuhat niining bayhana iasoy usab agig paghandom kaniya.” Nahibalo si Jesus nga gihigugma siya ni Maria ug ang gihimo ni Maria nagkinahanglag kaisog. Ang maong pagkamahinatagon takos gyong dayegon, dili sawayon.

Human adto, wala nay nangahas sa pagkuwestiyon kang Maria. Mibiya si Judas, ug determinado siya nga budhian ang iyang agalon. Pero segurado nga natandog gyod si Maria sa giingon ni Jesus. Pipila ka adlaw sa ulahi, nahitabo ang giingon ni Jesus nga iyang masinatian. Niadtong tungora, bug-os nga nasabtan ni Maria ang gipamulong ni Jesus. Si Jesus, ang minahal nga Ginoo ni Maria, gihusay sa ilegal nga paagi, gipatay, ug sa ulahi gilubong—sumala gyod sa iyang gitagna. Dili gyod mahubit ang kaguol nga gibati niining buotan ug mapinanggaong babaye. Pero seguradong nahupay siya pag-ayo dihang nahinumdoman niya ang giingon ni Jesus kaniya.

Sa ikatulong adlaw human mamatay si Jesus, dihay nahitabo nga talagsaon kaayo: Nabanhaw si Ginoong Jesus! Wala madugay human niana, nagpakita siya sa kapig 500 niya ka tinun-an. Posible nga nianang higayona, iyang gisugo sila sa pagsangyaw sa maayong balita ngadto sa “mga tawo sa tanang kanasoran.” (Mat. 28:19, 20) Sumala sa giingon na ni Jesus, ang mensahe sa “maayong balita” maglakip sa asoy sa pagkamapainubsanon ni Maria ug sa gugma nga iyang gipakita kang Jesus. Segurado nga wala gyod magmahay si Maria nga nagpakita siyag kaisog sa paghatag sa iyang kinamaayohan para sa iyang Ginoo. Hangtod sa kataposan sa iyang kinabuhi, wala gyod niya malimti nga gidayeg ni Jesus ang iyang pagtuo ug kaisog sa dihang ang Ginoo miingon: “Gihimo niya ang iyang maarangan.”

Basaha ang asoy sa Bibliya:

• Mateo 26:6-13

• Marcos 14:3-9

• Lucas 10:38-42

• Juan 11:5, 6, 31-35, 41-45; 12:1-8

Pakighisgot:

Sa unsang mga paagi nga si Maria nga igsoon ni Lazaro nagpakitag kaisog?

Tun-ig Dugang

1. 1. Unsay gipakita sa Bibliya bahin sa personalidad ni Maria ug sa iyang igsoon nga si Marta? (Luc. 10:39, 40; Juan 11:20; ia 173 ¶5-6; 176 ¶17) A

   Imong tubag

   

2. 2. Nganong talagsaon ang kaandam ni Jesus nga tudloan si Maria ug ang ubang mga babaye? (w99 9/1 30 ¶1-4)

   Imong tubag

3. 3. Nganong mahal kaayo ang lana nga gibubo ni Maria kang Jesus? (“mahalon ug humot nga lana” nga study note sa Mat. 26:7, nwtsty-wcgr) B

   Imong tubag

   

   Indian nard: © Haijie Lu, licensed under CC BY-NC 4.0. Source; dried jatamansi: wasanajai/stock.adobe.com; alabaster jar: © The Trustees of the British Museum. Licensed under CC BY-NC-SA 4.0. Source

4. 4. Gibuboan ni Maria ug lana ang ulo ug mga tiil ni Jesus. Sa kapanahonan sa Bibliya, unsay ipasabot niini? (w10 11/1 6 ¶4, footnote)

   Imong tubag

Hunahunaa ang mga Leksiyon

• Si Jesus miingon nga “gipili ni Maria ang maayong bahin”—iyang giuna ang espirituwal nga mga butang. (Luc. 10:42) Unsaon nato siya pagsundog? C

  Imong tubag

  

• Gidayeg ni Jesus si Maria kay “gihimo niya ang iyang maarangan.” Base niini, unsay gipabilhan ni Jehova kanato? (Mar. 12:29, 30; 14:8)

  Imong tubag

• Sa unsang mga paagi masundog nimo ang kaisog ni Maria?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Nganong mapasalamaton ka nga si Maria nga igsoon ni Lazaro lagmit gipili nga magmando uban sa Kristo didto sa langit?

  Imong tubag

Pagkat-og Dugang

Unsay makat-onan sa mga bata kang Maria, Marta, ug Jesus bahin sa pagpakighigala?

Kinsay Akong Pilion nga Amigo ug Amiga? (13:14)

Gipabilhan ni Jesus ang mahalon nga regalo ni Maria ug ang duha ka gagmayng sensilyo sa babayeng balo. Unsay imong makat-onan niini bahin kang Jesus?

“Ikaw Nagpakita ba sa Imong Kaugalingon nga Mapasalamaton?” (w99 4/15 16 ¶3-7)