“Nakita Nako ang Ginoo!”

Ang asoy bahin kang Maria Magdalena nagsugod dihang naay nahitabong dakong kausaban sa iyang kinabuhi. Ang iyang miserableng kinabuhi kaniadto nahimo nang malipayon. Ang Bibliya nag-ingon nga siya “gigulaan ug pito ka demonyo.” Segurado nga si Kristo Jesus ang nagpahigawas kaniya gikan sa maong makahahadlok nga kahimtang. Busa mapasalamaton kaayo siya kang Jesus maong maisogon siyang misunod kaniya ug gusto niyang motabang kang Jesus kutob sa maarangan.

Iyang gitawag ang iyang minahal nga Ginoo nga Rabboni, usa ka pulong nga nagpakitag lawom nga pagtahod ug nagkahulogang “Magtutudlo.” Si Jesus, uban sa iyang 12 ka apostoles, mipanaw sa lainlaing lugar aron tudloan ang mga tawo bahin sa Gingharian sa Diyos. Nakita ni Maria nga gibiyaan nila ang ilang trabaho aron magamit nila ang tanan nilang panahon ug kusog alang niining importante kaayong buluhaton. Sa unsang paagi siya mitabang kanila?

Usa si Maria sa daghang babaye “nga nag-alagad kanila pinaagi sa ilang mga kabtangan.” Ang maong mga babaye naggamit sa ila mismong kuwarta aron matagan-an ang panginahanglan ni Jesus ug sa iyang mga apostoles. Tanantanan, posibleng mga 20 ka tinun-an, lalaki ug babaye, ang “miadto sa mga siyudad ug mga baryo.” Wala maandi sa ilang kultura nga ang mga babaye mag-uban-uban sa usa ka relihiyosong magtutudlo, maong posible nga gisaway sa mga tawo ang maong mga babaye. Pero para kang Maria ug sa iyang mga kauban, wala nay mas importante pa kay sa pribilehiyo nga maalagaran si Jesus ug ang iyang mga apostoles. Maisogon silang misuportar kang Jesus bisan unsa pay isulti sa uban.

Seguradong naguol pag-ayo si Maria dihang gidakop si Jesus sa gabii sa Paskuwa sa Jerusalem. Mao pod nay iyang gibati dihang si Jesus gibutangbutangan, gihukmang sad-an nga nagpasipala sa Diyos, ug gisentensiyahag kamatayon diha sa estaka sa pagsakit. Pero wa gyod mawala ang kaisog ni Maria. Mikuyog siya sa ubang matinumanong mga babaye, apil ang inahan ni Jesus, sa dapit diin patyon si Jesus. Ilang gipabati kang Jesus nga ila siyang gihigugma ug gisuportahan. Samtang grabeng nag-antos si Jesus diha sa estaka, nakita niya nga giunongan gyod siya sa maong matinumanong mga babaye. Nasaksihan nila ang pagkamatinumanon ni Jesus samtang gitapos niya ang tanan nga gipahimo sa iyang Amahan kaniya. Tua si Maria dihang nabugtoan si Jesus sa iyang gininhawa.

Ang maong mga babaye wala mahadlok nga magbangotan atubangan sa Romanong mga sundalo ug Hudiyong mga lider nga nagpapatay kang Jesus. Pero naa pay gustong himoon si Maria aron ipakita ang iyang gugma kang Jesus. Kay init man sa Judea, dali rang madugta ang patayng lawas. Aron dili ni mangalisbo, naandan nga pahiran nig humot nga mga lana ug yerba sa dili pa ni ilubong. Pero kay dinalidali man ang paghimo niana sa lawas ni Jesus, gusto ni Maria nga himoon na pag-usab bisag nalubong na si Jesus. Pagkahuman dayon sa Igpapahulay, siya ug ang uban pang babaye namalit sa mga gikinahanglang lana ug yerba. Sayo sa buntag, miadto sila sa lubnganan aron ihaplas ni sa lawas ni Jesus.

Posible nga si Maria ang unang miabot sa lubnganan, ug nakurat siya nga abli kini ug wala nay sulod! Midagan siya aron sultihan si Pedro ug Juan. Pagbalik niya, wala na ang ubang mga babaye. Miyuko siya aron motan-aw sulod sa lubnganan ug ‘iyang nakita ang duha ka anghel nga nagbestig puti nga naglingkod sa gipahimutangan sa lawas ni Jesus.’ Human makig-estorya nila, siya milingi sa luyo ug nakakita siyag lalaki nga abi niyag hardinero. Ang lalaki miingon: “Babaye, nganong naghilak ka?” Nangutana si Maria kon asa ang lawas ni Jesus ug miingon: “Senyor, kon imo siyang gikuha, sultihi ko kon diin nimo siya gibutang kay kuhaon nako siya.” Wala na maghunahuna si Maria kon madaog ba niya ang gibug-aton sa lawas ni Jesus. Ang iya rang gihunahuna mao nga kinahanglan niyang himoon ang iyang maarangan.

Samtang si Maria milingiw nga magul-anon, ang lalaki miingon kaniya: “Maria!” Nakaila siya sa maong tingog. Dayon siya miingon:“Rabboni!” Ug iyang gigakos si Jesus. Si Jesus miingon: “Ayaw kog kupti.” Dayon iyang gihatagan siyag importanteng asaynment: “Adtoa ang akong mga igsoon.” Gisaligan siya ni Jesus sa pagpahibalo sa iyang mga apostoles bahin sa importante kaayong balita—ang ilang Ginoo nabanhaw na! Miadto dayon siya. Sa primero, wala siya tuohi sa mga tinun-an. Ang Bibliya nag-ingon: “Para nila dili [kini] katuohan.” Pero wala na makapugong kang Maria Magdalena. Seguradong padayon niyang gisulti ang maong maayong balita ngadto sa daghan pang mga tawo. Nagkinahanglan gyod nig kaisog.

Basaha ang asoy sa Bibliya:

• Mateo 27:55, 56

• Marcos 16:1, 2

• Lucas 8:1-3; 24:1-11

• Juan 19:25; 20:1, 2, 11-18

Pakighisgot:

Sa unsang mga paagi nga si Maria Magdalena nagpakitag kaisog?

Tun-ig Dugang

1. 1. Sa unsang mga paagi posibleng gisuportahan ni Maria Magdalena ug sa ubang mga babaye si Jesus ug ang iyang mga apostoles? (ijwia artikulo 6 ¶5-6) A

   Imong tubag

   

2. 2. Nganong wala dayon makaila si Maria sa nabanhaw nga si Jesus? (ijwia artikulo 6 ¶16)

   Imong tubag

3. 3. Nganong miingon man si Jesus kang Maria Magdalena nga dili siya kuptan? (w08 4/15 32 ¶6)

   Imong tubag

4. 4. Naghunahuna ang mga apostoles nga “dili katuohan” ang gibalita ni Maria nga nabanhaw na si Jesus. Unsang panglantaw bahin sa kababayen-an ang posibleng nakaimpluwensiya nila? (Luc. 24:11; w12 9/1 10 ¶4-5)

   Imong tubag

Hunahunaa ang mga Leksiyon

• Si Maria Magdalena mihimog ubos nga mga buluhaton para sa uban. Unsaon nato siya pagsundog? B

  Imong tubag

  

• Unsaon nato pagsundog si Maria Magdalena dihang dili tuohan o dili pabilhan sa uban ang maayong balita nga atong gisangyaw? (Luc. 24:10, 11)

  Imong tubag

• Unsaon nimo pagsundog ang kaisog ni Maria Magdalena?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Nganong mapasalamaton ka nga si Maria Magdalena lagmit gipili nga magmando uban sa Kristo didto sa langit?

  Imong tubag

Pagkat-og Dugang

Itandi ang pipila ka sayop nga ideya bahin kang Maria Magdalena sa mga kamatuoran nga gihisgotan sa Bibliya.

“Kinsa si Maria Magdalena?” (ijwbq artikulo 172)

Sa unsang paagi ang pagpakiglabot ni Jesus kang Maria Magdalena ug sa ubang babaye nagtudlo nato kon unsaon nato pagtratar ang mga babaye?

“Ang Kristohanong mga Babaye Takos sa Pasidungog ug Pagtahod” (w95 7/15 15-18 ¶3-8)