“Matarong Atubangan sa Diyos”

SI Zacarias usa sa daghang saserdote nga naggikan sa banay ni Aaron. Usa ka adlaw niana, dihay importante kaayong buluhaton si Zacarias. Turno na niya sa paghalad ug insenso sa bulawang halaran diha sa templo. Espesyal kaayo to kay sa tibuok kinabuhi sa usa ka saserdote, kas-a lang tingali siya makahalad ug insenso diha sa templo. Busa seguradong si Zacarias ug ang iyang minahal nga asawa nga si Elisabet nalipay pag-ayo sa maong halandomong adlaw.

Ang Bibliya nag-ingon nga si Zacarias ug Elisabet “matarong atubangan sa Diyos.” Dugay na silang minyo ug gipanalanginan sila ni Jehova sa daghang paagi. Pero diha silay gipangandoy nga wala pa nila mabatoni. Gusto nilag anak. Sa kapanahonan sa Bibliya, importante kaayo para sa mga magtiayon ang pagbaton ug anak. Si Zacarias ug Elisabet “tigulang na.” Pero bisan pa niana, sila kanunayng nag-ampo sa ilang Diyos ug masaligon nga dunggon ang ilang hangyo bisag daw imposible nga makaanak pa sila.

Misulod si Zacarias sa sangtuwaryo samtang daghang tawo ang nag-ampo sa gawas. Nag-inusara siya sa maong dakong lawak dihang kalit nga nagpakita kaniya ang anghel ni Jehova nga nagtindog duol sa halaran sa insenso. Gisultihan sa anghel si Zacarias nga gidungog sa Diyos ang iyang mga pag-ampo ug nga manganak si Elisabet ug batang lalaki. Ang bata nganlan ug Juan. Inigkadako niya, iyang mabatonan “ang espiritu ug gahom ni Elias.” Himoon niya ang usa ka dakong buluhaton sa pag-andam sa katawhan nga mobalik kang Jehova.

Si Zacarias wala motuo sa gisulti sa anghel ug siya miingon: “Mahitabo ba gyod na?” Siya gitul-id ug giingnan sa anghel: “Ako si Gabriel, nga nagtindog sa atubangan sa Diyos.” Wala gyoy rason nga magduhaduha si Zacarias sa maong gamhanang anghel nga nag-alagad kang Jehova. Tungod sa iyang pagduhaduha, si Gabriel miingon nga maamang si Zacarias hangtod nga matuman ang mga saad sa Diyos. Busa paggawas ni Zacarias sa sangtuwaryo, nagsenyas na lang siya aron ipahibalo sa mga tawo kon unsay nahitabo kaniya.

Nakahimo rag paagi si Zacarias nga mapatin-aw kang Elisabet kon unsay nahitabo. Dayon, “pipila ka adlaw sa ulahi,” namabdos si Elisabet. Wala siya mogawas sa ilang balay sulod sa lima ka bulan, pero sa ikaunom nga bulan giduaw siya sa iyang paryente nga taga-Nasaret, si Maria nga anak ni Heli. Pagsulod ni Maria sa balay, misikad ang bata sulod sa tagoangkan ni Elisabet tungod sa kalipay. Si Elisabet napuno sa balaang espiritu ug iyang gitawag si Maria nga “inahan sa akong Ginoo.” Nahibalo siya nga ang gimabdos ni Maria mao unya ang Mesiyas. Imbes masina, gidasig ni Elisabet si Maria ug gipasaligan nga motabang si Jehova kaniya.

Dihang nanganak na si Elisabet, giadto siya sa iyang mga paryente ug silingan. Gusto nila nga ang bata nganlag Zacarias, sama sa ngalan sa iyang amahan. Pero nahibalo si Elisabet sa giingon ni Gabriel kang Zacarias: “Nganli siyag Juan.” Busa wala siya mosugot. Siya miingon: “Dili! Juan ang ingalan kaniya.” Pero dili nila gustong maminaw kang Elisabet maong nangutana sila kang Zacarias. Kay dili gihapon siya makasulti, nangayo siyag sulatanan ug misulat: “Juan ang iyang ngalan.” Dihadiha, siya makasulti na.

Dayon si Zacarias napuno sa balaang espiritu ug nanagna. Nagpahayag siyag mensahe sa paglaom sa katawhan sa Diyos ug miingon siya nga si Jehova magpakitag kaluoy ug magluwas kanila. Iyang gitagna nga ang iyang anak nga si Juan “mag-una kang Jehova sa pag-andam sa iyang mga dalan.” Ug mao gyod nay nahitabo. Giandam ni Juan nga Tigbawtismo ang dalan para sa Mesiyas. Iyang gitabangan ang katawhan nga mahimong andam sa pagdawat sa mensahe ni Jesus bahin sa Gingharian sa Diyos.

Ang pag-abot sa Mesiyas magpahinabog dagkong kausaban kon sa unsang paagi ang katawhan sa Diyos makiglabot sa mga dili magtutuo ug mga magsusupak. Kaniadto, daghang alagad sa Diyos ang nagmaisogon ug nakiggubat sa mga kaaway ni Jehova. Pero niining higayona, nausab na ang kahimtang ug wala na sugoa ni Jehova ang iyang mga alagad sa pagpakiggubat. Pero nagkinahanglan gihapon silag kaisog. Kadtong modawat sa Mesiyas kinahanglang mogamit sa ilang katakos sa pagsulti sa paghimaya kang Jehova nga Diyos ug sa pagsangyaw sa maayong balita bahin kang Jesu-Kristo, sama sa gihimo ni Zacarias ug Elisabet.

Basaha ang asoy sa Bibliya:

• Lucas 1:5-25, 36-45, 57-80

Pakighisgot:

Sa unsang mga paagi nga si Zacarias ug Elisabet nagpakitag kaisog?

Tun-ig Dugang

1. 1. Si Zacarias ug Elisabet dili hingpit, pero nganong gihisgotan sila sa Bibliya ingong “walay ikasaway”? (Luc. 1:6; it “Pagkawalay-ikasaway” ¶2)

   Imong tubag

1. 3. Giingnan ni Gabriel si Zacarias nga nganlan ang iyang anak ug Juan. Unsay kahulogan sa ngalang Juan? (it “Juan” ¶1)

   Imong tubag

2. 4. Naamang ug nabungol ba gyod si Zacarias? (w08 3/15 30 ¶6)

   Imong tubag

Hunahunaa ang mga Leksiyon

• Sa panahon ni Zacarias, gitugotan sa Hudiyong mga rabbi ang usa ka lalaki nga diborsiyohan ang iyang asawa kon dili ni makaanak. Pero wala na himoa ni Zacarias. Unsay makat-onan sa mga bana kaniya? B

  Imong tubag

  

• Si Elisabet nagmaunongon ug misunod sa instruksiyon sa iyang bana imbes magpadala sa presyur sa iyang mga silingan ug paryente. (Luc. 1:58-61) Unsay makat-onan sa mga asawa kaniya?

  Imong tubag

• Unsaon nimo pagsundog ang kaisog ni Zacarias ug Elisabet?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Kon si Zacarias ug Elisabet banhawon dinhi sa yuta, unsay akong ipangutana kanila?a

  Imong tubag

Pagkat-og Dugang

Tan-awa ang nahitabo dihang si Zacarias nakasulti na pag-usab ug nagdayeg sa Diyos.

“Juan ang Iyang Ngalan” (6:59)

Sa unsang paagi nadawat ni Maria ang kusog gikan kang Jehova dihang mibisita siya kang Elisabet, ug unsay atong makat-onan niini?

“‘Hatagan Mo Niyag Kusog’—Sa Unsang Paagi?” (w23.10 14-15 ¶10-14)