40 NEHEMIAS
Iyang Gitukod Pag-usab ang Paril
SI Nehemias nagpuyo sa siyudad sa Susan sa Persia, pero ang iyang kasingkasing tua sa layo—sa Jerusalem. Gimahal niya ang maong siyudad kay tua didto ang templo ni Jehova. Gitugotan ang katawhan sa Diyos nga mobalik didto human mabihag sa taas nga panahon. Pero wala gihapon nila himoa kon unsay gidahom ni Jehova nga paagi sa pagsimba kaniya. Gun-ob ang mga paril sa siyudad. Niadtong panahona, ang usa ka siyudad nga walay mga paril nameligrong sulongon sa kaaway, maong diyutay ra ang gustong mopuyo niana nga siyudad.
Si Nehemias tinahod nga opisyal sa gobyerno ug sinaligang alagad ni Haring Artajerjes sa Persia. Pero labaw sa tanan, si Nehemias maunongong alagad ni Jehova. Usa ka adlaw niana, mibisita ang iyang igsoon nga nagdalag balita bahin sa ‘makaluluoy kaayong kahimtang’ sa Jerusalem. Gawas nga gun-ob pa gihapon ang mga paril niini, “makauulaw” pod ang kahimtang sa katawhan.
Naguol pag-ayo si Nehemias. ‘Milingkod siya ug mihilak ug nagbangotan sa pipila ka adlaw.’ Miampo siya kang Jehova ug nagpakiluoy nga hinumdoman ug tabangan ang katawhan sa Diyos. Human niana, samtang si Nehemias nagsilbig bino kang Artajerjes, gipangutana siya sa hari kon nganong masulub-on siya. Gikulbaan pag-ayo si Nehemias, pero wala siya magpadaog niini. Iyang gisulti ang makaluluoyng kahimtang sa Jerusalem. Gipangutana siya ni Artajerjes kon unsay gusto niyang buhaton. ‘Dihadiha miampo siya sa Diyos sa kalangitan.’ Dayon iyang giingnan ang hari nga gusto niyang biyaan usa kadiyot ang iyang trabaho, mobalik sa Jerusalem, ug motabang sa pagtukod pag-usab sa mga paril ug ganghaan niini. Gitugtan siya sa hari sa paghimo sa tanan sumala sa iyang gihangyo!
Busa miadto si Nehemias sa Jerusalem. Kadto maoy taas ug delikado nga panaw. Tulo ka adlaw human sa iyang pag-abot, iyang gisusi ang kagun-oban sa mga paril sa siyudad panahon sa kagabhion. Dayon iyang gitigom ang mga tawo ug gidasig sila nga motabang sa pagtukod pag-usab sa paril. Siya nagpakitag maayong ehemplo kay siya mismo nangunay sa pagtrabaho. Mitabang ang mga tawo, apil ang mga dato ug mga prominente, sama sa mga platero ug bisan mga prinsipe. Gani ang usa sa maong mga prinsipe mitabang sa pagtrabaho duyog sa iyang mga anak nga babaye.
Ang mga Hudiyo daghag kaaway nga dili gusto nga ang Jerusalem mapanalipdan ug lig-ong mga paril. Sa primero, ilang gibugalbugalan ug gibiaybiay ang mga Hudiyo. Ang usa ka magsusupak miingon nga bisag irong ihalas makalumpag sa paril nga ginatukod ni Nehemias ug sa iyang katawhan. Pero wala sila tagda ni Nehemias ug padayon niyang gidasig ang mga tawong nagtrabaho.
Bisan pag siya gibiaybiay ug gihulga sa mga kaaway, iyang gitukod pag-usab ang mga paril sa Jerusalem
Misamot ang pagsupak. Dihang katunga na ang gihabogon sa paril, ang mga kaaway nangandam sa pag-atake sa Jerusalem! Mihimog mga paagi si Nehemias aron mapanalipdan ang siyudad. Pagkakita niini sa mga kaaway, wala na nila dayona ang ilang pag-atake. Sukad adto, si Nehemias ug ang katunga sa mga nagtrabaho nagbantay sa paril nga nagdalag mga hinagiban, samtang ang katunga nagpadayon sa pagtrabaho. Pero wala mosurender ang mga kaaway.
Sila nagsuhol ug bakak nga propeta aron sultihan si Nehemias nga mangabot ang mga kaaway aron patyon siya ug nga kinahanglan niyang motago sulod sa sagradong templo ni Jehova. Kon himoon to ni Nehemias, malapas niya ang balaod sa Diyos, maong midumili siya. Siya miingon: “Ako nga gobernador moikyas?” Nagpadayon siya sa pagtrabaho kay nahibalo siya nga ang mga Hudiyo nagbuhat sa kabubut-on sa Diyos ug gipaluyohan ni Jehova. Wala masayop si Nehemias! Sulod lang sa 52 ka adlaw, nahuman ang pagtukod pag-usab sa paril, ug ang tanan nilang kaaway naulawan.
Karon, si Nehemias nagkinahanglag kaisog sa pagpakiglabot sa iyang katawhan. Kinahanglan siyang manguna sa pagtabang kanila sa pagsimba kang Jehova. Pananglitan, dihang ang mga dato nagdaogdaog sa mga pobre pinaagi sa pagpahulam nga may dakong tubo, maisogon silang gitul-id ni Nehemias. Sa ulahi, dihang iyang nasayran nga ang uban misupak kang Jehova ug nagminyog mga langyaw, maisogon niyang gibadlong sila ug giingnan nga ang ilang gibuhat daotan ug supak sa balaod sa Diyos.
Dihay panahon nga ang katawhan naguol pag-ayo tungod sa ilang mga kasaypanan ug sala, maong gidasig sila ni Nehemias. Siya miingon: “Ang kalipay nga gikan kang Jehova mao ang inyong salipdanan.” Nahibalo si Nehemias nga ang katawhan mobating luwas ug napanalipdan tungod sa lig-ong mga paril. Pero gusto niyang tudloan sila nga ang makahatag gyod ug tinuod nga panalipod mao ang kalipay nga gihatag ni Jehova kanila kay sila nag-alagad sa Diyos. Ug kini nga kalipay motabang sab nato karon nga magmaisogon.
Basaha ang asoy sa Bibliya:
Pakighisgot:
Sa unsang mga paagi nga si Nehemias nagpakitag kaisog?
Tun-ig Dugang
1. Unsay nalangkit sa buluhaton ni Nehemias ingong tig-ipis sa ilimnon sa hari? (w10 7/1 9 ¶5-7) A
National Museum of Iran, Tehran, Iran/Bridgeman Images
Hulagway A: Karaang kinulit sa paril sa Persia nga nagpakita sa tig-ipis sa ilimnon ni Dario nga Bantogan, ang lolo ni Artajerjes
2. Nganong ang mga anak nga babaye ni Salum lahi kon itandi sa prominenteng mga Tekoahanon? (Neh. 3:5, 12; w19.10 23 ¶11)
3. Sa unsang paagi ang mga tigpas-an makahimo sa pagtrabaho “samtang ang ilang pikas kamot nagkupot ug hinagiban”? (Neh. 4:17, 18; w06 2/1 9 ¶1) B
Hulagway B
4. Nganong nabalaka si Nehemias nga ang pipila ka anak sa mga Hudiyo dili makasultig Hebreohanon? (Neh. 13:23-27; w16.10 14 ¶4)
Hunahunaa ang mga Leksiyon
Sa unsang paagi masundog sa mga ansiyano si Nehemias sa iyang . . .
pagsalig kang Jehova? (Neh. 1:4-11; 4:14; 13:1-3)
kaandam sa pagtrabaho kauban sa iyang mga igsoon? (Neh. 4:15, 21-23)
kaandam sa pagpaminaw? (Neh. 5:1-7) C
Hulagway C
Si Nehemias dunay taas nga posisyon sa palasyo sa hari, pero mibiya siya aron tabangan ang katawhan sa Diyos, ug gipanalanginan siya ni Jehova. Unsay atong makat-onan niini?
Sa unsa pang mga paagi masundog nimo ang kaisog ni Nehemias?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Nehemias dihang banhawon na siya?
Pagkat-og Dugang
Unsay atong makat-onan kang Nehemias bahin sa gahom sa pag-ampo?
“Gitubag sa Diyos ang Iyang Pag-ampo” (Serye nga “Pagtuon sa Bibliya” diha sa jw.org)
Niini nga drama, sayra kon sa unsang paagi si Nehemias nagpakitag kaisog dihang wala siya lung-i sa mga magsusupak.
Nehemias: “Ang Kalipay nga Gikan Kang Jehova Mao ang Inyong Salipdanan”—Bahin I—Excerpt (5:22)