39 ESTER
“Kon Kinahanglan Kong Mamatay, Andam Kong Mamatay”
USA ka batan-ong babaye ang naglakaw paingon sa lawak diin ang hari naglingkod sa iyang trono. Wala siya ipatawag sa hari. Tungod niini, nahibalo siya nga puwede siyang ipapatay. Nahadlok siya, pero determinado siyang makig-estorya sa hari. Kinsa siya, ug nganong kinahanglan niya kining himoon?
Siya si Ester. Namatay ang iyang mga ginikanan adtong bata pa siya, ug si Mardokeo nga iyang ig-agaw nga magulang kaniya ‘nagsagop niya ingong anak’ ug maoy nag-atiman niya. Nagpuyo sila sa siyudad sa Susan. Ang hari sa Imperyo sa Persia nagpuyo pod sa maong siyudad, ug si Mardokeo usa sa iyang mga alagad. Si Ester midako nga “nindot ug lawas ug guwapa.”
Usa ka adlaw niana, si Haring Ahasuero (posibleng si Xerxes I) nangitag bag-ong asawa, maong gisugo niya ang iyang mga alagad nga mangitag guwapang mga ulay sa tibuok imperyo. Namatikdan sa mga alagad sa hari ang kaguwapa ni Ester ug ilang gidala siya sa palasyo. Sa wala pa dad-a si Ester, ‘giingnan siya ni Mardokeo nga dili isulti’ sa uban nga siya usa ka Hudiyo.
Sa palasyo, “si Ester nauyonan sa tanang nakakita kaniya.” Human sa 12 ka bulan nga pagpaanyag, gidala siya ngadto sa hari. “Siya ang nakaangkon sa iyang pabor ug pag-uyon,” ug siya ang gipili sa hari nga mahimong rayna. Nahimo siyang asawa sa magmamando sa gamhanang Imperyo sa Persia! Bisan pa niana, gituman ni Ester ang giingon ni Mardokeo ug wala gyod niya isulti kang bisan kinsa nga Hudiyo siya.
Adtong panahona, ang tawo nga ginganlag Haman gitudlo ingong primer ministro sa imperyo. Si Haman nagdumot kang Mardokeo, kinsa dili moyukbo kaniya. Si Mardokeo dili moyukbo kay siya matinumanong alagad sa Diyos. Posible nga si Haman naggikan sa nasod nga gihukman ni Jehova ingong Iyang kaaway. Bisan unsa pa may rason ni Mardokeo, si Haman nasuko pag-ayo kaniya ug nagplano nga ipapatay ang tanang Hudiyo sa imperyo. Pagkahibalo ni Mardokeo sa plano ni Haman, naguol siya pag-ayo. Nagpadala siyag mensahe kang Ester nga nag-awhag kaniya nga hangyoon ang hari sa pagluwas sa mga Hudiyo. Nagkinahanglan gyod ug dakong kaisog si Ester sa paghimo niini.
Giingnan ni Ester si Mardokeo nga puwede siyang masilotan ug kamatayon kon adtoon niya ang hari bisag wala siya ipatawag. Ang maong hari nailhan nga putong. Pero giingnan gihapon ni Mardokeo si Ester nga makig-estorya sa hari, ug gipahinumdoman nga tingali nahimo siyang rayna tungod niini nga rason—aron panalipdan ang katawhan ni Jehova. Busa gisuklan ni Ester ang iyang kahadlok. Siya miingon: “Kon kinahanglan kong mamatay, andam kong mamatay.” Ang iya lang gihangyo mao nga magpuasa ang mga Hudiyo sulod sa tulo ka adlaw. Seguradong dili maihap ang mga pag-ampo ni Ester ug sa iyang katawhan aron mapanalipdan siya. Dayon, miadto siya sa hari.
Pagkakita ni Ahasuero kang Ester nga nagtindog sa hawanan sa palasyo, wala siya masuko. Wala siyay gipahamtang nga silot nga kamatayon. Hinuon, gipangutana sa hari si Ester kon unsay iyang tuyo. Si Ester miingon nga gusto niyang imbitahon ang hari ug si Haman sa bangkete nga iyang giandam para nila. Sa maong bangkete, si Ester nag-amping ug nagmaalamon ug wala usa niya isulti ang plano ni Haman. Igo ra niyang giimbitar ang hari ug si Haman para sa lain pang bangkete pagkaugma. Si Haman mipauli sa iyang balay ug naghimo na pod ug plano. Gusto niyang ipabitay si Mardokeo sa estaka. Pero ang daotang plano ni Haman moresulta rag kadaot niya sa ulahi.
Kinahanglan niyang kombinsihon ang gamhanang hari nga pugngan ang pagpuo sa katawhan sa Diyos
Sa ikaduhang bangkete, gipangutana na pod ni Ahasuero si Ester kon unsay gusto niyang ihangyo. Niining higayona, iya nang gisultihan ang hari. Matinahorong miingon si Ester nga naay tawo nga nagplano nga patyon siya ug ang iyang katawhan. Miingon sab siya nga magpakahilom lang unta siya pero ang nakaapan, ang maong plano makadaot sa hari. Puwerteng kurata ni Ahasuero ug nangutana siya kon kinsa nang tawhana. Gisulti ni Ester kon kinsa ang kaaway: si Haman! Nasuko kaayo ang hari ug iyang gisugo nga ipapatay si Haman. Gibitay siya sa mismong estaka nga iyang gipahimo para unta kang Mardokeo.
Gusto gyod unta ni Haman nga mamatay si Mardokeo ug mapuo ang katawhan sa Diyos sa tibuok Imperyo sa Persia. Pero lahi ang nahitabo. Si Haman na hinuon ug ang mga kaaway ni Jehova ug sa mga Hudiyo ang gipatay. Busa si Jehova naggamit ug usa ka batan-ong babaye nga maisogon ug lig-og pagtuo aron panalipdan ang katawhan sa Diyos.
Basaha ang asoy sa Bibliya:
Pakighisgot:
Sa unsang mga paagi nga si Ester nagpakitag kaisog?
Tun-ig Dugang
1. Unsa pay nagpamatuod nga tinuod kini nga asoy? (ia 138, kahon) A
Ungnad, Arthur. “Neubabylonische Privaturkunden aus der Sammlung Amherst.” Archiv für Orientforschung, vol. 19, 1959, pp. 74–82
Hulagway A: Karaang papan sa Persia nga naghisgot kang Marduka (Mardokeo)
2. Ngano kaha nga dili gyod moyukbo si Mardokeo kang Haman? (ia 130 ¶18)
3. Unsay nagpakita nga nalangkit si Satanas ug ang iyang mga demonyo sa paningkamot nga puohon ang mga Hudiyo? (g02 9/8 7 ¶3–8 ¶2) B
Cube. Lot of Yahali, puru. Neo-Assyrian Clay. (YPM BC 021122). Courtesy of the Peabody Museum, Division of Anthropology, Babylonian Collection, Yale University; peabody.yale.edu
Hulagway B: Karaang dice nga gigamit sa pagripa
4. Unsang tagna ang gituman ni Ester ug Mardokeo? (ia 142, kahon)
Hunahunaa ang mga Leksiyon
Si Ester maalamon ug masinugtanon bisan pag layo siya ug dili niya kauban kadtong mga nagsimba kang Jehova. Unsay makat-onan sa mga batan-on kaniya?
Nakuha ni Ester ang pabor sa iyang bana kay siya mapailobon, matinahoron, ug matinud-anon sa pagpakig-estorya kaniya. Sa unsang paagi siya masundog sa Kristohanong mga asawa? C
Hulagway C
Sa unsa pang mga paagi masundog nimo ang kaisog ni Ester?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Ester dihang banhawon na siya?
Pagkat-og Dugang
Niini nga music video, sayra ang daghang leksiyon nga makat-onan sa mga bata kang Ester.
Sa unsang paagi gisundog sa mga brader si Ester dihang nameligro ang ilang mga igsoon sa pagtuo?
Sundoga Kadtong Nakadawat sa mga Saad Pinaagig Pailob—Mardokeo ug Ester (3:05)