38 ANG TULO KA HEBREOHANON
Sila “Wala Masunog sa Kalayo”
DIHANG si Hananias, Misael, ug Azarias kalit nga nakaatubang ug pagsulay, tingali nangandoy sila nga kauban unta nila si Daniel. Maayo siya nga higala ug lig-on ug pagtuo. Pero wala siya dihang nameligro ang kinabuhi sa iyang mga higala nga ginganlan sa mga Babilonyanhon ug Sadrak, Mesak, ug Abednego.
Nagsugod ning tanan dihang si Nabucodonosor nagpahimog dako kaayong estatuwa. Sama ni ka habog sa siyam ka andana nga bilding ug mga tres metros (8.8 piye) ang gilapdon niini. Ang hari nag-organisar ug dakong selebrasyon alang sa inagurasyon sa estatuwa, ug gimando niya nga kinahanglang motambong ang tanan niyang opisyales sa gobyerno. Ang tulo ka Hebreohanon kinahanglang mosunod sa maong mando ug motambong sa inagurasyon.
Mihilom ang mga tawo dihang gipahibalo kon unsay ilang madahom nga mahitabo sunod. Una, makadungog silag musika, lagmit aron maandam ang ilang kasingkasing sa pagbuhat sa sunod nga ipahimo sa hari kanila. Dayon sila kinahanglang ‘mohapa ug mosimba sa estatuwa.’ Nahibalo ang tulo ka batan-on nga gidili sa balaod ni Jehova ang pagsimbag mga idolo. Busa unsa kahay ilang himoon?—Ex. 20:4, 5.
Samtang gitan-aw sila sa daghang tawo, gisugo sila sa pagsimbag idolo, ug kon dili sila mosunod, patyon sila
Nagsugod pagtokar ang musika. Pagkadungog niini sa mga tawo, nanghapa sila sa pagsimba sa estatuwa. Pero dihay tulo nga nagpabiling nagtindog, ug segurado nga gitan-aw sila sa tanan. Gipahimuslan ni sa pipila ka Caldeanhon aron akusahan, o butangbutangan, ang maong batan-ong mga Hudiyo. Giingnan sa maong mga Caldeanhon si Nabucodonosor: “Kining mga tawhana walay pagtahod nimo, Oh hari. Dili sila moalagad sa imong mga diyos, ug dili sila mosimba sa estatuwang bulawan nga imong gipatindog.” Gipatawag sa hari ang tulo ka Hebreohanon ug suko kaayo siyang nangutana nila kon tinuod ba ang mga akusasyon. Pero wala na hulata sa hari nga makatubag sila; iya dayon silang gihulga. Siya miingon nga iyang hatagan silag usa pa ka kahigayonan nga mosunod sa sugo. Pero kon dili gihapon sila mosunod, “itambog dayon [sila] sa nagdilaab nga hudno.” Siya miingon nila nga walay diyos nga makaluwas nila.
Si Hananias, Misael, ug Azarias wala gyod magduhaduha sa pagtubag. Ilang giingnan ang hari nga “kon itambog gyod” sila, ang ilang Diyos makaluwas nila gikan sa maong ngilngig nga kamatayon. Sila midugang: “Apan kon dili mi niya luwason, gusto ming mahibalo ka, Oh hari, nga dili mi moalagad sa imong mga diyos o mosimba sa estatuwang bulawan nga imong gipatindog.” Puwerteng sukoa ni Nabucodonosor. Siya nagsugo nga painiton ang hudno ug pito ka pilo kay sa naandan ug nga ang tulo ka Hebreohanon gaposon ug itambog sa nagdilaab nga hudno. Init kaayo ang hudno nga tungod niana namatay kadtong mga nagtambog sa mga Hebreohanon!
Dayon dihay nakita si Nabucodonosor nga nakapalisang niya. Upat ka tawo na ang naa sa hudno, dili tulo. Naglakaw sila sa kalayo pero wala sila maunsa! Nakita sab sa hari nga ang hitsura sa ikaupat “morag anak sa mga diyos.” Naningkamot si Nabucodonosor nga makaduol sa hudno kutob sa iyang mahimo, ug dayon gitawag niya ang tulo ka Hebreohanon aron pagawson sa hudno.
Imadyina ang dakong kahingangha sa mga tawo dihang nanggawas sa hudno ang tulo ka batan-on nga wala maunsa. Wala masunog bisan ang ilang buhok o sinina, o wala man lang sila manimahong aso. Kini lang ang nausab: Wala na silay gapos. Nahingangha sab si Haring Nabucodonosor. Iyang gidayeg ang tulo ka Hebreohanon kay masinugtanon sila sa ilang Diyos. Siya miingon: “Sila misalig kaniya ug wala mosunod sa sugo sa hari ug andam mamatay imbes moalagad o mosimba sa bisan kinsang diyos gawas sa ilang Diyos.”
Ang maong mapahitas-ong hari nagpakanaog ug mando nga patyon si bisan kinsa sa iyang gingharian nga mosulti batok kang Jehova. Ug ang tulo ka batan-on iyang gihatagag mas taas nga posisyon sa gobyerno. Pero labaw pa niana ang gihimo ni Jehova—iya silang gihinumdoman. Pananglitan, gatosan ka tuig sa ulahi, gihisgotan ni apostol Pablo diha sa iyang sulat kadtong mga “wala masunog sa kalayo” tungod sa ilang talagsaong pagtuo. Seguradong naa sa iyang hunahuna ang maisogong mga Hebreohanon nga si Hananias, Misael, ug Azarias.
Basaha ang asoy sa Bibliya:
Pakighisgot:
Sa unsang mga paagi nga si Hananias, Misael, ug Azarias nagpakitag kaisog?
Tun-ig Dugang
1. Sa unsang paagi ang mga nadiskobrehan sa mga arkeologo nagpamatuod nga tukma ang gihisgotan sa Daniel kapitulo 3? (w23.07 31) A
© The Trustees of the British Museum. Licensed under CC BY-NC-SA 4.0. Source. Modifications: Box added
Hulagway A: Tisa nga naay ngalan ni Nabucodonosor
2. Unsa tingali ang kahulogan sa Babilonyanhong mga ngalan nga gihatag ngadto sa tulo ka Hebreohanon? (dp 36 ¶14)
3. Unsay nagpakita nga relihiyoso kaayo si Nabucodonosor? (dp 69 ¶3) B
Hulagway B: Si Nabucodonosor nagtukod ug nag-ayo sa mga templo sa daghang Babilonyanhong diyos
4. Nganong ang “katawhan nga lainlaig nasod ug pinulongan,” nga lagmit nagsimba sa ilang kaugalingong mga diyos, mosugot ra sa pagsimba sa estatuwa nga gipatindog ni Nabucodonosor? (Dan. 3:7; dp 73 ¶10)
Hunahunaa ang mga Leksiyon
Ang tulo ka Hebreohanon wala mokompromiso dihang gipakaon ug gidili nga pagkaon. Sa ulahi, wala sila mokompromiso dihang nameligro ang ilang kinabuhi. Unsay atong makat-onan niini bahin sa pagkahimong matinumanon bisan sa gagmayng butang? (Luc. 16:10) C
Hulagway C
Dihang lutoson ta, unsaon nato pagsundog ang mosunod nga mga hiyas sa tulo ka Hebreohanon? (Dan. 3:16-18)
Pagkamapainubsanon
Kalumo
Pagkamaunongon
Unsaon nimo pagsundog ang kaisog niining tulo ka Hebreohanon?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Hananias, Misael, ug Azarias dihang banhawon na sila?
Pagkat-og Dugang
Sa unsang paagi ang usa ka Kristohanon makapabiling matinahoron pero sa samang higayon neyutral panahon sa nasyonalistikong seremonyas?
Imadyina nga usa ka sa tulo ka Hebreohanon ug sayra kon unsa pay imong makat-onan niini nga asoy.
“Naluwas Gikan sa Nagkalayong Hudno!” (Serye nga “Pagtuon sa Bibliya” diha sa jw.org)