37 DANIEL
‘Determinado Siyang Dili Hugawan ang Iyang Kaugalingon’
SI Daniel nagpuyo sa lugar nga layo kaayo sa Juda. Ang iyang pamilya apil sa mga gibihag ug gidala ngadto sa Babilonya. Kini nga panaw gidangtan tingalig mga upat ka bulan. Dayon si Daniel ug ang ubang mga batan-on gikuha gikan sa ilang mga pamilya ug gidala ngadto sa kaulohang siyudad. Tulo sa maong Hebreohanong mga batan-on mao si Hananias, Misael, ug Azarias. Wala madugay, nahibaloan ni Daniel ug sa iyang tulo ka higala ang tuyo sa mga mibihag nila—nga maparehas sila sa mga Babilonyanhon.
Si Daniel layo kaayo sa iyang pamilya ug nagkinahanglan siyag kaisog nga magmaunongon kang Jehova
Pag-abot sa mga batan-on sa palasyo, gisugo sa hari sa Babilonya nga si Nabucodonosor ang iyang pangulong opisyal sa palasyo, si Aspenaz, nga usbon ang ilang mga ngalan. Ang ilang Hebreohanong mga ngalan nagdayeg sa matuod nga Diyos. Pananglitan, ang ngalan nga “Daniel” nagkahulogang “Ang Diyos ang Akong Maghuhukom.” Pero sa Babilonya ang mga ngalan sa daghang tawo nagdayeg sa ilang bakak nga mga diyos. Maong si Daniel gihatagan ug Babilonyanhong ngalan nga Beltesazar, nga nagkahulogang “Panalipdi ang Kinabuhi sa Hari.” Pag-ampo ni ngadto sa bakak nga diyos nga si Bel. Gusto pod sa hari nga ang maong mga batan-on maghunahuna ug mogawi nga sama sa mga Babilonyanhon. Iyang gisugo nga tudloan sila sa pagsulti ug pagsulat sa Caldeanhong pinulongan aron makaalagad sila kaniya sa palasyo. Pero dili lang kana ang gusto sa hari.
Gitudlo sa hari si Aspenaz nga magdumala sa pagbansay niining batan-ong mga binihag. Gusto sa hari nga mokaon sila sa kinalamiang pagkaon sa Babilonya nga iyang ginakaon ug sa maayo kaayong klase nga bino nga iyang ginainom. Tingali giganahan ang ubang mga batan-on sa maong espesyal nga pagtratar. Pero para kang Daniel, kadto makapameligro kaniya ug sa iyang tulo ka Hebreohanong higala. Ngano?
Naghunahuna tingali si Daniel: ‘Nahibalo ang mga nagbihag namo nga dunay mga pagkaon nga gidili sa balaod ni Jehova. Sulayan ba mi nila sa pagsupak kang Jehova pinaagig pagdalit namog mga pagkaon nga hugaw sa panglantaw sa Diyos? Ug kon dalitan mi nilag karne, napaagas bag maayo ang dugo niini o gusto mi nilang limbongan aron malapas namo ang balaod ni Jehova nga nagdili sa pagkaon sa dugo? O ang pagkaon ba niini giisip nga bahin sa pagsimba sa bakak nga diyos? Ug kon paimnon mi nilag daghang bino, dili kaha mawala ang among maayong paminsar?’a
Seguradong nag-ampo pag-ayo si Daniel ug iyang gikonsulta ang iyang tulo ka higala. Siya “determinado sa iyang kasingkasing” kon unsay angay niyang himoon aron mapalipay si Jehova. Dayon nakig-estorya siya kang Aspenaz. Matinahorong mihangyo si Daniel nga siya ug ang iyang mga higala tugotan nga dili mokaon sa tanang pagkaon nga makapahugaw nila. Gitabangan ni Jehova si Daniel, ug iyang gipahinabo nga ang pangunang opisyal sa palasyo magpakitag kaayo kang Daniel. Pero nabalaka si Aspenaz nga basig masakit si Daniel ug ang iyang mga higala kon dili nila kaonon ang gidalit nga mga pagkaon. Nahibalo siya nga kon mahitabo na, manubag siya kang Nabucodonosor. Naminaw ra si Daniel sa giingon ni Aspenaz. Pero sa ulahi, maisogong nakig-estorya si Daniel sa magbalantay nga gitudlo ni Aspenaz nga mag-atiman nila. Si Daniel mihangyo nga tugotan sila nga gulay o utan lang ang ilang kan-on ug tubig lang ang ilang imnon sulod sa 10 ka adlaw, ug dayon itandi silang upat ngadto sa ubang mga batan-on. Misugot ang magbalantay!
Human sa 10 ka adlaw, ang maong upat ka batan-on mas maayog hitsura ug mas himsog kay sa tanang ubang batan-on! Gani tungod niana, gitugotan sila nga padayong mokaon sa ilang gihangyo nga pagkaon. Klaro nga gipanalanginan ni Jehova ang pagtuo ug kaisog ni Daniel ug sa iyang mga higala. Dili gyod to nila malimtan.
Sa sunod nga kapitulo, masayran nato nga sa ulahi, ang tulo ka higala ni Daniel nakaatubang ug makahahadlok nga pagsulay sa ilang kaisog. Kon bahin kang Daniel, nabuhi siya hangtod sa mga 100 ka tuig ug sa tibuok niyang kinabuhi padayon siyang nagpakitag kaisog. Pananglitan, gisulti niya ang kahulogan sa mga damgo ni Nabucodonosor nga gikan kang Jehova, bisan pag ang maong mga damgo nagkahulogan nga naay daotang mahitabo sa maong mapahitas-ong hari ug sa iyang gingharian. Daghang tuig sa ulahi, panahon sa pagmando ni Belsazar, gisulti ni Daniel ang kahulogan sa sinulat diha sa bungbong. Siya miingon nga si Belsazar gihukman nga laglagon. Ug dihang tigulang na kaayo si Daniel, gihulog siya sa bangag nga daghag gigutom nga mga leyon. Sa maong mga kahimtang, si Daniel nagpakitag talagsaong kaisog sama sa iyang gihimo adtong batan-on pa siya. Dili ikatingala nga si Daniel gitawag sa usa sa mga anghel ni Jehova ingong “tawo nga gimahal pag-ayo”!
Basaha ang asoy sa Bibliya:
Pakighisgot:
Sa unsang mga paagi nga si Daniel nagpakitag kaisog?
Tun-ig Dugang
1. Nagkasumpaki ba ang Daniel 1:1 ug ang Jeremias 25:1? (dp 18-19 ¶14-15)
2. Sa unsang paagi ang usa ka Babilonyanhong sinulat nagpamatuod nga naglungtad ang “tipiganag bahandi sa [diyos ni Nabucodonosor]”? (Dan. 1:2; it “Tipiganan sa Bahandi” ¶3) A
© The Trustees of the British Museum. Licensed under CC BY-NC-SA 4.0. Source. Modifications: Box added
Hulagway A: Karaang sinulat nga nagpakita sa giingon ni Nabucodonosor bahin sa “tipiganag bahandi” sa templo ni Merodak
3. Unsay papel sa mga “salamangkerong saserdote”? (Dan. 1:20; it “Salamangka ug Pamarang” ¶2-6) B
Hulagway B: Papan gikan sa Babilonya nga naghisgot kon sa unsang paagi “ayohon” ang pasyente nga gihasi kuno sa multo
4. Unsa tingali ang apil sa mga pagkaon nga gidalit kang Daniel ug sa iyang tulo ka higala? (Dan. 1:12; dp 40 ¶25)
Hunahunaa ang mga Leksiyon
Si Daniel nagmatinumanon kang Jehova bisag layo siya sa iyang pamilya. Sa unsang paagi masundog sa mga batan-on si Daniel?
Si Daniel “determinado sa iyang kasingkasing” nga magmasinugtanon kang Jehova. Sa unsang paagi na nakatabang niya nga magmaisogon? (Dan. 1:8) Sa unsang paagi nato siya masundog? C
Hulagway C
Sa unsa pang mga paagi masundog nimo ang kaisog ni Daniel?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Daniel dihang banhawon na siya?
Pagkat-og Dugang
Tan-awa ang video bahin sa mga hitabo niini nga asoy sa Bibliya.
Sa unsang paagi masundog sa mga batan-on ang kaisog ug pagkamaunongon ni Daniel?
a Tan-awa ang Exodo 34:15; Levitico 7:26; 11:1-7; Numeros 25:2; Proverbio 20:1.