35 MANASES
Duna Siyay Kaisog sa Paghinulsol
UTANG ni Manases ang iyang kinabuhi sa milagro nga gihimo ni Jehova. Pinaagig milagro, gilugwayan sa Diyos ang kinabuhi ni Haring Ezequias, ug tungod niana ang maong maayong hari nakabaton ug anak nga lalaki, si Manases. Ikasubo, si Ezequias namatay dihang 12 anyos pa si Manases. Ang bata nahimong hari, pero lahi kaayo siya sa iyang amahan kay wala siya mag-alagad sa Diyos.
Grabe kaayo ang mga sala ni Manases. Sulod sa daghang katuigan sa iyang pagmando, siya naghimog daotan kaayo nga mga buhat sama sa apostasya, idolatriya, pagpamarang, ug bisan ang pagpatay sa iyang kaugalingong mga anak nga lalaki. Ubos sa iyang pagmando, mikaylap pag-ayo ang kapintasan. Daghan kaayog gipatay si Manases ug tungod niana, gisundog siya sa katawhan sa Jerusalem sa paghimo ug daghang pintas nga mga buhat. Kini nakapasuko pag-ayo sa Diyos. Si Jehova nagpadalag mga propeta sa pagpasidaan kaniya, pero wala gyod siya maminaw. Maghunahuna tingali ka kon nganong si Manases giisip nga maayong ehemplo sa kaisog. Atong sayron.
Usa ka adlaw niana, kalit nga nausab ang kinabuhi ni Manases. Kay wala siya maminaw sa mga pasidaan sa mga propeta ni Jehova, gitugotan sa Diyos nga ang Juda sakopon sa mga pangulo sa kasundalohan sa Asirya. Atong mabasa: “Ilang gidakop si Manases pinaagig mga kaw-it ug gigapos siya pinaagig duha ka tumbaga nga kadena ug gidala sa Babilonya.” Di gyod mahubit kon unsa ka sakit ang iyang giantos ug kon unsa ka lisod ang iyang nasinatian niining taas ug dili lalim nga panaw. Seguradong naulawan pag-ayo ang maong garbosong hari.
Daotan kaayo si Manases, pero gihatagan siya ni Jehova ug kahigayonan nga magbag-o
Samtang gipriso si Manases sa Babilonya, naa siyay panahon sa paghunahuna sa tanang daotan nga iyang gihimo. Mibati gyod tingali siyang nag-inusara o naghunahuna nga wala na siyay paglaom nga makabaton ug kagawasan. Asa na man ang tanang bakak nga mga diyos nga iyang gisimba ug gihalaran pa gani niya sa iyang kaugalingong mga anak? Iyang naamgohan nga kinahanglan siyang magbag-o. Ang una niyang gihimo mao ang pag-ampo kang Jehova. Niining higayona, dili na siya mapahitas-on. Hinuon, siya “nagpaubos pag-ayo sa iyang kaugalingon atubangan sa Diyos sa iyang mga katigulangan.” Nakita ni Jehova nga nausab si Manases, ug gidungog sa Diyos ang iyang mga pag-ampo. Samtang nahimong mas mapainubsanon si Manases, seguradong mas nakigsuod si Jehova kaniya. (Sal. 138:6) Si Manases nagpakiluoy ug miampo kang “Jehova nga iyang Diyos.” Gani, “siya nagpadayon sa pag-ampo” nga mapainubsanon.
Unsay gibati ni Jehova sa maong mga pag-ampo? Ang Bibliya nag-ingon: “Siya natandog sa iyang pagpakiluoy ug Iyang gidungog ang iyang hangyo alang sa pag-uyon.” Busa ang matuod nga Diyos nagpakitag kaluoy ug gitabangan niya si Manases sa talagsaong paagi. “Gipasig-uli Niya ang iyang pagkahari sa Jerusalem.” Karon duna nay kahigayonan si Manases nga ipakita nga tinuod ang iyang paghinulsol ug nausab na gyod siya.
Pagbalik ni Manases sa Jerusalem, giatubang niya ang kinadak-an tingali nga pagsulay sa iyang pagtuo. Ang yuta nalukop sa mga tawo nga iyang giimpluwensiyahan sa paghimog daotan sulod sa daghang tuig. Maminaw kaha niya ang mga tawo o masuko sila nga nagbag-o siya? Kon ugaling nabalaka niana si Manases, nagmaisogon gihapon siya sa pagtul-id sa iyang mga sayop. Nagtukod siyag lig-ong paril aron panalipdan ang Jerusalem, dayon iyang giwagtang ang bakak nga mga diyos ug mga idolo diha sa siyudad ug diha sa templo ni Jehova. Iyang giayo ang halaran ni Jehova ug nagtanyag siyag mga halad didto. Ug ang kinalisdan tingali sa tanan mao ang iyang pagpakigsulti sa iyang katawhan. Sulod sa daghang tuig, iyang giingnan sila sa pagsimbag bakak nga mga diyos. Pero karon, iyang gidasig sila “nga alagaron si Jehova nga Diyos sa Israel.” Nagbag-o na gyod ang maong kanhing daotan kaayo nga makasasala. Tin-aw natong makita diha sa iyang ehemplo ang nindot nga mga hiyas ni Jehova, ang pagkahimong “maayo ug andam sa pagpasaylo.”—Sal. 86:5.
Ikasubo, dili na masulbad ni Manases ang tanang problema nga resulta sa iyang daotang mga buhat. Gipasaylo ni Jehova ang hari, pero giseguro sa Diyos nga masilotan ang katawhan ni Manases tungod sa ilang kapintasan ug pagpamatay panahon sa iyang pagmando. Dili sila parehas sa ilang hari nga naghinulsol ug nagbag-o. Bisan gani ang kaugalingong anak ni Manases nga si Amon wala gyod maminaw sa iyang amahan ug siya nagpadayon sa paghimog daotan. Bisan pa niana, naningkamot gyod si Manases nga mahimong maayong impluwensiya sa iyang apo nga si Josias. Seguradong nahinumdom ang bata nga ang iyang apohan nagpakitag kaisog sa pagpaubos ug sa paghinulsol. Tinuod, daotan kaayo ang pagkinabuhi ni Manases sulod sa daghang tuig, pero nausab ra gyod siya sa ulahi. Sa nabiling mga bahin sa iyang kinabuhi, naa kanunay sa iyang hunahuna nga gipasaylo na siya sa iyang mahigugmaong Amahan.
Basaha ang asoy sa Bibliya:
Pakighisgot:
Sa unsang mga paagi nga si Manases nagpakitag kaisog?
Tun-ig Dugang
1. Si Manases “nagbuhat ug daotan nga labaw pa kay sa tanang Amorihanon” nga nagpuyo kaniadto sa Canaan. Unsay gipakita niini bahin kang Manases? (2 Hari 21:11; w00 10/15 16 ¶5-6; gl 10 ¶5, footnote)
2. Unsay nadiskobrehan sa mga arkeologo nga nagpamatuod nga tinuod si Manases ug nga ang Asirya maoy gamhanang gobyerno panahon sa iyang pagmando? (it “Manases” Num. 4 ¶2) A
© The Trustees of the British Museum. Licensed under CC BY-NC-SA 4.0. Source
Hulagway A: Ang ngalan ni “Manases, nga hari sa Juda,” makita sa Esarhaddon Prism
3. Unsay nagpakita nga ginakaw-itan gyod sa mga Asiryanhon ang ilang mga binihag? (2 Cron. 33:11; it “Kaw-it, Taga” ¶4) B
Hulagway B: Drowing sa usa ka kinulit sa paril nga gihimo sa mga Asiryanhon niadtong mga ikawalong siglo B.C.E.
4. Sa unsang paagi gigamit ni Jehova ang “pisi nga pangsukod” ug “nibel” sa pagsukod sa Jerusalem? (2 Hari 21:13; it “Nibel” ¶2)
Hunahunaa ang mga Leksiyon
Niini nga asoy, unsay atong makat-onan bahin sa paghinulsol?
Pasayloon ni Jehova ang mahinulsolong mga makasasala. Pero kinahanglan gihapon tingali nilang atubangon ang mga resulta sa ilang sala. Giunsa na pagpakita sa asoy bahin kang Manases? (Jer. 15:3-5) C
Hulagway C
Sa unsang mga paagi masundog nimo ang kaisog ni Manases?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Manases dihang banhawon na siya?
Pagkat-og Dugang
Sayra kon sa unsang paagi ang ehemplo ni Manases nakatabang sa usa ka brader nga mobalik kang Jehova.
Kon mibati kang walay pulos tungod sa imong nangaging mga sala, sa unsang paagi kini nga asoy makadasig nimo?