“Siya Miunong Kang Jehova”

SI Ezequias usa sa pipila ka hari sa Juda nga nahigugma gyod kang Jehova. Pero ang iyang amahan nga si Ahaz daotan kaayo nga hari, kinsa nagdasig sa katawhan sa pagsimbag bakak nga mga diyos. Gihalad pa gani ni Ahaz ang labing menos usa sa iyang mga anak nga lalaki ngadto sa pintas nga mga diyos. (2 Hari 16:2-4; 2 Cron. 28:1, 3) Busa posible nga si Ezequias nakakita ug ngilngig nga mga panghitabo niadtong bata pa siya. Pero pagdako niya, wala niya sundoga ang daotang binuhatan sa iyang amahan. Si Ezequias 25 anyos dihang ang iyang amahan namatay ug nahimo siyang hari. Dayon maisogon niyang gisugdan ang kampanya sa pagpahunong sa bakak nga pagsimba.

Giablihan pag-usab ni Ezequias ang templo ni Jehova sa Jerusalem ug giayo kini, gitangtang ang tanang idolo diha niini, ug giorganisar pag-usab ang mga saserdote ug mga Levihanon. Dayon nagpadala siyag mga mensahero aron dapiton ang tanang Israelinhon nga mangadto sa Jerusalem ug saulogon ang Paskuwa, apil kadtong nagpuyo sa amihanang gingharian. Dihay pipila ka tawo nga nagyagayaga sa mga mensahero, pero ang uban misanong ug miadto. Ang ehemplo ni Ezequias naghatag ug kaisog sa katawhan sa Israel ug Juda sa pagtumpag sa tag-as nga mga dapit nga gigamit sa bakak nga pagsimba ug sa pagdugmok sa mga idolo. Kon bahin sa tumbagang halas nga gipahimo ni Jehova kang Moises 700 ka tuig kanhi ug gisimba na sa mga tawo, gidugmok kini ni Ezequias aron wala nay makasimba niini.

Sulod sa daghang tuig, napanan-aw ni Ezequias nga dunay nagsingabot nga katalagman. Dugay nang gipasidan-an ni Jehova ang amihanang gingharian sa Israel nga ang mga kaaway mangabot ug maglaglag niini. Pipila lang ka tuig human magsugod ug mando si Ezequias, giatake sa mga Asiryanhon ang amihanang gingharian ug gidala ingong mga binihag ang kadaghanan sa katawhan niini. Naghunahuna tingali si Ezequias kon atakehon ba sab sa mga Asiryanhon ang Juda. Ang Juda dili matinumanon kang Jehova sama sa Israel. Mas daotan pa gani kini kay sa amihanang gingharian. Pinaagig mga propeta, gipasidan-an ni Jehova ang Juda nga iya silang silotan tungod sa ilang dili pagkamatinumanon, ug matuman gyod ang iyang giingon. Ug karon nga nagkaduol na sa Juda ang kasundalohan sa Asirya, seguradong nabalaka si Ezequias.

Sa kataposan, nakaabot sa Juda ang kasundalohan sa Asirya nga gipangunahan sa pintas nga hari nga si Senakerib. Anam-anam nilang nakuha ang daghang siyudad nga sakop sa gingharian ni Ezequias. Posible nga niining kuyaw nga panahon nga si Ezequias nasakit pag-ayo ug himalatyon na. Ang nakaapan pa gyod, wala pa siyay anak nga lalaki maong kon mamatay siya wala nay kaliwat si David nga mahimong sunod nga hari. Busa nagpakiluoy siya kang Jehova alang sa tabang. Gidungog ni Jehova ang iyang pag-ampo ug giayo siya. Mahigugmaon sab niyang gidugangag 15 ka tuig ang kinabuhi sa hari. Pero nameligro gihapon ang Jerusalem tungod sa mga Asiryanhon.

Aron mapanalipdan ang Jerusalem, ang balaang siyudad ni Jehova, si Ezequias misulay sa pagpugong kang Senakerib pinaagi sa pagpadalag dakong kantidad sa kuwarta nga gipangayo niini. Gidawat sa Asiryanhong hari ang kuwarta pero gusto pa gihapon niyang ilogon ang siyudad. Sa kasamtangan, padayong gipalig-on ni Ezequias ang Jerusalem. Nagdugang siyag bag-ong paril ug naghimog tanel nga magdalag tubig pasulod sa siyudad enkasog likosan ang Jerusalem. Gidasig sab niya ang iyang katawhan ug gipasaligan sila nga mas gamhanan si Jehova kay sa bisan unsang tawhanong kasundalohan.

Nasuko pag-ayo si Senakerib ug mihimog laing mga paagi aron hadlokon si Ezequias ug ang mga Israelinhon. Nagpadala siya sa Jerusalem ug taas nga opisyal, ang Rabsake, aron tamayon ug paluyahon ang katawhan. Ang maong tawo nagbiaybiay pag-ayo sa ilang hari ug sa ilang Diyos nga si Jehova. Pero nagmaisogon si Ezequias ug iyang gidasig ang katawhan. Dayon nagpadala si Senakerib ug mga sulat kang Ezequias aron hulgaon ug hadlokon siya. Gidala ni Ezequias ang maong mga sulat ngadto sa templo ug gibuklad kini sa atubangan ni Jehova. Pinaagi niana, iyang gitugyan sa labing gamhanang Diyos ang ilang giatubang nga suliran. Gitubag ni Jehova si Ezequias. Pinaagi kang propetang Isaias, gipadala ni Jehova kining makapalig-on nga mensahe para sa hari: Dili gyod makasulod sa Jerusalem si Senakerib. Ang iyang mga sundalo dili gani makapana ug udyong didto.

Nianang gabhiona, si Jehova nagpadalag anghel ngadto sa kampo sa mga Asiryanhon. Sulod lang sa mubo kaayo nga panahon, gipatay sa maong anghel ang 185,000 ka sundalo ni Senakerib. Imadyina kon unsay gibati ni Senakerib pagmata niya sa buntag ug nakita niya ang tanang patayng lawas sa iyang mga sundalo. Naulawan siya pag-ayo ug miuli sa iyang nasod. Sa ulahi, gipatay siya sa iya mismong mga anak nga lalaki samtang tua siya sa templo sa iyang Diyos nga si Nisrok.

Gihatagan ni Jehova si Ezequias ug dakong kadaogan! Wala na ang hulga sa mga Asiryanhon ug naayo na pod ang iyang sakit. Wa madugay, nakabaton siyag anak nga lalaki. Ikasubo, dihay panahon nga si Ezequias nahimong mapahitas-on. Pero gitul-id siya ni Jehova, ug mapainubsanon niya kining gidawat. Si Ezequias usa gyod sa kinamaayohang mga hari nga nagmando sa Israel. Siya nagpakitag dakong kaisog sa lisod kaayong panahon ug nagpabiling maunongon kang Jehova hangtod sa iyang kamatayon.

Basaha ang asoy sa Bibliya:

• 2 Hari 18:1–19:37

• 2 Cronicas 29:1–32:33

• Isaias 38:1–39:8

Pakighisgot:

Sa unsang mga paagi nga si Ezequias nagpakitag kaisog?

Tun-ig Dugang

1. 1. Unsay nadiskobrehan sa mga arkeologo nga nagpamatuod sa giingon sa Bibliya bahin kang Ezequias? (w11 5/1 15 ¶1-3) A

   Imong tubag

   

   Zev Radovan/Alamy Stock Photo

2. 2. Gitagna ni Isaias ang bahin sa “nagalupad nga lala nga bitin.” Sa unsang paagi gituman ni Ezequias ang maong tagna? (Isa. 14:28, 29; ip-1 190-191 ¶4-6)

   Imong tubag

3. 3. Nganong makapainteres ang mga gipangangkon ni Senakerib ug ang wala niya hisgoti diha sa rekord nga nadiskobrehan sa mga arkeologo didto sa Nineve? (g 12/10 27 ¶3-5) B

   Imong tubag

   

   © The Trustees of the British Museum. Licensed under CC BY-NC-SA 4.0. Source

4. 4. Niadtong 2003, gisusi sa usa ka grupo sa mga siyentista kon ang tanel nga nailhang Tanel ni Ezequias natukod ba gyod panahon sa pagmando ni Ezequias. Unsay resulta sa ilang pagsusi? (w09 5/1 27 ¶3-5)

   Imong tubag

Hunahunaa ang mga Leksiyon

• Nganong makapadasig ang ehemplo ni Ezequias alang sa usa ka Kristohanon kinsa may amahan o inahan nga dili magsisimba ni Jehova? C

  Imong tubag

  

• Dihang ang Jerusalem gihulga, unsa ang pangunang gikabalak-an ni Ezequias? (2 Hari 19:15-19) Unsaon nato siya pagsundog?

  Imong tubag

• Sa unsang mga paagi masundog nimo ang kaisog ni Ezequias?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Unsay akong ipangutana kang Ezequias dihang banhawon na siya?

  Imong tubag

Pagkat-og Dugang

Tan-awa ang kulbahinam nga mga panghitabo sa 2 Hari 19:14-36 niini nga video.

“Palihog Luwasa Kami” (5:38)

Sa unsang paagi ang Miqueas 5:5 natuman sa panahon ni Ezequias, ug sa unsang paagi kini nagakatuman karon?

“Pito ka Magbalantay, Walo ka Duke—Kon Unsay Kahulogan Alang Kanato Karon” (w13 11/15 18-20 ¶9-18)