Iyang Gitabangan ang Katawhan nga Mobalik Kang Jehova

SI Josias sayis anyos lang dihang namatay ang iyang lolo nga si Haring Manases. Nahibalo tingali siya sa nahitabo sa iyang lolo. Si Manases nakahimog daotan kaayong mga butang, pero nagbag-o siya ug misugod sa pag-alagad nga matinumanon kang Jehova. Dili gyod tingali malimtan ni Josias ang maayong gihimo sa iyang lolo. Pero daotan ang sunod nga nahimong hari, ang iyang amahan nga si Amon. Giimpluwensiyahan ni Amon ang katawhan sa paghimog daotan ug sa pagsimbag bakak nga mga diyos ug mga idolo. Nagmando siya sulod lang sa duha ka tuig ug dayon siya namatay. Human niana, ang otso anyos nga si Josias ang nahimong hari.

Posibleng nakakat-on si Josias sa pag-alagad kang Jehova sa hustong paagi gikan sa mga propeta nga si Sofonias, Jeremias, ug Hulda, ug sa hataas nga saserdote nga si Hilkias. Ang Bibliya nag-ingon bahin kang Josias: “Samtang siya batan-on pa [mga 16 anyos], siya misugod sa pagpangita sa Diyos ni David nga iyang katigulangan.” Sa mga 20 anyos siya, iyang gipangunahan ang importanteng buluhaton sa pagtabang sa katawhan sa Juda nga mobalik sa pagsimba kang Jehova sa hustong paagi. Gigamit ni Jehova kining maisogon ug batan-ong hari aron mohunong ang katawhan sa pagsimbag mga idolo ug sa paghimog daotan.

Si Josias miadto sab sa yuta nga gipuy-an kaniadto sa amihanang 10 ka tribo nga gingharian sa Israel. Mga langyaw na ang kadaghanan sa nagpuyo didto kay ang mga Israelinhon nabihag ngadto sa Asirya. Bisan pa ana, gitumpag ni Josias ang mga halaran ug gipulpog ang mga idolo nga tua didto.

Mga lima ka tuig sa ulahi, si Josias nakadawat ug wala damhang panalangin. Samtang giayo ang sagradong templo ni Jehova, nakit-an sa hataas nga saserdote nga si Hilkias ang usa ka linukot nga basahon. Mao kadto ang basahon sa Balaod nga gihatag ni Jehova kang Moises. Karaan na kaayo to ug posibleng si Moises mismo ang nagsulat adto! Ang maong basahon gidala ngadto kang Josias ug naminaw siya pag-ayo samtang gibasa kinig kusog sa iyang atubangan. Pagkadungog niya niini, naguol siya pag-ayo. Mas nasabtan na niya kon unsa ka masinupakon sa Balaod sa Diyos ang katawhan. Naamgohan ni Josias nga nasuko pag-ayo si Jehova sa Iyang katawhan. Busa unsa kahay himoon ni Josias?

Si Josias nagpadala dayon ug lima ka tawo aron magpakisayod kang Jehova. Nangadto sila sa propeta nga si Hulda. Giingnan sila sa propeta nga nasuko pag-ayo si Jehova sa pagrebelde sa katawhan sa Juda sulod sa taas na nga panahon ug nga laglagon ang Juda ug Jerusalem. Pero miingon sab ang propeta nga nakita ni Jehova ang maayong kasingkasing ni Josias ug ang iyang kaisog ug paningkamot sa pagtabang sa katawhan nga simbahon si Jehova sa hustong paagi. Busa ang maong kalaglagan dili ipahamtang samtang buhi pa si Josias.

Bisan pa ana, gihimo ni Josias ang iyang maarangan sa pagtabang sa iyang katawhan nga mobalik kang Jehova. Siya ug ang iyang katawhan naghimog pakigsaad nga sundon ang tanan nga giingon sa Balaod sa Diyos. Dayon mas gipangusgan pa niya ang iyang kampanya aron wagtangon ang idolatriya. Naghikay sab ang hari ug dakong pagsaulog sa Paskuwa. Siya ug ang iyang mga prinsipe miamot ug daghan kaayong hayop aron ihalad kang Jehova, ug ang mga mag-aawit mikanta ug mga pagdayeg sa Diyos. Usa to sa kinadak-ang mga Paskuwa nga gisaulog sa katawhan sa Diyos.

Si Josias padayong nagpakitag dakong kaisog ug pagtuo samtang naningkamot siya sa pagwagtang sa bakak nga pagsimba. Sa siyudad sa Bethel, nagsunog siyag bukog sa mga tawo diha sa halaran nga gigamit sa bakak nga pagsimba, ug dayon iyang gitumpag ang maong halaran. Pinaagi niini, iyang gituman ang mga pulong nga gitagna 300 ka tuig kanhi. (1 Hari 13:2) Sa Juda, gitumpag pa gani ni Josias ang mga halaran ug gipulpog ang mga idolo nga gigamit sa panahon nga nahimong apostata si Haring Solomon. Pero dihay higayon nga si Josias nakahimog dili maalamong desisyon. Nakiggubat siya sa paraon sa Ehipto nga ginganlag Neko. Pinaagi kang Neko, gipasidan-an ni Jehova si Josias nga dili makiggubat. Pero posibleng wala mangayog tambag si Josias sa mga propeta ni Jehova sa pagseguro kon gikan ba gyod kang Jehova ang gisulti ni Neko. Nakig-away na hinuon siya. Morag maisogon si Josias kay nakig-away siya kang Neko ug sa iyang kasundalohan, pero ang tinuod, madalidalion siya ug dili maalamon. Si Josias 39 anyos lang dihang namatay siya sa maong gubat.

Gikalimtan ba ni Jehova ang tanang maayong gihimo ni Josias? Wala gyod! Si propetang Jeremias miawit ug awit sa pagbangotan tungod sa namatayng hari. Posibleng sa daghang katuigan, padayon ning giawit sa katawhan sa Diyos. Tingali sa umaabot, dihang banhawon na si Josias, basahon niya ang mga nasulat sa Bibliya bahin sa iyang pagmando ug sa awit sa pagbangotan nga gikomposo ni Jeremias alang kaniya. Gihigugma gyod ni Jehova si Josias ug wala gyod niya kalimti ang pagtuo ug kaisog sa maong hari.

Basaha ang asoy sa Bibliya:

• 2 Hari 22:1–23:30

• 2 Cronicas 33:21–35:27

Pakighisgot:

Sa unsang mga paagi nga si Josias nagpakitag kaisog?

StockStudio/Alamy Stock Photo

1. 4. Gitagna ni Hulda nga si Josias “ilubong [sa iyang] lubnganan panahon sa kalinaw.” Pero kay namatay man si Josias sa gubat, sa unsang paagi natuman ang maong tagna? (2 Hari 22:20; w00 9/15 30 ¶2-3)

   Imong tubag

Hunahunaa ang mga Leksiyon

• Ang ubang mga Kristohanon dunay ginikanan nga magsusupak ug wala magsimba kang Jehova. Unsang mga leksiyon ang ilang makat-onan kang Josias, kinsa dunay apostatang amahan?

  Imong tubag

• Si Josias naningkamot nga masabtan ang Kasulatan. (2 Cron. 34:21) Unsaon nato siya pagsundog? B

  Imong tubag

  

• Sa unsa pang mga paagi masundog nimo ang kaisog ni Josias?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Unsay akong ipangutana kang Josias dihang banhawon na siya?

  Imong tubag

Pagkat-og Dugang

Sayra kon unsay imong makat-onan sa mga desisyon ni Josias ug sa duha pa ka batan-on nga nahimong hari sa Juda.

“Mga Batan-on—Unsa Kahay Mahitabo sa Inyong Kinabuhi?” (w23.09 8-13)

Pinaagi ba sa kaugalingong kusog ni Josias nga iyang nahinloan ang yuta gikan sa bakak nga pagsimba? Aron matubag na, tan-awa kini nga drama.

Ang Kinabuhi ni Josias: Higugmaa si Jehova; Dumti ang Daotan​—Bahin II—Excerpt (3:43)