21 SAMUEL
Ang Bata nga Maisogong Misulti sa Mensahe ni Jehova
SI Samuel parehas kang Samson ug sa anak nga babaye ni Jepte. Ang gihimo sa ilang mga ginikanan dako kaayog epekto sa ilang kinabuhi. Sama sa anak nga babaye ni Jepte, gigamit ni Samuel ang tibuok niyang kinabuhi sa sagradong pag-alagad kang Jehova. (1 Sam. 2:11) Sama kang Samson, si Samuel usa ka Nazareo sa tibuok niyang kinabuhi. (Maghu. 13:7) Ug sama nilang duha, si Samuel nagkinahanglag kaisog.
Dihang si Samuel nalutas na, gidala siya sa iyang inahan nga si Ana sa pag-alagad sa tabernakulo ni Jehova didto sa Shilo, sama sa gisaad ni Ana kang Jehova. Lagmit mga tres anyos si Samuel adtong panahona. Kada tuig, bisitahon ni Ana ang iyang anak ug dad-an siyag bag-ong sinina. Si Samuel nagdako sa tabernakulo uban sa edarang hataas nga saserdote nga si Eli. Tingali dihay mga babaye sa tabernakulo nga mitabang sa pag-atiman sa bata.
Pero nahugawan ang pagsimba didto sa tabernakulo, ug wala kaayoy gihimo si Eli bahin niini. Ang iyang duha ka anak nga lalaki, nga si Hopni ug Pinehas, mga daotan. Sila naghimog imoral nga mga buhat uban sa pipila ka babaye nga nag-alagad sa sagradong balay ni Jehova. Ug naa pa silay laing gibuhat nga nakapahugaw sa putling pagsimba. Dihang dad-on sa mga tawo ang ilang mga halad ngadto sa tabernakulo, sugoon ni Hopni ug Pinehas ang mga tig-alagad sa templo nga ilogon ang kinamaayohang mga bahin sa halad imbes nga ihatag kana kang Jehova. Nahibalo si Eli sa gipangbuhat sa iyang mga anak. Pero igo ra niya silang giestorya, ug wala sila mamati kaniya. Bisan sa grabeng pagkadaotan sa iyang palibot, si Samuel nagdako nga may pag-uyon sa Diyos ug sa mga tawo. Dihang miabot ang panahon nga kinahanglan nang tul-iron ni Jehova ang mga problema sa Shilo, iyang gipili ang batan-ong si Samuel sa pagsulti sa iyang mensahe.
Usa ka gabii, si Samuel nakamata kay nakadungog siyag tingog. Gitawag siya ni Jehova! Pero abi ni Samuel nga tingog to ni Eli, nga tigulang na ug dili na makakita, maong midagan siya ngadto sa hataas nga saserdote aron pangutan-on kon unsay iyang tuyo. Pero giingnan siya ni Eli nga matulog ug balik, kay wala niya tawga ang bata. Nahitabo ni sa duha pa ka beses. Sa ulahi, naamgohan ni Eli kon unsay nagakahitabo, maong iyang giingnan si Samuel nga mobalik ug higda. Giingnan ni Eli si Samuel nga kon tawgon siya pag-usab ni Jehova, mao ni ang iyang isulti: “Palihog sulti, Jehova, kay ang imong alagad namati.” Mao gyod nay gihimo ni Samuel.
Sa ikaupat nga higayon, si Jehova mitawag: “Samuel, Samuel!” Ang bata mitubag: “Palihog sulti, kay ang imong alagad namati.” Dayon si Jehova nakig-estorya kaniya. Siya miingon nga Iyang tul-iron ang mga problema sa Shilo ug silotan Niya si Eli kay wala niya badlonga ang iyang mga anak. Gihukman na ang iyang panimalay, apil ang iyang daotang mga anak. Kining tanan kinahanglang isulti ni Samuel kang Eli!
Si Samuel mibalik ug tulog, pero lagmit wala siya makatulog ug tarong. Pagkabuntag, mibangon siya aron ablihan ang mga pultahan paingon sa hawanan sa tabernakulo. Segurado nga “nahadlok si Samuel nga isulti kang Eli ang panan-awon nga iyang nakita.” Gitawag ni Eli ang bata ug gipangutana kon unsay gisulti sa Diyos kaniya. Namatikdan tingali niya nga nahadlok si Samuel, maong siya miingon: “Palihog, ayaw kana ililong kanako.”
Bisag bata pa si Samuel, kinahanglan niyang isulti ang mensahe ni Jehova sa paghukom ngadto sa hataas nga saserdote nga si Eli
Dili gyod to sayon para kang Samuel. Tingali gitahod ni Samuel si Eli sama sa iyang pagtahod sa iyang lolo. Pero ang segurado, gitahod niya si Eli kay siya ang hataas nga saserdote sa Israel! Bisan pa niana, si Samuel nagmaisogon ug gisulti niya kang Eli ang tanan. Nasabtan ni Eli nga hapit nang mahitabo ang katalagman. Iya na bang gitul-id ang iyang daotang mga anak? Walay pamatuod nga gihimo na ni Eli.
Dagayang gipanalanginan ni Jehova si Samuel tungod sa iyang gipakitang kaisog. Atong mabasa: “Si Jehova mismo nag-uban kaniya.” Siya nahimong propeta sa Diyos ug wala gayod tugoti ni Jehova “nga may bisan usa sa [mga pulong ni Samuel] nga dili matuman.” Sa ngadtongadto, ang tanang giingon ni Samuel bahin kang Eli ug sa iyang mga anak natuman. Sulod sa daghang katuigan human niana, gigamit ni Jehova si Samuel sa paggiya sa Israel. Sa taas nga panahon, si Samuel maunongong nag-alagad ingong propeta ug maghuhukom ni Jehova. Niadtong bata pa siya, nakakat-on siya sa pagpakitag kaisog sa tabang ni Jehova, ug siya padayong nagmaisogon ug matinumanong nag-alagad kang Jehova sa tibuok niyang kinabuhi.
Basaha ang asoy sa Bibliya:
Pakighisgot:
Sa unsang mga paagi nga si Samuel nagpakitag kaisog?
Tun-ig Dugang
1. Sa Shilo nahimutang ang tabernakulo ni Jehova. Unsang klaseha sa lugar ang Shilo? (w92 11/1 8-9) A
Todd Bolen/BiblePlaces.com
Hulagway A: Ang nahimutangan sa karaang Shilo
2. Unsay kinabuhi ni Samuel didto sa tabernakulo? (ia 61-62 ¶9-13) B
Hulagway B
3. Ang batang si Samuel “wala pa bug-os makaila kang Jehova.” Unsay ipasabot niini? (1 Sam. 3:7; w02 12/15 8 ¶5-6)
4. Sa unsang paagi natuman ang tagna bahin sa pamilya ni Eli? (it “Eli, I” ¶5-7)
Hunahunaa ang mga Leksiyon
Unsay makat-onan sa mga batan-on kang Samuel bahin sa kahinungdanon sa pagkahimong . . .
andam mosunod? (1 Sam. 3:5)
matinahoron? (1 Sam. 3:6-10)
kasaligan? (1 Sam. 3:15) C
Hulagway C
Kanus-a tingali kinahanglang maisogong mosulti ang usa ka batan-on, ug sa unsang paagi ang ehemplo ni Samuel makatabang kaniya?
Sa unsa pang mga paagi masundog nimo ang kaisog ni Samuel?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Samuel dihang banhawon na siya?
Pagkat-og Dugang
Kanus-a tingali nga ang mga batan-on ug mga hamtong nagkinahanglag kaisog nga mobarog sa kon unsay husto?
Bisag ang mga tawo sa iyang palibot wala magtahod sa Diyos, gihimo sa batang si Samuel kon unsay husto.
“Si Samuel Mipili sa Pag-alagad Kang Jehova” (ijwis artikulo 15)