Gikan sa Panahon sa mga Hari Hangtod sa Pagtukod Pag-usab sa Jerusalem

Ang mga asoy niini nga seksiyon nahitabo sulod sa mga 600 ka tuig. Naghisgot ni sugod kang Jonatan nga anak ni Haring Saul, ug dayon kang David, ang unang matinumanong hari sa Israel. Naghisgot sab ni sa ubang mga alagad ni Jehova hangtod sa panahon nga ang katawhan sa Diyos namalik gikan sa pagkabihag didto sa Babilonya ug ilang gitukod pag-usab ang Jerusalem. Madasig ta sa mga asoy bahin kang Abigail, Natan, Elias, Daniel, Ester, Nehemias, ug uban pa. Nagkinahanglan silag kaisog sa lainlaing kahimtang. Pananglitan, ang uban kanila nagmando sa rebelyosong katawhan ni Jehova, ang uban kinahanglang magmatinumanon bisag ang ilang magmamando dili matinumanon, ug ang uban kinahanglang magpasidaan sa katawhan sa Diyos nga nagsugod na sa pagsimbag bakak nga mga diyos ug sa paghimog daotan.