20 SAMSON
Siya Nagmaisogon sa Dihang Siya Luya
WALAY makita si Samson. Pero madungog niya ang pagbiaybiay ug pagyagayaga sa daghang Filistehanon. Nganong nahitabo man ni niya? Nasipyat siya kay iyang gisulti kon nganong kusgan kaayo siya. Dayon siya gidakop, gibutaan, gigapos, gipriso, ug gipugos sa pagtrabaho ingong ulipon. Karon, gikataw-an siya pag-ayo sa mga Filistehanon, ug seguradong gikataw-an pod nila ang iyang Diyos nga si Jehova. Nahibalo si Samson nga siya ra poy hinungdan niini. Daan na siyang nailhan ingong tawong maisogon. Pero niini nga situwasyon nga luya kaayo siya, kaya kaha niya nga magmaisogon pag-usab?
Sulod sa 20 ka tuig, si Samson nag-alagad ingong maghuhukom sa Israel. Pero lahi kaayo siya sa ubang maghuhukom. Ngano? Ang ubang maghuhukom, sama ni Barak, Gideon, ug Jepte, naay gipangunahan nga kasundalohan sa pagpakiggubat sa mga kaaway sa Diyos. Pero si Samson wala manginahanglag kasundalohan. Daghang higayon nga gigamit siya ni Jehova sa pagpatay sa daghang Filistehanon, bisag siya rang usa! Sa unsang paagi ni naposible?
Gisugo sa Diyos ang ginikanan ni Samson nga ihalad ang tibuok niyang kinabuhi aron mag-alagad ingong Nazareo. Busa wala gyod maputli ang buhok ni Samson. Basta tumanon lang niya ang iyang panaad sa pag-alagad, panalanginan siya ni Jehova ug talagsaong kusog. Diha pa gani higayon nga gipikas ni Samson ang usa ka leyon gamit lang ang iyang mga kamot! Gigamit ni Samson ang kusog nga gihatag sa Diyos kaniya sa pagpakig-away sa mga Filistehanon, kinsa nagdaogdaog sa mga Israelinhon nga mihunong na pod sa pag-alagad kang Jehova.
Dihay higayon nga nahadlok ang mga Israelinhon maong ilang gigapos si Samson ug gitugyan siya ngadto sa mga Filistehanon. Pero gibugto ni Samson ang mga pisi nga gigapos kaniya nga mora bag mga hilong lino ra kini ug dayon gipatay ang 1,000 ka Filistehanon gamit lang ang apapangig sa asno. Sa ulahi, dihang si Samson didto sa siyudad sa Gaza, giatangan siya sa iyang mga kaaway kay nagplano sila nga patyon siya pagkabuntag. Pero mibangon siya pagkatungang gabii, giibot ang dagko kaayong pultahan, ang mga poste sa isigkakilid, ug ang trangka sa ganghaan sa siyudad. Dayon iya ning gipas-an ug gidala padulong sa tumoy sa bukid duol sa Hebron nga mga 60 kilometros (37 ka milya) ang gilay-on!
Kadaghang gipamatud-an ni Samson nga way makalupig niya. Iyang gipakita sa mga Filistehanon nga ang ilang mga diyos, sama kang Dagon, dili gyod makapildi sa matinumanong alagad ni Jehova. Pero nakakitag paagi ang mga Filistehanon sa pagpildi kang Samson—ilang gigamit ang usa ka babaye nga ginganlag Delila.
Si Samson nahigugma kaniya, pero giluiban siya ni Delila, kinsa gibayran sa mga Filistehanon aron hibaloon kon nganong kusgan kaayo siya. Wala siya lung-i ni Delila hangtod nga gikapoy na si Samson maong gitug-an na lang niya ang iyang sekreto. Siya miingon nga kon putlan ang iyang buhok, mawad-an siyag kusog. Busa gihulat ni Delila nga makatulog si Samson. Dayon iyang gipaputol ang taas nga buhok ni Samson. Ang Bibliya nag-ingon: “Gibiyaan . . . siya ni Jehova.” Tungod ana, nawala ang kusog ni Samson. Gidakop dayon siya sa mga Filistehanon, gibutaan, ug gipriso.
Human adto, gihimo siyang tiggaling ug lugas sa mga Filistehanon. Kapoy kaayo to nga trabaho. Ang mga Filistehanon nalipay kaayo ug nanghambog nga ang ilang kusgan kaayo nga kaaway kaniadto ulipon na nila karon. Naghikay silag dakong pista aron pasidunggan si Dagon. Sa adlaw sa maong pista, linibo ang nagtigom sa sulod sa dakong templo ug mga 3,000 ang naa sa atop. Ang mga Filistehanon nakadesisyon nga himoong kalingawan si Samson maong ilang gipakuha siya ug gipatindog sa tunga sa duha ka dagkong haligi. Nianang panahona, naghinulsol na si Samson sa iyang sayop ug mitaas na pod ang iyang buhok.
Tungod sa mga sayop ni Samson, nawad-an siya sa iyang kagawasan, pero iyang gigamit ang iyang kusog sa kataposang higayon alang kang Jehova
Dihang nahikapan na niya ang mga haligi, iyang gihangyo si Jehova nga ibalik ang iyang kusog. Siya miampo: “Palihog hinumdomi ko, ug palihog himoa kong kusgan sa kataposang higayon, Oh Diyos ko,” dayon siya misinggit: “Tugoti kong mamatay uban sa mga Filistehanon!” Imadyina si Samson nga naggamit sa tibuok niyang kusog samtang iyang gitulod ang dagkong mga haligi hangtod nga anam-anam kining miirog. Wala na siya mapugngi sa mga Filistehanon kay ulahi na ang tanan. Natumpag ang mga haligi ug nahugno ang tibuok templo! Kadto ang kataposang higayon nga gigamit ni Samson ang iyang talagsaong kusog. Mas daghan siyag napatay nga mga kaaway sa Diyos panahon sa iyang kamatayon kay sa niadtong buhi pa siya.
Gatosan ka katuigan sa ulahi, giapil ni apostol Pablo si Samson dihang naghisgot siyag mga lalaki nga may dakong pagtuo. Nagsulat si Pablo bahin niadtong “nahimong gamhanan gikan sa luya nga kahimtang,” ug seguradong naa gyod sa iyang hunahuna ang maong maisogong maghuhukom.—Heb. 11:32-34.
Basaha ang asoy sa Bibliya:
Pakighisgot:
Sa unsang mga paagi nga si Samson nagpakitag kaisog?
Tun-ig Dugang
1. Sa unsang paagi si Samson nagpabiling usa ka Nazareo bisag nakahikap siyag mga patayng lawas? (w05 1/15 30 ¶1–31 ¶1)
2. Unsay nagpakita nga si Samson nagkinahanglan sa balaang espiritu sa Diyos sa pagpas-an sa mga pultahan ug mga poste sa isigkakilid niini gikan sa Gaza paingon sa Hebron? (w04 10/15 15 ¶7-8) A
Hulagway A
3. Unsay nagpakita nga si Delila lagmit usa ka Israelinhon? (w05 3/15 28 ¶2)
4. Nganong si Samson nag-ampo nga manimalos para lang sa “usa sa [iyang] mga mata”? (Maghu. 16:28; it “Samson” ¶10)
Hunahunaa ang mga Leksiyon
Kay napresyur si Samson, misulti siyag kompidensiyal nga impormasyon kang Delila. Unsay makat-onan sa mga ansiyano ug sa ilang mga asawa bahin niini? B
Hulagway B
Si Samson nakahimog seryosong sayop, pero sa ulahi gigamit siya ni Jehova sa talagsaong paagi. Kon ang usa ka Kristohanon makahimog sayop, sa unsang paagi ang ehemplo ni Samson makadasig niya nga magpadayon sa pag-alagad kang Jehova?
Unsaon nimo pagsundog ang kaisog ni Samson?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Samson dihang banhawon na siya?
Pagkat-og Dugang
Tudloi ang imong mga anak kon sa unsang paagi si Samson nahimong usa sa kinakusgang mga tawo nga nabuhi sukad.
“Si Samson Nakusgan Pinaagi sa Balaang Espiritu” (ijwis artikulo 14)
Unsa pay atong makat-onan sa estorya bahin kang Samson?