19 JEPTE UG IYANG ANAK NGA BABAYE
Gituman Nila ang Lisod nga Panaad
DILI maayo ang kahimtang sa Israel kay ang katawhan mihunong na sab sa pag-alagad kang Jehova. Tungod niana, gitugotan ni Jehova nga daogdaogon sila sa mga Ammonhanon sulod sa 18 ka tuig. (Maghu. 10:8) Sa ulahi, giangkon sa katawhan sa Diyos ang ilang sala, giwagtang ang ilang bakak nga mga diyos, ug mibalik sa pag-alagad kang Jehova. Pero wa madugay human niana, ang mga Ammonhanon miadto sa Gilead aron atakehon ang Israel.
Gihangyo sa mga ansiyano sa Gilead ang usa ka lalaki nga ginganlag Jepte nga maoy manguna nila sa gubat. Kaniadto, si Jepte gidaogdaog sa iyang mga igsoon sa amahan nga apil sa tinahod nga mga ansiyano sa Gilead maong mibiya siya nianang lugara. Nagdumot ba siya kanila tungod adto? Wala. Misugot si Jepte nga mobalik ug makig-away sa gubat. Pero gisulayan una niya nga makigdait sa mga Ammonhanon. Si Jepte nagpadalag mga mensahero aron ipatin-aw ngadto sa hari sa mga Ammonhanon kon nganong ang maong hari walay katungod sa yuta nga gusto niyang kuhaon gikan sa Israel. Gipakita ni Jepte nga daghan siyag kahibalo bahin sa pagpakiglabot ni Jehova sa Iyang katawhan ug sa palibot nga mga nasod. Pero ang hari sa mga Ammonhanon wala maminaw. Gusto gyod niyang makiggubat kanila!
Samtang nangandam si Jepte sa pagpakiggubat, ang espiritu ni Jehova milihok kaniya. Busa dili ta makaingon nga si Jepte mihimog dinalidali nga desisyon dihang nanaad siya kang Jehova: “Kon imong itugyan sa akong kamot ang mga Ammonhanon, ang unang mogawas sa akong balay aron sugaton ko inig-uli nako human ko makadaog sa mga Ammonhanon maimo, Oh Jehova, ug itanyag nako siya ingong halad nga sinunog.”
Nagpasabot ba to nga si Jepte literal nga magtanyag ug tawo ingong halad nga sinunog? Siyempre wala. Gidumtan ug gidili ni Jehova ang paghalad ug tawo. (Deut. 18:10, 12) Ang gipasabot ni Jepte nga ang unang tawo nga mogawas sa iyang balay magsakripisyo ug bug-os nga mag-alagad kang Jehova, lagmit didto sa tabernakulo sa Shilo. Nahibalo si Jepte nga basig lisod kaayong tumanon ang iyang panaad. Usa ra ang iyang anak, ang iyang pinanggang anak nga babaye. Posibleng siya ang unang mosugat kang Jepte inig-uli niya gikan sa gubat.
Pero nianang panahona, kinahanglan pang makiggubat si Jepte. Maisogon niyang gipangunahan ang iyang mga tawo sa pagpakiggubat. Ug gipanalanginan sila pag-ayo ni Jehova! Gipildi nila ang kaaway ug dayon ilang gilaglag ang 20 ka siyudad sa mga Ammonhanon ug “daghan kaayo [silag] napatay.”
Si Jepte miuli nga malipayon kaayo. Tingali naghunahuna siya nga maayo untag ang iyang sulugoon ang unang mogawas sa balay. Pero dili na mao ang nahitabo. Ang unang migawas mao ang iyang anak nga nagsayaw ug nagtugtog ug tamborin! Morag nahugno ang kalibotan ni Jepte ug gigisi niya ang iyang sinina ug miingon: “Anak ko! Naguol kaayo ko tungod nimo, kay ikaw man ang akong pahawaon.”
Si Jepte ug ang iyang anak nga babaye naay panaad nga angayng tumanon—pero nagkinahanglan kinig dakong sakripisyo
Nasabtan sa anak ni Jepte nga mausab gyod ang iyang kinabuhi tungod sa panaad sa iyang amahan. Isakripisyo niya ang iyang tibuok nga kinabuhi sa sagradong pag-alagad kang Jehova. Busa di gyod siya puwedeng magminyo o manganak. Para sa usa ka Israelinhong babaye, makapaguol kaayo na. Pero kining batan-ong babaye maisogong nagpasalig sa iyang amahan: “Kon nanaad ka kang Jehova, buhata kanako kon unsay imong gisaad.” Ang hangyo lang gyod niya nga tugotan una siyang makig-uban sa iyang mga amiga aron mohilak kay nawala na ang iyang kahigayonang maminyo o mahimong inahan.
Ang anak ni Jepte masakripisyohon ug maisogon nga babaye. Tungod niana, kada tuig ang batan-ong mga babaye sa Israel mobisita niya sulod sa upat ka adlaw aron hupayon ug komendahan siya! Ang iyang pag-alagad sa sagradong tabernakulo seguradong naay mga panalangin. Tingali anang panahona, ang bata nga si Samuel nagpuyo didto. Nakatabang kaha ang anak ni Jepte sa pagbansay ug pagdasig kaniya samtang nagdako siya? Wala ta mahibalo. Kon mao nay nahitabo, posibleng nalipay kaayo siya kay wala man siyay kaugalingong anak. Pero nahibalo ta nga naay problema bahin sa imoralidad diha sa tabernakulo niadtong panahona. (1 Sam. 2:22) Apil kaha ang anak ni Jepte sa maong imoral nga mga binuhatan? Dili. Ang Bibliya nag-ingon: “Wala gyod siya makigdulog ug lalaki.”
Si Jepte apil sa gihisgotan ni apostol Pablo nga mga lalaki ug babaye nga may dakong pagtuo. (Heb. 11:32) Si Jepte ug ang iyang anak maayo kaayong mga ehemplo sa kaisog. Nakiggubat siya para sa katawhan sa Diyos ug gisuportahan siya pag-ayo sa iyang anak. Gituman nilang duha ang usa ka lisod nga panaad kang Jehova!
Basaha ang asoy sa Bibliya:
Pakighisgot:
Sa unsang mga paagi nga si Jepte ug ang iyang anak nga babaye nagpakitag kaisog?
Tun-ig Dugang
1. Unsay nagpakita nga ang mga Ammonhanon nakiggubat sa mga Israelinhon aron sakopon sila ug babagan sab ang matuod nga pagsimba? (it “Jepte” ¶6) A
Hulagway A: “Giwagtang nila ang mga diyos sa mga nasod nga ilang gisimba ug nag-alagad sila kang Jehova.”—Maghu. 10:16
2. Sa unsang paagi si Jepte susama kang Jacob dihang nanaad siya kang Jehova? (it “Jepte” ¶11)
3. Nganong dakong sakripisyo para kang Jepte ang pagtuman sa iyang panaad? (w17.04 4 ¶6)
4. Si propetang Samuel natawo niadtong mga 1180 B.C.E. Unsay nagpakita nga siya ug ang anak ni Jepte posibleng nag-alagad sa tabernakulo sa samang panahon? (it “Jepte” ¶2; tan-awa ang timeline nga “Gikan sa Panahon sa mga Patriarka Hangtod sa mga Maghuhukom.”)
Hunahunaa ang mga Leksiyon
Dihang ang mga ginikanan magpakitag kaisog sama kang Jepte, unsay epekto niini sa ilang mga anak?
Unsaon pagsundog sa mga Kristohanon ang batan-ong mga babaye nga naghatag ug komendasyon sa anak ni Jepte ug nagtabang niya nga magpabiling maisogon? B
Hulagway B
Unsaon nimo pagsundog ang kaisog ni Jepte ug sa iyang anak?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Jepte ug sa iyang anak dihang banhawon na sila?
Pagkat-og Dugang
Sa unsang paagi ang ehemplo sa anak ni Jepte makatabang sa tagsaanong mga Kristohanon?
Susiha kon sa unsang paagi ang ehemplo ni Jepte ug sa iyang anak makatabang nato sa pagpabiling matinumanon kang Jehova.