18 GIDEON
Maisogon ug Mabinantayon
ANG tawong maisogon kinahanglan sab nga magmabinantayon. Kon mabinantayon siya, dili siya sobrang mosalig sa iyang kaugalingon o mohimog bisan unsa nga makapameligro na hinuon sa iyang kinabuhi. Ingon ana si Gideon. Maisogon siya ug mabinantayon. Nagkinabuhi siya sa panahon nga ang Israel wala na pod magmatinumanon kang Jehova. Busa gitugotan ni Jehova nga sulongon ug daogdaogon sa mga Midianhon ang iyang katawhan, ug tungod ana mahadlok na silang motrabaho sa ilang uma. Bisan pa ana, wala mahadlok si Gideon. Gani, naggiok siyag trigo aron matagan-ag pagkaon ang uban. Pero mabinantayon sab siya. Maggiok siya didto sa pug-anag bino, nga posibleng gikubkob diha sa dakong bato, aron dili siya makita sa mga Midianhon.
Ang mga Israelinhon naghinulsol ug nangayog tabang kang Jehova. Busa nagpadala siyag propeta aron pahinumdoman sila kon nganong wala na niya sila panalipdi. Dayon si Jehova nagpadalag anghel aron pahibaloon si Gideon nga siya ang gipili sa pagluwas sa Iyang katawhan. Si Gideon nangayog ilhanan. Busa ang anghel mihimog milagro. Gipasilaob niya ang kalayo gikan sa bato ug nasunog ang halad ni Gideon. Human niini, nawalag kalit ang anghel. Niadtong gabhiona, gisugo ni Jehova si Gideon nga tumpagon ang halaran ni Baal nga gipanag-iya sa iyang amahan ug putlon ang sagradong poste, ug dayon gisugo sab siya nga maghimog halaran para kang Jehova ug maghalad Kaniya. Mituman si Gideon, pero kay nahadlok siya sa iyang amahan ug sa mga tawo sa siyudad, gabii niya ni gihimo aron walay makakita niya.
Ang gihimo ni Gideon nagpakita sa iyang kaisog. Human adto, ang mga Midianhon, Amalekanhon, ug taga-Sidlakan nagpormag dakong puwersa sa kasundalohan. Giatake nila ang Israel, ug sama silag hugpa sa mga dulon nga milukop sa Walog sa Jezreel. Gipalihok sa espiritu ni Jehova si Gideon sa pagpadalag mga mensahero ngadto sa ubang mga tribo sa Israel aron awhagon sila nga moduyog kaniya sa pagpakiggubat. Dayon, gipakita na sab ni Gideon ang iyang pagkamabinantayon. Gihangyo niya si Jehova nga pakitaan siyag duha ka milagro ingong ilhanan sa Iyang pagpaluyo kaniya. Si Jehova nagpakitag pailob ug iyang gihimo ang gihangyo ni Gideon. Niadtong gabhiona, dihang si Gideon nagbutang ug balhibo sa karnero sa giokanan, gipaposible ni Jehova nga mahumod kini sa yamog bisag uga ang yuta sa palibot niini. Pagkasunod gabii, gipahinabo ni Jehova nga uga ang balhibo bisan pag ang yuta sa palibot niini nabasag yamog.
Sila Gideon diyutay ra kaayo kon itandi sa kaaway, pero gipamenosan gihapon ni Jehova ang ilang gidaghanon
Ang maong mga milagro nakapalig-on kang Gideon maong naa siyay kaisog nga makiggubat sa mga 135,000 ka kaaway bisag 32,000 lang ang iyang mga sundalo. Samtang ang mga Israelinhon nagkampo sa Tubod sa Harod, giingnan ni Jehova si Gideon nga ang iyang mga sundalo daghan ra kaayo! Busa gisugo ni Jehova si Gideon nga papaulion kadtong tanang sundalo nga nangahadlok. Ug tungod ana, 10,000 na lang ang nabilin. Pero miingon si Jehova nga daghan ra gihapon kaayo ang mga sundalo. Giingnan ni Jehova si Gideon nga panid-an ang iyang mga sundalo samtang moinom silag tubig. Kadtong miinom nga nagluhod ug nagduko gipapauli. Pero ang uban nagmabinantayon. Sila mihakop ug tubig ug miinom gamit ang ilang kamot aron makita gihapon nila ang nagakahitabo sa palibot. Kining alerto nga mga sundalo mao ang gipili sa pagpakiggubat. Karon, 300 na lang ang mga sundalo ni Gideon!
Bisag diyutay ra ang iyang mga sundalo, si Gideon nagmaisogon ug nangandam sa pag-atake. Dayon gipasaligan siya pag-usab ni Jehova. Iyang giingnan si Gideon nga mohinok ug adto sa kampo sa kaaway panahon sa gabii. Gihimo na ni Gideon. Nadunggan niya ang usa ka sundalo nga nag-asoy ug damgo nga nagpakita nga modaog ang Israel sa gubat. Tungod sa maong pasalig ni Jehova, napalig-on si Gideon. Mibalik siya sa iyang mga tawo ug giingnan sila sa ilang estratehiya aron modaog sa gubat. Siya miingon: “Tan-awa ko ug sundoga pag-ayo ang akong himoon.” Gabii na kaayo dihang gipalibotan nila ang kampo sa kaaway dala ang mga banga, sulo, ug budyong. Paghatag ni Gideon sa ilhanan, ilang gipatingog ang mga budyong ug gipamuak ang mga banga, dayon naninggit sila: “Ang espada ni Jehova ug ni Gideon!” Tungod sa kalit nga kabanha ug kahayag, ang mga kaaway nagtuo nga gipalibotan ug giatake silag dakong kasundalohan. Nangalisang sila ug nagkaguliyang! Gipahinabo ni Jehova nga magpinatyanay sila. Mga 15,000 lang ang nabuhi ug nakaikyas.
Gigukod sila ni Gideon. Napildi niya ang mga Midianhon ug gipatay ang ilang mga pangulo. Gisilotan sab niya kadtong mga wala modapig ug wala motabang kaniya ug sa iyang mga tawo sa pagpildi sa mga kaaway ni Jehova. Dayon gusto sa mga tawo nga himoong hari si Gideon. Mapainubsanon siyang mibalibad ug miingon: “Si Jehova ang magmando ninyo.” Gipanalanginan gyod ni Jehova ang maong maisogon ug mabinantayong tawo. Sa panahon nga si Gideon ang maghuhukom sa Israel, ang nasod nakasinatig kalinaw ug gipanalanginan siyag taas nga kinabuhi. Apil pa gani siya sa gihisgotan ni apostol Pablo nga mga lalaki ug babaye nga may dakong pagtuo.—Heb. 11:32.
Basaha ang asoy sa Bibliya:
Pakighisgot:
Sa unsang mga paagi nga si Gideon nagpakitag kaisog?
Tun-ig Dugang
1. Nganong ang “lingin nga tinapay nga sebada” sa damgo sa sundalo haom nga nagsimbolo sa kasundalohan ni Gideon? (Maghu. 7:13; it “Sebada” ¶7)
2. Nganong ang tingog sa 300 ka budyong nakapalibog ug nakapalisang sa mga Midianhon? (it “Sungay, Budyong” ¶3) A
Hulagway A: Ang sungay sa laking karnero gigamit ingong budyong sa paghatag ug ilhanan o pasidaan
3. Unsay kinahanglang himoon ni Gideon ug sa iyang kasundalohan aron mapildi ang mga Midianhon? (w04 10/15 16 ¶9-10) B
Hulagway B: Gigukod ni Gideon ug mga 80 kilometros (50 ka milya) ang mga Midianhon hangtod sa Jogbeha (wala mahibaloi ang eksaktong ruta)
4. Unsa nga mga detalye ang nagpamatuod nga tukma kini nga asoy sa Bibliya? (w05 4/15 32)
Hunahunaa ang mga Leksiyon
Gipangunahan ni Gideon ang katawhan sa Diyos ug sila nagmadaogon. Pero nagpabilin siyang mapainubsanon ug nakig-estorya nga makigdaiton sa uban. (Maghu. 8:1-3) Unsaon pagsundog sa mga ulo sa pamilya ug sa mga ansiyano si Gideon dihang dunay masilo o malain nila?
Sa unsang mga kahimtang kinahanglan tingali natong magmaisogon ug magmabinantayon? C
Hulagway C
Unsaon nimo pagsundog ang kaisog ni Gideon?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Gideon dihang banhawon na siya?
Pagkat-og Dugang
Dihang makadawat kag pribilehiyo sa pag-alagad, unsaon nimo pagsundog si Gideon?
“Ang Kaalam Anaa sa mga Makasaranganon” (w00 8/1 16-18 ¶11-15)
Gamita kining gidrowing nga estorya sa Bibliya sa pagtabang sa imong mga anak nga mosalig sa Diyos.