17 JAEL
“Labing Bulahan sa mga Babaye”
SI Sisera miikyas ug giabandonar niya ang iyang mga tawo sa kapatagan sa Jezreel. Iya silang gipasagdang mangamatay didto nga walay nangulo nila. Seguradong dili siya makatuo nga ang iyang dakong kasundalohan nga may 900 ka makahahadlok nga karo napildi sa Israelinhong mga sundalo nga simple rag hinagiban ug wala pa gyoy karo. Karon, si Sisera nangitag katagoan. Midagan siya paingon sa tolda ni Heber nga Kenihanon.
Ang mga Kenihanon kaalyado sa Israel. Maayo ang ilang relasyon sukad pa sa panahon ni Moises, nga Kenihanon ug asawa. Karon, kini nga katawhan nagpuyo sa Israel. Pero si Heber lahi sa ubang Kenihanon. Imbes nga makig-alyansa sa Israel, nakig-alyansa siya kang Jabin nga hari sa Canaan. Busa ang heneral ni Jabin nga si Sisera nagtuo nga luwas siyang makatago sa mga tolda ni Heber. Tingali wala maghunahuna si Sisera nga ang asawa ni Heber nga si Jael lahig gidapigan.
Si Jael tua didto sa iyang tolda pero wala ang iyang bana. Dihang nakita niya si Sisera, kinahanglan siyang modesisyon dayon kon unsa ang iyang buhaton. Nahibalo siya kon kinsa si Sisera ug kon unsa kini ka mangtas. Tingali wala siya mahibalo nga ang propeta ni Jehova nga si Debora miingon nga si Sisera patyon sa usa ka babaye, dili sa usa ka lalaki. Pero posible nga nahibalo si Jael kon unsay gusto ni Jehova nga iyang buhaton. Nganong nakaingon ta ana?
Sa ulahi, gigiyahan ni Jehova si Debora sa pagkomposog awit bahin sa kadaogan ni Barak batok kang Sisera. Si Debora miawit: “Si Jael ang labing bulahan sa mga babaye ang asawa ni Heber nga Kenihanon; siya ang labing bulahan sa mga babaye nga nagpuyo sa tolda.” Ang ubang kritiko nag-ingon nga si Jael bakakon ug daotan, pero dili na tinuod. Siya maisogong nakig-away sa gubat ni Jehova. Sama kang Rahab, gipili niyang modapig kang Jehova, dili sa Iyang mga kaaway. Nahibalo siya nga si Sisera kaaway ni Jehova ug nga gusto ni Jehova nga mamatay si Sisera. Pero unsaon niya na paghimo?
Siyempre, nahibalo pag-ayo si Jael nga wala siyay dag-anan kon makig-away siya kang Sisera. Si Sisera kusgan ug eksperyensiyadong manggugubat. Busa gipasulod siya ni Jael sa tolda aron makapahulay. Iya siyang gihabolan. Dihang siya nangayog tubig kang Jael, iya siyang gihatagag gatas. Giingnan ni Sisera si Jael nga motindog sa entrada sa tolda ug molimod enkasog naay mangutana kon naa bay lalaki sa sulod sa tolda. Dayon siya nahinanok sa pagkatulog.
Gigamit sa Diyos ang usa ka babaye sa pagpatay sa usa ka mangtas nga manggugubat
Nahibalo si Jael nga kahigayonan na to nga patyon si Sisera. Nagkuha siyag mga himan nga lagmit kanunay niyang gamiton—bug-at nga maso ug ugsok nga pangtolda nga posibleng gama sa kahoy. Siya mihinayhinayg duol sa natulog nga manggugubat. Miluhod siya duol sa ulo ni Sisera ug mihunat siya sa pagpatay kaniya. Usa ka gamayng sipyat lang ni Jael adtong tungora, seguradong makaagom siyag ngilngig nga kamatayon. Pero wala gyod masipyat si Jael. Gidukdok dayon niya ang ugsok sa tampihak ni Sisera ug kini namatay.
Unya miabot si Maghuhukom Barak nga nangita kang Sisera. Si Jael misugat niya. Siya miingon, “Dali, akong ipakita nimo ang tawo nga imong gipangita.” Misulod si Barak sa tolda, ug iyang nakita nga natuman ang gitagna ni Debora: “Babaye ang gamiton ni Jehova sa pagpildi kang Sisera.”
Sa ilang awit sa kadaogan, gidayeg ni Barak ug Debora si Jael. Human adto, wala na hisgoti pag-usab si Jael sa Bibliya. Pero kapig 3,200 ka tuig sa ulahi, makakat-on gihapon ta sa iyang maayo kaayong ehemplo. Karon, ang mga alagad sa Diyos dili makig-away gamit ang literal nga mga hinagiban o himan. Pero nakigbahin ta sa espirituwal nga pagpakiggubat. Ug karon, mas gikinahanglan nato ang kaisog nga sama nianang kang Jael.
Basaha ang asoy sa Bibliya:
Pakighisgot:
Sa unsang mga paagi nga si Jael nagpakitag kaisog?
Tun-ig Dugang
1. Sa unsang paagi managsama ang gubat batok kang Sisera ug ang gubat sa Armagedon? (w19.09 8-9 ¶3-6)
2. Ang bana ni Jael nga si Heber nakig-alyansa sa mga Canaanhon nga mga kaaway sa Israel. Pero unsay koneksiyon ni Heber sa mga Israelinhon? (it “Heber” Num. 2)
3. Sa unsang paagi ang kadaogan sa Israel batok kang Sisera ug Jabin nakapalig-on sa pagtuo sa katawhan sa Diyos daghang katuigan sa ulahi? (w08 10/15 14-15 ¶12-15)
4. Unsay atong makat-onan sa pagdayeg ni Debora kang Jael? (w15 8/1 15 ¶2) A
Hulagway A
Hulagway A
Hunahunaa ang mga Leksiyon
Kon ang bana sa usa ka sister dili magsisimba ni Jehova, kanus-a tingali nga ang sister kinahanglang magmaisogon sama kang Jael?
Si Jael dili propeta sama kang Debora ug dili sab siya sundalo sama kang Barak. Pero gihimo niya ang iyang maarangan. Kon duna tay mga limitasyon, sa unsang paagi nato masundog ang iyang tinamdan? B
Hulagway B
Sa unsa pang mga paagi masundog nimo ang kaisog ni Jael?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Jael dihang banhawon na siya?
Pagkat-og Dugang
Niini nga video, tan-awa kon sa unsang paagi ang ehemplo ni Jael nakapalihok sa usa ka batan-ong sister nga mosangyaw.
Sundoga ang Maisogon, Ayaw ang Talawan!—Sundoga si Jael, Ayaw ang mga Tawo sa Meroz (1:40)
Si Jael maoy usa lang sa daghang babaye nga may mga eksperyensiya nga makatudlo natog importanteng mga leksiyon. Basaha ang bahin sa pipila kanila.
“Mga Babaye Diha sa Bibliya—Unsay Atong Makat-onan Kanila?” (ijwbq artikulo 161)