16 BARAK UG DEBORA
“Mouban Ko Nimo”
LISOD kaayo ug peligroso ang kahimtang sa Israel. Ang mga tawo mirebelde kang Jehova. Sama sa gipasidaan na ni Jehova, gitugotan niya nga atakehon ug daogdaogon sila sa ilang mga kaaway. Iyang gitugyan sila kang Jabin nga hari sa Canaan. Ang pangulo sa kasundalohan ni Jabin nga si Sisera bayolente kaayo. Daghan kaayo siyag sundalo ug naa silay 900 ka karong panggubat.
Sulod sa 20 ka tuig, ang kasundalohan ni Sisera nagpahinabog kalisang sa mga Israelinhon. Dihang atakehon nila ang usa ka lungsod o siyudad, morag nabatasan nila nga himoong binihag ang batan-ong mga babaye ug lugoson sila. Makahahadlok kaayo ni, maong ang mga dalan ug kabaryohan nahimong awaaw. Ang kadaghanang Israelinhon walay hinagiban, maong dili intawon nila mapanalipdan ang ilang kaugalingon.
Nianang panahona, dihay maisogong babaye nga ginganlag Debora nga nag-alagad ingong propeta ni Jehova. Nagpahayag sab siyag mga paghukom bahin sa lisod nga mga kaso nga dad-on sa katawhan kaniya. Gigamit siya ni Jehova sa paghatag ug instruksiyon sa tawo nga ginganlag Barak, kinsa Iyang gipili ingong maghuhukom ug manluluwas sa Iyang katawhan. Imadyina ang reaksiyon ni Barak dihang gisultihan siya ni Debora sa instruksiyon ni Jehova nga magtigom ug 10,000 ka lalaki ug dad-on sila sa Bukid sa Tabor. Si Jehova nagsaad nga mapildi niya si Sisera ug ang iyang kasundalohan!
Nainsulto ba si Barak nga ang naghatag niyag instruksiyon usa ka babaye? Wala. Miingon pa gani siya nga moadto lang siya sa Bukid sa Tabor kon mouban niya si Debora. Wala ni magpasabot nga si Barak kulang ug pagtuo. Gani, apil siya sa mga tawo nga gihisgotan ni apostol Pablo nga may dakong pagtuo. (Heb. 11:1, 2, 32) Gipakita ni Barak ang iyang pagtuo pinaagi sa paghangyo kang Debora nga mouban kaniya ug sa iyang mga tawo. Nahibalo siya nga gigamit ni Jehova si Debora maong gusto niya nga mouban si Debora aron makadawat siyag dugang nga instruksiyon gikan kang Jehova. Si Debora nagmaisogon ug miingon: “Mouban ko nimo.” Miingon sab siya nga modaog si Barak sa gubat, pero dili si Barak o si bisan kinsang lalaki ang mopatay kang Sisera. Babaye ang gamiton sa Diyos sa paghimo niana.
Si Barak milihok dayon. Gipahibalo niya ang katawhan ug nagtigom siyag 10,000 ka maisogong lalaki, ug gihimo niya ang iyang maarangan aron maandam sila sa gubat. Gidala niya ang iyang mga tawo ibabaw sa Bukid sa Tabor. Kanang dako nga bukid, nga patag sa ibabaw, may gihabogon nga mga 562 metros (1,844 piye), ug sa ubos niini makita ang lapad nga kapatagan sa Jezreel. Gikan didto, makita ni Debora, Barak, ug sa iyang mga tawo si Sisera ug ang iyang kasundalohan nga may daghang karo nga nagpadulong.
Unsa kahay himoon ni Barak? Para sa kadaghanang pangulo sa kasundalohan, mas maayo tingali nga maghulat hangtod nga si Sisera ug ang iyang mga karo duol na sa Bukid sa Tabor. Kay kon patungas ang mga karo, mas mohinay ang dagan niini, ug mas makabentaha ang mga tawo ni Barak. Pero nahibalo si Barak nga ang gubat dili iyaha kondili kang Jehova, busa naminaw siya kang Debora. Pinaagi kang Debora, giingnan ni Jehova si Barak sa pag-atake. Si Barak ug ang iyang mga tawo maisogong milugsong ug midasdas paingon sa patag aron atakehon ang maong makahahadlok nga mga karo!
Usa ka maghuhukom ug usa ka propeta ang kinahanglang moatubang sa bayolenteng heneral ug sa iyang kasundalohan nga may mga karong panggubat
Sa panglantaw sa tawo, wala gyod silay dag-anan. Pero nakita ni Jehova ang ilang kaisog, ug iya silang gipanalanginan. Iyang gipahinabo nga magkaguliyang ang mga sundalo sa Canaan. Mibunok ang ulan. Wala madugay, ang Walog sa Jezreel mora nag kalamakan, ug kadtong makahahadlok nga mga karo naungot sa kalapokan. Ang mga sundalo ni Sisera napugos nga makigkombate nga manomano sa mga Israelinhon kay dili na man mapuslan ang ilang mga karo. Ang tanang sundalo ni Sisera namatay. Unya unsa man poy nahitabo kang Sisera?
Nakaikyas si Sisera nga nagkalisod ug dagan sa kalapokan paingon sa habog nga lugar. Nagtuo tingali siya nga nakaikyas na siya samtang way puangod niyang gipasagdan ang iyang mga tawo nga mamatay. Pero gigukod siya ni Barak. Kining tanan nakita ni Jehova, ug nakadesisyon na siya kon unsay iyang himoon kang Sisera.
Basaha ang asoy sa Bibliya:
Pakighisgot:
Sa unsang mga paagi nga si Barak ug Debora nagpakitag kaisog?
Tun-ig Dugang
1. Unsay kinabuhi sa mga Israelinhon samtang gidaogdaog sila ni Sisera? (w15 8/1 13 ¶1)
2. Nganong si Debora sagad wala isipa nga apil sa 12 ka maghuhukom nga nag-alagad sa Israel una pa nahimong propeta si Samuel? (w86 6/1 31 ¶6-8)
3. Nganong si Debora gitawag nga “inahan sa Israel”? (Maghu. 4:4, 5; 5:7; w15 8/1 13 ¶2) A
Hulagway A
Hulagway A
4. Unsay gipasabot ni Debora ug Barak dihang miawit sila nga “ang mga bituon nakiggubat” kang Sisera? (Maghu. 5:20; w05 1/15 25 ¶5)
Hunahunaa ang mga Leksiyon
Mapainubsanong gidawat ni Barak ang tabang sa usa ka matinumanong babaye. Sa unsang mga kahimtang nga masundog ni sa usa ka brader? B
Hulagway B
Nganong nagkinahanglag kaisog si Debora sa pag-uban kang Barak? Sa unsang mga kahimtang gikinahanglan nato ang susamang kaisog?
Sa unsa pang mga paagi masundog nimo ang kaisog ni Barak ug Debora?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Barak ug Debora dihang banhawon na sila?
Pagkat-og Dugang
Sayra kon sa unsang paagi kini nga asoy nagpasalig nato nga gipabilhan ni Jehova ang atong mga paningkamot.
“Hinaot ang Imong Pagboluntaryo Maghatag ug Pagdayeg Kang Jehova!” (w17.04 28-32)
Unsay atong makat-onan kang Barak ug Debora bahin sa pagsalig, pagkamakasaranganon, ug pagkamasinugtanon?
“Tungod sa Pagtuo, Giparot ni Barak ang Usa ka Gamhanang Panon sa Kasundalohan” (w03 11/15 28-31)