Sila Nagtinabangay Panahon sa Kalisdanan

SI Noemi nakaeksperyensiyag sunodsunod nga mga trahedya sa iyang kinabuhi. Siya, ang iyang bana, ug ang ilang duha ka anak nga lalaki, nagpuyo sa Betlehem. Pero dihang nahitabo ang gutom sa Israel, ang iyang bana midesisyon nga mamalhin sila sa yuta sa Moab. Usa ka adlaw niana, namatay ang bana ni Noemi maong siya ug ang iyang duha ka anak na lang ang nabilin sa Moab. Sa ulahi, ang iyang mga anak nagminyog mga Moabihanon nga wala magsimba kang Jehova. Mga 10 ka tuig sa ulahi, dihay makapasubo nga nahitabo: Namatay ang iyang duha ka anak ug walay usa kanila ang nakabatog mga anak. Busa gawas nga namatyan si Noemi ug bana, nawad-an pod siyag mga anak ug wala na siyay paglaom nga makabatog mga apo.

Gibati ni Noemi nga wala na siyay rason nga magpabilin sa Moab maong midesisyon siya nga mouli sa Betlehem, nga ang panaw dangtan tingalig mga usa ka semana. Mikuyog ni Noemi ang iyang duha ka binalaye nga si Ruth ug Orpa. Pero dili makaako si Noemi nga tungod niya biyaan nila ang ilang nasod ug mga paryente, ug basig dili na unya sila maminyo pag-usab ug makabatog mga anak. Tungod niana, andam siyang mosakripisyo, ug iyang gikombinsir si Ruth ug Orpa nga mouli sa ilang tagsatagsa ka inahan. Maisogon si Noemi kay andam siyang molakaw nga mag-inusara. Si Orpa mihilak, pero miuli siya sa ila. Si Ruth mihilak sab, pero miunong siya kang Noemi.

Si Ruth miingon kang Noemi: “Palihog ayaw kog hangyoa nga biyaan ka . . . Kon asa ka moadto, moadto usab ko, ug kon asa ka magpalabayg gabii, didto ko magpalabayg gabii. Ang imong katawhan mahimong akong katawhan, ug ang imong Diyos akong Diyos. Kon asa ka mamatay didto ko mamatay, ug didto ko ilubong.” Kining maunongon ug maisogong batan-ong babaye nakadesisyon nga si Jehova na ang iyang simbahon, ang Diyos nga gisimba ni Noemi.

Busa gibiyaan ni Ruth ang iyang pamilya, kultura, ug Moabihanong mga diyos, ug miuban siya kang Noemi paingon sa Israel. Pag-abot ni Ruth ug Noemi sa Betlehem, dihay mga babaye nga nakurat pagkakita nila nga nausab na pag-ayo si Noemi paglabay sa daghang katuigan. Iyang giingnan sila nga gitugot ni Jehova nga mahimong pait kaayo ug makaluluoy ang iyang kinabuhi. Posibleng nasakitan si Ruth sa giingon ni Noemi. Dako siyag gisakripisyo para sa iyang ugangan, pero morag wala kini mapabilhi. Bisan pa niana, walay mabasa sa Bibliya nga nasuko o mireklamo si Ruth. Hinuon, kini nag-ingon nga nanghagdaw si Ruth sa duol nga mga uma aron matagan-an ang panginahanglan nila ni Noemi.

Ang dato nga tag-iyag uma, si Boaz nga anak ni Rahab, nakamatikod kang Ruth nga kugihan kaayo samtang nanghagdaw sa kaumahan. Kining matinumanong alagad ni Jehova nangutana bahin kang Ruth. Nasayran niya ang pagsakripisyo ni Ruth aron tabangan si Noemi. Gidayeg niya si Ruth kay midangop siya kang Jehova ug misalig sa Iyang pag-atiman. Iya pa ganing giseguro nga si Ruth dili samokon sa sulugoong mga lalaki.

Pagkagabii, nalipay si Noemi dihang iyang nahibaloan ang kaayo nga gipakita ni Boaz kang Ruth. Minyoan kaha ni Boaz si Ruth? Paryente siya sa bana ni Noemi nga si Elimelek, ug ang balaod sa Diyos naay espesyal nga kahikayan para sa batan-ong mga biyuda sama ni Ruth. Kon ang babaye mabiyuda, naa siyay katungod nga magminyo sa duol nga paryente sa iyang namatay nga bana. Kon makabatog anak si Boaz ug Ruth, ang ilang anak isipon nga kaliwat ni Elimelek. Pinaagi niana, duna pa gihapoy mga kaliwat si Elimelek ug Noemi, ug ang panulondon ni Elimelek magpabilin sa pamilya. (Deut. 25:5, 6) Gisulti ni Noemi kang Ruth kon unsay angay niyang buhaton.

Misugot si Ruth nga buhaton ang giingon ni Noemi bisan pag ang kostumbre lahi tingali sa iyang naandan ug dili sayon himoon. Pagkagabii, miadto siya sa giokanan diin ang mga lalaki sagad matulog kilid sa tinapok nga sebada nga ilang inani. Mihinayhinay siyag duol, giwalis ang tabon sa tiil ni Boaz, dayon mihigda. Dihang nakamata si Boaz, si Ruth mapainubsanong nagpahinumdom kaniya sa balaod sa Diyos. Iyang gipangutana si Boaz kon andam ba siyang molukat kaniya. Posibleng namatikdan sa buotang si Boaz nga gikulbaan si Ruth. Nakadayeg pag-ayo si Boaz sa kaisog ug maunongong gugma ni Ruth kang Jehova ug kang Noemi, busa siya miingon nga andam siyang makigminyo kang Ruth. Pero iya usang susihon kon posible ba kini.

Pagkaugma, miadto si Boaz sa ganghaan sa siyudad sa Betlehem aron makig-estorya sa mga ansiyano ug gihimo niya ang tanan sumala sa balaod sa Diyos. Iyang giminyoan si Ruth. Sa ulahi, nakabaton silag anak nga lalaki. Pinangga kaayo ni Noemi ang iyang apo nga si Obed. Ang maong bata nahimong katigulangan ni Haring David, ug siya pod ang nahimong katigulangan sa Mesiyas kapig 1,000 ka tuig sa ulahi! (Mat. 1:5, 6, 16) Gipanalanginan pag-ayo ni Jehova ang kaisog ni Noemi ug Ruth!

Basaha ang asoy sa Bibliya:

• Ruth 1:1–4:22

Pakighisgot:

Sa unsang mga paagi nga si Noemi ug Ruth nagpakitag kaisog?

1. 2. Nganong makaingon ta nga walay imoral nga motibo si Ruth dihang miduol siya kang Boaz? (ia 47 ¶17-18)

   Imong tubag

2. 3. Gitawag ni Boaz si Ruth ug “anak.” Unsay atong makat-onan niini bahin kang Boaz? (Ruth 2:8; w16.11 3 ¶4-6)

   Imong tubag

3. 4. Si Boaz lahi kaayo sa iyang paryente. Miuyon siya nga minyoan si Ruth. Nganong ang gihimo ni Boaz nagpakita nga dili siya hakog? (w23.03 14) B

   Imong tubag

   

Hunahunaa ang mga Leksiyon

• Sa unsang paagi ang ehemplo ni Ruth sa pagkakugihan ug pagkamapasalamaton makatabang nato dihang maglisod ta sa pinansiyal? C

  Imong tubag

  

• Dihang grabe ang kaguol ni Noemi, gitabangan siya ni Ruth. Unsay atong makat-onan kang Noemi bahin sa mapainubsanong pagdawat sa tabang sa uban? Unsay atong makat-onan kang Ruth bahin sa paghatag ug pagdasig sa uban?

  Imong tubag

• Sa unsa pang mga paagi masundog nimo ang kaisog ni Noemi ug Ruth?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Unsay akong ipangutana kang Noemi ug Ruth dihang banhawon na sila?

  Imong tubag

Pagkat-og Dugang

Unsang mga leksiyon bahin sa maunongong gugma ang atong makat-onan sa basahon sa Ruth, ug unsaon nato ni pagpadapat?

“Padayong Ipakita ang Maunongong Gugma sa Usag Usa” (w21.11 8-13)

Gamita kining gidrowing nga estorya sa Bibliya aron ma-imagine sa imong pamilya kini nga asoy.

“Si Ruth Maunongon nga Higala” (ijwis artikulo 12)