6 REBECA
Siya Maisogong Mibalhin sa Layo Kaayong Lugar
SI Rebeca nagpaingon sa atabay nga nagpas-an ug dakong banga. Kilumkilom na ug panahon to sa pagkalos ug tubig para sa ilang panimalay. Seguradong naanad na siya sa maong trabaho adlaw-adlaw. Dayon nakita niya nga dihay grupo sa mga lalaki nga wala niya mailhi duol sa atabay, ug sila may mga kamelyo. Pero miadto gihapon siya sa atabay ug gipuno ang iyang banga.
Samtang nagpas-an siya sa iyang bug-at nga banga pauli sa ilang balay, dihay tigulang sa maong grupo nga miduol kaniya ug miingon, “Palihog paimna kog diyutayng tubig sa imong banga.” Si Rebeca wala magduhaduha sa pagpakitag kaayo sa maong mga lalaki. Hinuon, nagpakita siyag talagsaong pagkamaabiabihon. Siya miingon: “Inom akong ginoo,” ug iyang gipaubos ang iyang banga ug gipainom ang lalaki hangtod natagbaw kini.
Pero dili lang kay kana ang iyang gihimo. Miingon siya nga magkalos sab siyag tubig para sa 10 ka kamelyo sa maong mga lalaki. Ang lalaki nahingangha samtang nagtan-aw niining guwapa nga batan-ong babaye nga nagbalikbalik sa pagkalos ug tubig hangtod natagbaw ang mga kamelyo. Ang lalaki nangutana: “Kang kinsa kang anak? Naa pa bay kuwarto sa balay sa imong amahan nga among katulgan karong gabii?” Si Rebeca wala magduhaduha sa pag-abiabi kanila. Iyang gitanyagan silag katulgan anang gabhiona ug kompay para sa ilang mga kamelyo.
Wala mahibalo si Rebeca nga gimaniobra ni Jehova nga magkita sila sa maong lalaki. Ang tigulang nga lalaki, nga lagmit mao si Eliezer, usa ka sinaligang sulugoon ni Abraham. Daghang semana una pa niana, gisugo siya ni Abraham nga mopanawg gatosan ka kilometro aron pangitaag asawa si Isaac, ang anak ug manununod ni Abraham. Giingnan ni Abraham si Eliezer nga ang babaye nga iyang pilion kinahanglang maggikan sa usa ka pamilya nga nagsimba kang Jehova. Busa miampo si Eliezer kang Jehova nga tabangan siya. Miampo siya nga ang babaye nga pilion sa Diyos para kang Isaac magpakita kanilag pagkamaabiabihon—ug mao kana ang gipakita ni Rebeca kanila!
Wala magduhaduha si Rebeca nga tabangan ang maong mga lalaki bisag mao pa toy unang higayon nga nagkita sila. Siyempre, lahi ang panahon kaniadto kay sa karon tungod kay daghang tawo karon ang “bayolente, walay gugma sa pagkamaayo.” (2 Tim. 3:1, 3) Pero bisag lahi ang kahimtang kaniadto, talagsaon gihapon ang gipakitang pagkamaabiabihon ni Rebeca. Seguradong nagkinahanglan tog dakong kaisog. Gawas pa niana, nagpakita siyag kaisog sa lain pang paagi.
Wala madugay, nasayran niya kon nganong mipanawg layo ang maong mga lalaki. Ang amahan ni Rebeca nga si Betuel ug ang iyang igsoon nga si Laban nangagda kang Eliezer sa pagpangaon. Pero gisulti una niining tigulang nga sulugoon ang iyang tuyo. Gihisgotan niya kon giunsa siya pagpanalangin ni Jehova aron makit-an si Rebeca. Nakita ni Betuel ug Laban nga tinuod ang gisulti niya ug sila miingon: ‘Gikan kini kang Jehova.’
Unsa kahay gihimo ni Rebeca pagkahibalo niya nga kabubut-on sa Diyos nga siya mobalhin sa lugar nga layo sa iyang panimalay ug magminyog lalaki nga wala pa niya sukad makita?
Unsay himoon ni Rebeca? Si Abraham miingon nga basin dili mouban ang babaye kang Eliezer ngadto sa Canaan. Busa si Rebeca makapili kon mouban ba siya o dili. Pagkabuntag, si Eliezer mihangyo kon puwede na ba siyang makalakaw kauban si Rebeca. Midesisyon ang pamilya ni Rebeca nga pangutan-on si Rebeca. Dihang ila siyang gipangutana, mitubag siya: “Oo, mouban ko.” Andam siyang mobalhin nga layo sa iyang balay ug pamilya bisan pag nahibalo siya nga basig dili na gyod niya sila makita pag-usab. Unsay nakahatag niyag kaisog sa paghimo niana? Posibleng nakita sab niya nga kabubut-on kini ni Jehova para niya.
Human sa pipila ka semana nga panaw sakay sa mga kamelyo, ang grupo nila Rebeca nakaabot sa kampo ni Abraham sa Canaan. Kilumkilom na, ug dihay nakita si Rebeca nga nag-inusarang tawo nga naglakawlakaw sa kapatagan ug namalandong. Kadto si Isaac. Siya 40 anyos na ug usa ka mahigugmaon ug mahunahunaon nga tawo. Siya nagbangotan pa gihapon tungod sa iyang inahan nga si Sara nga namatay tulo ka tuig na ang milabay. Pagkahibalo ni Rebeca nga si Isaac ang maong lalaki, mapainubsanon siyang nagpandong, nga nagpakita nga iyang giila si Isaac ingong iyang pamanhonon. Duna bay kaisog si Rebeca nga himoon ang importanteng asaynment nga gihatag sa Diyos kaniya? Mahimo kaha siyang mahigugmaong asawa ug suportahan ug tabangan si Isaac sa pag-alagad kang Jehova ingong ulo sa ilang pamilya? Gipakita sa Bibliya nga maayo siya nga asawa. Gihisgotan niini ang pagbati ni Isaac kang Rebeca. Kini nag-ingon: “Si Isaac nahigugma kaniya ug nahupayan sa pagkamatay sa iyang inahan.”
Basaha ang asoy sa Bibliya:
Pakighisgot:
Sa unsang mga paagi nga si Rebeca nagpakitag kaisog?
Tun-ig Dugang
1. Dihang si Abraham nakabatog mga anak, unsay epekto niini kang Eliezer, pero unsay nagpakita nga wala siya masina o masuko? (Gen. 15:2-4; 24:12; w97 1/1 30 ¶2)
2. Nganong gusto ni Abraham nga ang pangasaw-onon ni Isaac mobalhin sa Canaan imbes nga si Isaac ang mobalhin sa lugar nga gipuy-an ni Rebeca? (w97 1/1 30 ¶3)
3. Unsay kahulogan sa paghatag ug mga regalo ngadto kang Rebeca ug sa iyang pamilya? (it “Rebeca” ¶4)
4. Unsang klaseha sa panaw ang gihimo ni Rebeca gikan sa Haran paingon sa gipuy-an ni Isaac sa Negeb? (wp16.3 15 ¶1) A
www.LifeintheHolyLand.com
Hulagway A: Kaniadto, daghang tawo ang nagpuyo sa Negeb ug kini dunay lapad nga sibsibanan para sa daghang hayop ni Abraham
Hunahunaa ang mga Leksiyon
Unsay atong makat-onan kang Abraham, Rebeca, ug Isaac bahin sa pagpilig kapikas? (Gen. 24:2, 3; 27:46–28:1)
Si Rebeca kugihan, mahinatagon, ug matinahoron. Sa unsang mga paagi masundog siya sa mga sister karon? B
Hulagway B
Unsaon nimo pagsundog ang kaisog ni Rebeca?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Rebeca dihang banhawon na siya?
Pagkat-og Dugang
Konsideraha kon sa unsang paagi si Rebeca padayong nagpakitag kaisog ingong asawa ug inahan.
“Si Rebeca—Usa ka Diyosnon ug Kugihan nga Babaye” (w04 4/15 8-11)
Unsay makat-onan sa mga bata kang Rebeca?
“Ang Dalayegong mga Hiyas ni Rebeca” (“Mga Hulagway nga Kalingawan” sa jw.org)