7 JACOB
Maisogon Niyang Gipanalipdan ang Iyang Pamilya
TIGULANG na kaayo si Jacob ug miingon siya nga ang iyang kinabuhi “mubo lang” ug “lisod.” (Gen. 47:9) Tinuod ang iyang giingon. Daghang tuig una pa niana, kinahanglan siyang moikyas sa layong lugar didto sa Haran kay gusto siyang patyon sa iyang igsoon. Didto, nailaila ni Jacob si Raquel ug nabihag ang iyang kasingkasing. Pero gilimbongan siya sa amahan ni Raquel nga si Laban aron ang magulang ni Raquel ang una niyang maminyoan. Busa duha ang asawa ni Jacob ug silang duha dili magkasinabot. Daghang tuig nga nagtrabaho si Jacob kang Laban pero kadaghan siyang gitikasan ni Laban. Bisan pa niana, si Jacob nagpakitag talagsaong kaisog, pagtuo, ug paglahutay.
Usa ka adlaw niana, giingnan ni Jehova si Jacob nga kinahanglan na niyang biyaan ang Haran ug mouli sa Canaan. Pero delikado ang iyang himoon, kay si Laban hakog ug naghunahuna nga iya ang tanan nga gipanag-iya ni Jacob. Giestorya ni Jacob ang iyang pamilya ug dayon mibiya sila nga wala mananghid kang Laban. Dihang nahibal-an kini ni Laban, gitigom niya ang iyang mga tawo ug gigukod sila. Sa ulahi, naapsan niya ang pamilya ug gisaway niya pag-ayo si Jacob kay mibiya sila nga wala mananghid. Nanghulga pa gyod si Laban: “Puwede ka nakong himoag daotan.” Pero maisogong midepensa si Jacob ug iyang gisukmatan si Laban. Miingon siya nga si Laban nanikas ug dili maayog pagtratar kaniya sulod sa daghang katuigan. Bisan pa niana, andam gihapon si Jacob nga makigdait. Silang duha nagbulag sa maayong kabubut-on.
Unsay nakatabang kang Jacob nga makigdait sa nasuko nga mga membro sa iyang pamilya ug makiglayog pa gani sa usa ka gamhanang anghel?
Pero wala pa mahuman ang mga problema ni Jacob. Makigkita siya sa iyang kaluha nga si Esau. Daghang katuigan una pa niana, gipasidan-an siya sa ilang inahan nga si Rebeca nga gusto siyang patyon ni Esau. Nagtuo si Esau nga gilimbongan siya ni Jacob aron makuha ang panalangin sa ilang amahan nga para unta niya. Karon, gusto ni Jacob nga makigdait kang Esau. Nasayran niya nga si Esau nagpaingon kaniya ug sa iyang pamilya uban ang 400 ka lalaki. Gipauna ni Jacob ang iyang mga sulugoon aron sugaton ug dad-ag mga regalo si Esau. Pero igo na ba kana aron mawala ang kasuko ni Esau? Atong mabasa: “Si Jacob nahadlok pag-ayo ug nabalaka.” Dayon dihay kahibulongang nahitabo.
Niadtong gabhiona, nakakita si Jacob ug tawo nga wala niya mailhi. Anghel kadto ni Jehova, ug ang anghel nakiglayog kang Jacob. Kay naghunahuna si Jacob nga posible siyang mahatagag panalangin sa anghel, maisogon siyang nakiglayog kaniya sa pipila ka oras. Wala mosurender si Jacob bisan pag 97 anyos na siya ug mas kusgan ang anghel kay kaniya. Nakiglayog siya taman sa ginhawa, ug mihilak pa gani siya. (Os. 12:4) Nahibalo si Jacob nga bililhon kaayo ang panalangin ni Jehova maong determinado siya nga himoon ang tanan aron makuha kini. Pagkabanagbanag, gitandog sa anghel ang lutahan sa bat-ang ni Jacob ug nalisa kini. Pero may nindot nga giingon ang anghel kang Jacob—Israel na ang iyang ngalan. Ang ngalan nagkahulogan ug “Nakigbugno sa Diyos.” Haom ang maong ngalan kay si Jacob wala gyod mosurender ug gigamit niya ang tanan niyang kusog aron makabaton ug panalangin gikan kang Jehova.
Si Jacob nagtakiang nga miadto sa iyang pamilya. Dayon gikan sa layo, nakita niya si Esau ug ang iyang 400 ka tawo nga nagpaingon kaniya. Miuna si Jacob sa pagsugat kanila. Samtang nagkaduol siya kang Esau, si Jacob miyukbo ug pito ka beses. Dayon si Esau midagan sa pagtagbo kaniya. Pero walay dalang hinagiban si Esau. Hinuon, gigakos niya si Jacob! Ug silang duha nanghilak. Ang daghang regalo ni Jacob ug ang iyang pagkamapainubsanon nakapawala sa kasuko ni Esau. Tingali nakadayeg siya sa kaisog ni Jacob. Nakahimog paagi si Jacob nga makigdait sa iyang igsoon.
Hangtod sa kataposan sa iyang kinabuhi, si Jacob nagtakiang tungod sa iyang nalisa nga bat-ang. Gawas ana, daghan pa siyag naatubang nga mga kalisdanan. Pero seguradong wala siya magmahay sa iyang desisyon nga sundon si Jehova o makiglayog sa anghel. Sa ulahi, natuman ang nindot nga saad ni Jehova kaniya. Ang kaliwat ni Jacob nahimong dakong nasod. (Gen. 28:14) Gani ang Bibliya nagtawag kang Jehova ingong “ang Diyos ni Jacob.” (Ex. 3:6) Gigamit sab ni Jesu-Kristo ang maong ekspresyon. Miingon pa gani siya nga si Jehova ‘Diyos sa mga buhi, ug dili sa mga patay, kay para niya silang tanan buhi.’ (Luc. 20:37, 38) Busa segurado ang kaugmaon ni Jacob. Sa bag-ong kalibotan, wala na unyay kataposan ang iyang kinabuhi ug dili na masukod ang iyang kalipay!
Basaha ang asoy sa Bibliya:
Pakighisgot:
Sa unsang mga paagi nga si Jacob nagpakitag kaisog?
Tun-ig Dugang
1. Nganong gipaneguro ni Jehova nga si Jacob ang makadawat sa katungod sa pagkapanganay imbes nga si Esau? (w03 10/15 29 ¶2)
2. Unsay gipadamgo ni Jehova kang Jacob, ug unsay gipasalig niini kaniya? (w03 10/15 28 ¶3–29 ¶1) A
Hulagway A
3. Nganong lig-on ang pagtuo ni Jacob nga makadawat siyag panalangin gikan sa anghel? (w03 10/15 31 ¶1) B
Hulagway B
4. Unsay mga gihimo ni Jacob aron ang iyang pamilya dili maimpluwensiyahan sa mga Canaanhon? (w95 9/15 21 ¶4, footnote.)
Hunahunaa ang mga Leksiyon
Gibati gyod ni Jacob nga responsibilidad niya ang pag-atiman sa tanang karnero ni Laban. (Gen. 31:38-40) Sa unsang paagi mapakita sa Kristohanong mga magbalantay nga naghunahuna sila pag-ayo sa kaayohan sa mga karnero ni Jehova—ang ilang mga igsoon sa pagtuo? C
Hulagway C
Dihang nahadlok si Jacob, miampo siya kang Jehova. (Gen. 32:6-12) Unsay atong makat-onan kang Jacob bahin sa puwede natong iapil sa atong mga pag-ampo?
Unsaon nimo pagsundog ang kaisog ni Jacob?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Jacob dihang banhawon na siya?
Pagkat-og Dugang
Unsaon nato pagsundog si Jacob dihang atong maamgohan nga naay igsoon nga nahiubos nato?
Gamita kining gidrowing nga estorya sa Bibliya aron tudloan ang imong pamilya bahin kang Jacob.