5 ABRAHAM
Iyang Giatubang ang Iyang Kinalisdang Pagsulay
SI Abraham hinayhinay nga nagbaktas paingon sa iyang destinasyon. Ang iyang pagbaktas abtan lag pipila ka adlaw, pero segurado nga kini ang kinalisdang panaw sa iyang kinabuhi.
Nagsige siyag hunahuna sa gisugo ni Jehova kaniya: “Dalha palihog ang imong anak, ang imong bugtong anak nga gihigugma nimo pag-ayo, si Isaac, ug adto sa yuta sa Moria ug itanyag siya ingong halad nga sinunog sa usa sa mga bukid nga akong itudlo kanimo.” Nahibalo si Jehova nga gimahal pag-ayo ni Abraham si Isaac. Busa nganong gisugo man siya ni Jehova nga ihalad ang iyang anak? Unsay nakatabang kang Abraham nga makapakitag pagtuo ug kaisog nga sundon ang sugo?
Ang Bibliya nagtawag kang Abraham nga “amahan sa tanang may pagtuo.” (Rom. 4:11) Nagpakita na siyag talagsaong pagtuo una pa niana, ug gitabangan siya ni Jehova nga molig-on kini. Pananglitan, daghang tuig sa miagi, giingnan sa Diyos si Abraham nga Iyang laglagon ang daotang siyudad sa Sodoma ug Gomora. Nakapaguol ni kang Abraham maong nangutana siya kang Jehova kon Iya ba gyong laglagon ang mga matarong uban sa mga daotan. Mapailobong gitudloan ni Jehova si Abraham nga dili Niya laglagon ang maong mga siyudad kon makakita Siya ug bisag pipila lang ka matarong nga tawo didto. (Gen. 18:16-33) Wala gyod malimti ni Abraham ang iyang nakat-onan: Si Jehova matarong ug maluluy-on.
Dihang gisugo ni Jehova si Abraham sa paghimog butang nga dili gyod mahunahunaan sa usa ka mahigugmaong amahan, sa unsang paagi nakabaton siyag kaisog nga mosunod niini?
Wala madugay human adto, dihay gihimong milagro si Jehova kang Abraham ug Sara. Gipaposible niya nga makabaton silag anak, si Isaac, bisan pag si Sara halos 90 anyos na ug si Abraham halos nag-edad nag 100. Nakita ni Abraham nga si Jehova makahatag ug kinabuhi niadtong gihunahuna nga “patay na.” (Rom. 4:18, 19) Nakat-onan ni Abraham nga walay imposible kang Jehova. Kini nga leksiyon nagpabilin sa iyang hunahuna ug kasingkasing.
Karon, mga 25 ka tuig sa ulahi, seguradong nagsigeg dagan sa hunahuna ni Abraham ang maong mga leksiyon samtang nagpadulong siya sa Moria. Siya nakahinapos: Kon mamatay si Isaac, si Jehova dunay gahom ug tinguha sa pagbanhaw kaniya! (Heb. 11:19) Busa si Abraham nagpadayon sa paglakaw paingon sa iyang destinasyon, ug ang iyang paglaom nakahatag niyag kaisog nga makapadayon.
Dihang malantaw na ni Abraham ang dapit nga gipili ni Jehova, giingnan niya ang iyang mga sulugoon nga magpabilin didto samtang siya ug si Isaac motungas aron maghalad. Wala siya magduhaduha sa pag-ingon nga mobalik ra sila ni Isaac. Nakaabot sila sa bukid ug silasila ra ang tua didto. Panahon na nga ihalad ni Abraham ang iyang anak. Kinabubut-ong misugot si Isaac nga gaposon siya sa iyang tigulang nga amahan ug ibutang siya sa halaran. Andam na si Abraham nga himoon ang usa ka butang nga dili gyod mahunahunaan sa usa ka mahigugmaong amahan. Gikuha niya ang kutsilyo aron patyon na unta ang iyang anak. Dayon gitawag siya sa anghel aron pugngan siya. Ang anghel miingon: “Ayawg patya ang imong anak.”
Dayon gidayeg sa Diyos si Abraham tungod sa iyang pagtuo ug pagkamasinugtanon. Gisulti niya pag-usab ang iyang saad nga panalanginan si Abraham, padaghanon ang iyang kaliwat, ug nga makadawat ug daghang panalangin ang “tanang nasod sa yuta” tungod sa gihimo ni Abraham.
Padayon gihapong ginatuman ni Jehova ang iyang gisaad kang Abraham. Kini nga saad maghatag ug mga panalangin nga molungtad sa walay kataposan. Ang pagpakiglabot sa Diyos kang Abraham ug Isaac duna poy laing gipadayag bahin kang Jehova. Gihatagan ta niyag ideya kon unsa ang iya mismong masinatian aron maluwas ang tanang matinumanong tawo. Sama nga andam si Abraham sa paghalad sa iyang pinalanggang anak, andam sab si Jehova sa paghatag sa iyang bugtong nga anak, si Jesus, ingong halad alang sa kaayohan sa tanan. (Juan 3:16) Busa dihang basahon nato ang gihimong sakripisyo ni Abraham, mas masabtan nato kon unsa ka dako ang gugma ni Jehova.
Sama kang Abraham, mas molig-on ang atong pagtuo kon pamalandongon nato ang gisulti ug gihimo ni Jehova kaniadto. Samtang magkalig-on ang atong pagtuo, mahimo sab tang mas maisogon. Dili ta angayng mabalaka nga basig dunay ipahimo ang Diyos kanato nga sama sa iyang gisugo kang Abraham. Pero makaseguro ta niini: Bisan unsa pay ipahimo sa Diyos kanato, ang atong pagtuo kaniya maghatag natog kaisog sa pagsunod niini. Ang atong pagkamasinugtanon moresultag dugang panalangin nga labaw pa sa atong mahunahunaan!
Basaha ang asoy sa Bibliya:
Pakighisgot:
Sa unsang mga paagi nga si Abraham nagpakitag kaisog niining bahina sa iyang kinabuhi?
Tun-ig Dugang
1. Unsay pamatuod nga tinuod nga tawo si Abraham? (g 5/12 18, kahon; it “Abraham” ¶22–23) A
Hulagway A: Usa ka kinulit sa paril sa Karnak, Egypt, naghisgot sa “Uma ni Abram”
2. Sa unsang paagi nakakat-on si Abraham bahin kang Jehova nga Diyos? (ia 26 ¶4-5)
3. Nganong dalawaton kang Jehova ang pagsimba ni Abraham? (rr 20 ¶18)
4. Sa unsang paagi ang saad ni Jehova kang Abraham sa Genesis 22:17 nagpamatuod nga ang Bibliya tukma sa siyensiya? (g88 4/8 25) B
Hulagway B
Hulagway B
Hunahunaa ang mga Leksiyon
Sa unsang paagi ang paglaom ni Abraham nakatabang niya nga magmaisogon? Sa unsang paagi ang pagpokus sa atong paglaom motabang nato nga magmaisogon? C
Hulagway C
Sa unsang paagi masundog nato ang kaisog ni Abraham ug makatanyag tag halad dihang . . .
makakita tag kahigayonan sa pagsangyaw? (Heb. 13:15)
modesisyon kon unsaon nato paggamit ang atong materyal nga mga butang? (Prov. 3:9)
mahibaloan nato nga nanginahanglag tabang ang mga igsoon? (Filip. 4:18)
Sa unsa pang mga paagi masundog nimo ang kaisog ni Abraham niini nga asoy?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Abraham o Isaac dihang banhawon na sila?
Pagkat-og Dugang
Tan-awa ang mga hitabo niini nga asoy.
Sa unsang paagi si Abraham nahimong suod nga higala ni Jehova, ug unsay atong mahimo aron mas masuod ta Niya?
“Si Jehova Nagtawag Kaniya nga ‘Akong Higala’” (w16.02 8-12)