4 ABRAHAM
Unang Tawo nga Nakiggubat Para Kang Jehova
SI Jehova mihimog talagsaong saad sa iyang higala nga si Abraham. Ang maong saad dakog epekto sa kaugmaon sa katawhan. Si Jehova miingon: “Himoon ka nako nga dakong nasod.” Gipakita sab sa Diyos kang Abraham ang nindot nga yuta nga puy-an unya niini nga nasod. (Gen. 12:2; 13:14, 15) Pero gusto ni Satanas nga patyon si Abraham aron ang maong nasod dili maporma. Nahibalo ang Yawa nga maggikan niini nga nasod ang gitagnang “kaliwat” nga magtapos sa daotang pagmando ni Satanas ug maglaglag kaniya.—Gen. 3:15.
Si Abraham ug ang iyang pamilya giatake ni Satanas. Usa sa mga nag-antos pag-ayo mao ang pag-umangkon ni Abraham nga si Lot. Gipapili ni Abraham si Lot kon asa niya gustong magpuyo sa Yutang Saad, ug gipili ni Lot ang kinamaayohang dapit diin tambok kaayo ang yuta. Duol ni sa siyudad sa Sodoma, diin ang mga tawo “daotan ug grabe ka makasasala kang Jehova.” (Gen. 13:8-13) Ang hari sa Sodoma apil sa alyansa sa lima ka hari sa Canaan, ug gipul-an na silag binayad ug buhis sa hari sa Elam mao nga mirebelde sila. Tungod niini, ang hari sa Elam ug ang tulo pa ka hari nga kaalyado niya gikan sa lagyong rehiyon misulong, ug ilang gipildi ang mga hari sa Canaan. Ang hari sa Elam ug ang iyang mga kaalyado miuli sa ilang yuta ug gidala nila ang daghang inilog ug mga binihag. Si Lot ug ang iyang pamilya apil sa ilang mga nabihag.
Gipangunahan ni Abraham ang iyang 318 ka tawo sa paggukod ug pagpakig-away sa kasundalohan sa upat ka nag-alyansa ug gamhanang mga hari
Unsa kahay himoon ni Abraham? Puwede unta siyang maghunahuna nga giani ra ni Lot ang pait nga resulta sa iyang mga desisyon. O kaha mabalaka siya nga kon luwason niya si Lot, kinahanglan siyang makiggubat sa maong mga hari. Pero si Abraham dili manggugubat; magbalhinbalhin siyag puyo ug magbalantay siyag karnero. Mapildi kaha niya ang kasundalohan sa upat ka nag-alyansa ug gamhanang mga hari? Dugang pa, usa sa maong mga hari nagmando sa Sinar diin naggikan si Abraham. Kon si Abraham makig-away sa maong hari, posible nga dili na siya makabalik sa iyang komportableng puy-anan sa Ur. Pero wala na hunahunaa ni Abraham. Nahibalo siya nga gusto ni Jehova nga iyang luwason si Lot.
Nianang panahona, kapin nag 1,000 ang sakop sa panimalay ni Abraham. Gitigom niya ang iyang binansay nga mga tawo, 318 ka sulugoong lalaki, ug nangandam sila sa pagpakiggubat. Dayon gigukod ni Abraham ug sa iyang mga kaalyado ang mga kaaway. Miabot sila sa layong dapit sa amihanan, sa rehiyon sa Dan, ug tua didto ang ilang mga kaaway. Pagkagabii, gigrupo-grupo ni Abraham ang iyang mga tawo ug dayon miatake sila. Bisag mas gamay ang kasundalohan ni Abraham, napildi nila ang ilang mga kaaway ug ang mga kaaway miikyas. Samtang ang upat ka hari ug ang ilang mga tawo miikyas paamihanan, wala sila lung-i ni Abraham. Iyang naabtan sila duol sa Damasco. Didto, iyang napildi sila ug gibawi niya ang tanan nilang inilog ug binihag nga gikan sa Canaan. Naluwas si Lot ug ang iyang pamilya!
Unsay pagbati ni Jehova sa gipakitang kaisog ug pagtuo ni Abraham? Masayran nato ni dihang milabay si Abraham duol sa siyudad sa Salem. Ang hari sa maong siyudad nga si Melquisedek saserdote sab ni Jehova. Si Melquisedek migawas sa siyudad aron sugaton si Abraham ug hatagan siyag panalangin nga gikan kang Jehova. Gihatag ni Abraham kang Melquisedek nga representante ni Jehova ang ikapulo sa kinamaayohang mga inilog sa gubat. Nagpakita ni nga mapainubsanon niyang giila nga midaog siya dili sa iyang kaugalingong kusog kondili sa tabang ni Jehova.
Klaro gyod nga ang maong gubat iya sa Diyos, dili sa tawo. Ang Bibliya naghisgot sa “basahon sa Mga Gubat ni Jehova.” (Num. 21:14) Posible nga ang pagpakiggubat ni Abraham mao ang unang gubat nga narekord sa maong basahon. Gatosan ka tuig sa ulahi, dihang ang mga kaliwat ni Abraham nakiggubat sa daotang mga Canaanhon nga namuyo sa Yutang Saad, gihatagan ni Jehova ang iyang matinumanong katawhan ug sunodsunod nga kadaogan.
Pero dihang si Jehova gibiyaan sa iyang katawhan, wala na niya sila panalipdi. Sa ulahi, gisalikway sila ni Jehova dihang ilang gisalikway ang iyang Anak, ang Mesiyas. Imbes panalanginan ang nasod sa Israel, ang gipanalanginan na ni Jehova mao ang espirituwal nga Israel ubos sa pagmando sa Kristo. Gidid-an ni Jesus ang iyang mga tinun-an nga moapil sa literal nga gubat. (Mat. 26:52) Pero iyang gitudloan sila kon unsaon pagpakig-away sa espirituwal nga gubat. Pinaagi sa ehemplo ni Jesus, iyang gipakita nga sama sa literal nga gubat, ang espirituwal nga pagpakiggubat nagkinahanglag dakong kaisog.
Basaha ang asoy sa Bibliya:
Pakighisgot:
Sa unsang mga paagi nga si Abraham nagpakitag kaisog niining bahina sa iyang kinabuhi?
Tun-ig Dugang
1. Unsay pamatuod nga tukma kini nga asoy? (w89 7/1 5 ¶4–6 ¶1)
2. Unsay pamatuod nga tukma ang giingon sa Bibliya nga nahimutangan sa Sodoma ug Gomora? (it “Dagat sa Asin” ¶6) A
BestTravelPhotography/iStock via Getty Images Plus
Hulagway A: Bisan karon, dagaya ang mga palmang datiles ug ubang pananom sa rehiyon diin posibleng nahimutang ang karaang Sodoma
3. Si Melquisedek hari ug saserdote sa Salem. Diin nahimutang ang Salem? (it “Salem”)
4. Sa unsang mga paagi nga si Melquisedek nagrepresentar kang Jesus? (it “Hataas nga Saserdote” ¶27-28) B
Hulagway B
Hunahunaa ang mga Leksiyon
Gitugotan ni Abraham nga maangkon ni Lot ang kinamaayohang dapit sa yuta. Unsaon nato pagsundog si Abraham sa atong pagpakiglabot sa atong pamilya, mga isigkamagtutuo, ug sa uban? C
Hulagway C
Unsay atong makat-onan sa kaandam ni Abraham nga luwason ang iyang pag-umangkon?
Sa unsa pang mga paagi masundog nimo ang kaisog ni Abraham niini nga asoy?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Abraham o kang Lot dihang banhawon na sila?
Pagkat-og Dugang
Susiha kon sa unsang paagi nagpakitag bug-os nga pagsalig si Abraham kang Jehova.
Sa unsang paagi si Abraham nagpakitag kaisog bisan niadtong wala pa siya mobiya sa Ur?