3 SARA
Wala Gyod Siya Maghunahuna nga Mobalik
SI Sara naminyo kang Abraham, ang lalaki nga iyang gihigugma. Nagpuyo sila sa siyudad sa Ur, sa yuta sa Sinar. Kini usa ka dakong siyudad nga gipalibotag dagkong paril duol sa dakong Suba sa Euprates. Ang mga tawo sa siyudad nagsimbag daghang bakak nga mga diyos, pero lahi si Abraham. Nagsimba siya sa bugtong matuod nga Diyos, si Jehova. Si Sara nagtuo pod sa matuod nga Diyos. Pero usa ka adlaw niana, nakaatubang siyag wala damhang pagsulay sa iyang pagtuo ug kaisog.
Giingnan siya ni Abraham nga si Jehova nakig-estorya niya. Seguradong eksayted si Sara adto! Pero ang gisulti ni Jehova nga himoon ni Abraham dili sayon. Kinahanglan nilang biyaan ang ilang balay ug mga paryente sa Ur ug moadto sa layong lugar. Dad-on nila ang ilang mga sulugoon diha sa taas nga panaw. Mamuyo na sila sa mga tolda ug dili na sa siyudad nga gipanalipdag mga paril ug mga guwardiya. Dili na sab sila magpuyo sa usa ka dakong balay nga may suplay sa tubig o ubang butang nga makapahayahay sa kinabuhi, ug wala poy merkado. Lisod kaayo ni, pero misunod gihapon si Sara. Nagpakita siyag pagtuo kang Jehova, nag-empake, nanamilit sa iyang pamilya ug mga higala, ug miuban kang Abraham bisag wala siya mahibalo kon asa sila paingon.
Imbes pugson ni Sara si Abraham nga mamalik sila sa ilang luwas nga puy-anan sa Ur, iyang gisuportahan ang desisyon sa iyang bana nga moadto kon asa sila paadtoon ni Jehova
Si Sara nagpakitag pagtuo ug kaisog sa laing paagi. Kini ang giingon ni apostol Pablo bahin kang Sara ug sa iyang bana: “Kon nagsige pa silag hunahuna sa lugar nga ilang gigikanan, may kahigayonan unta sila nga mobalik.” (Heb. 11:15) Puwede untang maghandom si Sara sa balay nga ilang gibiyaan sa Ur ug kon unsa sila ka luwas didto. Pero nagpakita siyag pagtuo ug kaisog, ug wala gyod maghunahuna nga mobalik.
Dihang nakaabot na sila sa yuta sa Canaan, nasayran ni Sara nga walay dakong suba didto sama sa Euprates nga may mga barko nga magdalag pagkaon o ubang butang nga ilang mapalit. Busa dihang nahitabo ang gutom sa Canaan, kinahanglan silang mamalhin. Wala gamita ni Sara ang maong panghitabo aron pugson ang iyang bana nga mamalik sila sa Ur. Hinuon, kinabubut-on siyang miuban kang Abraham sa Ehipto.
Guwapa kaayo si Sara, ug tungod niana nahadlok si Abraham nga basig patyon siya aron ilogon si Sara. Kinahanglang magpakaaron-ingnon si Sara nga igsoon lang siya ni Abraham. Pero wala na magsilbi dihang nasayran sa Paraon sa Ehipto kon unsa siya ka guwapa. Gisugo niya ang iyang mga sulugoon nga kuhaon siya kang Abraham ug dad-on sa iyang palasyo. Ang pagpuyo sa palasyo mas luwas ug mas komportable kay sa pagsigeg balhin ug sa pagpuyo sa mga tolda. Pero gibiyaan ba ni Sara si Abraham ug mipili nga makabaton ug komportableng kinabuhi uban sa Paraon? Wala. Nagpakita siyag kaisog ug nagmaunongon sa iyang bana, ug giluwas siya ni Jehova! Wala madugay, nakauban niya pag-usab ang iyang minahal nga bana.a
Si Jehova nagsaad nga maggikan kang Abraham ang usa ka dakong nasod. Pero si Sara dili makaanak. Nakapaguol na niya. Pero paglabayg daghang tuig didto sa Canaan, gigantihan ni Jehova si Sara. Bisag 90 anyos na siya, gipanalanginan siya ni Jehova pinaagi sa paghatag sa iyang gipangandoy. Nagmabdos si Sara! Si Jehova miingon nga ang bata nganlag Isaac kay nagkahulogan nig “Pagkatawa.” Si Abraham ug Sara nalipay ug mikatawa dihang nasayran nila nga makabaton silag anak. Kombinsido si Sara nga ang mga tawo malipay ug mokatawa uban niya dihang masayran nila ang milagro nga gihimo ni Jehova kaniya.
Si Sara nabuhi ug taastaas pa, ug napadako niya ang iyang anak ug nakita kini nga nahimong maayo kaayong tawo. Ingong mahigugmaong inahan, kinahanglan siyang magpakitag kaisog aron iyang mapanalipdan ang iyang anak. Hangtod sa iyang kamatayon, wala gyod siya maghunahuna nga mobalik sa mas komportableng kinabuhi. Hinuon naglantaw siya sa unahan, sa usa ka nindot nga kaugmaon nga gisaad ni Jehova. Wala makita ni Sara ug sa iyang pamilya ang katumanan sa maong saad, pero segurado nga matuman gyod ni!
Basaha ang asoy sa Bibliya:
Pakighisgot:
Sa unsang mga paagi nga si Sara nagpakitag kaisog?
Tun-ig Dugang
1. Sayop ba nga si Sara naminyo kang Abraham bisag magsoon sila sa amahan? (wp17.3 12 ¶5, footnote)
2. Unsa tingali ang mga gibiyaan ni Sara didto sa Ur? (wp17.3 13 ¶3–14 ¶2) A
Photograph taken by courtesy of the British Museum
Hulagway A: Alahas nga nakubkoban sa dapit nga nahimutangan sa karaang Ur
3. Unsay pamatuod nga maalamon ang gihimo ni Abraham dihang wala niya ipaila si Sara ingong iyang asawa? (wp17.3 14 ¶6–15 ¶2)
4. Si Sara mapinasakopon kang Abraham, pero nagpasabot ba na nga nagpakahilom na lang siya sa tanang panahon? Ipatin-aw. (g 1/08 29 ¶4-5) B
Hulagway B
Hunahunaa ang mga Leksiyon
Itandi si Sara ug ang asawa ni Lot.
Sa unsang mga paagi sila managsama? (Gen. 12:1; 13:5-7; 19:12, 15)
Sa unsang mga paagi sila managlahi? (Gen. 19:17, 26; Luc. 17:28-32)
Unsay atong makat-onan sa mga desisyon nga ilang gihimo ug sa nahitabo nila?
Si Sara guwapa kaayo, ug dato ang iyang bana. Unsay atong makat-onan kaniya kon parehas ta niyag kahimtang? (Prov. 31:30; 1 Tim. 6:17-19)
Unsaon nimo pagsundog ang kaisog ni Sara? C
Hulagway C
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Sara dihang banhawon na siya?
Pagkat-og Dugang
Ang ehemplo ba ni Sara para lang sa mga asawa? Unsa poy makat-onan sa mga bana kaniya?
Sayra kon unsang paagi si Sara ug Abraham nagpakitag pagtahod sa usag usa.
“Padayong Sugnori ‘ang Kalayo ni Jah’” (w23.05 24-25 ¶15-17)
a Human niadto, dihay naeksperyensiyahan si Sara nga susamang hitabo dihang gikuha siya kang Abraham sa hari nga si Abimelek. Maisogon niyang gisunod ang mga instruksiyon ni Abraham ug giluwas siya pag-usab ni Jehova.