2 NOE
Iyang Gihukman ang Kalibotan
PAGLABAY sa panahon human mamatay si Enoc, dihay mga anghel sa langit nga mirebelde sa Diyos. Ang maong daotang mga anghel gustong makigsekso sa mga babaye sa yuta, busa nagsul-ob silag tawhanong lawas ug gikuha ang tanang babaye nga gusto nilang maasawa. Mestiso ang ilang mga anak—bayolente kaayong mga higante nga gitawag ug Nepilim. Tungod sa ilang daotang impluwensiya, ang mga tawo sa yuta nahimong daotan kaayo. Sa panan-aw sa Diyos, ang nindot nga kinabuhi nga iyang gihatag sa mga tawo nadaot. Pero dihay usa ka tawo nga lahi kaayo—ang apo sa tuhod ni Enoc nga si Noe.
Si Noe matarong nga tawo sama kang Enoc. Atong mabasa: “Si Noe naglakaw uban sa matuod nga Diyos.” Sa ulahi naminyo siya, ug gitudloan nila sa iyang asawa ang ilang tulo ka anak nga lalaki nga mosunod sab kang Jehova. Tungod niana, lahi kaayo ang ilang pamilya sa mga tawo sa ilang palibot.
Usa ka adlaw niana, giingnan ni Jehova si Noe nga paphaon Niya ang tanang daotang tawo sa yuta. Pero gusto sab ni Jehova nga naay maluwas, maong iyang gisugo si Noe nga maghimog dakong arka. Si Noe wala pa gyod sukad makakitag Lunop nga molukop sa tibuok yuta sama sa gitagna ni Jehova. Wala pa pod siya sukad makasulay ug asaynment nga sama sa paghimog dako kaayong arka. Pero misalig siya sa mga saad ni Jehova maong gisugdan niya ang paghimo niini.
Si Noe ug ang iyang pamilya nag-atubang ug makahahadlok nga mga kaaway nga wala makaangay sa ilang mensahe ug buluhaton
Si Noe ug ang iyang pamilya nagkinahanglag kaisog sa paghimo niini. Segurado nga grabe silang gisupak ug gibiaybiay sa mga tawo. Ang daotang mga anghel gamhanan ug makahahadlok, ug ang ilang mga anak ganahang magdaogdaog sa uban. Pero wala kana makapugong kang Noe, sa iyang matinabangong asawa, sa iyang tulo ka anak, ug sa ilang mga asawa sa pagsunod kang Jehova. Sulod sa mga 50 ka tuig, silang walo naghago sa paghimo sa arka, ug kini anam-anam nga naporma.
Nianang panahona, diha pay laing gihimo si Noe. Ang Bibliya nag-ingon nga siya “magwawali sa pagkamatarong.” Ingong ulo sa pamilya, nanguna siya sa pagpasidaan sa mga tawo bahin sa umaabot nga kalaglagan. Pero walay naminaw niya, bisan ang iyang mga paryente. Dili gusto sa mga tawo nga bag-ohon ang ilang daotang binuhatan. Tungod sa lig-ong pagtuo ni Noe, lahi kaayo siya sa mga tawo sa iyang palibot. Dili ikatingala nga ang Bibliya nag-ingon bahin kang Noe: “Pinaagi niini nga pagtuo iyang gihukman ang kalibotan.”
Sa kataposan, nahuman ang arka. Si Noe ug ang iyang pamilya kinahanglang magtigom ug pagkaon, tubig, ug ubang suplay para sa ilang kaugalingon ug sa tanang mananap nga pasudlon sa arka. Dayon, dihay talagsaong nahitabo. Ang tanang klase sa mananap, laki ug baye, nagpadulong sa arka! Unya “sila nanulod sa arka nga tinagurha ngadto kang Noe.”
Giingnan sa Diyos si Noe nga mangandam na sa pagsulod sa arka kay pito na lang ka adlaw moulan na. Ma-imagine tingali nato nga siya ug ang iyang pamilya puliki sa paghakot sa ilang mga gikinahanglan ug sa pag-organisar sa mga butang ug mananap sulod sa arka. Tingali mas misamot ang pagbiaybiay sa mga tawo kanila. Pero dihang nakarga na nila ang tanan ug nanulod sila sa arka, gisirhan ni Jehova ang pultahan. Seguradong nakapahilom to niadtong mga nagbiaybiay kanila. Dayon mibundak ang ulan! Padayon kining mibunok sulod sa 40 ka adlaw, ug ang tubig padayong misaka hangtod nga nalapawan bisan ang mga bukid. Nianang paagiha, gilaglag ni Jehova ang mga daotan sa yuta.
Si Noe ug ang iyang pamilya naluwas, ug kapig usa ka tuig silang nagpabilin sa arka. Niadtong panahona, anam-anam nga mihubas ang tubig. Sa kataposan ang arka nahiluna sa usa ka bukid, ug sa ulahi giingnan ni Jehova si Noe nga luwas na sila nga makagawas. Dihang si Noe ug ang iyang pamilya nakagawas na sa arka, ilang gisimba si Jehova kay mapasalamaton sila sa iyang pagluwas kanila. Nagsaad si Jehova nga dili na gyod siya magpahinabo pag-usab ug ingon niadto nga lunop, ug iyang gihatag ang balangaw (rainbow) ingong ilhanan, o garantiya, sa iyang saad.
Ang tanang tawo karon naggikan sa maong pamilya. Busa mapasalamaton kaayo ta nga nagpakita silag kaisog nga mahimong lahi diha sa usa ka daotang kalibotan!
Basaha ang asoy sa Bibliya:
Pakighisgot:
Sa unsang mga paagi nga si Noe nagpakitag kaisog?
Tun-ig Dugang
1. Unsay kinabuhi kaniadto sa wala pa ang Lunop? (w02 3/1 5 ¶3–6 ¶4)
2. Kanus-a gisugo si Noe sa paghimo sa arka? Kanus-a siya gisultihan sa Diyos kon kanus-a magsugod ang Lunop? (w12 4/15 23 ¶5-8)
3. Nganong makatuo ta nga nahitabo gyod ang Lunop? (ijwbq artikulo 156 ¶2-5, kahon) A
Historic Collection/Alamy Stock Photo
Hulagway A: Sumala sa usa ka karaang estorya sa India, dihay tawo nga naghimog sakayan aron maluwas sa usa ka tibuok kalibotang lunop. Human sa lunop, naghalad siya ug dayon nahimong katigulangan sa tanang tawo
4. Unsay nahitabo kapig 100 ka tuig human sa Lunop, ug unsa tingali ang epekto niini sa tigulang nga si Noe? (it “Noe” ¶13) B
Hulagway B
Hunahunaa ang mga Leksiyon
Sa unsang paagi ang atong panahon sama sa mga adlaw ni Noe? (Mat. 24:36-39)
Unsay gitudlo kanimo sa ehemplo ni Noe bahin sa kaimportante sa pagkahimong . . .
organisado? C
Hulagway C
kugihan? D
Hulagway D
mapailobon? E
Hulagway E
Unsaon nimo pagsundog ang kaisog ni Noe?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Noe dihang banhawon na siya?
Pagkat-og Dugang
Tan-awa kon sa unsang paagi naningkamot pag-ayo ang usa ka amahan sa pagsundog sa ehemplo ni Noe.
Sundoga ang Dunay Pagtuo, Dili ang Walay Pagtuo—Noe, Dili ang mga Tawo sa Iyang Palibot (2:57)
Tabangi ang imong mga anak nga makakat-on sa mga leksiyon bahin kang Noe.