Siya Naglakaw Uban sa Diyos

SI Enoc nahibalo sa pagbati nga nag-inusara. Lahi kaayo siya sa mga tawo sa iyang panahon. Siya lang niadtong panahona ang gihisgotan sa Bibliya nga “padayong naglakaw uban sa matuod nga Diyos.” Sa unsang paagi nahimo kini ni Enoc? Unsay atong makat-onan kaniya bahin sa kaisog?

Si Enoc naglakaw uban sa matuod nga Diyos sa duha ka importanteng paagi. Una, wala siya magpaimpluwensiya sa dili diyosnong mga tawo sa iyang palibot. Siya ang ikapito sa linya sa kaliwatan gikan kang Adan ug Eva, ug adtong panahona buhi pa si Adan ug tigulang na kaayo. (Tan-awa ang timeline nga “Gikan sa Panahon sa mga Patriarka Hangtod sa mga Maghuhukom.”) Sukad nga si Adan ug Eva mirebelde sa Diyos, halos tanang tawo misundog sa ilang pagkarebelyoso. Gipatay sa ilang anak nga si Cain ang iyang kaugalingong igsoon nga si Abel, ang unang tawo nga nagpakitag pagtuo kang Jehova. Ang ubang mga kaliwat ni Cain sama ka bayolente kaniya, o mas grabe pa gani. (Gen. 4:23, 24) Si Enoc nagmaisogon ug wala magpaimpluwensiya sa pagkabayolente sa mga tawo sa iyang palibot. Siya nagpabiling makigdaiton, ug kini nakapalipay sa Diyos.

Daghang katuigan sa wala pa matawo si Enoc, “ang katawhan nagsugod sa pagtawag sa ngalan ni Jehova.” (Gen. 4:26) Gigamit nila ang ngalan ni Jehova, pero sa mapasipalahong paagi ug sa bakak nga pagsimba. Si Enoc wala makigbahin niini. Iyang gimahal ug gitahod pag-ayo ang balaang ngalan ni Jehova, mao nga lahi kaayo siya sa tanang tawo adtong panahona.

Ang ikaduhang paagi nga si Enoc naglakaw uban sa Diyos mao ang iyang paghimo sa gisugo ni Jehova. Gihatagan siya sa Diyos ug espesyal nga asaynment ingong propeta. Kini nagkinahanglag dugang kaisog kay gisugo siya sa pagpahayag ug mensahe ngadto sa tanang daotang tawo. Kini ang mensahe: “Tan-awa! Si Jehova miabot uban sa iyang balaang mga panon aron hukman ang tanan, ug aron hukmang sad-an ang tanang dili diyosnon maylabot sa tanan nilang dili diyosnong binuhatan nga ilang gibuhat sa dili diyosnong paagi, ug maylabot sa tanang makalilisang nga mga butang nga gisulti batok kaniya sa dili diyosnong mga makasasala.”

Matikdi nga gibalay ni Enoc ang iyang mensahe sa paagi nga daw gipahamtang na ni Jehova ang Iyang paghukom kanila. Nagpakita ni nga segurado gyong matuman ang giingon ni Enoc. Matikdi sab nga bug-at nga paghukom ang iyang mensahe. Kaupat niya gibalikbalik ang mga pulong nga “dili diyosnon.” Segurado nga ang maong mensahe nakapasuko pag-ayo sa mga tawo nga nakadungog sa pagsangyaw ni Enoc. Pero maisogon niyang gisulti kanila ang mensahe nga gusto ni Jehova nga madunggan nila.

Wala hisgoti sa Bibliya kon giunsa gyod pagtratar sa mga tawo si Enoc. Pero gipaila niini nga dihay panahon nga nameligro siya pag-ayo. Nganong nakaingon ta ana? Atong mabasa: “Unya siya nawala, kay siya gikuha sa Diyos.” Unsay nahitabo? Posible nga gilutos si Enoc sa daotang mga tawo sa iyang panahon. Pero wala tugoti ni Jehova nga ilang pasakitan o patyon si Enoc. Tungod sa iyang gugma kang Enoc, iyang gikuha siya ug gipahinabo nga matulog siya sa kamatayon. Nianang paagiha, si Enoc nagpabiling luwas diha sa panumdoman ni Jehova, diin walay bisan kinsa nga makahimog kadaot kaniya.

Pero una pa niana, gihatagan ni Jehova si Enoc ug espesyal nga gasa. Atong mabasa: “Sa wala pa [si Enoc] ibalhin nakadawat siyag pamatuod nga nalipay niya pag-ayo ang Diyos.” Tingali gihatagan ni Jehova si Enoc ug panan-awon bahin sa panahon nga mabatonan unya niya ang malinawong kinabuhi sa paraisong yuta! Sa wala pa mamatay si Enoc, segurado kaayo siya nga gimahal ug gipanalanginan siya ni Jehova kay nagpakita siyag lig-ong pagtuo ug kaisog.

Basaha ang asoy sa Bibliya:

• Genesis 5:21-24

• Hebreohanon 11:5

• Judas 14, 15

Pakighisgot:

Sa unsang mga paagi nga si Enoc nagpakitag kaisog?

Tun-ig Dugang

1. 1. Unsay ipasabot dihang ang Bibliya nag-ingon nga ang katawhan nagsugod sa “pagtawag sa ngalan ni Jehova”? (Gen. 4:26; w01 9/15 29 ¶3)

   Imong tubag

2. 2. Unsang talagsaong asaynment ang nadawat sa matinumanong si Enoc? Sa unsang paagi niya natuman kini nga asaynment? (w01 9/15 31 ¶5)

   Imong tubag

3. 3. Bisag sa wala pa madawat ni Enoc ang asaynment nga managna, nganong lagmit nahibalo siya nga masulayan ang iyang kaisog? (w06 10/1 19 ¶13-14) A

   Imong tubag

   

4. 4. Unsaon nimo pagpakita nga si Enoc wala dad-a ngadto sa langit, sama sa gituohan sa uban? (Juan 3:13; Heb. 11:5, 13)

   Imong tubag

Hunahunaa ang mga Leksiyon

• Kanus-a tingali nga mas gikinahanglan nato ang kaisog sa pagsangyaw? Base sa ehemplo ni Enoc, unsay makatabang nato? B

  Imong tubag

  

• Unsay bation ni Jehova dihang maglakaw ta nga maisogon uban kaniya? (Prov. 27:11; Heb. 11:5)

  Imong tubag

• Unsaon nimo pagsundog ang kaisog ni Enoc?

  Imong tubag

Pamalandonga Kini

• Unsay akong nakat-onan bahin kang Jehova niini nga asoy?

  Imong tubag

• Sa unsang paagi kini nga asoy konektado sa mga katuyoan ni Jehova?

  Imong tubag

• Unsay akong ipangutana kang Enoc dihang banhawon na siya?

  Imong tubag

Pagkat-og Dugang

Sa unsang paagi ang ehemplo ni Enoc makatabang nimo sa pag-atubang ug bayolenteng mga tawo?

Sundoga ang Dunay Pagtuo, Dili ang Walay Pagtuo—Enoc, Dili si Lamek (2:53)

Sayra kon unsay nakatabang kang Enoc nga maugmad ang pagtuo.

“Lakaw Uban sa Diyos Niining Magubot nga Panahon” (w05 9/1 13-17)