Ri qachʼalal ri ya kʼo chik kijnaʼ kan kowan kiqʼij pa congregación

Rkʼë jbʼaʼ rït chqä najin naqʼaxaj ri najin nuqʼaxaj re qachʼalal reʼ. Rma ya xbʼä ajnaʼ, kʼo kʼïy ma yakowin ta chik naʼän. Y, tapeʼ ataman chë kan kʼïy chik jnaʼ ayaʼon pä rqʼij Jehová, rkʼë jbʼaʼ najnamaj ri najin naʼän komä rkʼë ri xaʼän ojer, y ya riʼ nuʼän chawä chë yabʼison. ¿Achkë xkatoʼö rchë ma ke riʼ ta chik xtanaʼ?

RI NRAJOʼ JEHOVÁ CHË NAʼÄN

Taquʼ rij ya reʼ: «¿Achkë nrajoʼ Jehová chë rïn nbʼän?». Deuteronomio 6:5 nuʼij: «Tawajoʼ Jehová ri aDios rkʼë ronojel awan, rkʼë ronojel akʼaslemal y rkʼë ronojel awchqʼaʼ». Re tzij reʼ kan nukʼuqbʼaʼ akʼuʼx. ¿Achkë rma?

Rma re texto reʼ nukʼüt chë Jehová nrajoʼ chë rït nayaʼ ri más ütz kʼo awkʼë che rä. Ri nayaʼ ya reʼ pan ajolon xkaturtoʼ rchë ma xtajnamaj ta awiʼ kikʼë nkʼaj chik chqä rchë ma xtajnamaj ta ri yakowin naʼän komä rkʼë ri xaʼän ojer.

Taquʼ rij ya reʼ: taq rït kʼa yït qʼopoj o yït kʼajol na, ¿achkë xayaʼ che rä Jehová? Rït xayaʼ che rä ri más ütz kʼo awkʼë; xaʼän jontir ri xakowin chpan ri tiempo riʼ. ¿Y komä? ¿Achkë najin nayaʼ che rä Jehová? Komä chqä najin nayaʼ che rä ri más ütz kʼo awkʼë, ntel chë tzij, najin naʼän jontir ri yakowin komä. Achiʼel natzʼët, ri najin nayaʼ che rä Jehová komä xa jnan rkʼë ri xayaʼ che rä ojer, rma najin nayaʼ che rä ri más ütz kʼo awkʼë.

RÏT KʼO KʼÏY YAKOWIN NAʼÄN RCHË YEʼATOʼ NKʼAJ CHIK

Taquʼ na peʼ rij ya reʼ: pa rkʼexel naquʼ chë kʼo kʼïy ma yakowin ta chik naʼän rma ya xbʼä ajnaʼ, más ütz taquʼ chë kʼo chik nkʼaj ri yakowin naʼän. Nqaʼij riʼ rma komä ke ya kʼo chik ajnaʼ, kʼo jojun yakowin naʼän ri ma yakowin ta wä naʼän taq kʼa yït qʼopoj o yït kʼajol na. Tqatzʼetaʼ jun chkë riʼ.

Tatzjoj chkë nkʼaj chik achkë ataman pä pan akʼaslemal. Tatzʼetaʼ ri xkiʼij re achiʼaʼ reʼ ri yertzjoj le Biblia:

Ri rey David: «Taq kʼa yïn kʼajol na kʼa komä, ri ya xirjïx, majun bʼëy ntzʼeton ta jun winäq ri jïk rkʼaslemal mestan qa o chë ralkʼwal ma ta jun kiway» (Sal. 37:25).

Josué: «Rïn xa jbʼaʼ chik nrajoʼ rchë yikäm, y rïx itaman chqä itzʼeton chë majun ta jun ri rtzjun Jehová iDios chiwä ri ma ta rbʼanon. Iwmä rïx, ryä rbʼanon jontir ri rtzjun. Majun ta jun rbʼin ri ma ta rbʼanon» (Jos. 23:14).

David chqä Josué kitaman wä achkë rma xkiʼij ya riʼ, rma ryeʼ kan kʼïy chik jnaʼ kiyaʼon pä rqʼij Jehová chqä kʼo kʼïy kitzʼeton chik pa kikʼaslemal. Rma riʼ ri xkiʼij kan kowan rqʼij. Ke riʼ chqä rït, rma kʼo kʼïy atzʼeton pä pan akʼaslemal, ri naʼij chkë nkʼaj chik kan kowan rqʼij.

Si rït kan kʼïy chik jnaʼ ayaʼon pä rqʼij Jehová, ütz natzjoj chkë nkʼaj chik achkë utzil awlon rma abʼanon riʼ. ¿Nnatäj chawä ajän xatzʼët achkë rbʼanik Jehová xtoʼ rtinamit? Si ke riʼ, tatzjoj chkë nkʼaj chik. Rkʼë jbʼaʼ kan xtkʼuqbʼaʼ kikʼuʼx xtkikʼoxaj ya riʼ, y rït chqä kan kiʼ akʼuʼx xtanaʼ (Rom. 1:11, 12).

Jun chik rbʼanik nakʼuqbʼaʼ kikʼuʼx nkʼaj chik, ya riʼ taq yabʼä pa qamoloj, si ütz nuʼän chawäch. We xtaʼän riʼ, ma xa xuʼ ta xkeʼatoʼ qachʼalal, rït chqä kʼo utzil xtawïl. Ri qachʼalal Connie, ri xqatzjoj qa pa naʼäy, nuʼij: «Ri yibʼä pa qamoloj yirtoʼon rchë ma yibʼison ta. ¿Achkë ta rma yibʼison si jontir qachʼalal pa Salón del Reino nkikʼüt chi nwäch chë kowan yinkajoʼ? Rïn chqä ntäj nqʼij rchë nkʼüt chkiwäch chë yenwajoʼ chqä kʼo nspaj chkë. Chqä ntäj nqʼij rchë nbʼän ri yikowin rchë nyaʼ rqʼij Jehová kikʼë».

JEHOVÁ NULOQʼOQʼEJ JONTIR RI ABʼANON PÄ RCHË NAYAʼ RQʼIJ

Le Biblia yertzjoj ye kʼïy winäq ri xejowäx rma Jehová tapeʼ ma kan ta achkë xekowin xkiʼän rma ya xbʼä kijnaʼ. Jun chkë ryeʼ ya riʼ Simeón, jun israelita ri ya riʼj chik taq Jesús xaläx. Ronojel mul ri nbʼä wä pa templo, rkʼë jbʼaʼ yertzʼët wä jojun israelitas ri kʼa ye kʼojolaʼ na ri yekiʼän nmaʼq taq samaj. ¿Achkë komä xpë pa rjolon ryä taq xertzʼët ri kʼojolaʼ riʼ? Rkʼë jbʼaʼ xquʼ chë ma kan ta nloqʼoqʼëx chik rma Jehová rma ya xbʼä rjnaʼ. Ye kʼa ma ke riʼ ta, Jehová xuʼij chë Simeón «rkʼwan wä jun jïk kʼaslemal chqä nuyaʼ wä rqʼij», rma riʼ xyaʼ qʼij che rä rchë xtzʼët Jesús taq xa kʼa riʼ jbʼaʼ taläx. Y ma xa xuʼ ta riʼ, Jehová chqä xksaj re achï reʼ rchë xuʼij chë Jesús ya riʼ xttok ri Mesías (Luc. 2:25-35). Rma ri nuʼij le Biblia, nqʼax chqawäch chë, tapeʼ Jehová xtzʼët chë Simeón kʼo kʼïy ma nkowin ta chik nuʼän o chë chaq ntiʼon chik, ri xyaʼ más rqʼij ryä ya riʼ chë Simeón kan rkʼuqbʼan rkʼuʼx chrij. Chqä, le Biblia nuʼij chë re achï reʼ kan «kʼo wä ri loqʼoläj rchqʼaʼ Dios pa rwiʼ».

Rït chqä ütz nayaʼ chwäch awan chë Jehová kan nuloqʼoqʼej jontir ri najin naʼän rchë nayaʼ rqʼij tapeʼ kʼo ma yakowin ta chik naʼän. Ryä kan kiʼ rkʼuʼx nuʼän taq nutzʼët chë rsamajelaʼ nkiyaʼ ri kʼo kikʼë y ma yë ta ri majun ta kʼo kikʼë (2 Cor. 8:12).

Komä ke xqatzʼët ya reʼ, tayaʼ awan chrij ri yakowin naʼän. Jun ejemplo. Taquʼ rij achkë jojun rbʼanik yakowin natzjoj le Biblia tapeʼ xa jbʼaʼ tiempo yakowin naʼän riʼ. Chqä ütz yeʼaskʼij äl qachʼalal pa teléfono o natäq äl jun kinota rchë nakʼuqbʼaʼ kikʼuʼx. Si rït nakanuj rbʼanik rchë nakʼüt chkiwäch qachʼalal chë yeʼawajoʼ, ryeʼ kan xtkiloqʼoqʼej ya riʼ, y más si kan jun qachʼalal achiʼel rït nbʼanö riʼ, rma kan kʼïy chik jnaʼ ayaʼon pä rqʼij Jehová.

Tapeʼ rït rkʼë jbʼaʼ kʼo kʼïy ma yakowin ta chik naʼän, kʼa kʼo na kʼïy yakowin naʼän rchë nayaʼ rqʼij Jehová. Jun ejemplo. Chpan ri recuadro «Xtoʼöx rma jun qachʼalal» xtawïl jun experiencia rchë jun qachʼalal ixöq ri ya kʼo chik rjnaʼ ri aj África oriental.

Ma tamestaj ta chë, rma akʼuqbʼan akʼuʼx chrij Jehová y rma ma ayaʼon ta qa chpan jontir ri tiempo qʼaxnäq pä, ya riʼ kan kowan xkertoʼ nkʼaj chik qachʼalal. Rït najin nakʼüt chkiwäch achkë rbʼanik yeʼaköchʼ ri kʼayewal. Y ma tamestaj ta ri nuʼij Hebreos 6:10: «Dios ma itzel ta rnaʼoj y ma numestaj ta jontir ri samaj xiʼän y rma xikʼüt chë niwajoʼ rbʼiʼ, rma xeʼitoʼ qachʼalal ri kan ye loqʼoläj y kʼa najin na yeʼitoʼ».

TATJAʼ AQʼIJ RCHË YEʼATOʼ NKʼAJ CHIK

Kʼo estudios nkiʼij chë taq ri winäq ri ya kʼo chik kijnaʼ yekitoʼ nkʼaj chik, ryeʼ ma kan ta yeyawäj, más kʼäs kijolon chqä más yalöj yekʼaseʼ.

Kantzij wä, ri yeqatoʼ nkʼaj chik ma nresaj ta ri kʼayewal qlon rma ya xbʼä qajnaʼ. Xa xuʼ Rqʼatbʼäl Tzij Dios xtkowin xtuʼän riʼ. Ri Qʼatbʼäl Tzij riʼ xtchüp rwäch ri mak, ri nbʼanö chqë chë nqrjïx chqä nqkäm (Rom. 5:12).

Tapeʼ ke riʼ, jontir ri najin naʼän rït rchë nayaʼ rqʼij Jehová —achiʼel yeʼatoʼ nkʼaj chik rchë nkitamaj rwäch— xkaturtoʼ rchë xtakʼuqbʼaʼ más akʼuʼx chrij ri ayoʼen apü, y rkʼë jbʼaʼ xkaturtoʼ chqä rchë ma kan ta xkayawäj. Rït qachʼalal ri ya kʼo chik ajnaʼ, majun bʼëy tamestaj ta chë Jehová kowan nuloqʼoqʼej jontir ri najin naʼän rchë nayaʼ rqʼij chqä chë kan yït jun ütz ejemplo chwäch ri congregación.