«Tibʼanaʼ jontir [...] rchë ri loqʼoläj rchqʼaʼ Dios nuʼän chiwä chë jnan nuʼän iwäch»

Pablo xuʼij chë yë «ri loqʼoläj rchqʼaʼ Dios» nbʼanö chqë chë jnan nuʼän qawäch. Ye kʼa ryä chqä xuʼij chë nkʼatzin nqaʼän jontir ri kʼo pa qaqʼaʼ rchë jnan nuʼän qawäch. ¿Achkë kʼo chë yebʼanö riʼ? Chqajujnal röj ri cristianos nkʼatzin nqatäj qaqʼij rchë nqaʼän riʼ.

Tqabʼanaʼ che rä chë kʼo jun winäq nuspaj jun achʼichʼ. ¿Achoq pa rqʼaʼ kʼo wä rchë nuchajij rchë ma nchaʼ ta chiʼ? ¿Tapeʼ chë rït kʼo chë yabʼanö riʼ? Si ri chʼichʼ nchaʼ chiʼ rma ma nachajij ta, rït ma ütz ta naqʼabʼaj ya riʼ chrij ri xspan chawä.

Ke riʼ chqä jbʼaʼ nbʼanatäj rkʼë ri jnan rbʼanon qawäch chpan rtinamit Dios. Ya riʼ jun spanïk ryaʼon Jehová chqë, ye kʼa chqajujnal nkʼatzin nqtoʼon rchë ma njeʼ ta chʼaʼoj chqawäch. Rma riʼ, si ma ütz ta qakʼwan qiʼ rkʼë jun qachʼalal, tqaquʼ rij ya reʼ: «¿Najin nbʼän jontir ri kʼo pa nqʼaʼ rchë ri loqʼoläj rchqʼaʼ Dios nuʼän chë jnan nuʼän qawäch? ¿Najin komä ntäj nqʼij rchë nsöl ri chʼaʼoj kʼo chqawäch?».

«TIBʼANAʼ JONTIR RI KʼO PAN IQʼAʼ RCHË [...] JNAN NUʼÄN IWÄCH»

Achiʼel xqatzʼët qa, Pablo xuʼij chë kʼo mul nkʼatzin nqatäj qaqʼij rchë jnan nuʼän qawäch, achiʼel taq nqrsök jun qachʼalal pa congregación. Röj nqajoʼ chë jnan nuʼän qawäch rkʼë ri qachʼalal riʼ. Ye kʼa, ¿kan ronojel komä mul nkʼatzin nqtzjon rkʼë jun qachʼalal ri xqrsök? Manä. Naʼäy nkʼatzin nqaquʼ rij ya reʼ: «Si rïn kan nüm nbʼän che rä ri xbʼan chwä, ¿xkitoʼon rchë jnan xtuʼän qawäch, o xa xtintïk chʼaʼoj chqakojöl?». Kʼo mul, ri más ütz nqaʼän ya riʼ nqamestaj ri xbʼan chqë o nqkyun (Prov. 19:11; Mar. 11:25).

Pablo xyaʼ re naʼoj reʼ: «Rma niwajoʼ iwiʼ, tikochʼolaʼ iwiʼ chiwäch» (Efes. 4:2). Re tzij reʼ rkʼë jbʼaʼ ntel chqä chë tzij «yeʼawajoʼ nkʼaj chik tapeʼ xa bʼa achkë na kinaʼoj» (Comentario para exégesis y traducción. Carta a los Efesios, Mariano Ávila Arteaga). Reʼ ntel chë tzij chë nkʼatzin nqʼax chqawäch chë ri qachʼalal xa kʼo qa mak chkij, achiʼel röj. Kantzij na wä chë jontir nqatäj qaqʼij rchë yejeʼ «ri kʼakʼakʼ taq naʼoj» qkʼë (Efes. 4:23, 24). Ye kʼa majun ta jun chqë röj ri kan tzʼaqät rbʼanik yerkʼüt ri naʼoj riʼ (Rom. 3:23). Si nqʼax ya riʼ chqawäch, ma kwest ta más xtuʼän chqawäch yeqaköchʼ nkʼaj chik chqä nqaküy kimak. Taq nqaʼän riʼ, nqtoʼon rchë ri loqʼoläj rchqʼaʼ Dios nuʼän chqë chë jnan nuʼän qawäch.

Ronojel mul ri nqaküy rmak jun qachʼalal —tapeʼ kʼo mul xa xuʼ pa qan nqaʼän wä riʼ—, kan jaʼäl nqanaʼ rma majun ta chʼaʼoj njeʼ chqawäch. Ri chʼaʼäl griego ri xksäx chpan Efesios 4:3 rchë ri tzij «ma njeʼ ta chʼaʼoj chikojöl», ntel chë tzij «bʼochʼil»; ya riʼ chqä ri tzij kʼo chpan Colosenses 2:19. Jontir röj kʼo qabʼochʼil, y rsamaj qabʼochʼil ya riʼ yertün chqä kuw yerchäp qabʼaqil rchë ma nkijäch ta kiʼ. Ke riʼ chqä nbʼanatäj qkʼë taq yeqajoʼ qachʼalal chqä ma nqaʼän ta chʼaʼoj kikʼë; ya riʼ nqrtoʼ rchë ma xtqajäch ta qiʼ kikʼë tapeʼ kʼo mul kʼo xtkiʼän ri ma xtqä ta chqawäch.

Rma riʼ taq jun qachʼalal nqrsök, kʼo jun nuʼän o nuʼij ri ma nqä ta chqawäch o nutïk qayowal, tqatjaʼ qaqʼij rchë nqʼax chqawäch achkë rma xuʼän riʼ pa rkʼexel xa yë ri ma ütz ta nqaquʼ chrij (Col. 3:12). Rma jontir xa kʼo qa mak chqij, rkʼë jbʼaʼ röj chqä kʼo mul qasokon jun qachʼalal. Ri ma nqamestaj ta ya riʼ xtqrtoʼ rchë xtqtoʼon rchë jnan xtuʼän qawäch.