Nafolow bɛ se ka kɛ i ta ye
1. Munna i ka kan ka miiri tutigɛbaga basigilen baara la?
1 Yala i b’a ɲinina ka dɔ fara i ka wasa ni i ka nisɔndiya kan i ka diɲɛlatigɛ kɔnɔ wa? Yala i bɛ wasa ni nisɔndiya sɔrɔ mɔgɔw dɛmɛni na wa? Yala i b’a fɛ ka dɔ fara i ka kɛta kan Jehowa ka baara la wa? N’i ko ɔwɔ o ɲininkaliw dɔ la kelen na, o tuma na, i bɛ se ka kɛ tutigɛbaga basigilen ye. A jɛlen don ko mɔgɔ ka kan ka miiri nin kow la: denbaya ka doni ani doni wɛrɛ minnu ɲɛfɔlen bɛ Ala ka kuma kɔnɔ, bana ani farikolo bɛ dan minnu sigi mɔgɔ ka baara kɛtaw la.
2. Tutigɛbaga basigilen bɛ nafolo minnu sɔrɔ alako ta fan fɛ, olu dɔw fɔ.
2 Ala ka hakili senu barika la, Solomani y’a jira a ka fɛn sɛbɛnnenw kɔnɔ ko Jehowa ka duba ni fɛntigiya de bɛ taa ɲɔgɔn fɛ. (Nt. 10:22) Bi, Jehowa ka duba bɛ mɔgɔ fɛntigiya kɛrɛnkɛrɛnnenya la alako ta fan fɛ. O nafolo suguw bɛ sɔrɔ ka caya kosɛbɛ tutigɛbaga basigilen bolo. Misali la, dɔ bɛ fara u ka hɛrɛ kan, bawo u bɛ ‘waati kunmabɔ’ olu yɛrɛ ka ko kɛtaw kan walisa k’o di mɔgɔw ma. (Kol. 4:5; Kɛw. 20:35) U bɛ cɛsiri minnu kɛ ni kanuya ye, Jehowa bɛ u kɔlɔsi, wa, u nafa ka bon a bolo kosɛbɛ. Wa, o nafolo sugu minnu bɛ lajɛ sankolo la, dɔ tɛna bɔ olu nafa la abada. (Mat. 6:20; Heb. 6:10) Ka fara o kan, ikomi tutigɛbaga b’u ‘ɲɛkisɛ kɛnɛma’ to, ka u ka dannaya da Jehowa kan fana walisa a ka u magoɲɛfɛnw di u ma, o kow kɛli bɛ olu ni Jehowa cɛsira kologɛlɛya ka taa a fɛ.—Mat. 6:22, 25, 32; Heb. 13:5, 6.
3. Ka tugu nafolomafɛnw kɔ ani ka tugu nafolow kɔ alako ta fan fɛ, danfara jumɛn bɛ o fɛn fila cɛ?
3 Ka tugu nafolomafɛnw kɔ, tuma caman na o bɛ na ni “nege jugu kunntanw” ye. (1 Tim. 6:9, 10; Yak. 5:1-3) Nka Jehowa ka duba tɛ o cogo la abada. Tutigɛbaga basigilenw bɛ u ka waati fanba kɛ cidenyabaara la minkɛ, o bɛ u dɛmɛ u ka to basigi la alako ta fan fɛ, wa, fɛn minnu nafa ka bon kosɛbɛ, olu jɛlen bɛ to u hakili la. (Fil. 1:10) An balimakɛ dɔ tun ye inzeniyɛri ye, wa, a ka baara tun b’a ka waati bɛɛ ta. A y’a ka baara bila walisa ka kɛ tutigɛbaga ye. A ko: “Ne y’a ye ko ne ka baara tun ye ne dusu kasi, wa, ne ni tun lafiya tɛ hali dɔɔnin. Nka tutigɛbagaya tɛ o cogo la. Ne bɛ mɔgɔw dɛmɛ sisan, k’u kalan tiɲɛ ko la. Ka mɔgɔw dɛmɛ u ka sɔn tiɲɛ na, wasa bɛ sɔrɔ o baara la kosɛbɛ, wa, o ka di fana.”
4. Tutigɛbaga basigilenw bɛ hɛrɛ sɔrɔ cogo jumɛn na k’a sɔrɔ olu yɛrɛ bɛ ka hɛrɛ lase tɔw ma?
4 I ka kɛ hɛrɛ ye tɔw bolo: An kelen-kelen bɛɛ bɛ “waati gɛlɛnw” dɔn bi. (2 Tim. 3:1) Yɔrɔ bɛɛ la mɔgɔw bɛ ka jigi sɛmɛyɔrɔ ɲini fo ka sɛgɛn. Ni Masaya weleweledalaw b’a ye ko jigitigɛ tun bɛ ye mɔgɔ minnu ɲɛ kan fɔlɔ, k’olu ka jigitigɛ bɛ se ka yɛlɛma ka kɛ jigi ye tiɲɛ na, bawo u sɔnna kibaru duman na, o ko bɛ weleweledalaw nisɔndiya kosɛbɛ. Tutigɛbaga basigilen minnu bɛ lɛrɛ 800 ni kɔ kɛ san o san mɔgɔ kisili baara la, yala olu ka nisɔndiya man kan ka bonya kosɛbɛ tuguni wa?—1 Tim. 4:16.
5, 6. Mun bɛ se k’a to i ka kɛ tutigɛbaga basigilen ye?
5 Yala i miirila kosɛbɛ walisa ka kɛ tutigɛbaga basigilen ye wa? O bɛ se k’a wajibiya i ka “waati kunmabɔ” fɛnw kan minnu nafa ma bon kosɛbɛ. (Efe. 5:15, 16) Mɔgɔ caman ye o de kɛ. U ye u ka diɲɛlatigɛ nɔgɔya u yɛrɛ bolo. O y’a to u sera ka dɔ bɔ u ka baara kɛwaati la walisa ka waati caman kɛ Masaya kunkankow kosɔn. Yala e bɛ se ka i ka kow labɛn walisa e fana ka fara u kan wa?
6 Hakilitigiya min bɛ bɔ Jehowa yɔrɔ, o ɲini a fɛ walisa i ka se k’i ka waati boloda ka ɲɛ. (Yak. 1:5) N’i ye o kɛ, i bɛ se ka sigi ni dugawu jumɛnw ye? I bɛ se ka sigi ni nafolo caman ye alako ta fan fɛ. Jehowa bɛna duba i ye fana ka i magoɲɛfɛnw di i ma. (Mat. 6:33) Mɔgɔ minnu bɛ Jehowa kɔrɔbɔ o ko la, Jehowa bɛna “duba . . . fo u bɛɛ mara yɔrɔ tɛ sɔrɔ.”—Mal. 3:10.