Nafa minnu bɛ Tutigɛbagaya baara la
1 Balimakɛ tutigɛbaga dɔ y’a fɔ ko: “Ne ye nisɔndiya min sɔrɔ waajulikɛ la, ne b’a dɔn ko baara wɛrɛ tɛ yen min bɛ se ka o nisɔndiya ɲɔgɔn di ne ma.” Balimamuso tutigɛbaga dɔ wɛrɛ ko: “Don o don bɛ ban tuma na, ne dusukun bɛ ɲagali kosɛbɛ, wa ne bɛ sunɔgɔ ka ɲɛ.” Kuma minnu bɛ tutigɛbaga ninnu da, o kuma kelen de bɛ diɲɛ fan bɛɛ kɔnɔ balimakɛw ani balimamusow da, minnu delila ka tutigɛbagaya baara nafa sɔrɔ.—Ntal. 10:22.
2 Ka mɔgɔw dɛmɛ u ka Ala ka kuma sɔrɔ, kisi dɔnniya bɛ min kɔnɔ, o bɛ nisɔndiya sɛbɛ di mɔgɔ ma. (Kɛw. 20:35; 1 Tes. 2:19, 20) Balima kɛ dɔ mɛnna tutigɛbagaya la. A y’a sɛbɛn ko: “Barika min bɛ Ala ka Kuma na ka mɔgɔw bila u ka yɛlɛmaw don u ka ɲɛnamaya la, ni i bɛ to ka o ye, o bɛ i bila ka dɔ fara i ka baara kan, ani i ka limaniya bɛ kɔgɔ ka taa a fɛ.” Tiɲɛ na, k’a to u b’u yɛrɛ bila mɔgɔ dɛmɛ na ani Bibulu kalan na mɔgɔw kun, tutigɛbagaw bɛ nin ɲɔgɔnna nafaw sɔrɔ.
3 K’i jigi da Jehowa kan: Ni tutigɛbagaw bɛ u jigi da Jehowa ka hakili senu kan don o don u ka cidenyabaara kɔnɔ, o b’u dɛmɛ ka “hakili senu mɔw sɛnɛ u yɛrɛ la.” A bɛ kɛ u ma lakana ye. (Gal. 5:16, 22, 23) Ka fara o kan, ka masɔrɔ u bɛ baara kɛ ni Ala ka Kuma ye tuma bɛɛ, u tɛgɛ bɛ diya baara kɛli la ni Bibulu ye walisa ka tiɲɛ dɛmɛ ani ka dusu don mɔgɔ wɛrɛw kɔnɔ. (2 Tim. 2:15) Balimakɛ dɔ ye tutigɛbagaya baara kɛ san tan damadɔ kɔnɔ. A ko: “Tutigɛbagaya baara ye ne dɛmɛ ka Bibulu dɔnniya ba sɔrɔ. Ne ye o dɔnniya kɛ ka mɔgɔ caman dɛmɛ u ka Jehowa dɔn, ka a sagonata dɔn.” E ma a dɔn o bɛ mɔgɔ wasa!
4 Tutigɛbaga basigilenw wajibiyalen don fana k’u jigi da Jehowa kan sira caman na. Ni u b’a ye ko Jehowa bɛ ka u dɛmɛ, u kɛtɔ ka baara kɛ walisa ka u mago ɲɛ, u ka limaniya bɛ kɔgɔ. Balimakɛ tutigɛbaga dɔ si ye san 75 ye. A ye san 55 kɛ tutigɛbagaya la. A y’a fɔ ko: “Jehowa ma ne jigi tigɛ ka ye abada.” Ka fara o kan, ni u bɛ u ka ɲɛnamaya kɛcogo nɔgɔya, tutigɛbagaw b’u yɛrɛ tanga ɲɛnɛmaya jɔɔrɔko caman na. Yala o ko man di i ye wa?—Mat. 6:22; Heb. 13:5, 6.
5 Ka i magɛrɛ Jehowa la: Jɛɲɔgɔnya min bɛ an ni Jehowa cɛ, o ye fɛn nafama ba ye an bolo ka tɛmɛ fɛn tɔw bɛɛ kan. (Zab. 63:3) Ni an bɛ waajuli baara kɛ koɲuman, ka sababu kɛ ko Jehowa ko ka di an ye, an ni a ka jɛɲɔgɔnya bɛ yiriwa ka taa a fɛ. (Yak. 4:8) Balimakɛ dɔ, min ye tutigɛbagaya kɛ san 18 ni kɔ kɔnɔ, o y’a fɔ ko: “Tutigɛbagaya baara bɛ mɔgɔ dɛmɛ ‘k’a nɛnɛ ani k’a ye ko Jehowa ka ɲi.’ A b’an dɛmɛ ka jɛɲɔgɔnya ba sigi an ni an Dabaga cɛ.”—Zab. 34:8
6 Ka fara fɛɛrɛw kan minnu bɛ u bolokɔrɔ, tutigɛbagaw wajibiyalen bɛ ka kɛ maa limaniya ba tigiw ye, u wajibiyalen bɛ ka kɛ Ala fɛ sɛbɛ yɛrɛ la ani ka kɛ u mɔgɔɲɔgɔn fɛ. Yɛrɛ di ŋaniya ka kan ka ye u la. (Mat. 16:24; 17:20; 22:37-39) Wa nisɔndiya min bɛ tutigɛbagaw ɲɛdaw kan diɲɛ fan bɛɛ, o b’a jira ko tutigɛbagaya baara nafaw ka bon ka tɛmɛ o yɛrɛdi sɛgɛn kan. (Mal. 3:10) O Nafaw ninnu tɛ dan tutigɛbagaw kelenw dɔrɔn ma. U ka denbayaw, ani jɛkulu fana bɛ nafa belebeleba sɔrɔ u ka tutigɛbagaya hakili ɲuman jirali la.—Fil. 4:23.
[Study Questions]
1, 2. Nafa jumɛnw sirilen bɛ tutigɛbagaya baara la? Mun na?
3, 4. Cogo jumɛn na tutigɛbagaya baara bɛ mɔgɔ kalan i k’i jigi da Jehowa kan? O bɛ mɔgɔ dɛmɛ cogo di i ka ɲɛtaa sɔrɔ alako ta fan fɛ?
5. Cogo jumɛn na tutigɛbagaya bɛ mɔgɔ dɛmɛ ka magɛrɛ Jehowa la?
6. Jogo jumɛn ka kan ka ye tutigɛbagaw la, ani jɔni wɛrɛ bɛ nafa sɔrɔ o la tutigɛbagaw kɔfɛ?