Sisan de ye waajuli-kɛtuma ye!
1 “A’ ye siran Ala ɲɛ, ka nɔɔrɔ da a kan.” Nin cikan ɲɛmɔgɔya bɛ mɛlɛkɛw de bolo. Cikan bɛ ka fɔ “siyaw bɛɛ ni bɔnsɔnw bɛɛ ni kanw bɛɛ ani mɔgɔ sifa bɛɛ” ye. Mun na? “Katuguni [Ala] ka kiritigɛ lɛrɛ sera.” Bi an bɛ ka ɲɛnamaya kɛ o ‘kiri tigɛ lɛrɛ’ de kɔnɔ, o min bɛna taa ɲɛ fo ka se bi kow sigicogoya in halakili ma. Mɔgɔw ka kan o la sa, ka “sankolo ni dugukolo ni kɔgɔji ni ji boyiw Dabaga bato” bawo u ka ɲɛnamaya bɛ a dafɛ. Baara o baara bɛ ka kɛ bi, a si nafa man bon, a si tɛ kɔrɔtɔko ye ka “ɲɛnamaya banbali kibaruya dumanw” weleweledali bɔ. Ɔwɔ, sisan de ye waajuli-kɛtuma ye!—Jir. 14:6, 7.
2 San tan minnu tɛmɛna, olu kɔnɔna na, Jehowa ka baarakɛlaw ye lɛrɛ miliyari 12 ɲɔgɔnna de kɛ Masaya weleweledali baara la ani ka mɔgɔw kɛ kalandenw ye. Mɔgɔ caman ye yɛlɛmaw don u ka ɲɛnamaya la walisa u ka se ka waati caman kɛ sumantigɛ la alako ta fan fɛ. (Mat. 9:37, 38) Misali la, salon, weleweledala 850 000 ani kɔ kɛra tutigɛbagaw ye kalo o kalo. Ni i ye tutigɛbaga basigilen ye, o kɔrɔ ye ko i bɛ lɛrɛ 70 ɲɔgɔnna de kɛ waajulibaara la kalo o kalo. Ni i ye tutigɛbaga farankan ye, lɛrɛ 50 de waajibiyalen bɛ i kan.
3 Mɔgɔ bɛ kɛ tutigɛbaga ye cogo min na: U b’a dɔn minkɛ ko “waati surunyara,” tutigɛbagaw b’u jija ka u ka ɲɛnamaya kɛcogo nɔgɔya. (1 Kɔr. 7:29, 31) U bɛ se ka dɔ bɔ u ka musakaw la sira minnu fɛ, u bɛ o siraw de ɲini walisa wari-ɲini-baara kana u ka waati caman ta. Misali la, dɔw yɛlɛmana so fitininw kɔnɔ. Dɔ wɛrɛw mago tɛ bololafɛnw minnu na, u ye olu bɔ u yɛrɛ bolo. (Mat. 6:19-21) Tuma caman na u wajibiyalen don ka u tɔgɔla diyanyebaaraw dɔgɔya. Nin bɛɛ kɛkun ye ka lɛrɛ caman labila ani ka u mago don kosɛbɛ cidenyabaara la. (Efɛ. 5:15, 16) Weleweledala caman y’u timinandiya, ka jɛn-yɛrɛ-kɔ hakilila ta, ani ka u jigi da Jehowa kan deliliw kɔnɔ. O kosɔn u sera ka waati boloda ka ɲɛ min y’a to u sera ka kɛ tutigɛbagaw ye.
4 Yala aw bɛ se ka kɛ tutigɛbagaw ye wa? Mun na aw tɛ tutigɛbagaw ɲininka minnu ye ɲɛtaa sɔrɔ, walisa u k’a ɲɛfɔ aw ye u sera ka kɛ tutigɛbagaw ye cogo min na? Aw ka baara kɛ ni u ye forobaara la, walisa aw ka u ka nisɔndiya fana sɔrɔ. An ka sɛbɛnw kɔnɔ, barokun minnu bɛ kuma tutigɛbagaya kan, aw ka olu lajɛ. Aw ka kuntilenna jɔnjɔnw sigi aw yɛrɛ ye minnu bɛ se ka aw dɛmɛ ka kɛ tutigɛbagaw ye. Ni kow bɛ yen bi, minnu b’aw bali ka kɛ tutigɛbagaw ye, aw ka o kow fɔ Jehowa ye delili kɔnɔ, k’a ɲini a fɛ a ka aw dɛmɛ ka o ɲɛnabɔ.—Nta. 16:3.
5 Dugawuw ani nisɔndiyaw minnu b’a kɔnɔ: Se min bɛ an ye ka baara kɛ ni Ala ka Kuma ye, tutigɛbagaya bɛ dɔ fara o kan. O fana bɛ dɔ fara an ka nisɔndiya kan. Balimamuso tutigɛbaga denmisɛn dɔ y’a fɔ ko: “Ka se ka Ala ka tiɲɛ Kuma jɛnsɛn ni tilennenya ye o nafa ka bon kosɛbɛ.” “Ni i bɛ tutigɛbagaya baara la, i bɛ baara kɛ ka caya ni Bibulu ye. Sisan, ni ne bɛ da-ni-da waajuli la, ne bɛ se ka Bibulu tɛmɛsiraw miiri, minnu bɛ bɛn sokɔnɔmɔgɔ kelen-kelen bɛɛ ma.”—2 Tim. 2:15
6 Ni an bɛ tutigɛbagaya baara kɛ, o fana bɛ an kalan ɲɛnamaya sekow ani dɔnkow caman na. A bɛ se ka denmisɛnw dɛmɛ u ka se waati minɛcogo ɲuman na, wari minɛcogo ɲuman, ani mɔgɔw minɛcogo ɲuman. Mɔgɔ caman ye tutigɛbagaya baara kɛ minkɛ, u sera ka u ka ɲɛnamaya kɛcogo bɛn ni alako kuntilenna ye. (Efɛ. 4:13) Ka fara o kan, mɔgɔ minnu bɛ a ye ko Jehowa bolo bɛ ka u dɛmɛ ka tɛmɛ tɔw bɛɛ kan tuma caman na o ye tutigɛbagaw de ye.—Kɛw. 11:21; Fil. 4:11-13.
7 Laala dugawu bɛɛ la belebeleba min bɛ sɔrɔ tutigɛbagaya la, o ye ko a bɛ an magɛrɛ Jehowa la. O bɛ se ka kɛ an dɛmɛlan ye gɛlɛyaw waati la. Balimamuso dɔ ye gɛlɛyaba sɔrɔ waati dɔ kɔnɔ. A y’a fɔ ko: “Ne gɛrɛla kosɛbɛ Jehowa la ka ne to tutigɛbagaya la minkɛ, o ye ne dɛmɛ ka a gɛlɛyaw bɛɛ kun.” A y’a fɔ fana ko: “Ne nisɔndiyalen don, ko ne ye ne ka balikuya bɛɛ kɛ waati-dafalen baara la Jehowa ye. O y’a to ne sera ka ne yɛrɛ bila ka taama siraw kan, ne tun ma deli k’a miiri ko ne tun bɛ se ka taama minnu kan.” (Kɛw. 20:35) An fana ka dugawu caman sɔrɔ o cogoya la, an kɛtɔ ka an seko bɛɛ kɛ waajulibaara la, o min nafa ka bon ɲɛnamaya ta fan fɛ.—Nta. 10:22.
[Study Questions]
1. Mun na sisan de ye waajuli-kɛtuma ye?
2. Jehowa ka baarakɛlaw bɛ k’a jira cogo di k’u b’a dɔn ko waati koronnen dɔn?
3. Tuma caman na weleweledalaw ka kan ka yɛlɛma jumɛnw don u ka kow la ni u b’a fɛ ka kɛ tutigɛbagaw ye?
4. An bɛ se ka ko jɔnjɔn jumɛnw kɛ ni olu bɛ se ka an dɛmɛ ka an labɛn tutigɛbagaya baara kama?
5. Tutigɛbagaya b’an dɛmɛ ka dɔ fara an ka sekow ani dɔnkow kan cogo di an ka cidenyabaara kɔnɔ?
6. Tutigɛbagaya baara bɛ mɔgɔ dege mun na?
7. Tutigɛbagaya baara bɛ an dɛmɛ cogo di an ka an magɛrɛ Jehowa la?